22
ياهودا ئسخاريوطي يرا أد ئزّنز سيدنا عيسى
1 ئدجّاور لعيد ن - ؤراخصيس نّا مي دا تّينين لعيد ن - ؤزرّوي.
2 يافد لحال ئنمغورّ ن ـ ثدّارث ن ـ ربّي د - ئسّلمادن ن - شّرع أر ؤرزّون ميمش تّݣّين أد نغين سيدنا عيسى، ماشان ݣّدن أد سكّرن ميدّن ثيريتّ.
3 داي يكشم شّيطان ݣ - ياهودا نّامي دا تّينين ئسخريوطي، يݣان يوكّ زݣ ثناعش ن - ؤمحضر ن ـ سيدنا عيسى.
4 يدّو غر ئنمغورّ ن ـ ثدّارث ن ـ ربّي د - ئكسواثن ن - ئعسّاسن ن ـ ثدّارث ن ـ ربّي، ئمساوال أݣيدسن خف ميمش ئتّݣّ أداسنث ئصّيوض ئي يفاسّن.
5 داي فرحن، أها قّاولناس أداس ؤشين شان لفلوس.
6 ئقّيم ياهودا أر يورزّو بار أد ياف شان ؤبريد نّاس أسن ئصّاواض سيدنا عيسى ئي يفاسّن ؤرثن تّانّاين ميدّن.
سيدنا عيسى أر ئتحبّال ئي لعيد نتّا د - ئمحضرّ نّس
(ماتّى 26:17-25؛ مارقوس 14:12-21؛ يوحنّا 13:21-30)
7 ياوض واسّ ن - لعيد ن - ؤراخصيس نّا ݣ دا غرّصن ئي ينوݣوضن ن - لعيد ن - ؤزرّوي.
8 يازن سيدنا عيسى بطرس د - يوحنّا ينّاياسن: «دّوياث حبّلاثاخ ئي يمنسي ن - لعيد حما أنتشّ».
9 أها سقسانث نّاناس: «ماني ݣ - ثريد أداس نحبّل؟»
10 داي ينّاياسن: «أدّاي ثكشمم غر ثمدينث، ثدّام أتّمناقّارم د ـ يان ؤرݣاز يوسين ثاقلّالث ن - وامان. ثفاراتّ غر ثادّارث نّا غر ئدّا أد ئكشم،
11 ثينيماس ئي باب ن - ثادّارث: "ئنّاياش ؤسّلماد، مانيݣ تتّاخ ئمنسي ن - لعيد نكّين د - ئمحضرّ ئنو؟"
12 هاثين ئدّا أداون ئسنعث يوث ن - ثمصريث ثاكسواتّ نّا يسّان، ئوا ديسّ أݣ غا ثحبّلم ئي يمنسي».
13 أها دّون أفينن أم ؤينّاسن ئنّا، داي حبّلن ئي يمنسي ن - لعيد ن - ؤزرّوي ݣ ـ ثمصريث نّا.
ئمنسي أنݣّارو ن - مولانا
(ماتّى 26:26-30؛ مارقوس 14:22-26؛ 1 كورنتوس 11:23-25)
14 نتّا ثيوض لوقث، ئقّيم سيدنا عيسى د ـ ئمازان س - ثناعش أد تشّين.
15 أها ينّاياسن: «ريخ س ـ وول ئنو أݣّيدون تّشخ ئمنسي ياد ن - لعيد ن - ؤزرّوي قبل أد تّومرّثخ،
16 ئدّخ أداون ئنيخ: هاثين ؤسار عاويدخ أد زّيكس تشّخ أر تثدّو ثݣلديتّ ن - ربّي. لوقث نّا أد ئتواسّن مايد ئݣان سثيتّ لعيد أد»
17 داي ياسي سيدنا عيسى يان ؤغرّاف ديكس أمان ن ـ واضيل ئتّر ئي ربّي أديكس ئيݣ لباراكا، أها ينّاياسن: «أمژاث أغرّاف أد ثبضومث ئنݣراثون،
18 أداون ئنيخ: ؤسار سويخ زݣ وامان ن - واضيل أر تثدّو ثݣلديتّ ن - ربّي».
