4
سيدنا عيسى دا ئسّاوال د يوت ن تمطّوطّ زݣ تمازيرت ن سّامرا
1 داي ئسلّا سيدنا عيسى ئسّ سّن ئفرّيسيّين ئسّ دا ئتسمونا أها أر ئتغبّاژ ئمحضرن ؤݣار ن يحيى،
2 مغار ؤر ئد سيدنا عيسى س-يخف نّس أيد أر ئتبّژن ميدّن ݣ وامان ماشان ئمحضرن نّس،
3 داي ئفّغ سيدنا عيسى زݣ تمازيرت ن-أيت يهوذا أها ياغول غر تمازيرت ن لجليل.
4 ئوا ئخصّاس أد-يشوقّا تامازيرت ن سّامرا.
5 أها ياوض غر يوت ن تمدينت ݣ تمازيرت ن سّامرا ئسم نّس سوخار، تاما ن-ييݣر نّا ئوشا سيدنا يعقوب ئ ممّيس سيدنا يوسف،
6 ماني ݣ-يلّا وانو ن سيدنا يعقوب. داي ئوحيل سيدنا عيسى س توادا، ئقّيم ݣ-يديس ن وانو، تݣ لوقت أتّاين ن وامّاس ن واسّ.
7 داي تدّود يوت ن تمطّوطّ تاساميريت حما أت تاݣم، أها ئنّاياس سيدنا عيسى: «وشييي أد سوخ».
8 ئد ئمحضرن نّس يافتنيد لحال دّان غر تمدينت حما أد سغين ؤتشّي.
9 داي تنّاياس تمطّوطّ: «مّاخ ألّيݣ دا يي تتّرت أت تسوت؟ شݣّ تݣيت ؤداي، ئد نكّ ݣيخ تاساميريت». ئدّخ ؤداين ؤر دا تمصارافن د-أيت سّامرا.
10 أها ئنّاياس سيدنا عيسى: «مور تسّيند توكّي ن ربّي، د مايد مسخ نكّين نّام ئتتّرن أمان أد سوخ، أت تتّرت شمّينتين زّيݣي أد-أم وشخ أمان ن تودرت».
11 تنّاياس تمطّوطّ: «أسيدي، هات ؤر غورش ئلّي أود جّالوق ن واݣام د وانو ئغبا، ئوا ماني زݣ-أش دكّان وامان ن تودرت؟
12 ئبّاتنخ يعقوب ئوشاخ أنوياد، ئسو زّيكس نتّا س-يخف نّس د واراو نّس د لبهايم نّس ألّو. مايدا تّينيد ݣ-يخف نّش، ئس تغالد ئس ت توݣرد؟»
13 داي ئنّاياس سيدنا عيسى: «ونّا دا ئسان زݣ أمان-اد ئدّا أت تينغ ئريفي ديخ ألتو،
14 ماشان ونّا ئدّان أد-يسو زݣ أمان نّا دّيخ أد-اس وشخ ؤسار ئدّي أت تينغ ئريفي، أمان نّا دّيخ أد-اس وشخ أد-أغولن أد ديكس ݣين يون ؤغبالو نّا زݣ غا تفلوفول تودرت ن وابدا».
15 أها تنّاياس تمطّوطّ: «أسيدي، وشييي أمان-اد، حما ؤر ئ ئنقّا ئريفي أها ؤر ئ يخصّا أد دّوخ غر داد أد-اݣمخ».
16 ئنّاياس سيدنا عيسى: «أشم غردّ ئ ورݣاز نّم تاغولتدّ غر داهاد».
17 تنّاياس تمطّوطّ: «ؤر غوري ئلّي ؤرݣاز». داي ئنّاياس سيدنا عيسى: «ستيتّ أيد تنّيد: ؤر غورم أرݣاز،
18 ئدّخ غورم كّان خمسا د-يرݣزن، د ونّا غورم ئلّان دغي ؤر ئݣي أرݣاز نّم. ستيتّ أينّا ئ تنّيد».
19 تنّاياس تمطّوطّ: «أسيدي، ئضهرييي ئس تݣيد نّبي!
