16
1 «هاتين نّيخاون ئسكّين-اد حما أت تقّيميم ݣ ليمان نّون.
2 دّان أكون ژّعن زݣ تمزݣيديوين ن ووداين، أها تسول أت تدّو يوت ن لوقت مانيݣ دّان أد غالن كول وينّا ئدّان أكون نغين ئس دا تݣّين شا ئژيلن غر ربّي.
3 داي دّان ميدّن أداون ݣين أياد، ئدّخ ؤر سّينن ئبّا ؤلا سّننييي.
4 ماشان هاتين سيولخاون خف ؤياد حما أدّاي تاوض لوقت نّا، أت تكتيم ئس-اون تنّيخ. ؤر-اون تنّيخ زݣ تيزويري ئدّخ لّيخ أݣّيدون ألتو».
تاووري ن رّوح ن ربّي
5 «دغي، ها يي دّيخ أد دّوخ غر ونّا ئ دّيوزنن، أها أود يون زّيݣون ؤر ئ ئسقسا: "ما غر تدّوت؟".
6 ماشان ئدّخ-أون نّيخ ئسكّين-اد، عمّرن وولاون نّون س لغيار.
7 والاينّي داون تّينيخ لحقّ: هات يوفاون أد دّوخ، ئدّخ مش ؤر دّيخ ؤر غورون دّيتدّو ؤمعاون، ئد مش دّيخ، دّيخ أداون تيد أزنخ.
8 داي أدّاي ديدّو، ئدّا أد-ئسباين ئ ميدّن ن دّونيت أينّا سّن خف لمعصييت د-ؤينّا ئمنان د خف لحكام ن ربّي ئس ؤر ئصحي.
9 أينّا سّن ميدّن خف لمعصييت ؤر ئصحي، ئدّخ ؤر ئسّي ؤمين،
10 ئد أينّا سّن ميدّن خف ؤينّا ئمنان ؤر ئصحي، ئدّخ أينّا ئمنان دا ئتبايان ݣ ؤياد: دّيخ أد دّوخ غر ئبّا أها ؤسار ئ تّانّايم،
11 أينّا سّن ميدّن خف لحكام ن ربّي ؤر ئصحي، ئدّخ أخاتار ن دّونيت-اد نّا ئݣان شّيطان هاتين ئتّوحكم غيفس ياد.
12 هاتين لّان غوري ديخ ألتو شايݣان ئسكين نّاون تّينيخ، ماشان وعرن غيفون أد تن تفروم دغي.
13 والاينّي أدّاي دّيدّو رّوح ن لحقّ، ئدّا أداون ئسنعت شوي س شوي لحقّ كول. هاتين ؤر ئدّي أد ئسّيول زݣ ئخف نّس، ماشان ئدّا أداون ييني أينّا مي ئدّا أد ئسلّ كول زݣ ربّي أها يينياون أينّا ئدّان أد ئجرو.
14 نتّا أد ئسباين لعزّ ئنو، علاحقّ أد يامژ أينّا ئݣان وينو أها يينياونت.
15 أينّا ئلّان غر ئبّا كول، وينو أيد ئݣا ألتو، خف أياد أخف-اون نّيخ ئس ئدّا رّوح ن لحقّ أداون ييني أينّا ئدّا أد يامژ زّيݣي.
16 ݣ شا ن لوقت ئدروسن، ؤسار ئ تّانّايم، داي ديخ ألتو ݣ شا ن لوقت ئدروسن أد ئ تانّايم».
أطيّر أد ياغول أد ئݣ أفراح
17 داي قّيمن ييتس ن-ئمحضرن أر تمسقسان ئنݣراتسن: «ماتّا ؤياد أخ ئتّيني: "ݣ شا ن لوقت ئدروسن، ؤسار ئ تّانّايم، داي ديخ ألتو ݣ شا ن لوقت ئدروسن أد ئ تانّايم"، أها ئنّاخ ألتو: "ئدّخ دّيخ أد-اغولخ غر بّانو"؟»
18 أها نّان ألّو: «ئوا مايد ئݣان لمعنا ن "شا ئدروسن ن لوقت" نّا خف ئسّاوال؟ هات ؤر نسّين مايد ئرا أد ييني س-ؤياد!»
