14
أجّوجي ن - يان ؤموضين س - واسّ ن - سّبث
1 يان واسّ ن - سّبث، ئكشم سيدنا عيسى غر ثادّارث ن - يوكّ زݣ ئخاثارّ ن - ئفرّيسين حما أد غورس ئتشّ، قّيمين ميدّن حضونث.
2 ييلي ديسّ يان ؤرݣاز نّا ياغشا، بزيناس ئضارّ د ـ ئفاسّن.
3 داي يسقسا سيدنا عيسى ئسّلمادن ن - شّرع د - ئفرّيسين ئنّاياسن: «ئيس ئزري وجّوجي ن ـ ميدّن س - واسّ ن - سّبث ماد ئهي؟»
4 ماشان فسثان ؤر نّين شا، داي يامژ أرݣاز ئجوجيث يازنث ئبردان نّس.
5 داي يبرّم غورسن أها ينّاياسن: «ؤنّا مي ياتّوي ديݣون ؤغيول a نّس نغد أزّݣر نّس ݣ - وانو س - واسّ ن - سّبث، ئيس ؤر ثيد ئنزّغ ݣ ـ وانسا؟»
6 داي ؤر غين أد غيفس رارين.
أوال خف ؤسنّبݣو
7 نتّا يانّاي وينّامي يتّوغرا كول أر ستّين ئدغارّ نّا ژيلنين، داي ينّاياسن لقيسث أد:
8 «أدّاي أش ئغر شان يون غر ثمغرا، أد ؤر تّغيما ݣ - ؤدغار ئژيلن ئدّخ غوراش أد ييلي باب ن ـ ثمغرا ئغراد ئي شان يوكّ نّاش يوفن.
9 أها يدّود غورش يينياش: "كّر أدّج أرݣاز أد ئقّيم ݣ ـ وانسا نّش". داي ثحشّمد لوقث نّا أها ثدّود أتّقّيمد ݣ ـ يار أنسا.
10 ماشان أدّاش ئتّوغر، أها ثدّود ثقّيمد ݣ ـ شان ؤدغار نّا ؤر ئژيلن حما أدّاي ديدّو ؤنّاش ئغران أها يينياش: "أيامدّاكول ئنو، كّر هاياش أنسا نّا يوفن واد" داي ئبورزاش داث ن - ئنبݣيون ضنين كول.
11 ئدّخ هاثين وونّا دا يسخاثارن ئخف نّس ئدّا أد ئيسّ ئتّوسّمژيي، ئيد وونّا دا يسّمژيين س ـ ئخف نّس ئدّا أد ئيسّ ئتّوسخاثر».
12 داي ينّاياس أود ئي ونّاس ئغران: «أدّاي ثݣد شان ئمشلي نغد ئمنسي أد ؤر قّار ئي يمدّوكّال نّش ؤلا أيتماش ؤلا لاهل نّش ؤلا أدجّارّ نّش نّا طّرّحنين، ئدّخ دّان أود نيثني أداش غرين أها راريناش أينّا ثݣيد.
13 ماشان أدّاي ثݣد شان زّردا، أها ثغرد ئي يمژلاض د - ئفوشالّ، د - ئحيزان، د - ئدرغالن.
14 داي يدّا ربّي أدّيك ئيݣ لباراكا ݣ - واس نّاݣ دتّكّرن وينّا منانين زݣ لموث ئدّخ ثغريد ئي وينّا غر ؤر ئلّي ماس أش تّراران».
مايد ئتّتّان ݣ - ثݣلديتّ ن - ربّي؟
15 نتّا يسلّا يون زݣ وينّا قّيمانين ئي وياد أها ينّاياس: «أياعريتّ ن - ونّا غا يامژن أنسا نّس ݣ ثمغرا نّا غا ييلين ݣ - ثݣلديتّ ن - ربّي!»
16 داي ينّاياس سيدنا عيسى: «ئݣا يان ؤرݣاز يوث ن ـ زّردا ثاخاثارث أها يغر ئي شايݣان ن - ميدّن.