20 لجدود نّخ عبدن ربّي ݣ عاري-اد، ماشان كونّي، ؤداين دا تّينيم: ئلازم أد-ئتّوعبد ربّي ݣ تمدينت ن لقدس».
21 داي ئنّاياس سيدنا عيسى: «ألالّا، أمنييي، هاتين تدّا أت تدّو تاسّاعت نّاݣ تدّام كونّي ئسامريين أت تعبدم ربّي ئبّاتنخ ؤر-ئد ݣ عاري-اد ؤلا ݣ تمدينت ن لقدس.
22 كونّي دا تعبادم ونّا ؤر تسّينم، ئد نوكني ؤداين دا نتعباد ونّا نسّن، ئدّخ دا ديتدّو ؤفوكّا زݣ ؤداين.
23 ماشان ئقنن أد ئدّو يونواسّ، هاتّين ييوض ياد، د وينّا ئتعبادن س نّييت أد عبدن ربّي ئبّاتنخ س رّوح د لحقّ، ئدّخ أم ويد أيدا يورزّو ربّي ئبّاتنخ.
24 ربّي رّوح أيد ئݣا، د ونّا ت-ئتعبادن ئلازم أت ت-ئعبد س رّوح د لحقّ».
25 تنّاياس تمطّوطّ: «نكّ سّنخ ئسّ ئدّا أد ديدّو لمسيا، نّا مي تّينين لمسيح. أدّاي ديدّو، ئدّا أداخ ئسفرو مايد ئݣان شا».
26 داي ئنّاياس سيدنا عيسى: «"نكّ أيد-يݣان"، ونّا دا م-ئسّاوالن».
27 ݣ لوقت نّا، أغولندّ ئمحضرن نّس أها رعبن لّيݣ أنّاين سيدنا عيسى أر ئسّاوال د يوت ن تمطّوطّ. ماشان أود يون زّيكسن ؤر ت-يسقسا: «ماي تريد تامطّوطّ-اد؟» نغد: «مّاخ ألّيݣ دا تساوالد أݣّيدس؟»a
28 أها تادجّ تمطّوطّ تاقلّالت نّس ن وامان، تاغول غر تمدينت، أر تّيني ئ ميدّن:
29 «أوريو أت تانّايم يون ؤرݣاز ئنّايي أينّا ݣّيخ كول. عيّنخ واد أيد ئݣان لمسيح؟»
30 داي فّغن ميدّن زݣ تمدينت أها دّوندّ غر سيدنا عيسى.
31 ݣ لوقت نّا، أر سحوژّورن ئمحضرن سيدنا عيسى أد-يتّش، قّيمن أراس تّينين: «أسي أت تّشد ألموعلّيم».
32 ماشان سيدنا عيسى ئنّاياسن: «نكّ، غوري ؤتشّي نو نّا ؤر تسّينم كونّي».
33 داي قّيمن ئمحضرن أر تمسقسان ݣراتّسن: «بار-يس-أس دّييوي شا ن يون مايد ئتتّا؟»
34 أها ئنّاياسن سيدنا عيسى: «ؤتشّي نو أد ݣخ لخاضر ن ونّا يي دّيوزن أها شمّلخ لخدمت نّا ئ ئوشا.
35 ئس ؤر دا تّينيم: "هاتين سولن ربعا ن وايورن أت تاوضدّ لوقت ن-ؤمجر"؟ ماشان نكّ داون تّينيخ: حقّات مليح ݣ-ئݣران هان ئمندي ئنوا حما أد ئتّومجر.
36 د-ؤشوّال دا ئتّامژ تيغراض نّس دغي، أها أر ئتسمونا لغلت ئ تودرت ن وابدا، ئمشيد دا فرحن كول نسن ونّا ئزرّعن د ونّا ئمجرن.
37 ئدّخ ئصحا واوال نّا ئنّان: "يون دا ئزرّع د وايّاض دا ئمجّر".
