13
تاردا ن-ئضارن ن-ئمحضرن نّس
1 لّيݣ ئسول يون واسّ ئ لعيد ن-ؤزرّويa ن ووداين، ݣ لوقت-اد، ئسّن سيدنا عيسى ئس تيوض تاسّاعت نّس، حما أد ئموتّي زݣ دّونيت-اد غر ئبّاس. ئكّا أر ئتّيري دّيما وينّا ئسّ يومن ݣ أر ئتݣّا لخدمت نّس ݣ دّونيت، أود دغي دا تن ئتّيري أر لحدّ.
2 داي لّيݣ أر ئتّمنسيوْ سيدنا عيسى د-ئمحضرن نّس، ئغرّا شّيطان ياد يهوذا، ممّيس ن سمعان ئسخريوطي أد ئزّنز سيدنا عيسى.
3 ئدّخ سيدنا عيسى ئسن ئس-أس ئݣا ربّي مايد-ئݣان شا دّاو ن تنباطّ نّس، ئسّن ألّو ئس دّيدّا زݣ ربّي أها ئدّا أد ياغول غر ربّي،
4 أياد أخف ئكّر زݣ ئمنسي، ئكّس ئعبان نّس ئنافلّاتن، ياسي يون زّيف ن لشتّان أها ئفكّس ئسّ.
5 فّير ن-ؤينّا، ئكّر ئفرّغ أمان ݣ يون ن طّاس، ئسفالّ أر ئسّيريد ئضارن ئ ئمحضرن، أر-اسن تن ئسّفّض س لشتّان نّا س-ئفكّس.
6 ياوض غر سمعان بطرس، نّا س-ئنّان: «ئد شݣين أسيدي، تريد أد ئ تسّيرت ئضارن؟»
7 داي ئرار غيفس سيدنا عيسى، ئنّاياس: «شݣّين دغي، ؤر تسّيند أينّا تݣّاخ نكّين، ماشان تدّيد أت تفروت شا واسّ».
8 داي ئنّاياس بطرس: «ئهي أسيدي، ؤر ئ تسّيريت ئضارن تارضاراس». داي ئنّاياس سيدنا عيسى: «مش ؤر-اش سّيردخ ئضارن، ؤر-اخ ئزدي والو».
9 داي ئنّاياس سمعان بطرس: «واخّا أسيدي، أد-ؤر-ئ سّيريد غاس ئضارن هيلّي، ماشان سّيردييي أود ئفاسّن د-ئخف».
10 ئنّاياس سيدنا عيسى: «هان ونّا ئعومن ؤر ئحدادجا أد ئسّيرد، ئخصّاياس أد ئسّيرد غاس ئضارن، ئدّخ ئزدّيݣ كول نّس. كونّي تزدّيݣم، ماشان ؤر ئد كول نّون».
11 سيدنا عيسى ئسّن مايد ئدّان أت ت-ئزّنز، خف ؤياد أخف ئنّا: «كونّي تزدّيݣم، ماشان ؤر ئد كول نّون».
12 داي لّيݣ أسن ئسّيرد ئضارن، ئلسا ئعبان نّس، ياغول س-أنسا نّس، أها ئنّاياسن: «ئس دا توفرّوم أينّاون ݣيخ؟
13 ها كونّي دا ئ تقّارم: ألموعلّيم نغد سيدي. غورون لحقّ، ئدّخ تݣيخ.
14 ئوا مش ݣيخ نكّ سيدي نّون د لموعلّيم نّون أها سّيردخاون ئضارن، ئلازم أود كونّي أت تمسيريدم ئضارن ئنݣراتون.
15 هاتين سنعتخ-اون ميمشي ئخصّا أت تݣيم، حما أود كنّي أت تݣيم أم ؤينّاون ݣيخ نكّين.
16 يّيه، ستيتّ أيد-أون تّينيخ: ؤر ئلّي شا ؤسمغ يوݣرن باب نّس، نغد شا ؤمازان يوݣرن ونّا ت-يد يوزنن.
17 دغي، مش دا تّيسينم ئسكّين-اد، أياعريت نّون مش دا تّݣّام أياد.
18 ؤر دا غيفون ساوالخ كول نّون، سّنخ وينّا ستيخ، ماشان ئخصّا أد ئجرو ؤينّا ئلّان ݣ لشتاب ن ربّي: ونّا د مي شّورخ أغروم ئنو، ياغول ئݣا أعداو ئنو.
19 دغي، ها نكّ داون تّينيخ أياد قبل أد ئجرو، حما أدّاي ئجرو، أت تامنم ئد "نكّ أيد-يݣان". b
20 يّيه، ستيتّ أيدا أون تّينيخ: ونّا ئرحبن س ونّا تّازنخ، دا ئسّي ئتّرحاب، د ونّا ئسّي ئرحبن، دا ئتّرحاب س ونّا ئ د يوزن».
