13
لقيست ن ونّا ئزرّعن
(مارقوس 4:1-9؛ لوقا 8:4-8)
1 داي ئفّغ ݣ واسّ نّا سيدنا عيسى زݣ ثادّارت ئقّيم تاما ن لبحر.
2 أها دّوند غورس شيݣان ن ميدّن ألّيݣ ئكّر ئني ݣ يون ن-ؤغرّابو ئقّيم، لّان ميدّن كول نّسن بدّان ݣ طرف ن لبحر،
3 داي أر-اسن ئساوال س شيݣان لمعاني، ئنّاياسن: «هان يون ن-ؤورݣاز ئفّغ أد ئزرع.
4 داي نتّا أر ئزرّع، تّوتّين ئيتّس ن-ئفسان ݣ ؤبريد، دّوندّ ئجضاض تشّينتن.
5 أها تّوتّين وييْض ݣ أشال ئݣان ئزرا، ماشان ئدّخ ؤر ئيعدّي واشال، فيساع كّرند ئدّخ ؤر آسن ئغبي واشال.
6 ماشان ألّيݣ دتنقّر تافوشت غيفسن، قّارن ئدّخ ؤر غورسن لّين ئژوران.
7 داي تّوتّين وييْض ئينݣر ن-ئسنّان، مغيند ئسنّان جيّفنتن.
8 أها تّوتّين وييْض ݣ واشال ئغودان، ݣين لغلت ئغودان، شين مييّا، د وييْض ستّين، د وييْض تلاتين.
9 د ونّا غر لّان ئمجّان أد ئسّغد، ئسّغد!»
لمعنا ن-ئد لميتال
(مارقوس 4:10-12؛ لوقا 8:9-10)
10 داي قيمن تما نّس ئمحضار نّاناس: «مّاخ ألّيݣ داتساوالت يي ميدّن س لمعاني؟»
11 ئجاوب ئنّاياسن: «ئدّخ أون ئتّونشفا أد تّيسينم سّر ن-تݣلديت ن-ئݣنوان، ئد يي ويض ؤراسن ئتّونشفا شا.
12 هاثين ونّا غر ئلّا شا، ئدّا أداس ؤشين زايدناس، ئد ونّا غر ؤر ئلّي شا، أود أينّا غورس ئلّان ئدّا أداس ئتّواكّس.
13 خف ؤياد أخف داسن ساوالخ س لمعاني، ئدّخ دا تراعان ؤر دا تّانّاين، أر سّغادن ؤر دا تسلّان أها ؤر دا تفهامن.
14 هاثين ئجراسن ؤينّا غيفسن ئيخبّر نّبي إشَعْيَا، ئنّان: «واخا دا تسلام يي أينّا مي تسلّام ؤر دا تفهامم والو، أر تّراعام أر تنّايم ماشان ؤر دا تّنّايم.
15 ئدّخ لقوم-اد سقسحن ؤلاون نّسن، ستيلن أسّفلد ن-ئمجّان نّسن، قّنن ألّن نّسن، حما أد ؤر تّانّاين س-وال نّسن، د ؤر سفليدن س-ئمجّان نّسن، د ؤر تفهامن س-ؤولاون نّسن أها بلا مارا ثن سّوجّيخ».
16 ماشان أياعرينسث يي والّن نّون ئدّخ داتّراعانت د يي ئمجّان نّون ئدّخ دا سغادن.
17 هاثين لحق أداون تّينيخ: شيݣان ن لانبييا د صّاليحين ران أد أنّاين أينّا دا تّانّايم كنّي أها ؤر أنّاين شا، سلّين يي ؤينّا مي تسّغادم أها ؤر سّغيدن شا».
لمعنا ن ونّا ئزرّعن
(مارقوس 4:13-20؛ لوقا 8:11-15)
18 «سّغداث كونّي يي لمعنا ن لميتال ن ونّا ئزرّعن.
19 كول ونّا ئسّغادن يي واوال ن تݣلديت ن ربّي أها ؤر دا ث-يتفهام دا دّيتدّو شّيطان ئحوّژ أينّا ئزرعن ݣ-ؤول نّس: وادخ ئݣا أم ئفسان ئتّوتين ݣ ؤبريد.
20 د ئفسان ئتّوتّين ݣ ؤدغار ئݣان ئژرا: وادخ ئݣات ونّا ئسّغادن يي واوال فيساع يامژت س-ؤفراح،
21 ماشان ؤر غورس ئلّي ؤژور، أخثار شا غاس شان لوقت ئدروسن، داي مش تكر ثيريت د لقهرا خف نّيرت ن واوال ن ربّي فيساع داي ردّل.
