20
ثانباطّ نّا يلّان غر سيدنا عيسى
(ماتّى 21:23-27؛ مارقوس 11:27-33)
1 يان واسّ، ئلّا سيدنا عيسى أر ئسّقرا ميدّن ݣ - ثدّارث ن - ربّي أراسن ئساوال خف ئنغميسن ژيلنين، دّوندّ غورس ئنمغورّ ن ـ ثدّارث ن ـ ربّي، د - ئسّلمادن ن - شّرع د - ئخاثارّ ن ـ ووداين
2 أها نّاناس: «ئنياخ، ماتّا ثنباطّ نّاس دا تݣّاد أياد، نغد مايداش ئوشان ثانباطّ أد؟».
3 داي ينّاياسن: «أود نكّين أكون سقساخ يان ؤسقسي، ئنياثي:
4 مايداس ئوشان ئي يحيى ثانباطّ ناس أر يتغبّاز ميدّن ݣ ـ وامان، ئيد ربّي ماد ميدّن؟».
5 داي مداشارن ئنݣراتسن، أر تّميينين: «مش ننّا هاثين ربّي أيداس ئوشان ثانباطّ أد، ئدّا أداخ ييني ئوا ماخ ألّيݣ ؤر ئيسّ ثومينم؟
6 ئيد مش ننّا: ميدّن أيداستّ ئوشان، دّان ميدّن كول أداخ رجمن ئدّخ ؤر غورسن شّكّ ئيس ئݣا يحيى نّبي».
7 داي نّاناس: «ؤر نسّين».
8 أها ينّاياسن سيدنا عيسى: «ئوا أود نكّين ؤر دّيخ أداون ئينيخ ماتّا ثنباطّ نّاس دا تݣّخ أياد!»
لقيسث ن - ئبحّارن
(ماتّى 21:33-46؛ مارقوس 12:1-12)
9 داي يبرّم سيدنا عيسى غر ميدّن ئقّيساسن لقيسث أد: «ئژّا يان ؤرݣاز ؤرثي ن - دّيليث، ئوشيتّ ئي ييتّس ن - ئبحّارن داي يدّو غر يوث ن ـ ثمازيرث ئبعدن ئقّيمن ديكس شايݣان.
10 نتّا ثيوض لوقث ن ـ واضيل، يازن يان ؤمزيلّز غر ئبحّارن حما أداس ؤشين أمور نّس زݣ واضيل، ماشان كّرن ئبحّارن ؤثنث رارينث س - ييري ن - ؤفوس.
11 داي يازن يان ؤمزيلّز ضنين، ؤوثنث أود نتّا، كرفصنث أها رارنث س - ييري ن - ؤفوس.
12 أها يازن ديخ أمزيلّز ويسّ شّراض، ستّورسثنث ݣرينيسّ غر برّا ن ـ وورثو.
13 داي ئنّا باب ن - وورثي: "مايد تݣّخ دغي؟ دّيخ أد غورسن أزنخ ممّي نّا غوري يعزّين بار أث وقّرن".
14 نتّا أنّاينث ئبحّارن، داي ميونّان ئنݣراتسن: "واد أيد ئݣان أمكّاسو! كّراثاخ أثنّغ حما أتݣ ثكاسوتّ ثينّخ".
15 داي ژّوغرنث غر برّا ن - وورثو أها نغينث. ئوا ما غاسن ئيݣ باب ن - وورثو ئي ئبحّارن أد؟
16 هاثين ئدّا أدّ ئدّو، داي ينغ ئبحّارن نّا أها يوش ؤرثي ئي ييتس ضنين».
نتّا سلّان ميدّن ئي ؤياد أها نّاناس: «أيد ؤر نانّاي»
17 ماشان ئراعا ديكسن سيدنا عيسى أها ينّاياسن: «ئوا ماي دا يتّيني لشثاب ن ـ ربّي؟ هان أژرو نّا ؤر رين ئبنّاين، أيد ياغولن ئݣا لّساس ن - ثغمرث.
18 كول وونّا يتّوتّين خف ؤژرو ياد ئدّا أد ئرّژ، د - ؤنّا خف ئتّوتّي ئدّا أث ئبرش!»
19 لّيݣ سلّان ئسّلمادن ن - شّرع د ـ ئنمغورّ ن ـ ثدّارث ن ـ ربّي ئي وياد، ران أد أمژن سيدنا عيسى ثسّاعت نّا ئدّخ سّنن ئيد نثني أيد أر ئكّاث س ـ واوال، ماشان ݣّدن أد سكّرن ميدّن ثيريتّ.
ضّاريبا ن - ؤݣلّيد ن ـ رّومان قايصار
(ماتّى 22:15-22؛ مارقوس 12:13-17)
20 قّيمين أرث حطّون، أها أزنن ييتّس ن - ئرقّاسن أد ݣين أمّ شان ئرݣزن نّا منانين حما أد غيفس أمژن شان واوال نّاس ثتّاوين غر لمخزن.
21 داي سقسان ئرقّاسن سيدنا عيسى نّاناس: «أياسّلماد، هاثين نسّن ئيس ئصحا ؤينّا دا تّينيد د ـ ؤينّا دا ثسّلمادّ، أها ؤر دا تݣّاد ثودماوين، أر ثسنعادّ أبريد ن - ربّي ئي ميدّن س - لحقّ.
22 دغي يينياخ، ئيس أخ ئزري أنوش ضّاريبا ئي وݣلّيد ن ـ رّومان قايصار ماد ئهي؟».
