14
سيدنا عيسى نتا ئݣا أبريد د لحقّ د تودرت
1 (داي فّير ن-ؤينّا، ئنّا سيدنا عيسى ئ ئمحضرن نّس:) «أد ؤر ئتشوّاش لخاطر نّون، غاس أمّنات س ربّي، أها أمّنات ئسّي أود نكّ.
2 هاتين لّان ݣ-ئغرم ن-ئبّا شايݣان ن تيدّار. مور ئد-ئس ؤر-ئݣي ؤياد ستيت، ؤر داون تّنيخ: هايي دّيخ أد-اون حبّلخ ئ يون ن وانسا.
3 داي أدّاي دّوخ أها حبّلخاون ئ وانسا، أد-اغولخ أها أويخكون غوري، باش أت تيليم أود كونّي ماني ݣ لّيخ.
4 تسّنم أبريد ن وانسا نّا غر دّيخ أد دّوخ».
5 داي ئنّاياس توما: «أسيدي، هاتين ؤر نسّين ماني غر تدّيد أت تدّود، ئوا ميمشي نتّݣ أد نيسين أبريد؟»
6 أها ئنّاياس سيدنا عيسى: «نكّ أبريد، لحقّ د تودرت. أود يون ؤر ئتّيغي أد د-ئدّو غر ئبّا بلا ئسّي.
7 مور دا ئ تّيسينم، أت تيسينم أود ئبّا، زݣ دغي دا ت تّيسينم، أها تانّايمت».
8 داي ئنّاياس فيلبس: «أسيدي، سنعتاخ ربّي ئبّاش أت نانّاي، باراكا غيفنخ».
9 أها ئنّاياس سيدنا عيسى: «زݣ واهلي أيد أݣّيدون لّيخ أها تسولت ؤر ئ تسّيند أفيلبس! ونّا ئ يانّاين هات يانّاي بّانو، ئوا مّاخ ألّيݣ دا ئ تّينيد شݣّين سنعتاخ ربّي ئبّاش؟
10 ئس ؤر دا تّامند ئس لّيخ نكّين ݣ-ئبّا د-ئبّا ئلّا ديݣي؟ د واوال نّا س-اون سّاوالخ ؤر دا ئسّ ساوالخ زݣ ئخف ئنو، ماشان ئبّا نّا ئلّان ديݣي أيد-ئتݣّين لخدامي نّس.
11 أمّناتييي أدّاي-اون ئنيخ: نكّين لّيخ ݣ-ئبّا د-ئبّا ئلّا ديݣي، نغد أمّنات غاس خف لخدامي-اد نّا ݣيخ.
12 يّيه، ستيتّ أيدا أون تّينيخ: ونّا ئسّي ئتّامن هاتين أد-ئݣّ أود نتّا لخدامي نّا تݣّاخ نكّين، أها ئݣ وينّا تن يوݣرن، ئدّخ دّيخ أد دّوخ غر ئبّا.
13 د-ؤينّا تتّرم كول س-ئسم ئنو، أت تݣخ، باش أد-ئسضهر ممّيس ن ربّي لعزّ ن ئبّاس.
14 هايي دا-ون تّينيخ ألّو: مش تتّرم شا س-ئسم ئنو أت تݣخ».
سيدنا عيسى دا ئتقاول رّوح ن ربّي ئ وينا ئس يومن
15 «مش دا ئ تّيريم، أت تضاعم لوصيات ئنو.
16 ئد نكين دّيخ أت تّرخ ئ ئبّا أداون ئوش يون ؤمعيون ياضن أد ئقّيم أݣّيدون أبدا،
17 رّوح ن لحقّ، نّا ؤر تّيغيين ميدّن ن دّونيت أد-ئسّ رحبن، ئدّخ ؤر دا ت تّانّاي ؤلا سّنت. ئد كونّي تسّنمت، ئدّخ دا ئتغيما أݣّيدون أها ئدّا أد ييلي ديݣون.
18 ؤر دّيخ أكون زريخ أت تقّيميم ئويل نّون أم ئويجيلن، ماشان دّيخ أد دّاغولخ غورون.
19 ݣ شا ن لوقت ئدروسن، أها ؤسار ئ تّانّاين ميدّن ن دّونيت، ئد كونّي تدّام أد ئ تانّايم. ئدّخ دّرخ، تدّام أت تيديرم أود كونّي.
20 أدّاي دياوض واسّ نّا، تدّام أت تيسينم ئس لّيخ ݣ-ئبّا، د كونّي تلّام ديݣي، د نكّين لّيخ ديݣون.
21 ونّا ئتّامژن ݣ لوصييات ئنو أها أر-ئسّن ئتݣّا، ونّا دا ئ ئتّيري. د ونّا ئ ئتّيرين أت ت ييتّيري ئبّا، أت تيريخ أود نكّين أها سنعتخاس ئخف ئنو».
22 داي ئنّاياس يهوذا، ؤر ئد يهوذا ئسخريوطي: «أسيدي، ماخ ألّيݣ نكّني أمي تريد أت تسنعت ئخف نّش أها ؤر ئد ئ ميدّن ن دّونيت؟»
23 أها ئرار غيفس سيدنا عيسى، ئنّاياس: «مش دا ئ ئتّيري شا ن يون، أد ئضاع أوال ئنو. ئدّا أت تييري ئبّا، ندّا أد ندّو غورس نكّين د-ئبّا أها نزدغ أݣّيدس.
24 د ونّا ؤر دا ئ ئتّيرين ؤر دا ئتضاع أوال ئنو. د واوال نّا مي تسّغادم ؤر ئݣي وينو، ماشان وين ئبّا نّا ئ دّيوزن.
25 هاتين نّيخاون ئسكّين-اد كّود سولخ أݣّيدون.
26 ماشان أمعيون، ئݣان رّوح ن ربّي نّا نّيقّن أت تيازن ئبّا س-ئسم ئنو، نتّا أيد ئدّان أداون ئسّلمد مايد ئݣان شا، ئسّكتياون أينّاون نّيخ كول.
27 لهنا أيداون تّادجّاخ د لهنا نو أيداون أكّاخ، ؤر ئد أم ؤينّاون تاكّا دّونيت أيداون أكّاخ نكّينتين. أد-ؤر ئتشوّاش لخاضر نّون، ؤلا تݣّدم.
28 تسلّيمي، نّيخاون: "دا تدّوخ، والاينّي دّيخ أد-اغولخ غورون". مش دا ئ تّيريم ستيت، ئوا تدّام أت تفرحم أت تيسينم ئس دا تدّوخ غر ئبّا، ئدّخ ئبّا يوݣرييي.
29 هان نكّ نّيخاونت دغي دات ن مايد ئتّجرو، حما أدّاي ئجرو أت تامنم.
30 ؤسار دّيخ أد سيولخ شايݣان أݣّيدون، ئدّخ ئدّا ؤخاتار ن دّونيت-اد نّا ئݣان شّيطان ئدّا أد ديدّو، أها ؤر غورس تلّي أود يوت ن تنباطّ غيفي،
31 ماشا ئخصّا أد-ئسين ميدّن ن دّونييت ئس دا تّيريخ ئبّا، أها أر تݣّاخ أينّا س ئ يومّر كول. ئوا كّرات، فّغاتاخ زݣ وانساياد!»