38 نكّينتين، ؤزنخكون أتمجرم ئݣر نّا ݣ-ؤر تخديمم، وييّاض خدمنّ ديكس، أها تاسيم كونّي لغلت ن لخدمت نّسن».
39 داي أمنن ئسّ زݣ تمدينت نّا شايݣان ن-يساميرين ئدّخ أسن تنّا تمطّوطّ: «ئنّايي كول أينّا ݣّيخ».
40 نتّا دّاندّ غورس أيت سّاميرا، سحوژّرنت أد غورسن ئقّيم. داي ئقّيم سيدنا عيسى غورسن سين ن ووسّان.
41 داي أمن ئسّ ألّو شايݣان ن ميدّن ليݣ سلّان ئ واوال نّس،
42 أها نّاناس ئ تمطّوطّ: «نوكني دغي دا نتّامن، ؤر-يد غاس خف واوال نّاخ ثقّيسد، ماشان ئدّخ أس نسلّا س-ئخفاون نّخ أها نسّن ئد واد أيد ئݣان ستيتّ أمفوكّو ن دّونيت».
سيدنا عيسى ئجوجي يون ؤربا
43 ضارت ن مايد ئكّا سيدنا عيسى سين ن ووسّان غر أيت سّاميرا، ئدّو ئعيّن تمازيرت ن لجليل.
44 ئنّا سيدنا عيسى س-ئخف نّس: «ؤر ئلّي شا ننّبي دا ت توقّارن أيت تمازيرت نّس».
45 والاينّي لّيݣ ييوض تامازيرت ن لجليل، رحبن ئسّ أيت لجليل، ئدّخ دّان أود نيتني غر لعيد ن-ؤزرّويb غر تمدينت ن لقدس أها نژان ݣ-ؤينّا ئݣا كول ݣ-ؤسّان ن لعيد.
46 داي ياغول ديخ التو سيدنا عيسى غر تمدينت ن قانا، نّا ئلّان ݣ تمازيرت ن لجليل، ماني ݣ-ئكّا ئرورا أمان أغولن ݣان أمان ن واضيل. أها ييلي ݣ تمدينت ن كفرناحوم يون ؤخاتار ن لمخزن ياغ شا ممّيس.
47 لّيݣ ئسلاّ ؤخاتار ن لمخزن ئس ديدّا سيدنا عيسى زݣ تمازيرت ن-أيت يهوذا غر تمازيرت ن لجليل، ئكّر ئدّو غورس، ئسحوژّرت أد ئسرّح غر تمدينت ن كفرناحوم حما أد-اس ئجّوجي ممّيس نّا ييوضن لموت.
48 داي ئنّاياس سيدنا عيسى: «كونّي كول نّون، مش ؤر تانّايم تيميتار د لعجايب، ؤر دا تّامنم أبدا!»
49 أها ئنّاياس ؤخاتار ن لمخزن: «عافاش أسيدي، أورا غوري دغي، قبل أد-يمّت ممّي».
50 داي ئنّاياس سيدنا عيسى: «دّو عايد غر تادّارت نّش! هان ممّيش ئدّا أد ييدير». يامن ؤرݣاز س واوال نّا س-ئنّا سيدنا عيسى، أها ئدّو.
51 ݣ-ؤبريد، نّالنتيد ئسمغان نّس أها نّاناس: «هان ممّيش ئدّر».
52 أها ئسقساتن ماتّا لوقت نّاݣ ئجّي ممّيس. نّاناس: «أسّنّاط، أتّاين ن لوحدا ضارت ن وامّاس ن واسّ، ترژماس تاولا».
53 داي ئسّن ئبّاس ن-ؤربا ئس ئجّي ممّيس ݣ تاسّاعت نّا ݣ-أس ئنّا سيدنا عيسى: «هان ممّيش ئدّا أد ييدير». أها يامن نتّا د-أيت تادّارت نّس كول س سيدنا عيسى.
54 تاد أيد ئݣان تاماتارت تيسّ سنات نّا ئݣا سيدنا عيسى زݣّوس دّيدّا زݣ تمازيرت ن-أيت يهوذا غر تمازيرت ن لجليل.