13
لابودّا ن - تّوبث
1 دّوند ݣ - لوقث نّا ييتس ن - ميدّن أها قّيسناس ئي سيدنا عيسى ئيس ئنغا ونبّاض بيلاطس ييتس ن ـ ميدّن زݣ لجاليل نّا دّدانين غر ثدّارث ن ـ ربّي ݣ ـ لقدس حما أد ؤشين ثيمغراص ئي ربّي، أها يشّار ئدامّن نسن د ـ وين ن ـ ثمغراص نسن.
2 داي ينّاياسن سيدنا عيسى: «ئيس ثغالم ئيس ݣان ئجاليلين أد لمعصيّاث ؤݣار ن - أيث لجاليل ضنين ألّيݣ أسن ئجرا وياد؟
3 داون تّينيخ ئهي، ماشان هاثين مش ؤر تّوبم، ثدّام أود كونّي أتّخلوم كول نّون،
4 ئي ثمنطاعش ن - ميدّن نّا خف ياتّوي لبرج ݣ - سيلوام أها ينغيثن؟ ئيس ݣان أود نيثني لمعصيّاث ؤݣار ن - ميدّن كول نّا زدغنين ݣ - لقدس؟
5 داون تّينيخ ئهي، ماشان هاثين مش ؤر تّوبم، ثدّام أود كونّي أتّخلوم كول نّون».
6 داي ينّاياسن لقيسث أد: «ئژّا يان ؤرݣاز يوث ن - ثازارث ݣ - وورثي نّس. يان واسّ ئدّود أد زّيكس ئكّس ئقورّان، ئميل ؤر ديكس يوفي شا.
7 داي ينّاياس ئي وبحّار: "هاثين شراض ن - ئسݣّاسن أيا دا دتدّوخ غر ثازارث أد بار أتّيد أفخ ثيرو شا، ئميل ؤر دا ديكس دتّافاخ أود يان ؤقورّو. بّيت! غاس ثومژ أشال؟"
8 داي ينّاياس ؤبحّار: "أسيدي، غاس أدجّيتّ أسݣّاس أد ديخ ألثو، دّيخ أداس سضورخ أنقّش أها ݣخاس لغبار،
9 بار أتّارو شا ييمال، داي مش ؤر ثيرو شا أها ثبّيتّ"».
أجّوجي ن - ثمطّوطّ س - واسّ ن - سّبث
10 يان واسّ ن - سّبث، أر ئسّقرا سيدنا عيسى ݣ - يوث ن - ثمزݣيدا ن ـ ووداين.
11 داي ثيلي ديسّ يوث ن - ثمطّوط نّاّ يسفوشل يان دجّن: ثمّنطاعش ن - ؤسݣّاس أيد أر تدّو س - ؤحودر، ؤر أر تّيغي أتبدّ ثارضاراس.
12 نتّا يانّايتّ سيدنا عيسى، ئغراس أها ينّاياس: «أثامطّوطّ، هاثين ثجّيد زݣ ييغنشا نّم».
13 ئسيرس غيفس ئفاسّن نّس أها ثاغول ثيدّي نّس ثطّعنا ݣ ـ وانسا، ثقّيم أر تّحماد ئي ربّي.
14 ماشان يطيّراس ئي وخاثار ن - ثمزݣيدا ئدّخ ئجّوجي سيدنا عيسى ثامطّوط نّا س - واسّ ن ـ سّبث، أها ينّاياسن ئي ميدّن: «هاثين ستّا ن ـ ووسّان أݣ ئخصّا أتخدّمم، ئوا أوريو ݣ - وسّان نّا أديكسن ثتّوجّوجيم، ؤر ئيد س - واسّ ن - سّبث!»
15 داي ينّاياس سيدنا عيسى: «ألمونافيقين، ئيس ؤر دا يتّنورژوم كّو يون ديݣون ئي وزݣر نّس نغد ئي وغيول نّس زݣ لمدود ݣ - واسّ ن - سبّث أها ياويث أث ئسّو؟
16 ئي ثمطّوط أد ئݣان ئلّيس ن - سيدنا براهيم أها يكرفتّ شّيطان ثمنطاعش ن - ؤسݣّاس، ئيس ؤراس ئتّياكّاس ؤشاريف أد ݣ - واسّ ن - سّبث؟»
17 نتّا ينّا أياد، أها يسّحشم وينّا أرث تغانّانين كول، داي فرحن ميدّن كول س ـ ئسكينّ ئخاثارّ نّا أر ئتݣّا.
