8
أجوجي ن-ونّا ݣ ئلّا لبرص
(مارقوس 1:40-45؛ لوقا 5:12-16)
1 داي نتّا ئضرد زݣ عاري تفارنتيد شيݣان ن ميدّن.
2 أها ئدّودّ غورس يون ؤورݣاز ݣ ئلّا لبرص، ئسجد دات-اس ئنّاياس: «أسيدي هاثين مش تريث تغييث أد يي تشّوجيث».
3 داي ياژض سيدنا عيسى أفوس نّس ئحاداث، أها ئنّاس: «ريخ ئوا جّي!» فيساع ئدّو زّيكس لبرص.
4 داي ئنّاياس سيدنا عيسى: «خوراش، أد ؤر تّيني أياد يي أود يون، ماشان دّو سنعت ئخف نّش يي ؤكهّان. تشث توكّي نّا س-ئوصّا موسى، أداسن تيݣ أم شّهادت».
أجوجي ن-ئسمخ ن-ؤخاتار ن لعسكر
5 داي نتّا ئكشم سيدنا عيسى غر تمدينث ن كفرناحوم، ئدّودّ غورس يون ن-ؤخاتار ن لعسكر ن رّومان ئحاولت.
6 ئنّاياس: «أمولانا، هان أخدام ئنو ئكّوشم ئمحض ݣ تادّارت أر ئتّوهوّال شيݣان».
7 أها ئنّاياس سيدنا عيسى: «ها نكّين أد دّوخ أتّجوجيخ».
8 داي ئسيول ؤخاتار ن لعسكر ئنّاياس: «أسيدي، هاثين ؤر واتاخ أتكشمت غر تادّارت ئنو، ماشان ئنيي غاس يون ن واوال أد ئجّي ؤخدام ئنو.
9 ئدّخ ݣيخ أود نكّين يون ن-ؤرݣاز ئلّان دّاو ن تنباطّ. غوري لعسكر دّاو ن-ؤفوس ئنو، دا تّينيخ يي واد: دّو! أها ئدّو، ئنيخ يي وايض، أورا! ئدّود، ئنيخ يي ئسمغ ئنو، ݣ أياد: ئݣث».
10 داي ألّيݣ ئسلا سيدنا عيسى يي ؤياد ئرعب، أها ئنّاياسن يي وينّا تيتفارن، لحقّ أداون تّينيخ: «هاثين ؤر ؤفيخ أود يون ݣ تمازيرث ن-إسرائيل غورس ليمان أم وادخ.
11 أداون ئنيخ: هات دّان أد ددّون شيݣان ن ميدّن زݣ تمازيرث ن-ؤنقّر د تمازيرث ن-ؤغلّوي ن تافوشت أها دورن خف لميدا د إبراهيم د إسْحَاق د يعقوب ݣ تݣلديت ن-ئݣنوان.
12 ئد ونّا تّينين نكني أرّاو ن تݣلديت أد تّوݣرن ݣ تالّست غر برّا، دينّا أي تّيلين ئمطّاون د ؤغژاژ ن توغماس».
13 أها ئنّاياس سيدنا عيسى ئ-ؤخاتار ن لعسكر: «دّو أد غورش ييلي وانشت س-ؤينّا س تومنت». أها ئجّي ؤخدّام نّس ݣ لوقت نّا.
أجوجي ن تضݣّالت ن بطروس.
(مارقوس 1:29-34؛ لوقا 4:38-41)
14 داي ألّيݣ دّيدّا سيدنا عيسى غر تادّارت ن بطرس، يافدّ تاضݣّالت ن بطرس تمحض تومژت ثاولا.
15 ئحاداس يان ؤفوس، داي ترژماس تاولا أها تكّر أراس تخدّم.
16 نتّا تيوض تادݣّات، أويندّ غورس شيݣان ن ميدّن ݣ مي لّان شيݣّان وادجنون، ئسّوفغ لارياح س يون ن واوال ئجّوجّين ئموضين كول.
17 حما أد ئجرو ؤينّا ئنّا نّبي إِشَعْيَا: «نتّا ييوي ئسروثن نّخ أها ياسي ئغنشاتن نّخ».
