4
شّيطان أر ئتجرّاب سيدنا عيسى
(ماتّى 4:1-11؛ مارقوس 1:12-13)
1 داي ياغولدّ سيدنا عيسى زݣ واسيف ن ـ لوردون ئتّوعمّر س - رّوح ن ـ ربّي، أها يحريث رّوح ن ـ ربّي ݣ - لخلا
2 أرث ئتّجرّاب شّيطان ربعين ن - واسّ، ؤر ئتشّي أود ئميقّ ݣ - ووسّان نّا. نتّا زرين أها ينغيث لاژّ.
3 داي ينّاياس شّيطان: «مش ثݣيد ممّيس ن - ربّي، ئنيياس ئي وژرو ياد أد ياغول أد ئݣ أغروم».
4 ئرار غيفس سيدنا عيسى ينّاياس: «هاثين ئتّياري ݣ ـ لشثاب ن ـ ربّي: ؤريد غاس س - ؤغروم أس دا يتّيدير بنادم».
5 داي يسّيليث شّيطان غر يان عاري نّا يعولّان، ئسنعثاس ثيݣلّيدين ن - دّونيث كول ݣ ـ شان لوقث ئدروسن،
6 أها ينّاياس: «أداش ؤشخ ثانباطّ خف ثݣلّيدين أد كول د - لعزّ نسنث ئدّخ ئي تمّوشنث، د - نكّين أثنث ؤشخ ئي ونّا ريخ.
7 ئوا مش ثبندقد خف ئفادّن نّش داثي، أد ئݣ ؤياد كول وينش».
8 ئرار غيفس سيدنا عيسى ينّاياس: «هاثين ئتّياري ݣ ـ لشثاب ن ـ ربّي: أد ؤر تّبنداق غاس ئي مولانا يݣان ربّي نّش، د ـ غاس نتّا ييويل نّس أغا تّعبادّ».
9 داي ياويث شّيطان غر ثمدينث ن - لقدس، ئسّيلث غر ئخف أنافلّا ن - ثادّارث ن - ربّي أها ينّاياس: «مش ثݣيد ممّيس ن - ربّي، ئوا ݣر ئخف نّش زݣ سّياد غر سادّا،
10 ئدّخ ئتّياري ݣ ـ لشثاب ن ـ ربّي: ئدّا ربّي أد ييني ئي لمالايكاث نّس أكّ حضونث.
11 دّانث أك أسينث ݣ - ئفاسّن نسنث حما أد ؤر ئتّمناقّار ؤضار نّش د - شان ؤژرو».
12 ئرار غيفس سيدنا عيسى ينّاياس: «هاثين ئتّياري ألثو ݣ ـ لشثاب ن ـ ربّي: أد ؤر تّجرّاب مولانا ربّي نّش».
13 لّيݣ ئشمّل شّيطان أينّاس أرث ئتجرّاب كول، ئدّو يحيداس أرد غورس ياف ديخ أبريد.
أيث ثمدينث ن - نّاصيرا ؤر حميلن سيدنا عيسى
(ماتّى 13:53-58؛ مارقوس 6:1-6)
14 ياغول سيدنا عيسى غر ثمازيرث ن - لجاليل، ئتّوعمّر س - جّهد ن - رّوح ن - ربّي؛ داي يساقّا ؤنغميس نّس ݣ - ئحيدان نّا كول.
15 ئقّيم أر ئسّقرا ݣ - ثمزݣيديوين ن ـ ووداين، أها أر ئسّ سّمغورن كول نسن.
16 داي يكّر ئدّو غر ثمدينث ن - نّاصيرا نّاݣ ئݣما. س - واسّ ن - سّبث، ئكشم غر ثمزݣيدا ن - ووداين أم ؤينّا يوالف، أها يبدّ حما أد ئقرا شا زݣ واوال ن ـ ربّي،
17 داي وشيناس لشثاب ن - نّبي ئشعيّا. نتّا يرژمث، ياف أنسا نّاݣ ئتّييياري:
18 «رّوح ن - ربّي يلّا غيفي ئدّخ ئي يسثي أد ئنيخ ئنغميسن ژيلنين ئي لمساكين،
أها يازنيد أد برّحخ ئيس دّان وينّا تّوامژنين أد تّورژمن،
د ـ ئدرغالن أد تّانّاين، فوكّاخ وينّا خف ئتّوعدّا،
19 أها برّحخ ئيس ييوض ؤسݣّاس نّاݣ ئتّرضو ربّي خف ميدّن نّس».
20 ئسمون سيدنا عيسى لشثاب ئرارث ئي ومزيلّز ن ـ ثمزݣيدا أها يوث أغجديم. أر ديكس سمقّولن وينّا لّانين ݣ - ثمزݣيدا كول.
21 داي يسفالّ أراسن ئتّيني: «هاثين أسّا يجرا وياد نّامي ثسّغدم».
22 قّيمين كول نسن أر غيفس تّينين أينّا يژيلن، أها رعبن ݣ - ئواليون غودانين نّا أرد ئتفّغن زݣ ؤقمو نّس، أر تّميينين: «ئيس ؤر ئيد ممّيس ن - يوسف أياد؟».
23 داي ينّاياسن: «ؤر ديكس ئلّي شّك ثدّام أد ئي ثينيم لميثال أد: أياضبيب جّوجي ئخف نّش، ئوا ݣ ـ داد ݣ - ثمازيرث نّش لمعجزاث أمّ ثينّا مي نسلّا ثݣيتّنث ݣ - ثمدينث ن - كافرناحوم».
24 ئزايد ئنّاياسن: «أداون ئنيخ سثيتّ: هاثين ؤر ئلّي أود يان نّبي نّا دا تّيرين أيث ثمازيرث نّس.
