22
لمعاني ن ثمغرا ن مميس ؤݣليد
1 داي ئكّر سيدنا عيسى أر-أسن ئساوال ديخ ألثو س لمعاني، ئنّياسن:
2 «ثاݣلديت ن-ئݣنوان أم يون ؤݣلّيد ئݣان ثامغرا يي ممّيس.
3 أها يازن ئسمغان نّس أد غرين يي ميدّن غر تمغرا، ئميل ؤر رّين أد دّون.
4 ئكّر يازن ألثو ئسمغان ياضن، ئنّياسن: دوياث ئنيثاسن ئنبݣاون هان زّردا ئنو ثوجد غرصخ ئ-يزݣارن-ئنو د ئعجّين، د ماݣان شا ئلّا، أدّوياد غر ثمغرا!
5 ماشان ؤر دييس تّيوييْن، كو شا ئدّا غر لهم نّس،
6 ئد شان ئيتسن ؤمژن ئسمغان نّس عايرنثن، نغينثن.
7 ألّيي ئسلا ؤݣلّيد يي وينّا ثطيّراس، يازن لعسكر نّس، ئخلو وينّا نغانين ئسمغان نس، ئسغوس ثامدينث نسن.
8 داي ئنّياسن يي يسمغان نّس: هان ثامغرا ثوجد ئد ئنبݣاون ؤر تسثاهلن شا،
9 دّوياث غر أنّاي جمعن ئبردان، ونّا ثوفام كول غراثاسد غر ثمغرا.
10 داي فّغن ئسمغان غر مانيݣ جمعن ئبردان، جمعند كول أينّا يوفان ن ميدّن مغار خّان نغد غودان، ألّيݣّ ثعمّر ثدّارث ن ثمغرا س-ئنبݣاون.
11 ألّيي ئكشمد ؤݣلّيد حما أد ينّاي ئنبݣاون، يانّاي ديكسن يون ن-ؤرݣاز نّا ؤر ئلسين ئعبان ن ثمغرا.
12 داي ئنّياس: أيامدّاكل، ميمش ثݣيد ألّيݣّ د تكشمث غر داتخ؟ أها ؤر ثلسيث ئعبان ن ثمغرا داي ئفسث ؤرياز.
13 داي ئكّر ؤݣلّيد ئنّياسن ئ-ئسمغان نّس شرفثاس ئضارن د-ئفاسّن نّس ثاويمث ثݣرمث غر برّا ݣ ثالّسث، ديس أي تّيلين ئمطّاون د-ؤغژاژ ن ثوغماس.
14 ئتخ وينّا تّوعرضنين عدّان ئد وينّا تّوخثارّين دروسن».
أسقسي خف ضّاريبا ن-ؤݣلّيد قايصر ن رومان
(مارقوس 12:13-17؛ لوقا 20:20-26)
15 داي دّون ݣ ثسّاعت نّا ئفرّيسيّين مساوال ݣراسن خف ماي تݣّان أد غيفس أمژن شان لفالطا ݣ واوال نّس.
16 أزن غورس ئيتس زݣ ئمحضار نّسن د ئيتس ن-ئهيرودسن، نّناس: «ألموعلـّيم نسّن ئد س لحق أس دا تساوالث، أر تسنعادث س لحق أبريد ن ربّي، أها ؤر دا تتّاويث ݣ أود يون ئدّخ شݣّين ؤر دا تݣات تودماوين.
17 ئنياخ ماݣان رّاي نّش: ئساخ ئزري أنش ضّاريبا ئ-ؤݣلّيد قايصر ن رومان ماد لا؟»
18 داي ييسين سيدنا عيسى ثحراميات نّسن داي ئنّياسن: «ألمونافقين! مّاخ ألّيݣ دا يي دجرّابم؟
19 نعثاثي لفلوس ن ضّاريبا!» أويناسد يون ؤقاريض ن نقرث.
20 داي ئنّياسن: «ثين مي أي ثيا تصويرا ياد د-ييسما؟»
21 نّناس: «ثين ؤݣلّيد قيصر ن رومان!» داي ئنّياسن: «شاث أينّا ئݣان وين قيصر يي قيصر، تشيم أينّا ݣان وين ربّي يي ربّي!»
