12
مريم دا تفرّاغ زّهر خف ئضارن ن سيدنا عيسى
(ماتّى 26:6-13؛ مارقوس 14:3-9)
1 داي دات ن لعيد ن-ؤزرّويa س ستّا د-ؤسّان، ئدّادّ سيدنا عيسى غر ئغرم ن بيت عنيا، نّا ݣ-ئزدغ لعازر، أرݣاز-اد ئكّا سيدنا عيسى ئسكّرتيد زݣ ئنݣر ن ئمتّين.
2 أها ݣاناس ئمنسي، داي أر غيفسن تزيلّز مرثا، ئد لعازر ئݣا يون زݣ وينّا ئلّان د سيدنا عيسى غر لميدا.
3 داي تاسي مريم نّص ن ليترو ن زّهر ن نّاردين b لحورّ، ئغلان شايݣان، تفرّغت خف ئضارن ن سيدنا عيسى أها تصفضاستن س-ؤشكوك نّس. داي كضون ميدّن كول نّا ئلّان ݣ تادّارت رّيحت ن زّهر.
4 داي ئكّر يهوذا ئسخريوطي نّا ئݣان يون زݣ ئمحضرن ن سيدنا عيسى، ونّا ئدّان أت ت-ئزّنز، أر ئتّيني:
5 «مّاخ ألّيݣ ؤر ئنزي زّهر-اد س تلتميا ؤقاريض ن نّقرت أها ئتمْوْش واتيݣ نّس ئ يمژلاض؟»
6 ئنّا أياد ؤر-ئد ئدّخ دا ئتّاسي أنزݣومc ئ يمژلاض، ماشان ئدّخ ئݣا أخوّان، ئݣ أنبّاض خف صّندوقّ ن لفلوس، أها أر ئتّاكر زݣ ؤينّا ديكس سروسان ميدّن.
7 والاينّي سيدنا عيسى ئنّاياسن: «أدجّات! هاتين ئ واسّ ن تنضلا نو أمي تفّر زّهر-اد.
8 ئد ئمژلاض دا تّيلين أݣّيدون كوتوال، ماشان نكّ ؤر دّيخ أد-اݣّيدون ئليخ كوتوال».
ئخاتارن ن تادّارت ن ربّي ران أد نغين لعازر
9 داي ياوضن ؤنغميس شايݣان ن ووداين ئس ئلّا سيدنا عيسى ݣ-ئغرم ن بيت عنيا، أها دّاند ؤر-ئد خف سيدنا عيسى هيلّي، ماشان حما أد أنّاين ألّو لعازر نّا ئكّا سيدنا عيسى ئسكّرت زݣ ئنݣر ن-ئمتّين.
10 داي مساسان ئخاتارن ن تادّارت ن ربّي حما أد نغين أود لعازر،
11 علاحقّ شايݣان ن ووداين رولن زّيكسن خف ؤينّا ئجران ئ لعازر أها أمن س سيدنا عيسى.
أكتّشوم ن سيدنا عيسى غر تمدينت ن لقدس
(ماتّى 21:1-11؛ مارقوس 11:1-11؛ لوقا 19:28-40)
12 س-اسكّا نّس، سلّان شايݣان ن لغاشي نّا د-ئدّان غر لعيد ن-ؤراخصيس، ئس ئدّا سيدنا عيسى أد دّيدّو غر تمدينت ن لقدس.
13 داي أسين ئسضوان ن تزدايين فّغن أت نّالن، أر سغويّون: «أوصانّا!d أنبارش أيد ئݣا ونّا ديدّان س-ئسم ن مولانا! أنبارش أيد ئݣا ؤݣلّيد ن-إسرائيل!»
14 داي ياف سيدنا عيسى يون ن-ؤشنيض، ئني غيفس، أم ؤينّا ئتّوارين ݣ لشتاب ن ربّي:
15 «أد ؤر تݣّدات أييمزداغ ن تمدينت ن لقدس! e
هان أݣلّيد نّم دا ئدّادّ
ئني خف ؤشنيض».
16 ݣ لوقت-اد، ؤر فهيمن ئمحضرن ن سيدنا عيسى لمعنا ن-وينّا ئجران. ماشان فّير ن مايد ئتّوسيلي سيدنا عيسى أد يامژ لعزّ نّس، شتين ئمحضرن ئد أينّاس ݣان ميدّن ئلّا ئتّوارين ݣ لشتاب ن ربّي.
