21
صّاداقا ن - ثنّامي يمّوث ؤرݣاز
(مارقوس 12:41-44)
1 ئسول سيدنا عيسى ݣ ـ ثدّارث ن ـ ربّي، يانّاي وينّا طرّحنين أر ݣّارن صّاداقاث نسن ݣ - صّندوق ن - ثدّارث ن - ربّي.
2 ثدّود أود يوث ن ـ ثمطّوطّ نّا مي يمّوث ؤرݣاز أها ؤر غورس شا ثݣر ݣ ـ صّندوق سينّ ن ـ ئقّاريضن.
3 داي ينّاياسن سيدنا عيسى: «سثيتّ أداون ئنيخ: هان ثامطّوط أد نّامي يمّوث ؤرݣاز أها ؤر غورس شا ثݣرا ؤݣار ن - وييّاض كول.
4 ئدّخ نيثني ݣران زݣ ؤينّا غيفسن ئشايضن، ئيد نتّاث ثݣرا أينّا غورس ئلّان كول».
ثيميثار ن - ثنݣيرا ن - دّونيث.
(ماتّى 24:1-14؛ مارقوس 13:1-13)
5 قّيمين ييتّس أر ساوالن خف ثدّارث ن - ربّي ميمش أيد ثتّوسبربش س ـ ئژرا ژيلنين د - س ـ ئسكّين غلانين نّا أر تّاكّان ميدّن ئي ربّي، داي ينّاياسن سيدنا عيسى:
6 «هاثين ثدا أدّ ثدّو شان لوقث نّاݣ ؤر ئتّغيما أود يان ؤژرو خف وايّاض، أياد كول نّا دا تّانّايم ئدّا أد ئتّوردل».
7 داي سقسانث نّاناس: «أياسّلماد، ميلمي أيد ئتّجرو ؤياد؟ ئيس ثدّا أتّيلي شان ثماثارث نّاس نتّيسين ئيس ئدجّاور ؤياد أد ئجرو؟»
8 أها ينّاياسن: «أوياث بعيتّ، غوراون أكون ئسّخضو شا! ئدّخ مشثا ن ـ يون أغا ديدّون ئسّخدم ييسم ئنو أها يينياون: "هاثين نكّين لماسيح"، د - "هاثين ثيوض لوقث!" ماشان أد ؤر ثتّامناث.
9 داي أدّاي ثسلّيم ئيس كّرن ئمنغان د - ثيراثين، أد ؤر تّݣّداث؛ ئدّخ لابدّا أد ئجرو وياد بعدا، ئيد ثينݣيرا ن - دّونيث ؤر ثدّي أتّيلي دغيا فّير ن ـ ؤينّا».
10 داي ينّاياسن ألثو: «دّان لݣنوس أد نّاغن ئنݣراتسن، مّواثنث ثݣلّيدين،
11 دّان أد ئلين ئيد زّنزال نّا وعرنين، ييلي بوهيّوف، د - ييغنشاثن ݣ - شايݣان ن - ثميزار، جرون ييتس ن ـ ئسكّين نّا دا سّخلاعنين أها ضهرنثدّ ثميثار ثيخاثارين زݣ ييݣنّا.
12 ماشان داث ن - ؤياد كول، دّان ميدّن أكون تّامژن أها كّرفصنكون، أوينكون غر لمخزن ن ـ ووداين د - غر لحباساث. دّان أكون حرين غر داث ن - ئݣلّيدن د - ئنبّاضن خف نّيرث ئنو.
13 داي لوقث نّا ثدّام أتّيغيم أداسن ثسيولم غيفي.
14 أد ؤر تخمّاماث ݣ ـ ماي ثدّام أتّينم حما أتّراريم خف ئخفاون نّون.
15 ئدّخ دّيخ أداون ؤشخ أوال د - ثانژّي نّاس ؤر تّيغين ئنضليبن نّون أكون نّالين نغد أون نّان هاثين ثخضام.
16 دّان أود لوالدين نّون د - أيثماثون، د - لاهل نّون، د - ئمدّوكّال نّون أد ئسّون قرقرن، أها سبّبن ݣ ـ منغيوث ن ـ ييتس ديݣون.