سيدنا عيسى نغد دّونيت
18 داي ألّيݣ يانّاي سيدنا عيسى شيݣان ن ميدّن تاما نّس، يامر ئمحضرن نّس، ئنّاياسن نضويات غر ثمناطين ن-ؤݣلمام.
19 أها ئدّاد غورس يون ؤسّلماد ن شّرع ئنّاياس: «آلمعلم، دّيخ أش تفورخ دوخ غر ماني غر تدّيد».
20 داي ئنّاس سيدنا عيسى: «ئشعبن غورسن ئخبا د-ئجضاض ن-ئݣنّا غورسن لعشوش، ئد ممّيس ن بنادم ؤر غورس ئلّي أود ماخف ئتسنّاد ئخف نّس».
21 داي ئنّاياس يون ياضن زݣ ئمحضرن نّس: «أسيدي، أدجّي ݣ ؤمزوارو أد دّوخ أد نضلخ بّا نو».
22 ئنّاياس سيدنا عيسى: «تفارييي أها تادجث ئمتّين أد نضلن ئمتّين نّسن!»
سيدنا عيسى دا ئسفستا شّوطّ ن-ؤنژار
(مارقوس 4:35-41؛ لوقا 8:22-25)
23 نتّا ئني سيدنا عيسى ݣ ؤغرّابو، تفارنت ئمحضار نّس.
24 داي تكّر يوت ن شّوط تاخاتارت ن-ؤنژار خف ؤݣلمام ألّيݣ أر غمسنت لموجات ن وامان يي ؤغرّابو، ئد نتّا ئلاّ ئݣن.
25 أها قربند غورس ئمحضار نّس سفافانت داي نّاناس: «أسيدي، فوكّاياخ ندّا أنخلو!»
26 داي ئنّاياسن: «ماكون ياغن ألّيݣ تݣّدم أوينّا مي ئدروس ليمان؟» أها ئكّر ئنهر أزݣو د وامان ن لبحر ياغول ئنّيرس.
27 داي رعبن ميدّن أر تّينين: «ماتّا ؤورݣاز-اد؟ أود أزݣو د وامان ن لبحر كول نّسن داس تضاعن».
أسّوفغ ن وادجنون د تيخلي ن-ئلفان.
(مارقوس 5:1-20؛ لوقا 8:26-39)
28 لّيݣ يوض سيدنا عيسى غر تمازيرث ن لجدريّين ضارت ن مايد ئنضو أݣلمام ن لجليل، نّالنتيد سين ن-ئرݣزن ݣ لّان وادجنون فّغندّ زݣ ئسنضال أها ؤعرن شيݣان، ألّيݣ ؤر دا ئتّيغي أود يون أد ئزري زݣ ؤبريد نّا.
29 داي قّيمن أر سغويّون سّين نّسن أر تّينين: «ماي ثريث غورنخ أسيدنا عيسى ممّيس ن ربّي؟ ئس تدّيث قبل لوقت أداخ تعدّبث؟»
30 أها تيلي ئورينّا سن يوت ن توالا تاخاتارت ن ئبولخيرن لا تّوهدّو دينّا،
31 داي حاول وادجنون سيدنا عيسى نّاناس: «مش داخ تّژّعت، أدجّاخ أد نكشم ݣ توالا ن-ئبولخيرن».
32 أها ئنّاياسن: «دّويات!» فّغن كشمن ݣ توالا ن-ئبولخيرن، داي ثدُويْ توالا ن-ئبولخيرن س ماس تلّا ثنقز زݣ وافلّا ن زّابوق غر أݣلمام خلون ݣ وامان.
33 أها رولن ئمكساون دّون غر تمدينث قّيسن يي ميدّن أينّا ئجران كول أود أينّا ئجران يي سين ن-ئرݣزن ݣ لّان وادجنون.
34 داي فّغندّ ئمزداغ ن تمدينث كول نّسن نّالن سيدنا عيسى، نتّا أنّاينث تّرناس أد ئدّو زݣ تمازيرث نّسن.