19 داي ياسي أغروم ئتّر ئي ربّي أديكس ئيݣ لباراكا، ئبّيث ئوشاسنث أها ينّاياسن: «واد أيد ئݣان صّاحث ئنو نّا ئتّواوشن غيفون، ئوا تّݣّاواث أياد حما أد ئي ثشثيم».
20 فّير ن - ئمنسي ياسي ديخ أغرّاف أها ينّاياسن: «أغرّاف أد أيد ئݣان ثاضا ثوجديتّ نّا يݣا ربّي أݣيدون س ـ ئدامّن ئنو نّا نّغلانين غيفون».
21 «ماشان هان ؤنّا يدّان أد ئي يغدر ئلّا أݣيدنخ غر لميدا.
22 هاثين ممّيس ن - بنادم ئخصّاياس أد ئمّث أم ؤينّا غيفس ئزمّم ربّي، ماشان أياعندا نّس ئي ونّا غا ثيغدرن!»
23 قّيمين ئمحضرّ أر تمسقسان ئنݣراتّسن خف مان ديكسن أيد ئدّان أد ئݣ أياد.
مامي يمقّور شّان؟
24 داي يكّر أود يان ؤمغانّا ئنݣراتّسن خف مان ديكسن أمي يمقّور شّان.
25 داي ينّاياسن سيدنا عيسى: «ئݣلّيدن دا تّنباضن خف لݣنوس نسن، د ـ ويد نّا غر ثلّا ثنباطّ دا تّيرين أداسن قّارن ميدّن "أيث لخير".
26 ئيد كونّي ؤر ئخصّا أد ييلي وياد ئنݣراثون، ؤنّامي يمقّور شّان ديݣون ئخصّاياس أد ئيݣ أم ؤنّا ؤر ئواثان شا، د ـ ؤنمغور ئخصّاياس أد ئيݣ أمّ ؤمزيلّز.
27 ئدّخ مامي ئمقّور شّان، ئيد وونّا يقّيمان غر لميدا ماد ؤنّا دا يتزيلّيزن؟ ئيس ؤر ئيد ؤنّا يقّيمان غر لميدا؟ ماشان نكّينثين ݣيخ أم ؤمزيلّز ئنݣراثون».
28 «كونّي أيد ئبدّان أݣّيدي ݣ - ثماريوين نّا غيفي يكّان،
29 خف ؤياد دّيخ أداون ؤشخ ثانباطّ أتّݣيم ئݣلّيدن أكيس ئيتّ ئوشا يبّا،
30 حما أتشّيم ثسويم خف لميدا نو ݣ - ثݣلديتّ ئنو، أها ثقّيميم خف ئيد لعرش حما أتّنبضم خف ثقّبيلين ن - إسرائيل س - ثناعش».
سيدنا عيسى يكاشاف ئيس ئدّا بطرس أث ئنكر
(ماتّى 26:31-35؛ مارقوس 14:27-31؛ يوحنّا 13:36-38)
31 «أ سيمعان، أ سيمعان،a أوي بعيتّ هان شّيطان ئرا أكون ئسّيفّ أم ييردن.
32 ماشان هاثين تّرخاس ئي ربّي زݣ ثنيلا نّش حما أد ئقّيم ليمان نّش، داي أدّاي تّوبد ثاغولددّ غيري، أها ثسزّعيمد أيثماش».
33 أها ينّاياس بطرس: «أمولانا، هاثين وجدخ أد دّوخ أݣيدش أود غر لحبس أها مّثخ أݣيدش».
34 ماشان ينّاياس سيدنا عيسى: «أداش ئنيخ أبطرس: ؤر ئدّي ؤفولّوس أد ئسكّوع أسّا أرد ثنكرث شراطّ ن - ثيلمرّات ئيس ئي ثسّند».
سيدنا عيسى أر ئتوصّا يمحضرّ نّس
35 داي ينّاياسن: «لّيݣ كون ؤزنخ أتبرّحم س ـ ئنغميسن ژيلنين أها ؤر ثيويم أݣيدون لا لفلوس، ؤلا ياخّريض، ؤلا يبوركسن ئمشوياض، ئساون ئخصّا شا؟» أها نّاناس: «ئهي».