17 دّان ميدّن كول أد ؤر كون تّيحميلن خف نّيرث ئنو،
18 ماشان أود يان يينژض ؤر ئدّي أد ياتّوي زݣ ئقرّا نّون.
19 س ـ صّبر، ثدام أتفوكّام ئخفاون نّون».
ثيخلي ن - لقدس
(ماتّى 24:15-31؛ مارقوس 13:14-27)
20 «ماشان أدّاي ثانّايم لقدس ئضوراس لعسكر، ثيسينم ئيس ثدجّاور لوقث ن ـ ثخلي نّس.
21 داي كول وينّا لّانين ݣ ـ ثمازيرث ن ـ أيث ياهودا ئخصّياسن أد رولن غر لعواري، د - وينّا لّانين ݣ - لقدس ئخصّاياسن أد زّيكس فّغن، د - وينّا لّانين برّا نّس أد ؤر غورس كتّشمن،
22 ئدّخ لوقث نّا أيد ئݣان ثين لعيقاب، ثنّا ݣ ـ ئتجرو ؤينّا ينّا ربّي كول ݣ ـ لشثاب نّس.
23 أياعندانسنث ئي ثينّا دا تّارونين، د - ثينّا دا سوطّوضنين ݣ - لوقث نّا، ئدّخ ثدّا أتّيلي يوث ن - ثامارا ئحرّين ݣ ـ ثمازيرث أد أها يعاقب ربّي ميدّن أد.
24 دّان يتس زّيكسن أد تّونغين س - ثفروثين، تّييمژن وييّاض، تّواݣن د ـ ئحبّاسن أها تّياوين غر ثميزار ن ـ دّونيث كول، داي كشمن لݣنوس ئبرّانين لقدس ركّشنت أها قّيمين ديكس ألّ ثشمّل لوقث نسن».
أدّاي دّياغول ممّيس ن - بنادم
25 «دّانث أد ئلينث ثيميثار ݣانين لعجب ݣ - ثافوكث د - وايور د - ييثران. د ـ خف واشال، دّان لݣنوس كول أد ئلين ݣ - ثمارا، أها شوّشن س ـ ثاهيجت ن ـ لبحر د - لهزّ ن - ثمزازين.
26 دّان ميدّن أد مّثن س ـ ؤخلاع زݣ ؤينّا غا يجرون ݣ - دّونيث ئدّخ ئدّا ييݣنّا س ـ ماس ئلّا أد ئرݣيݣي.
27 داي يانّاين ميدّن كول ممّيس ن - بنادم ئدّاد ݣ - ئسيݣنو س - جّهد د - لعزّ أخاثار.
28 أدّاي سفالّن ئسكّين أد تّجرون، بدّاث ثهزّام ئقرّا نّون ئدّخ ئدجّاور ؤفوكّا نّون».
لقيسث ن - ثازارث
(ماتّى 24:32-35؛ مارقوس 13:28-31)
29 داي يقّيساسن لقيسث أد: «راعيواث ݣ - ثازارث د - ئسكلا س ـ ماس لّان.
30 أدّاي دا دطّيقّيسن وافريون، دا تّيسينم ئس ئدجّاور ؤنبدو.
31 ئوا أود أدّاي ثانّايم ئسكّين أد دا تّجرون، ثسينم ئيس ثدجّاور ثݣلديتّ ن - ربّي.
32 سثيتّ أداون ئنيخ: ؤر دا يتّمثاث لجيل أد أرد ئجرو ؤياد كول.
33 هاثين ؤر ئتّغيما لا ييݣنّا ؤلا ياشال، ئيد أوال ئنو أد ئقّيم أبدا».
أفافا د - ثژالّيت
34 «حضوياث ئخفاون نّون، غوراون أتّعمّرم ؤلاون نّون س ـ شّهواث د ـ ئنزݣومن ن ـ دّونيث د ـ شّراب، أها يوّثكونيد واسّ ن ـ لحساب ݣ ـ مهويث،
35 أم ثژقّورث، ئدّخ ئدّا أدّ ئوث ئمزداغ ن ـ دّونيث كول.
36 ئوا راراث لبال نّون كّوياسّ، أر تژّالّام بار أتّروحم زݣ ؤينّا يدّان أد ئجرو كول أها ثغيم أتبدّيم داث ن ممّيس ن - بنادم».