17 كول وينّا ئلّان أݣّيدس لّيݣ ئكّا دّيغرا ئ لعازر أد ئفّغ زݣ تنضلت أها ئكّا ئسكّرتيد زݣ ئنݣر ن-ئمتّين، أر تشاهادن س ؤينّا ئجران.
18 أياد أخف ديدّا لغاشي-اد أت ئنّال (ݣ لوقت ن لعيد)، ئدّخ ئسلّا ئ تماتارت-اد نّا ئݣا سيدنا عيسى.
19 داي ميونّان ئفرّيسيّين ئنݣراتسن: «سموقلات! هاتين ؤردا تغيم أد تݣيم والو! هان ميدّن كول دا ت تفارن».
سيدنا عيسى دا ئسّاوال خف لموت نّس د تنكرا نّس
20 داي لّان داد ئتس ن ميدّن نّا ؤر ئݣين ؤداين.f دّاند باش أد عبدن ربّي ݣ تمدينت ن لقدس ݣ-ؤسّان ن لعيد ن-وراخصيس ن ووداين.
21 أها دّون غر فيلبّس أجاليلي نّا ئݣان زݣ تمدينت ن بيت صيدا، نّاناس: «عافاش أسيدي، هاتين نرا أد نانّاي عيسى».
22 داي ئدّو فيلبّس يينيت ئ أندراوس، أها دّون سّين نسن باش أتينين ئ سيدنا عيسى.
23 ئواجبتن سيدنا عيسى، ئنّاياسن: «هاتين تيوض تاسّاعت نّاݣ ئدّا أد ئتّوسيلي ممّيس ن بنادم باش أد يامژ لعزّ.
24 يّيه، ستيتّ أيد-أون تّينيخ: هات مش ؤر-يتّوݣر ؤعقّا ن-ييردن ݣ-اشال أها مش ؤر-ئمّوت، هاتين ئدّا أد-ئقّيم ئويل نس، ماشان مش ئمّوت ئدّا أد يارو شايݣان ن لغلت.
25 هان ونّا ئتّيرين تودرت نّس، أت ت-ئزل، ماشان ونّا ت-ئشرّهن ݣ دّونيت-اد، أت تيخزن ئ تودرت ن وابدا.
26 ونّا ئران أد ئݣ أمزيلّز ئنو، ئلازم أد ئ ئتفار، د-ؤمزيلّز ئنو ئدّا أد ييلي ماني ݣ دا تّيليخ. د ئبّا ئدّا أد-ئسبورز كول وينّا غيفي ئزيلّيزن.
27 هان لخاضر ئنو ئشوّش، مايد دّيخ أت تينيخ دغي؟ ئد أد-ئنيخ: "أيبّا فوكّايي زݣ (تمارا ن) تاسّاعتّ-اد؟" والاينّي خف تاسّاعتّا أخف ددّيخ.
28 أيبّا، سباين لعزّ نّش». أها ئتّوسلّا يون ن واوال زݣ-يݣنّا: «هاتين سباينخ ياد لعزّ ئنو أها دّيخ أت تسباينخ ديخ ألّو!»
29 داي ئسلّا لغاشي نّا ئبدّ ديهيس ئ واوال-اد، أها ئنّا: «شا ن تاجنوت أياد!» ئد ئتس ياضن نّان: «شا ن لمالاك ن ربّي أيداس ئسّيولن!»
30 والاينّي سيدنا عيسى ئنّاياسن: «هاتين ؤر ئد نكّين أي مي ديدّا واوال-اد، ماشان كونّي أي مي ديدّا.
31 دغي، تدّادّ لوقت نّاݣ ئدّا ربّي أد ئحكم خف ميدّن ن دّونيت-اد. د-ؤخاتار ن دّونيت-اد نّا ئݣان شّيطان أد ئتّواژّع غر برّا.
32 د نكّين، أدّاي تّوهزّاخ زݣ نّيݣ ن واشال، دّيخ أد-اويخ ميدّن كول غوري».
33 سيدنا عيسى ئنّا أياد باش أد-ئسنعت ئ ميدّن ميمشي ئدّا أد-ئمّت.