36 داي يناياسن: «ماشان دغي، ونّا غر ثلّا شان ثكمّوسث ن - لفلوس نغد أخريض ياسيثن، د - ونّا غر ؤر ثلّي ثفروتّ ئزّنز ئعبانّ نّس أها يسغيتّ،
37 أداون ئنيخ: هاثين ثيوض لوقث نّاݣ ئتجرو وينّا غيفي ئتّيارين ݣ ـ لشثاب ن ـ ربّي ليݣ ئنّا: "ئتّوحاسب د ـ وينّا فّغنين شّرع ن ـ ربّي". ئدّخ أينّاس غيفي كاشفن لانبيا كول ئدّا أد ئجرو».
38 داي نّاناس: «أمولانا! هاثين لّانث غورنخ سناث ن - ثفروثين». أها ينّاياسن: «باراكا ن ـ واوال خف ؤياد».
ثاژالّيت ن - سيدناعيسى ݣ - عاري ن - زّيثون
(ماتّى 26:36-46؛ مارقوس 14:32-42)
39 داي يفّغ أم لقاعيدا نّس ئدّو غر عاري ن - زّيثون، أها ثفارنث ئمحضرّ نّس.
40 نتّا ييوضنّ غر ديسّ، ئنّاياسن: «ژّالّاث حما أد ؤر كون ئتجرّاب شّيطان».
41 داي يبعداسن شوي، ئقّيم خف ئفادّن نّس أر ئتژّالّا
42 أر ئتّيني: «أيبّا، مش ثريد، أسي زّيݣي ثمارا ياد نّا يي نّيقّان! ماشان أد ييلي وينّا ثريد شݣ، ؤر ئيد أينّا ريخ نكّين».
43 داي يفّغد غيرس يان لمالاك زݣ ييݣنّا أها يوشاس جّهد.
44 داي يژيّر وول نّس، ئقّيم أر ئتّژالّا س - شايݣان ن - لحرّ ألّيݣ أر تّادّوم ثيدي نّس خف واشال أم ثمقّا ن - ئدامّن.b
45 ضارث ن ـ مايد ئژّولّا، ئعايدّ غر ئمحضرّ نّس، يافتنينّ ݣنن س - ؤطيّر.
46 أها ينّاياسن: «مّاخ ألّيݣ ثݣنم؟ كّراث ژّالاّث حما أد ؤر كون ئتجرّاب شّيطان».
أماژ ن - سيدنا عيسى
(ماتّى 26:4-56؛ مارقوس 14:43-50؛ يوحنّا 18:3-11)
47 ئلّا سيدنا عيسى أر ئساوال، داي هان يان ؤربيع ن ـ ميدّن ئدّاد، ئزويرثنيد ياهودا ئسخاريوطي، ئݣان يوك زݣ ثناعش ن - ؤمحضر، أها يحادزّ غر سيدنا عيسى أث ئسّودم.
48 ماشان ئنّاياس سيدنا عيسى: «أياهودا، ئيد س - ؤسّودم أس غا ثغدرد ممّيس ن - بنادم؟».
49 نتّا أنّاين ئمحضرّ نّس مايد ئدّان أد ئجرو أها نّاناس: «أمولانا، ئيد أنوّث س - ثفروثين نخ؟»
50 ئكّر يون زّيكسن ئوّث أمزيلّز ن - ؤنمغور ن ـ ثدّارث ن ـ ربّي أها يبّياس أمژوغ أفاسي.
51 داي ينّاياسن سيدنا عيسى: «رصّيواث، باراكا!» ياژضاس ئي ورݣاز س ـ أمژوغ أها يجّوجيث.
52 داي ينّاياسن سيدنا عيسى ئي ينمغورّ ن ـ ثدّارث ن ـ ربّي، د - ئكسواثن ن - ئعسّاسن ن - ثدّارث ن - ربّي، د - ئخاثارّ ن ـ ووداين نّا غورس ددّانين: «مّاخ ئيس ݣيخ أخوّان ألّيݣ غوري دّثدّام س - ثفروثين د - ئغريان؟
53 ياكّ لّيخ أݣّيدون كويّاس ݣ - ثدّارث ن - ربّي، ماخ ألّيݣ ؤر ئي ثوميژم. ماشان دغي ثسّاعت نّون أياد نّاݣ دا تّنباض ثالّسث».