25 سثيتّ أي داون تّينيخ: هاثين ݣ - لوقث ن - نّبي إيليّا ؤر ئوّيث ؤنژار شراض ن - ئسݣّاسن د - ستّا ن - وايورن، أها ييلي يان بوهيّوف ئحرّان ݣ - ثمازيرث كول. يافد لحال ݣ ـ لوقث نّا شايݣان ن - ثوثمين نّامي مّوثن ئرݣزن ݣ ـ ثمازيرث ن - ثاروا ن ـ إسرائيل،
26 ماشان ؤر يوزين ربّي نّبي إيليّا غر أود يوث ديكسنث، غاس غر يوث ن - ثمطّوطّ نّا مي يمّوث ؤرݣاز ثلّا ݣ - ثمدينث ن - صيرفا ݣ - ثمازيرث ن - صايدا.
27 أها ييلي ݣ ـ لوقث ن - نّبي أليشع شايݣان ن ـ وينّا ݣ - ئلّا لبرص ݣ - ثمازيرث ن - ثاروا ن ـ إسرائيل، داي ؤر ئجّي أود يوكّ زّيكسن غاس نوعمان أسورياني».
28 نتّا سلّان وينّا لّانين كول ݣ - ثمزݣيدا ئي وياد نّا ينّا سيدنا عيسى داي أليناسن ئدامّن.
29 أها كّرن ژّوغرنث غر برّا ن - ثمدينث، أوينث غر زّابوق ن - عاري نّا خف ثتّوبنا ثمدينث نسن حما أثينّ ݣرين.
30 ماشان ئحيل ألّيݣ ئسراح ئخف نّس أها يدّو ئبردان نّس.
أجّوجي ن - ؤرݣاز نّاݣ لّان وادجّنون
(مارقوس 1:21-28)
31 ئكّر سيدنا عيسى ئضر غر ثمدينث ن - كافرناحوم، ئلّان ݣ - ثمازيرث ن - لجاليل، يان واسّ ن ـ سّبث ئقّيم أر ئسّلماد ميدّن ݣ ـ ثمزݣيدا.
32 داي رعبن زݣ ؤسّلمد نّس ئدّخ ثلّا ثنباطّ ݣ - واوال نّس.
33 ييلي ݣ - ثمزݣيدا يان ؤرݣاز نّاݣ ئلّا دجّن، داي يسغويّ س ـ ؤينّاس ؤشانث،
34 أر ئتّيني: «ياح! مايداخ ثريد أعيسى ونّاصيرا؟ ئيد ئيس تثدّيد أداخ ثخلود؟ نكّين سّنخ مايد ثمسد؟ شݣّينثين أيد ئݣان أزدّاي نّا ديوزن ربّي!»
35 ئفقّع غيفس سيدنا عيسى ينّاياس: «سوسم، ثفّغد زّݣ ؤرݣاز!» داي ئسغر دجّن أرݣاز ݣ - وامّاس ن - ميدّن أها يفّغ زّيكس ؤرث ئمرّيث.
36 داي هبضن ميدّن كول أر تّميينين ئنݣراتسن: «ماتّا ؤياد؟ ماتّا ثنباطّ أد د - جّهد أد نّا يلّان ݣ ـ واوال ن ـ ؤرݣاز أد ألّيݣ داسن ئتّيني ئي وادّجنون أد فّغن أها أرث تّضاعن!»
37 داي يساقّا ونغميس ن ـ سيدنا عيسى ݣ ـ ئحيدان نّا كول.
سيدنا عيسى أر ئجّوجوي شايݣان ن - ميدّن
(ماتّى 8:14-17؛ مارقوس 1:29-34)
38 نتّا يفّغ سيدنا عيسى زݣ ثمزݣيدا، ئدّو غر ثادّار ن - سيمعان، يافنّ ثاضوݣّالث ن - سيمعان ثومژتّ يوث ن - ثاولا يوعرن، أها تّرن زّيكس أتّ ئجّوجي.
39 داي يتّوجي يحودر غورس، ئژّع ثاولا أها ثرژماس ݣ - وانسا، داي ثكّر أر غيفسن ثزيلّيز أد تشّين.
40 س ـ أغلّوي ن - ثافوشث، ؤنّا غر ئلّا كول شان ؤموضين نّا ݣ - ئلّا شان ييغنشا داكّ ماتّا نتّا ييويثيد غر سيدنا عيسى، داي يسرس ئفاسّن نّس خف كّو يوكّ ديݣسن أها يجّوجيثن.
41 أها أر تفّغن أود وادجّنون زݣ شايݣان ن ـ ميدّن، أر سغويّون أر تّينين: «شݣّين أيد ئݣان ممّيس ن - ربّي!» ماشان أر ثن ئتّنهار سيدنا عيسى أد ؤر ساوالن ئدّخ سّنن ئد نتّا أيد ئݣان لماسيح.
سيدنا عيسى أر ئساوال خف ثݣلديتّ ن - ربّي
(مارقوس 1:35-39)
42 لّيݣ ئفّو لحال، ئفّغ سيدنا عيسى ئدّو غر يان وانسا يوران، قّيمين ميدّن أرث ؤرزّون. نتّا يوفانث، شبّرن ديكس حما أد ؤر يتّدّو زّيݣس.
43 ماشان ئنّاياسن: «هاثين ئخصّايي أد برّح س ـ ئنغميسن ژيلنين خف ثݣلديتّ ن - ربّي أود ݣ ـ ثمدينين ضنين ئدّخ خف ؤياد أخف دتّوازنخ».
44 أها يدّو أر ئساوال خف ربّي ݣ - ثمزݣيديوين ن - ثمازيرث ن - أيث ياهودا كول.