22 د-ئفسان ئتّوتّين ئينݣر ن-ؤزݣّار: ئݣات ونّا ئسغادن ئ-واوال أها ئتّوجيّف واوال س-ؤنزݣوم ن دّونيت د ؤخمّم ݣ ؤطرّح أها ؤر دا ئتّݣّ لغلْت.
23 ئد ئفسان ئتّوتّين ݣ واشال ئـﮋيلن: ئݣات ونّا ئسغادن يي واوال ن ربّي ئيفهمت، د نتّا أيد ئتݣّان لغلت، ݣين ييتّسن ميّا ن-ؤحبوب وييْض ستّين د وييْض ثلاثين».
لقيست ن ثباوشث
24 أها ئزايداسن يون ن لمعنا ياضن، ئنّاياسن: «ترويس تݣلديت ن-ئݣنوان يون ن-ؤرݣاز ئزرعن ئفسان ئژيلن ݣ ئݣر نّس.
25 داي نتّا ݣن ميدّن، ئدّودّ يون ؤعداو نّس ئݣراس ثاباوشث ݣ وامّاس ن-ئمندي ئدّو.
26 نتّا ئمغيد ئمندي ئݣ ئبورخصن، لوقت نّا مغيند أود ثاباوشث.
27 داي دّوندّ ئسمخان ن باب ن تادّارت، نّاناس: «أسيدي، ئس ؤر ئد ئفسان ژيلنين أيد تزرعت ݣ ئݣر نّش، ئوا ماني زݣ ددّانت ثباوشين؟»
28 أها ئنّاياسن: «شان ؤعداو أيد ئݣان أياد»، نّاناس ئسمخان: «ئد ئس تريت أندّو حما أتنقلع؟»
29 ئسيول ئنّاياسن: «ؤهو، تدّام أتسمونم ئمندي د ثباوشث أدّاي تنقلعم.
30 غاس أدجّاتن أد مغين كول نّسن أر تمݣرا، داي ݣ لوقت ن تمݣرا أد ئنيخ يي ئشوّالن، قلعاث ݣ ؤمزوارو أصكّون تݣيمت د تّادلوين حما أد ئغوس، ئد ئمندي أد تسمونن ݣ ؤخزين ئنو».
لميتال ن زرّيعث ن ثيشيط
(مارقوس 4:30-32؛ لوقا 13:18-19)
31 أها ئسيولاسن س يون ن لميتال ياضن، ئنّاياسن: «دا تشباه تݣلديت ن-ئݣنوان ݣ يون ؤعقّا ن ثيشيط يومژت يون ن-ؤرݣاز ئزرعث ݣ ئݣر نّس.
32 أعقّا ن ثيشيط نتّا ئمژّيي ݣ ئفسان كول، ماشان أدّاي ثمغور تسكلوت نّس ثاݣر ثوݣا تݣ أسكلو أر غورس تتدّون ئجضاض ن-ئݣنّا زدغن ئنݣر ن-ئشبضان نّس».
لميتال ن ثمثونث
33 داي ئنّاياسن يون ن لميثال ياضن: «ثݣا ثݣليت ن-ئݣنّا أم تمثونث نّا تومژ يوت ن تمطّوط تݣيت ݣ شراط ن لعبرات ن-أورن ألّيݣ مثنن كول نّسن».
سيدنا عيسى د-ئد لميتال
(مارقوس 4:33-34)
34 أياد كول ئنّات سيدنا عيسى س لمعاني ئ-تربّاع، ؤر داسن ئساوال غاس س لمعاني.
35 حما أد ئجرو ؤينّا ئنّا نّبي ئنّان: «دّيخ أد رژمخ ئيمنو س-ئد لمعاني، سفهمخ أينّا ئنثلن زݣّ ليسبدا ن دونيث».
لميتال ن لخرطال
36 داي يازن سيدنا عيسى تيربّاع ئيبردان نّسن ئكشم غر ثادّارث، دّوند غورس ئمحضار نّس أها نّاناس: «سفهماخ لمعنا ن لقيست ن تباوشت ن ييݣر».
37 ئسيول ئنّاياسن: «ونّا دا يزرعن ئفسان ژيلنين ئݣات: ممّيس ن بنادم.
38 د ئيݣر تݣات: دّونيت، د ئفسان ژيلنين ݣانتن أراو ن تݣلديت، د-ئفسان ن تباوشت ݣانتن أرّاو ن-إبليس.