بطرس ئنكر سيدنا عيسى
(ماتّى 26:69-75؛ مارقوس 14:66-72؛ يوحنّا 18:12-27)
54 داي أمژنث أوينث غر ثدّارث ن - ؤنمغور ن ـ ثدّارث ن ـ ربّي، أها يثفارث بطرس زݣ تّيساع.
55 حمون ئعسّاسن لعافيث ݣ - رّحبث ن - ثادّارث قّيمين ضورناس، ئقّيم أود بطرس ئنݣراتّسن.
56 داي ثانّايث يوث ن - ثمزيلّزث ئقّيما ثاما ن ـ لعافث أها ثنژو ديكس، داي ثنّاياسن: «هان أرݣاز أد أر ئتّمون د ـ عيسى!»
57 ماشان ئنكر بطرس أها ينّاياس: «أثامطّوط، نكّين ؤر ثسّينخ!»
58 شوي يانّايث يوكّ ضنين فّير ن - ؤينّا أها ينّاياس: «أود شݣّ ثݣيد زّيكسن!» ماشان ئنّاياس بطرس: «أيارݣاز، هاثين ؤر ئيد نكّين!»
59 فّير ن - ماي ثزري أم ثسّاعت، ئنّاياس يوكّ ضنين: «سثيتّ، هاثين أود أرݣاز أد أسمون ن ـ عيسى أيد ئݣا، ئدّخ هاثين أود نتّا ئݣا زݣ ثمازيرث ن - لجاليل!»
60 داي ينّاياس بطرس: «أيارݣاز، ؤر سّينخ ماي دا تّينيد!» ئسول بطرس أر ئساوال أها يسكّوع ؤفولّوس.
61 ئبرّم غورس سيدنا عيسى يحقّا ديكس أها يشثيدّ بطرس أوال ن - سيدنا عيسى لّيݣ أس ئنّا: «هاثين قبل أد ئسكّوع ؤفولّوس ثيفاوث، ثدّيد أدي ثنكرد شراطّ ن - ثيلمرّاث».
62 أها يفّغ بطرس غر برّا، يرو ييمطّاون حرّانين.
سيدنا عيسى داث ن - ئخاثارّ ن - ووداين
(ماتّى 26:59-68؛ مارقوس 14:55-68؛ يوحنّا 18:19-24)
63 قّيمين ئعسّاسن نّا حضانين سيدنا عيسى أر ديكس تعژّارن أرث كّاثن.
64 أراس غمّسن ئي وودم أراس تّينين: «كاشف! مايد ئمس ؤنّاش ئوّثن؟»
65 قّيمين أرث رݣّمن شايݣان.
66 نتّا يفّو لحال، مّݣراون ئخاثارّ ن ـ ووداين، د ـ ئنمغورّ ن ـ ثدّارث ن ـ ربّي، د ـ ئسّلمادن ن - شّرع، أوينث غر لمݣليس نسن،
67 أها نّاناس: «مشد شݣين أيد ئݣان لماسيح، ئنيياخث!» داي ينّاياسن سيدنا عيسى: «مش أون نّيخ ؤر ثدّيم أد ئي ثامنم.
68 ئيد مش ئكون سقساخ، ؤر ثدّيم أد غيفي ثراريم.
69 ماشان زݣ دغي، ئدّا ممّيس ن - بنادم أد ئقّيم ݣ - ئديس أفاسي ن - ربّي ئغين ئي كولشي».
70 داي نّاناس كول نسن: «ئوا شݣّ أيد ئݣان ممّيس ن - ربّي؟» أها ينّاياسن: «كونّي س ـ ئخفاون نّون ثنّامث، نكّين أي ثيݣان».
71 داي نّاناس: «ماي نرا دغي يينيݣان! نوكّني س ـ ئخفاون نّخ نسلاّياس ئنّاث س ـ ؤقمو نّس!»