15
سيدنا عيسى نتا ئݣا دّيليت تارصليت
1 «نكّ دّيليت تارصليت أها ئݣ ئبّا أفلّاح ن دّيليت.
2 دا ئتكّس تيسطوين نّا ديݣي ئلّان أها ؤر دا تݣين لغلتa، أر-ئتژبار أها أر ئسزديݣ تيس ئتݣّين لغلت باش أد ݣين ؤݣار.
3 كونّي، تزدّيݣم ياد س واوال نّاون نّيخ.
4 أمژات ديݣي، د نكّين دّيخ أد-أمژخ ديݣون. تاسطّا ؤر تّيغي أد تݣ لغلت زݣ ئخف نّس، مش ؤر توميژ ݣ دّيليت، هات مش ؤر توميژم ديݣي أود كونّي ؤر تّيغيم أت تݣيم لغلت.
5 نكّ دّيليت د كونّي تݣام تيسطوين: ونّا ديݣي يومژن أها أمژخ ديكس واد أد ئݣ شايݣان ن لغلّات، ئدّخ بلا نكّين ؤر تّيغييم أت تݣيم والو.
6 ئد ونّا ؤر يوميژن ديݣي ئدّا أد ئتّوݣر غر برّا أم تسطّا أها ئقّار. د تسطوين نّا ئقّورن، تّوسمون، تّوݣرن ݣ لعافيت أها أر تغوسن.
7 ماشان مش ديݣي تومژم أها يامژ واوال ئنو ديݣون، تّرات أينّا ترام أها ئتّموْشاون.
8 مش تݣام شيݣان ن لغلّات أها س-ؤياد دا تسباينم ئس تݣام ئمحضرن ئنو، ئدّا أد ئضهير لعزّ ن ئبّا.
9 نكّ دا كون تّيريخ ئمشينّا دا ئ ئتّيري ئبّا. ئوا أمژات ݣ تايري نو.
10 هات مش دا تضاعم لوصييات ئنو، تدّام أت تامژم ݣ تايري نو، ئمشينّا ضاعخ لوصييات ن-ئبّا أها أر تّامژخ ݣ تايري نّس.
11 نيخ-اون أياد حما أد ييلي ؤفراح ئنو ديݣون، أها ؤر ئتخصّا والو ئ وفراح نّون.
12 هان تاد أيد ئݣان لوصييت ئنو: ئخصّا أت تمييريم ئنݣراون، أكيس كون تّيريخ.
13 ؤر تلّي شا ن تايري يوݣرن تاد، أدّاي ئوش يون تودرت نّس خف ئمدّوكال نّس.
14 ئمدّوكال ئنو أيد تݣام، مش دا تضاعم أينّا س كون توصّاخ.
15 هاتين ؤسار-أون غريخ ئسمغان ئنو، ئدّخ ئسمغ ؤر دا ئتّيسين مايد ئتݣّ باب نّس، ماشان أداون غرخ ئمدّوكال ئنو، ئدّخ أون نّيخ كول أينّا مي سلّيخ زݣ ئبّا.
16 ؤر-ئد كونّي أيدي ئستين، ماشان نكّ أيكون ئستين، كلّفخكون حما أت تدّوم أها تݣيم لغلت، لغلت نّا ئتغيمان أبدا. داي ئدّا ئبّا أداون ئوش كول أينّا تدّام أداس تتّرم س-ئسم ئنو.
17 ئوا هان أينّا خف كون توصّاخ: أت تمييريم ئنݣراون».
ميدّن ؤر حميلن سيدنا عيسى د ئمحضرن نّس
18 «مش ؤر كون حميلن ميدّن ن دّونيت-اد، ئسينات ئس ؤر ئ حميلن داتاون.
19 مور تݣيم زݣ ميدّن دّونيت، أكون ئرين، ئدّخ تݣام زيكسن. والاينّي ؤر تݣيم زݣ ميدّن دّونيت، ئدّخ كون ستيخ زݣ أمّاس نّسن. خف-ؤياد ؤر كون حميلن.
20 شتييات أوال نّاون نّيخ ياد: "هان ئسمغ ؤر يوݣير باب نّس". مش ئ مرّتن ئقنتنين أد كون مرّتن أود كونّي ألتو، داي مش ݣان س واوال ئنو، ئقنتنين أد ݣين ألتو س واوال نّون.
21 ماشان دّان أد ݣين ئسّون أياد كول خف نّيرت ئنو،b ئدّخ ؤر دا تّيسين ونّا ئ دّيوزنن.
22 مور-ئد-ئس ؤر ددّيخ أها مور-ئد-ئس ؤر-اسن سيولخ، ؤر تدّي أت تّوحاسب غيفسن لمعصيت، ماشان دغي، ؤر غورسن أود يوت ن تسعضرت خف لمعصيت نّسن.c
23 د ونّا ؤر ئ يحميل ؤر دا ئتّيحميل أود ئبّا.
24 مور-ئد-ئس ؤر ݣيخ داتاسن لخدايم نّا ؤر دجّين ئݣي أود يون، ؤر تدّي أت تّوحاسب غيفسن لمعصيت، ماشان دغي، ؤر ئ حميلن نكّ د-ئبّا، واخّا أنّاين لخدايم ئنو.
25 ماشان ئخصّا أد ئجرو نّيت واوال ئتّيارين ݣ شّرع نّسن (نّا ئݣان لشتاب ن تّورات): ؤر ئ حميلن بلا سّيبت.