39 د ؤعداو نّا تّيزرعن ئݣات إِبْلِيس، د لوقت ن تمݣرا ئݣات ؤمݣارو ن دّونيت، د ئشوّالن ݣانتن لمالايكا.
40 داي ئمشينّا دا سمونان تاباوشت حما أتغوس س لعافيت، ئمشيد أيد ئتجرون ݣ ؤومݣارو ن دّونيت.
41 ئدّا ممّيس ن بنادم أد ديازن لمالايكا نّس، أها سمونن زݣ تݣلديت نّس كول أينّا ئستوتين ميدّن ݣ دّنب د وينّا ئتݣّن أينّا ؤر ئݣين لقانون.
42 ݣرينتن ݣ لكوشت ن لعافيت، دينّا أيد تّيلين ئمطّاون د ؤغژاژ ن ثوغماس.
43 ݣ لوقث نّا أد سّادن وينّا تضاعنين ربّي، ݣين أم تافوشت ݣ تݣلديت ن بّا تسن. وينّا غر لّان ئمجّان أد-ئسفلد، ئسغد!
لقيست ن لكنز د جّوهر
44 «ثݣليت ن-ئݣنوان ثݣا أم يون ن لكنز ئنضلن ݣ يون ن-ئيݣر، يافث يون ؤورݣاز ئفّرث، أها ئدّو س-ؤفراح ئزّنز أيدّا نّس كول ئدّو ئسغ ئيݣر نّا.
45 ثݣا ألتو تݣلديت ن-ئݣنوان أم يون ن-ؤرݣاز ئݣان أم ؤسبّاب دا يتفتّاشن خف لجوهر ئغلان.
46 نتّا يوفا يوث ن تالجوهارت ئغلان، ئدّو ئزّنز أيدّا نّس كول. ئسغث.
لقيست ن تراتسا ن ؤنݣمار (أصيّاد)
47 دا تشباه تݣلديت ن-ئݣنوان، يوث ن ثراتسّا ئتّوݣران ݣ لبحر، ثامژ لانواع ن-ئسلمان كول.
48 نتّا ثعمّر نزغنتّيد غر طرف ن لبحر، قّيمن أردجماعن وينّا ئغودان ݣ تزݣاوين، ئد وينّا ؤر ئحلين ݣرانتن برّا.
49 ئمشيد أيد ئتّجرون غر ؤومݣارو ن دّونيت، أد ددّون لمالايكا، عزلن وينّا ؤر ئحلين زݣ وامّاس ن وينّا ضاعنين ربّي.
50 ݣرينتن ݣ لكوشت ن لعافيت، دينّا ݣ تّيلين ئمطّاون د ؤغژاژ ن توغماس».
ؤجديد د ؤقديم
51 داي ئسقسا سيدنا عيسى ئمحضار نّس: «ئيس تفهمم أياد كول؟» نّاناس: «يّيه».
52 أها ئنّاياسن: «خف ؤياد كول ونّا ئݣان أسلماد زݣ ن-شّرع نّا ئسنّ خف تݣلديت ن-ئݣنوان، دا ئتشباه يي يون باب ن ثدّارت دا يسّفوغ زݣ لكنز نّس أينّا ئݣان ؤجديد د-ؤينّا ئݣان أقديم».
ئمزداغ ن تمدينث ن نّاصرا ؤر ؤمينن س سيدنا عيسى
(مارقوس 6:1-6؛ لوقا 4:16-30)
53 داي نتّا ئشمّل سيدنا عيسى لمعاني، ئموتّي زيݣسن.
54 أها لّيݣ دّيدّا غر تمازيرث نّس ئلّا أر تن ئسّغرا ݣ ثادروين ن تزاليت نّسن، داي رعبن أها نّان: «ماني زݣ أس تكّا لحما-ياد يي واد د لموعجيزاث آدخ؟
55 ئس ؤر-ئد وادخ أيد ئݣان ممّيس ن-ؤنجّار؟ ئس ؤر ئد مّا نّس ئسم نّس مريم، د أيتماس يعقوب، د يوسف، د سمعان، د يهوذا؟
56 ئس ؤر لّينت غورخ ئستماس كول نسنت؟ داي ماني زݣ دّيكّا ؤياد كول يي وادخ؟»
57 أها شكّان ديكس، ئد سيدنا عيسى، ئنّاياسن: «ؤور ئلّي أود يون ن نّبي غر ئلّا لوقر ݣ تمازيرث نّس د-أيت ؤخام نّس».
58 داي ؤر ئݣي دينّا شيݣان ن لموعجيزات ئدّخ ؤر ئس ؤمينّ.