19 داي ئسّن سيدنا عيسى ئس ران أت تسقّسان، أها ئنّاياسن: «دا تّمسقسام ئنݣراون ئدّخ نّيخ: "ݣ شا ن لوقت ئدروسن، ؤسار ئ تّانّايم، داي ديخ ألتو ݣ شا ن لوقت ئدروسن أد ئ تانّايم".
20 يّيه، ستيتّ أيدا أون تّينيخ: "هاتين ئقّن كونين أت تروم أها توتم أݣجدور. ئد ميدّن دّونيت دّان أد فرحن. كونّي تدّام أت تّيليم ݣ تمارا، والاينّي تامارا نّون تدّا أت تعايد أت تݣ لفرح.
21 أدّاي دا تّارو تمطّوطّ دا س-ئتشوّاش لخاضر ئدّخ تيوض تاسّاعت ن تمارا نّس، ماشان أدّاي تّلال تسلمييا ؤر ياد دا تكتّي تامارا نّا غيفس ئكّان س لفراحيت، ئدّخ دّ-يلال يون ن بنادم ݣ دّونيت.
22 ئمشيس أود كونّي، ئلّا غورون ؤطيّر دغي، ولاينّي دّيخ أكون أنّايخ ديخ ألتو، أد فرحن وولاون نّون، د-أود يون ؤر ئتّيغي أد ئكّس لفرح نّون.
23 داي أدّاي د ياوض واسّ نّا ؤر تقّيمم أد ئ تسقسام خف والو. يّيه، ستيتّ أيدا أون تّينيخ: هان أينّا تتّرم س-ئسم ئنو كول زݣ ئبّا، ئدّا أداون تيوش.
24 ألّ دغي هات ؤر تتّيرم شا س-ئسم ئنو. تّرات تامژم أكّ أداون ئكمّل لفرح نّون».
سيدنا عيسى ئرّا دّونييت
25 «هاتين سيولخاون س-ئد لمعاني، ماشان تدّا أت تدّو يوت ن لوقت أها ؤسار-اون سيولخ س-ئد لمعاني، دّيخ أد-اون سيولخ س طايطاي خف ئبّا.
26 ݣ واسّ نّا تدّام أت تتّرم ئ ئبّا س-ئسم ئنو، أها ؤر داون تينيخ ئس دّيخ أت تّرخ ئ ئبّا غيفون،
27 علاخاطر ئبّا س-ئخف نّس دا كون ئتّيري. دا كون ئتّيري ئدّخ دا ئ تّيريم أها تامنم ئس ددّيخ زݣ غورس.
28 دّيخدّ زݣ بّانو أها دّيخد غر دّونيت، دغي، دا تفّغخ زݣ دّونيت أغولخ غر ئبّا».
29 داي نّاناس ئمحضرن نّس: «هان شݣّ دغي دا تساوالت س طايطاي أها ؤر دا تّينيت أود يون ن لميتال!
30 نسّن دغي ئس تسّنت مايد ئݣان شا، أها تسّند ياد ئسقسيتن نّا نرا أك نسقسا. a خف ؤياد أس دا نتّامن ئس تتدّيت زݣ ربّي».
31 ئواجبتن سيدنا عيسى: «دغي، ئس تّومنم ئسّي ستيتّ؟
32 هاتين تدّا أت تدّو يوت ن لوقت، أها هاتين تيوض ياد، أد ديكس تمزلّاعم، كو يون أد ياغول غر تادّارت نّس، أها تادجّيمييي غاس نكّ، والاينّي ؤر لّيخ غاس نكّ، ئدّخ ئلّا ئبّا أݣّيدي.
33 هاتين سيولخاون خف-وياد حما أد غورون ييلي لهنا مش تومژم ديݣي، b ئقنّ أد غيفون ئكّ ؤخوب ݣ دّونيت، ماشان أد ؤر تݣدات! هاتين رنيخ دّونيت».