3
سيدنا عيسى د-ؤرݣاز نيقوديموس
1 ئلّا يون ن-ؤرݣاز زݣ تربيعت ن-ئفرّيسيّين، ئسم نّس نيقوديموس أها ئݣا زݣ ئخاتارن ن ووداين.
2 ئدّاد غر سيدنا عيسى ݣّيض أها ئنّاياس: «ألموعلّيم، نسّن ئس ك دّيوزن ربّي باش أد-اخ تسّلمدد، ئدّخ ؤر ئلّي أود يون ئتّيغيين أد ئݣ تيميتار-اد نّا دا تݣّاد غاس مش ئلّا ربّي أݣّيدس».
3 داي ئواجبت سيدنا عيسى: «يّيه، ستيتّ أيدا اش تّينيخ: هات مش ؤر د-ئلال بنادم منّا ؤجديد ؤر ئنّي أد يانّاي تاݣلديتّ ن ربّي».
4 أها ئسقسات نيقوديموس، ئنّاياس: «أسيدي، ميمشي أد-ئݣ يون بنادم أد-يلال أدّاي ئوسير؟ ئد أد ياغول غر دّيست ن مايس أها ئلالد لمرت تيس سنات؟».
5 ئسيول سيدنا عيسى، ئنّاياس: «يّيه، ستيتّ أيدا أش تّينيخ: هات مش ؤر د-ئلال بنادم زݣ وامان د رّوح ن ربّي، ؤر ئتّيغي أد-ئكشم غر ثݣلديت ن ربّي.
6 ونّا د-ئلالن زݣ صّاحت ن بنادم ئݣا بنادم، ئد ونّا ئلالن زݣ رّوح ن ربّي ئݣا رّوح.
7 أد ؤر تّرعاب ئدّخ-أش نّيخ: "ئخصّاويت كول نّون أد تلاليم منّا ؤجديد".
8 هان أزݣو دا ئتّصوض غر ماني غر ئرا، أها تسلّت ئ لهزّ نّس، والاينّي ؤر دا تّيسينت ماني زݣ دّيدّا نغد ماني غر ئتدّو. أكيس أيد ئݣا ونّا د-ئلولان زݣ رّوح ن ربّي».
9 داي ئسقسات نيقوديموس ألّو: «ميمشي ئغي ؤياد أد ئجرو؟»
10 ئواجبت سيدنا عيسى، ئنّاياس: «معنا شݣّ تݣيد لموعلّيم أخاتار ن-أيت إسرائيل أها ؤر تسّيند ئسكّين-اد!
11 يّيه، ستيتّ أينّا دّيخ أد-اش ئنيخ: نوكّني دا اون نسّاوال س-ؤينّا نسّن، أر نتشاهاد س-وينّا نانّاي، والاينّي كونّي ؤر دا تّامنم س-ؤينّا نتّيني.
12 ؤر دا ئسّي تّامنم مش دا اون سّاوالخ خف ئسكين ن واشال، ئوا ماكّاي تݣّيم أد ئسّي تّامنم مش دا اون سّاوالخ خف ئسكين ن-ئݣنوان؟
13 علاحقّ أود يون ؤر يولي غر ئݣنّا، غاس ممّيس ن بنادم، نّا ديسرّحن زݣ ئݣنّا!
14 أكيس ئسّيلي سيدنا موسى تيفيغري (ن نّخاس خف يون ئحنيݣ) ݣ لخلاa، ئمشيس أيد ئلازمن ئ ممّيس ن بنادم أد ئتّوسّيلي،
15 حما ونّا ئسّ ئتّامنن كول أت تيلي غورس تودرت ن وابدا.
16 ئدّخ ئمشيد أس ئرا ربّي ميدّن ن دّونيت خف ؤياد ئوشا ممّيس أفرضي، باش ؤر ئتّاشكا كول ونّا ئسّ ئتّامنن، والاينّي أد غورس تيلي تودرت ن وابدا.
17 ئدّخ ؤر دّيوزين ربّي ممّيس غر دّونيت حما أد-ئحكم خف ميدّن، ماشان يوزنيت باش أد-ئسّ يفوكّا ميدّن.