17 يازن ئسمغ نّس أتّاين ن - لوقث ن - ووتّشي حما أد ييني ئي وينّامي ئغرا: "أوريو هاثين ئوجد كولشي!"
18 ماشان قّيمان كول نسن أر كّاثن ثيسعدار، داي ينّاياس ؤمزوارو: "هاثين أبحرا سغيخ يان ييݣر ئخصّايي أد دّوخ أث أنّايخ، عافاك سامحي".
19 داي ينّاياس وايّاض: "أبحرا سغيخ خمسا ن - تيوݣّاوين ن - ئزݣارّ، ريخ أد دّوخ دغي أثن جرّبخ، عافاك سامحي".
20 أها ينّاياس وايّاض: "نكّينثين أبحرا ييولخ، خف ؤياد هاثين ؤر تّيغيخ أنّدّوخ"».
21 «ياغولدّ ئسمغ غر باب نّس ئقّياس أينّاس نّان، أها يطيّراس ئي باب ن - ثادّارث داي ينّاياس ئي يسمغ نّس: "فّغ دغيا غر ئساراݣن ن - ثمدينث د - ئزنيقن نّس أها ثاويددّ لمساكين د - ئفوشالّ د - ئدرغالن د ـ ئحيزان"».
22 «ياغولدّ ئسمغ ئنّاياس: "أسيدي، هاثين ݣيخ أينّايي ثنّيد أها يسول ؤدغار ألتو يورا".
23 داي ينّاياس باب نّس ئي يسمغ: "فّغ غر ئبردان ن - برّا د - ئنݣر ن - ئفراݣن أها ثݣد دّرع ئي ميدّن أدّ دّون حما أتعمّر ثادارث ئنو".
24 ئدّخ أداون ئنيخ، هاثين أود يوكّ زݣ ئمزوورا دّاخ نّامي غريخ ؤر ئدّي أد يارم ؤتّشي نو!»
وونّا يران أد ئيݣ أمسّثفر ن ـ سيدنا عيسى
25 ئلين شايݣان ن - ميدّن أر تمونن د ـ سيدنا عيسى، داي يبرّم غورسن أها ينّاياسن:
26 «ؤنّا يران أد ئيݣ أمحضر ئنو، ئخصّاياس أدي ييري ؤݣار ن ـ ئبّاس د - مايس، د - ؤݣار ن ـ ثمطّوطّ نّس د - واراو نّس، د - ؤݣار ن ـ أيثماس د - ئسّثماس، د ـ ؤݣار أود ن ـ ئخف نّس.
27 د - ؤنّا ؤر يوسين أحنيݣ نّس ن ـ ؤطّورق نّس أها يثفاريي، ؤر ئتّيغي أد ئݣ أمحضر ئنو.
28 مش ئرا شا ديݣون أد ئبنو شان ثمالايث، ئيس ؤر ئتّغيما بعدا أد ئݣر لحساب، حما أد ئراعا ئيد أداس ئقدّا ؤينّا غورس ئلّان ماد ئهي؟
29 ئدّخ مش أس ئݣا لساس أها ؤر ئغي أتّيشمّل، دّان كول وينّا غا يانّاينين أياد أد غيفس تصّين،
30 أر تّينين: "أرݣاز أد أر ئبنّو ثمالايث أها ؤر ئغي أتّيشمّل"».
31 «نغد مش ئرا شان ؤݣلّيد أد ئكشم ئمنغي د - شان ؤݣلّيد ياضن، ئس ؤر ئتّغيما بعدا أد ئمشاوار د ـ ئخف نّس ئيد أد ييغي أد ئنّال س - عشرالاف ن ـ ؤعسكري ؤنّا غورس ديدّان س - عشرين ألف؟
32 ئيد مش ؤر ئغي، أد غورس يازن ئمازانّ أد زّيكس ئتّر أد ميوݣّان لهنا ماحدّ نّيسول ݣ ـ تّيساع؟».
33 «ئوا أود كونّي، ؤنّا ؤر ئغين أد ئزري أيدّا نّس كول غيفي، ؤر ئتّيغي أد ئݣ أمحضر ئنو».
ثيسنث
(ماتّى 5:13؛ مارقوس 9:50)