سيدنا عيسى دا ئتّكاشاف ئسّ ئدّا يهوذا أت ت-ئزّنز
(ماتّى 26:20-25؛ مارقوس 14:17-21؛ لوقا 22:21-23)
21 داي لّيݣ ئنّا سيدنا عيسى أياد، ئشوّش لخاضر نّس أها ئنّا س طايطاي: «يّيه، ستيتّ أيد-أون تّينيخ: هان يون زّيݣون ئدّا أد ئ ئزّنز!»
22 داي قّيمن ئمحضرن أر تّمراعان ئنݣراتسن أها ؤر سّين مان ديكسن أخف ئسيول.
23 ييلي يون زݣ ئمحضرن نّس، ونّا ئعزّين غر عيسى، ئقّيما تاما نّس.
24 داي ئشيّراس سمعان بطرس باش أد-ئسقسا سيدنا عيسى مان ديكسن أخف دا ئساوال.
25 داي ئحودر ؤمحضر نّا غر سيدنا عيسى، ئنّاياس: «عافاش أسيدي، مايد-ئمس واد أخف دا تساوالد؟»
26 داي ئنّاياس سيدنا عيسى: «ونّا مي دّيخ أد بّزخ توفّيژت ن-ؤغروم أها وشخاست». ئكّر ئبّز توفّيژت ن-ؤغروم، ئوشيت ئ يهوذا، ممّيس ن سمعان ئسخريوطي.
27 غاس يومژ توفّيژت، ئكشمت شّيطان. داي ئنّاياس سيدنا عيسى: «أينّا تدّيد أتݣد، ݣّيت فيساع».
28 زݣ ئمحضرن كول نّا ئلّان داد، أود يون ؤر ئسّين ماخ ألّيݣ أس ئنّا سيدنا عيسى أياد.
29 ماشان ئتس ن-ئمحضرن غالن، ئس-أس ئنّا سيدنا عيسى أد ئسغ أينّا ئخصّان ئ لعيد نغد أد ئوش صّاداقا ئ يمژلاض، ئدّخ صّندوق ن لفلوس ئلّا غر يهوذا.
30 داي نتّا ئتشا يهوذا توفّيژت ن-ؤغروم، ئفّغ دغيا. ئݣ لحال ئض.
لوصييت توجديت
31 نتّا ئفّغ يهوذا، ئنّاياسن سيدنا عيسى: «دغي، ئضهرد لعزّ ن ممّيس ن بنادم، د لعزّ ن ربّي ئضهرد ݣ ممّيس ن بنادم.
32 [داي مش ئضهر لعزّ ن ربّي ݣ ممّيس ن بنادم،] ئقنّ ربّي أد-ئسضهر لعزّ نّس ݣ ممّيس ن بنادم أها ئݣاس لعزّ دغيا.
33 أياراو ئنو، ها نكّ سولخ أد-أݣّيدون ئليخ غاس شا ن لوقت ئدروسن، داي ئقّنكنين أد ئ ترزوم، داي أكيس نّيخ ئ ووداين، دغي أداون ت-ينيخ كونّي ديخ ألتو: ؤر تّيغييم كونّي أت تدّوم ماني غر تدّوخ.
34 أكون وصّاخ يوت ن لوصييت توجديت: مييريات ئنݣراون. ئمشينّا دا كون تّيريخ نكّ، ئلازم أت تمييريم ئنݣراون أود كونّي.
35 دّان ميدّن كول أد-ئسين ئس تݣام ئمحضرن ئنو، مش دا تّمييريم ئنݣراون».
سيدنا عيسى دا ئتّكاشاف ئس ئدّا بطرس أت تينكر
(ماتّى 26:31-35؛ مارقوس 14:27-31؛ لوقا 22:31-34)
36 داي ئسقسات سمعان بطرس، ئنّاياس: «أسيدي، ماني غر تدّوت؟» ئنّاياس سيدنا عيسى: «هاتين ؤر تّيغييت أد ئ تتفارد دغي غر ماني غر تدّوخ، ماشان تدّيد أد ئ تتفارد يون ن واسّ».
37 أها ئنّاياس بطرس: «أسيدي، مّاخ ألّيݣ ؤر تّيغييخ أك تفارخ دغي؟ هاتين وجدخ أد مّتخ غيفش!»
38 داي ئنّاياس سيدنا عيسى: «ئد ستيتّ توجت أت تمّت غيفي؟ يّيه، ستيتّ أيداش تّينيخ: ؤر ئسكوكّوع ؤفولّوس غاس ألّ ئ تنكرد شراطّ ن لمرّات».