34 داي ئنّاياس لغاشي: «نوكني نسلّا ئ وينّا ئلّان ݣ شّرع، ئس ئدّا لمسيح أد ييدير أبدا، ئوا ماكّاس ألّيݣ تّينيد شݣّ ئلازم ئ ممّيس ن بنادم أد ئتّوسيلي؟ مايد ئمس ممّيس-اد ن بنادم؟»
35 أها ئنّاياسن سيدنا عيسى: «ئسول أد-أݣّيدون ييلي واسيدّ غاس يوت ن لوقت ئدروسن، غاس تدّويات ماحد ئسول غورون ؤسيدّ، حما ؤر غيفون تاتّوي تالّست. هان ونّا ئتدّون ݣ تالّست ؤر دا ئتّيسين ماني غر ئتدّو.
36 ماحد ئسول غورون ؤسيدّ، أمنات ئس، باش أت تݣيم أراو ن-ؤسيدّ».
ؤداين ؤر رين أد امنن س سيدنا عيسى
داي لّيݣ أسن ئسيول سيدنا عيسى، ئدّو ئنتل زّيكسن.
37 داي مغار ئݣا داتاسن تيميتار-اد كول، ؤر-ئسّ ؤمين،
38 باش أد-ئجرو ؤينّا ئنّا نّبي ئشعيا:
«أمولانا، مايد يومن س واوال نّخ؟
ئ ماي مي ئسنعت مولانا لجهد نّس؟»
39 ئنّا نّبي ئشعيا ديخ ألتو مّاخ ألّيݣ ؤر غيين ميدّن-اد أد-امن:
40 «هاتين ئقناسن ربّي ألّن
أها ئسغر ؤلاون نّسن،
حما ؤر تّانّاين س والّن نّسن،
ؤلا فران س وولاون نّسن،
هاتين أياد أخف دا ئتّيني ربّي، ؤر د تّاغولن غوري
أت تن جّوجيخ».
41 ئنّا نّبي ئشعيا أياد، ئدّخ يانّاي لعزّ ن سيدنا عيسى. أها ئسيول غيفس. g
42 والاينّي، عدّان أود ئخاتارن ن ووداين نّا يومن س سيدنا عيسى، ماشان ئدّخ ݣّدن زݣ ئفرّيسيّين ؤر-ئسّ قرّان دات ن ميدّن، حما ؤر تن تژعن زݣ تمزݣيدا ن ووداين.
43 ئدّخ ران لعزّ نّا د-ئتدّون زݣ ميدّن ؤݣار ن لعزّ نّا د-ئتدّون زݣ ربّي.
44 داي ئكّر سيدنا عيسى ئبرّح، أها ئنا: «ونّا يومن ئسّي، ؤر ئد غاس ئسّي أس دا ئتّامن، ماشان دا ئتّامن ألّو س ربّي نّا ئ دّيوزن.
45 د ونّا ئ يتّانّاين، دا ئتّانّاي ألّو ونّا ئ دّيوزن.
46 نكّين نّا ئݣان أسيدّ، دّيخدّ غر دّونيت، حما ونّا ئتّامن ئسّي ؤر ئتّغيما ݣ تالّست.
47 مشدا ئتسلّا شا ن يون ئ واوال ئنو أها ؤر دا ئسّ ئتݣ، هاتين ؤر-ئد نك أيدا غيفس ئحكمن، ئدّخ ؤر ددّيخ غر دّونيت حما أد حكمخ خف ميدّن، ماشان أد فوكّاخ ميدّن ن دّونيت.
48 د ونّا ؤر ئ ئرين ؤلا ئݣا س واوال ئنو، هاتين ئلّا مايد ئدّان أد غيفس ئحكم، د واوال نّا س سيولخ، نتّا أيد ئدّان أد غيفس ئحكمن ݣ واسّ أنݣّارو.
49 ئدّخ ؤر سيولخ زݣ ئخف ئنو، ماشان ئبّا نّا ئ دّيوزن، نتّا أيد ئ ئنّان مايد ئخصّا أت تينيخ د مايد ئخصّا أت تسلمدخ.
50 د نكّ سّنخ ئد لوصييت نّس دا ت تّاوي غر تودرت ن وابدا، خف ؤياد كول أينّا تّينيخ، دا تّينيخ أمّ ؤينّا ئ ئنّا ئبّا».