23 داي ياشي سيدنا عيسى د - ثاحراميّات نسن أها ينّاياسن:
24 «سنعثاثي يان ؤقاريض ن ـ لفلوس! وين مي وودم أد، د - وين مي ييسم أد نّا غيفس ئتّوارين؟» داي نّاناس: «وين قايصار».
25 أها ينّاياسن: «ئوا، ؤشاث أينّا ئݣان وين قايصار ئي قايصار ثوشيم أينّا ئݣان وين ربّي ئي ربّي!»
26 داي ؤر غين أد غيفس أمژن أود يان واوال داث ن - ميدّن، أها هبضن ݣ ـ ثراريت نّس ؤر ؤفين ماي نّان.
ثانشرا ن - ئمتّينّ
(ماتّى 22:23-33؛ مارقوس 12:18-27)
27 داى دوند غر سيدنا عيسى يتس ن ـ ئصدوقّين، نثني ؤر دا تّامنن ئيس دا تكّرن ئمتّين زݣ لموث، أها سقسانث:
28 «أياسّلماد، دا يتّيني شّرع ن ـ سيدنا موسى: مش ئمّوث شان يوكّ، ئزريد ثامطّوطّ أها ؤر دّيودجّي أراو، ئخصّاياس ئي ݣماس أد ياول ثامطّوطّ نّا حما أد ئݣ أراو ئي ݣماس.
29 ئلين سبعا ن - واماثن. ييول ؤمزوارو أها يمّث ؤر دّيودجّي أراو.
30 ياول ويسّ سّين ثامطّوطّ نّا دّيودّجا ݣماس أها يمّث أود نتّا ؤر دّيودجّي أراو.
31 شوي ياولتّ ويسّ شراض، ألّيݣ ئيتّ ئولن واوماثن س ـ سبعا أها مّتن كول نسن ؤر دّودجّين أراو.
32 داي ثمّت أود ثمطّوطّ نّا فّيراسن.
33 أدّاي ياوض واسّ نّاݣ دّتكّرن ئمتّين، مان ديكسن أمي ثدّا ثمطّوطّ أتّيݣ ثينس؟ ئدّخ س - سبعا نسن كّان ئولنتّ».
34 داي ينّاياسن سيدنا عيسى: «أيث دّونيث أد دا تمياوالن؛
35 ماشان وينّا يحاسب ربّي واثان أدّ كّرن زݣ لموث أها ييلي غورسن ثودرث ن ـ وابدا ؤر دا تّمياوالن،
36 ؤسار مّوثن زݣ ضارث ن - ؤينّا ئدّخ ݣّان أم لملايكاث. نيثني ݣان أراو ن - ربّي، كّرند زݣ لموث حما أد غورسن ثيلي يوث ن ـ ثودرث ثوجديتّ.
37 ئيد خف ثنشرا ن ـ ئمتّين، هاثين أود سيدنا موسى ئسنعثاخ ئيس دا تكّرن ئمتّين ليݣ ئسيول غر ثزݣّارث نّاݣ ثاغ لعافيث، أر ئقّار ئي ربّي: ربّي نّا أر ئتّعباد سيدنا براهيم، د - ربّي نّا أر ئتّعباد سيدنا يسحاق، د - ربّي نّا أر ئتّعباد سيدنا يعقوب.
38 ماشان ربّي ؤر ئݣي ربّي ن - وينّا مّوثنين، ئݣا ربّي ن - وينّا دّرنين. كول نسن دّرن غورس».
39 داي نّاناس ييتّس ن - ئسّلمادن ن - شّرع: «أياسّلماد، ئصحا وينّا ثنّيد!»
40 داي ؤر غين ضارث ن ـ ؤينّا أث سقسان خف شا ضنين.
لماسيح د - سيدنا داود
(ماتّى 22:41-46؛ مارقوس 12:35-37)
41 داي يسقساثن سيدنا عيسى أود نتّا ينّاياسن: «ماكّاس ألّيݣ دا تّينين ئݣا لماسيح ئرو ن - سيدنا داود؟
42 ئدّخ سيدنا داود س - ئخف نّس دا يتّيني ݣ - لشثاب ن - زّابور: "ئنّاياس مولانا ئي مولانا نو: قّيم ݣ - ؤفاسي نو
43 أرد ݣخ ئنضليبن نّش دّاو ن - ئضارّ نّش".
44 داي مش داس ئقّار سيدنا داود ئي لماسيح مولانا، ئوا ماكّاس أيد ئتّݣ ئرو نّس؟».
سيدنا عيسى دا يتّوصا يمحضرّ نّس
(ماتّى 23:1-36؛ مارقوس 12:38-40؛ لوقا 11:37-54)
45 داي ينّاياسن ئي يمحضرّ نّس، ئلين ميدّن كول أر سّغادن:
46 «أوياث بعيتّ ئي يسّلمادن ن - شّرع، هاثين دا تّيرين أد سّاران س - مرسيواث ثيغزافين، أر تّيرين أد غيفسن تسلّامن ميدّن ݣ ـ لاسواق. أر تّيرين أد قّيمين ݣ - ئدغارن ئمزوورا ݣ - ثمزݣيديوين، د - وانسيون ژيلنين ݣ - ثمغريوين».
47 «أر تتّين أينّا ئݣان وين ثينّا مي مّوثن ئرݣزن، أر سغزيفن ثيژيلاّ نسن حما أثن أنّاين ميدّن. خف ؤياد ئقّانثنينّ لعيقاب أخاثار!»