23
سيدنا عيسى دا ئتوصّا ثيربّاع ن ميدن د ئمحضار نّس زݣ لعولاما ن دّين د ئفرّيسين
(مارقوس 12:38-40؛ لوقا 11:37-52؛ لوقا 20:45-47)
1 داي ئسيول سيدنا عيسى يي تربّاع د ئمحضار نّس.
2 ئنّاياسن: "لكورسي ن موسى أخف مي قّيمان لعولاما ن شّرع د ئفرّيسيّين،
3 أينّاون نّان كول ݣاث ثحضومث، ماشان أد ؤر تݣّاث أينّا تݣّان، ئدّخ أينّا س دا سّاوالن ؤر دا تتݣّان:
4 هاثين دا تّسّان أݣّاثن ئزّاين وعرنين ݣ واسّاي ݣينثن خف ثغرضين ن ميدّن، ئد نيثني ؤر دا تّيرين أتن حادان أود س-ؤضاض نسن.
5 أر تݣّان ئسكين نّسن كول داث ن ميدّن حما أتن أنّاين أر سّمغور ئشدّال نّسن، أر سغزيفن ئشضران ن ملسيوث نّسن،
6 أر تّيرين أد قّيمن ݣ ؤدغار أمزوارو ئزيل ݣ زّرداث د وانسيون ئمزوورا ݣ ثيدّار ن دزالّيت ن ربّي،
7 أر تّيرين أد غيفسن سلمن ميدّن ݣ لاسواق، أراسن قّارن ميدّن: أسيدي.
8 ئد كنّي أد ؤر تّادجّاث أود يون أداون ئغر أسيدي، ئدّخ كنّي كول أوماثن أي ثݣام، غرون يون ن سيدي نّون نتّا أݣّان لمسيح.
9 أد ؤر قّاراث يي أود يون بّانو ݣ دّونيت، ئدّخ يون بّاثون أݣ لاّن ئلاّ ݣ ئݣنوان.
10 أد ؤر تّادجّاث أود يون أداون ئقّار ألموعلّـيم، ئدّخ غورون يون لموعلّيم نتّا أݣّان لمسيح.
11 ئد أخاثار ديݣون ئخصّاص أد يݣ أخدّام نّون.
12 هان ونّا ئسمغور ئيخف نّس ئدّا أد ئمـﮋيݣ، ئد ونّا ئسّمـﮋين ئخف نّس ئدّا أد-ئمغور.
13 ماشان أياكن ياغن ألعولاما ن شّرع د ئفرّيسيّين ألمونافقين! ئدّخ د تقّنم خف ميدّن لباب ن ثݣلّيث ن-ئݣنوان، ؤر دا ثكشّمم كنّي ؤر دا تّادجّام ونّا ئران أد ئكشّم أد كشمن.
14 أياكن ياغن ألعولاما ن شّرع د ئفرّيسيّين ألمونافقين! ئدّخ دا تّتشام ثيغراد ن ثيدجال، أر تسغزيفم ثاژالّيت نّون حما أتسنعتم ئخفاو نّون، ئدّا لعيقاب نّون أد ياݣر وين ميدّن ياضنين.
15 أياكن ياغن ألعولاما ن شّرع د-ئفرّيسيّين ألمونافقين! دا تبّيم أشال د لبحر حما أتبرمّم غاس يون ن-ورݣاز أبرّاني غر دّين نّون، أدّاي دتّاويم غورون دا ترارام ئستاهل جاهنّام خف سنات تيكّال!
16 أياكن ياغن أييخاثار ن دّين هاثين ثيام ئدرغال! دا تّينيم ونّا ئݣّولاّن س ثادّارث ن ربّي ؤراس ثزري ثݣّالّيت، ماشان ونّا ئݣّولاّن س دّهب ن ثادارث ن ربّي ئلازم أد ئݣ أينّا خف ئݣّولاّ.
17 أييدرغال ئحياض، ماݣ مقّورن ئد دّهب ماد ثادارث ن ربّي نّا دا ئتقدّاسن دّهب؟
18 أر تّنيم ألثو ونّا ئݣّولّان س-ؤدغار ن-ؤسغرس ؤر-اس ثزري ثݣّالّيت، ماشان ونّا ئݣّولّان س ثمغروسث نّا غيفس ئلّان ئلازم أد ئݣ أينّا خف ئݣّولّا.