لقيسث ن - ييفس أمژّيان
(ماتّى 13:31-32؛ مارقوس 4:30-32)
18 ئقّيم سيدنا عيسى أر ئتّيني: «ميمش ثݣا ثݣلديتّ ن - ربّي؟ ما غر تسّرويسخ؟
19 هاثين تݣا أم شان ييفس أمزّيان نّا يوسي شان يوكّ ئژّوث ݣ - ثبحيرث نّس، أها يمغيد ياغول ئݣ ثاخليدّجث أها زدغن ئجضاض ݣ ـ ئسضوان نّس».
لقيسث ن - ثمثونث
20 أها ينّا ديخ ألتو: «ما غر سّرويسخ ديخ ثاݣلديتّ ن - ربّي؟
21 ثݣا أم ثمثونث نّا ثوسي شان ثمطّوطّ ثوݣّيتّ ݣ - شراطّ ن - لعبراث ن - واݣّورّ أها ثسّمثن أرشثي كول».
لباب ئقمرن
22 أر ئتكّا سيدنا عيسى ثيمدينين د - ئسونّ لّيݣ ئدّا ݣ - ؤبريد غر لقدس، أر ئسقرا ميدّن،
23 داي يسقساث شان يوكّ ئنّاياس: «أسيدي، ئيس دروسن وينّا غا تّوفوكّانين؟» داي ينّاياسن:
24 «ݣاث ثامسّومانث أتّكشمم غر دّجنث زݣ لباب نّا يقمرن ئدّخ هاثين مشثا ن ـ يوكّ أيد ئدّان أد ئرزو أد ئكشم أها ؤر ئتّيغي.
25 أدّاي يقّن باب ن - ثادّارث لباب، ؤر ئقّيمي وكتّشوم أها ثقّيميم برّا أر ثكّاثم لباب أر تّينيم: "أمولانا رژماخ. "داي يدّا أداوند ييني: "ؤر كون سّينخ!"
26 أها ثينيماس: "هاثين نتشّا نسوا أݣيدش أها تسّقراد ݣ - ئساراݣن نّخ".
27 داي يينياوند ديخ ألتو: "ؤر سّينخ ما زݣ ثݣام، دّوياث زّيݣي كول أوينّا دا تّݣّانين لمعصيّاث"».
28 «ديسّ أݣ غا يلين ئمطّاون د - ؤسمّغژاژ ن - ثوغماس أدّاي ثانّايم سيدنا براهيم د - سيدنا يسحاق، د - سيدنا يعقوب، د - لانبيا كول لّان ݣ - ثݣلديتّ ن - ربّي د - كونّي ثقّيمام برّا نّس.
29 دّان أدّ دّون ميدّن زݣ مايد ئݣان أنسا ݣ ـ دّونيث أد أمژن أنسيون نسن ݣ ـ ثمغرا نّا غا ييلين ݣ - ثݣلديتّ ن - ربّي.
30 داي وينّا ݣانين دغي ئنݣّورا دّان أد ݣين ئمزوورا، د ـ وينّا ݣانين دغي ئموزوورا دّان أد ݣين ئنݣّورا».
سيدنا عيسى د - هيرودوس
31 شوي دّوند ييتّس ن - ئفرّيسين نّاناس: «فّغ سّياد، دّو رول هان هيرودس ئرا أكّ ئنغ!»
32 أها ينّاياسن: «دّوياث ئنيياثاس ئي يكعب نّا، هان نكّين دا سّوفوغخ أدجّنون أر جّوجويخ ئموضين أسّاد د - واسكّا. داي ݣ ـ واسّ ويسّ شّراض، دّيخ أد شمّلخ لخدمث ئنو.
33 ماشان ئخصّايي أد شمّلخ أبريد ئنو أسّاد د - واسّكا د - وانيݣن ن ـ واسكّا ئدّخ ؤراس ئخصّا أود ئي يان نّبي أد ئتّونغ برّا ن - لقدس».
ئمطّاون ن - لماسيح خف لقدس
34 «ألقدس، ألقدس! أتنّا ينقّين لانبيا أها ثرجم ئمازانّ ن ـ ربّي! مشثا ن - ثيلمرّات أيد ريخ أد سمونخ أراو نّم ئمشينّا دا تّسمون ثفولّوسث ئشيشاون نّس دّاو ن - وافريون نّس أها ؤر ثريم.
35 هاياون ثدّارث نّون أداون ثقّيم ثورا، د - سثيتّ أداون ئنيخ: هاثين ؤسار ئي ثانّايم ألّ تثدّو لوقث نّا ݣ - تّينيم: "أنبارش أيد ئݣا ونّا دّيوزن ربّي!"».