22 داي ألّيݣ سلان يي وياد بهضن، زرينث دّون ئبردان نسن.
ثانشرا ن-ئمتّين
(مارقوس 12:18-27؛ لوقا 20:27-40)
23 داي دّوند غورس ݣ واسّ نّا ئيتّس ن-ئصدّوقين، نّا دا ئتّينين ؤر ثلّي ثنشرا ن-ئمتّين، داي سقسانث.
24 نّناس: «ألموعلّـيم، ئنّا موسى مش ئمّوث شان يون، أها ؤر د يودجي أرّاو، ئخصّا ݣماس أد ياول ثامطّوط نّس حما أد ئݣ أرّاو خف ئسم ن ݣماس.
25 داي ئلين غورّخ سبعا دا وماثن، ياول ؤمزوارو ئميل ئمث ؤر د يودجّي ثاروا، أها ئزريد ثامطّوط نّس يي ݣماس.
26 زايدن ئمشيس أݣ جران ئويسّين د ويشراض ألّيݣ ن ثيوض غر ويس سبعا ئمّث.
27 ݣ ؤمݣارو تمّوت تمطّوط نّـا.
28 ئوا دغي ماني ونّاݣ تݣن أرياز يي ثمطّوطا ݣ واسّ ن ثنشرا، ئثخ كول نسن كّان ئولنت».
29 داي ئجاوبثن سيدنا عيسى ئنّياسن: «كنّي ثغالضم ؤر تسّنم لا يوال ن ربّي ولا لجهد نّس.
30 ئدّخ ݣ واسّ ن تنشرا ؤر-ئلّي ييول أود يون ؤر دا ي تمياوال، ماشان دا تݣّان أم لمالايكاث ن ربّي ݣ ئݣنوان.
31 ئد زݣ جّيهث ن تنشرا ن وينّا مّوثنين، ئس ؤر ثقرام أينّا ئتيارون ݣ شثاب ن ربّي.
32 نكّين أݣان ربّي ن براهيم د ربّي ن-إسحاق د ربّي ن يعقوب، ربّي ؤر يّي ربّي ن وينّا مّوثنين، ماشان ربّي ن وينّا درنين.
33 ألّيݣ سلانث ثربّاع يي وياد بهضن ݣ-ؤعلّم نّس.
لوصيث تاخثارث
(مارقوس 12:28-34؛ لوقا 10:25-28)
34 ئد ئفرّيسيّين ألّيݣ سلان ئس ئس فسثا سيدنا عيسى ئصدّوقين داي جمعن ݣراسن.
35 داي ئسالث يون زّييسن ئݣان زݣ لعولاما ن شّرع حما أتيجرّب ئنّياس:
36 «ألموعلـيم، ماݣان لوصيث ثخثارث ݣ شّرع؟»
37 داي ئنّاياس سيدنا عيسى: «أتّيريث ربّي مولانا نّش زݣ وول نّش كول د زݣ نّفس نّش كول د زݣ لعقل نّش كول.
38 ثاد أݣّان لوصيث ثاخثارث تامزواروت.
39 ثيسناث أم تمزواروت، أتّيريث أدجّار نّش أم ئخف نّش.
40 خف سناث ن لوصيّاث-اد أخف ئتّوبنا شّرع د شثاب ن لاّنبيا».
سيدنا عيسى د سيدنا داود
(مارقوس 12:35-37؛ لوقا 20:41-44)
41 ألّيݣ جمعن ئفرّيسيّين داي ئسالثن سيدنا عيسى.
42 ئنّياسن: «مايدا تّينيم خف لمسيح؟ ممّيس ن مي أݣا؟» داي نّناس: «ممّيس ن داود أݣا!»
43 داي ئنّياسن: «ئوا، ماخ ألّيݣ داس ئقّار داود أمولانا س رّوح ن ربّي، ألّيݣ ئنّا:
44 ئنّاياس ربّي يي مولانا:
قّيم خف ؤفاسي ئنو
أر د ݣخ ئعداون نّش دّاو ن-ئضار نّش.