19 أييدرغال ئحياض! ماݣ مقّورن، ئد ثوكّي ماد أسغرس نّا دا ئتقدّاسن ثامغروسث؟
20 ئدّخ ونّا ݣ ݣّولّان س-ؤسغرس هاثين داي تݣالّا أود س-ؤينّا غيفس ئلّان كول،
21 ئد ونّا ئݣّولّان س ثادّارث ن زالّيت، دا ئس ئتݣالّا د ربّي ئزدغن ديكس،
22 ئد ونّا ئݣّولّان س-ئݣنّا هاثين دا ئتݣالّا س لكورسي ن ربّي د ونّا ئقّيمان غيفس.
23 أياكن ياغن ألعولاما ن شّرع د ئفرّيسيّين لمونافقين! دا ثاكّام لعشور زݣ نّعناع د لبسباس د لكامون، داي أر تزرّيم أينّا ئهمّان ݣ شّرع: لحق، د رحمث، د ليمان، ئلازمكن أت تݣيم أياد بلا مارا أتّادجم ئسكّين ياضنين.
24 أييخاثار ن دّين! دا تستّيم أمان زݣ ؤبيبا، ماشان دا تصرّضم ألغُم.
25 أياكن ياغن ألعولاما ن شّرع د-ئفرّيسيّين ألمونافقين! ئدّخ دا ثسّزديݣم لكاس د تزلافث زݣ برّا د نيثني زݣ جاج عمّرن س طّمع أها تسايبم.
26 أيافرّيسي أدرغال! ݣ ؤمزوارو سزديݣ جاج ن لكاس د تزلافث، حما أد زديݣن زݣ برّا نّسن ألثو.
27 أياكون ياغن ألعولاما ن شّرع د ئفرّيسيّين ألمونافقين! ئدّخ ثݣام أم ئصنضال ؤمليلن دا تّضهارنث غودان زݣ برّا، ئميل زݣ جاج عمّرن س-ئغصان ن-ئمتّين د تيخّوث.
28 ئمشيد ديخ ألثو أيد ثݣام أود كنّي زݣ برّا داتّضهارم يي ميدّن ئس تصلحم، ئميل كنّي زݣ جاج ثعمّرم س نّيفاق د دّنوب.
29 أياكون ياغن ألعولاما ن شّرع د-ئفرّيسيّين ألمونافقين، ئدّخ دا تبنّوم ئسنضال ن لانبييا، أر تزوّاقم ئصندال ن صّاليحين.
30 أر تّينيم مور نلّي ݣ زّمان ن لجدود نّخ، ؤر نتشّور أݣّيدسن ݣ منغيوث ن لانبييا.
31 أر تشّاهادم خف ئخفاون نّون ئس تݣام كنّي ثاروا ن وينّا ئنغان لانبييا.
32 شملاث كنّي أنّاي بدّان لجدود نّون.
33 أييفيغراون د وارّاو ن-ئيفيغراون! ميمش تݣّام أترولم زݣ لعيقاب ن لعافيت ن جاهنّام؟
34 خف ؤياد دّيخ أداون نّازنخ لانبييا د وينّا غر ثلاّ لحكما د ئكتاتبين ن شّرع، ثنغيم ئيتسن زّيݣسن تطرقم خف ؤحنيݣ ئيتسن، تسلخم ئيتسن ݣ لبيوث ن دزالّيت نّون، تژّعمثن زݣ ثمدينث غر ثمدينث.
35 حما أدّيݣّز غيفون لعيقاب ن-ئدامّن ن كول نّبي نّا ئنغلن خف واشال، زݣ ئدامّن ن هابيل آر ئدامّن ن زكريّا ممّيس ن برخيا نّا ثنغام كونّي ئنݣر ن ثادّارث ن ربّي د ؤسغرص.
36 دّيخ أداون نينيخ لحق، هان لعيقاب-اد كول أد-يݣز خف لجيل-اد!".
ئمطّاون ن سيدنا عيسى خف تمدينث ن لقدس
37 ألقدس، ألقدس! أثنّا ئنغان لانبيّا أها ثرجم ئمازان نّا غورس دّيدّان. شيݣان ن لمرّاث أيد ريخ أد جمعخ أراو نّم، ئمشينّا دّجمع ثفولّوسث ئفراخ نّس دّاو ن وافريون نّس، أها ؤر ثريث.
38 هان ثادّارث نّون ثقّيماون ثخوا.
39 نك ريخ أداون ئينيخ: ؤسار ئتّنّايم زݣ دغي أر أسّ نّاݣ تّينيم: أنبارش ونّا دّيدّان س-ئسم ن مولانا!