17
تاژالّيت ن سيدنا عيسى
1 داي فّير مايد ئنّا سيدنا عيسى أوال-اد، ئهزّا ألّن نّس غر ئݣنّا أها ئنّا: «آبّانو هان لوقت تيوضدّ. سباين لعزّ ئنو، باش أد سباينخ لعزّ نّش ألتو، نكّين نّا ئݣان ممّيشa،
2 ئدّخ ئ توشيد تانباطّ خف ميدّن كول حما أد وشخ تودرت ن وابدا يي وينّا يي توشيد كول.
3 د تودرت ن وابدا نتّات: ميدّن سّن ماي تمسد، شݣّين ربّي أرصلي نّا ئݣان أفرضي أها سّن عيسى لمسيح نّا توزند.
4 نكّ، سباينخ لعزّ نّش خف واشال، علاخاطر شمّلخ لخدمت نّا ئ توشيد أد ݣخ.
5 آبّانو، دغي ݣييي لعزّ غورش، لعزّ نّا غوري ئلّان لّيݣ لّيخ أݣّيدش دات ن مايد تلّا دّونيت.
6 نكّ، سنعتخ ئ ميدّن نّا ئ توشيد زݣ دّونيت ماي تمسد.b هاتين كّان ݣان وينّش أها توشتيييتن، داي ضاعن أواوال نّش.
7 دغي، سّن ئد أينّا ئ توشيد كول زّيكّ أيد-ئكّا،
8 ئدّخ-أسن سّيوضخ أوال نّا ئ توشيد أها رحبن ئس. سّن ستيتّ ئد زّيكّ أيد ددّيخ، أها أمنن ئد شݣّين أيد ئ يوزن.
9 دا ش تتّرخ غيفسن، ؤر دا تتّرخ خف ميدّن ن دّونيت-اد، ماشان خف وينّا ئ توشيد، ئدّخ ݣان وينّش،
10 ونّا ئݣان وينو كول وينّش أيد ئݣا، د ونّا ئݣان وينّش هاتين وينو أيد ئݣا، لعزّ ئنو دا ئتبايان ديكسن.
11 علاحال، ؤر تغيماخ ݣ دّونييت، ئدّخ دّيخ أد-أغولخ غورش. والاينّي نيتني سولن ݣ دّونييت. أيبّا ئصفان، حضوتن س لجهد ن-ئسم نّش، لجهد نّا ئ توشيد، باش أد ݣين يون ئمشينّا ݣيخ أݣّيدش.
12 لّيݣ لّيخ أݣّيدسن، أر تن ؤحطّوخ س لجهد ن-ئسم نّش، لجهد نّا ئ توشيد. حضيختن ؤر زّيكسن يوشكي أود يون، غاس ونّا مي ئلازم أد ياشك حما أد-يجرو ؤينّا ئتّوارين ݣ لشتاب نّش.
13 دغي، أيبّا ديخ أد-اغولخ غورش. داسن تّينيخ أوال-اد ماحد سولخ ݣ دّونيت، حما أد ديكسن ييلي ؤفراح ئنو، أفراح ئشمّلن.
14 هاتين سّيوضخ-اسن أوال نّش، أها ؤر تن حميلّ ميدّن ن دّونيت، ئدّخ ؤر ݣين زݣ دّونيت، ئمشينّا ؤر ݣيخ نكّ زݣ دّونيت.
15 ؤر دا زّيك تتّرخ أت تن تّاويد زݣ دّونيت، ماشان أت تن تحضود زݣ شّيطان.
16 هاتين ؤر ݣين زݣ دّونيت، ئمشينّا ؤر ݣيخ نكّ زݣ دّونيت.
17 ݣيتن د وينّش س لحقّ. هان أوال نّش ئݣا لحقّ.
18 أكيس ئ توزنت غر دّونيت، أود نكّ دا تن تّازنخ غر دّونيت.
19 د نكّين، ݣيخ ئخف ئنو د وينّش غيفسن، حما أد ݣين أود نيتني س-تيتّ وينّش.
20 داي ؤر دا تتّرخ غاس خف ويد هيلّي، ماشان دا تتّرخ ألتو خف وينّا ئدّان أد ئسّي أمنّ س واوال نّسن.
21 دا تترخ أد ݣين كول نّسن يون، أكيس ديݣي تلّيت أيبّا د نكّ لّيخ ديكّ، أد ݣين ألتو يون ديݣنخ، حما أد أمنّ ميدّن ن دّونيت ئد شݣّين أيد ئ يوزنّ.
22 هان نكّ، ؤشيخاسن لعزّ نّا ئ توشيد، أكّ أد ݣين يون أكيس نݣا نوكّني يون.
23 نكّ، لّيخ ديكسن د شݣّين تلّيت ديݣي، باش أت تشمّل تامونت نسن أها ئسين ميدّن ن دّونيت ئد شݣّين أيد ئ د يوزن أها أر تن تيريد أكيس ئ تّيريد.
24 أيبّا، توشييتن، أها رّيخ أد ئلين أݣّيدي ماني ݣ دّيخ أد ئليخ، حما أد أنّاين لعزّ ئنو، لعزّ نّا يي توشيد، ئدّخ دا ئ تّيريد دات ن مايد تخلقد دّونيت.
25 أيبّا، شݣّين أيد-ئمنان. هان ميدّن ن دّونيت ؤر ش سّين، ماشان نكّينتين سّنخش، أها سنّ ئمحضرن ئنو ئد شݣّين أيد ئ د يوزن.
26 هاتين سنعتخاسن ماي تمسد أها سولخ أت تݣخ ألّو، حما تايري نّا ئ تّيريد أت تيلي ديكسن، أها ئليخ نكّ ديكسن».