18 د ونّا ئتّامنّ س ممّيس ن ربّي ؤر دا غيفس ئتّوحكام، ئد ونّا ؤر دا ئسّ ئتّامنّ ئتّوحكم غيفس ياد، ئدّخ ؤر يومين س ممّيس أفرضي.
19 داي واد أيد ئݣان لحوكم: ئس دّيدّا ؤسيدّ غر دّونيت، ماشان ميدّن دا تّيرين تالّست ؤݣار ن-واسيدّ، ئدّخ دا تݣّين أينّا ؤر ئحلين.
20 ونّا دا ئتݣّان أينّا ؤر ئحلين ؤر دا ئتّيحميل أسيدّ أها ؤر دا ديكس ئدّو، أكّ ؤر تّوفضاحنت لفعايل نّس ؤر حلينين.
21 ؤنّا دا ئتݣّان س لحقّ، دا ئتفّغ غر منيد ن ـ ؤسيدّ حما أد ئباين نّيث ئد دا ئتݣّا أينّا ئتّيري ربّي».
سيدنا عيسى د يحيى المعمدان
22 ضارت ن-ؤياد، ئدّود سيدنا عيسى د-ئمحضرن نّس غر تمازيرت ن-أيت يهوذا، ئقّيم أݣّيدسن ديس شا ن ووسّان، أها أر ئتبّژ ميدّن ݣ وامان.
23 أود يحيى أر ئتبّژ ميدّن ݣ وامان ݣ تمدينت ن نون تاما ن تمدينت ن ساليم، ئدّخ لّان ديس شايݣان ن وامان، أها أر دتدّون غورس ميدّن حما أت توابّژن ݣ وامان.
24 ݣ لوقت نّا، ئسول يحيى ؤر ئتّوݣري ݣ لحبس.
25 داي ئكّر يون ؤمغانّا ئنݣر ئمحضرن ن يحيى د يون ؤرݣاز زݣ ؤداين خف لقاعيدا ن تازدݣي. b
26 أها دّوند غر يحيى، نّاناس: «ألموعلّيم، ونّا ئكّان أݣّيدش أجمّاضين ن واسيف ن الأُردن، نّا مي تشاهتّ، هاياشت أود نتّا دا ئتبّژ ميدّن ݣ وامان دغي، أها أر غورس تدّون كول».
27 داي ئنّاياسن يحيى: «ؤر ئتّيغي أود يون أد يݣ شا ؤسكّين أم نتّا مش ؤر-اس تيد ئوشي ربّي. c
28 كونّي س-يخفاون نّون دا تشّاهدم ئس نّيخ: "ؤر ݣيخ نكّ لمسيح، والاينّي نكّ يوزنيييد ربّي داتاس".
29 د ونّا مي تݣا تسليتّ تينّس، نتّا أيد ئݣان ئسلي، ئد أمسناي ن-يسلي دا ئتّبداد تاما نّس، أر غورس ئسّغاد أها أر ئفرّح شايݣان أد ئسلّ ئ واوال ن-يسلي. لفراحيت-اد تݣا أم تينو، تمقّور ؤر-اس ئخصّا شا.
30 ئخصّا أد-اس ئمغور وادّور أها ييمژي وينو».
ونّا دّيدّان زݣ ئݣنّا
31 «ونّا دّيدّان زݣ ئݣنّا يوݣر كول مايد ئݣان شا. د ونّا ئݣان زݣ دّونيت-اد، وين دّونيت-اد أيد ئݣا، أر-يسّاوال خف ئسكّين ن دّونيت، د ونّا ديدّان زݣ ئݣنّا [نتّا أيد ئلّان خف مايد ئݣان شا]،
32 أر ئتشاهاد س-ؤينّا يانّاي د-ؤينّا مي ئسلّا ݣ-يݣنّا، ماشان أود يون ؤر ئقبيل شّهاتّ نّس.
33 د ونّا ئقبلن شّهاتّ نّس، دا ئتشاهاد ئسّ ئݣا ربّي لحقّ،
34 ئدّخ ونّا دّيوزن ربّي دا ئساوال س واوال ن ربّي، علاحقّ دا س ياكّا ربّي شايݣان ن رّوح بلا حساب.
35 ئبّاتنخ نّا ئݣان ربّي دا ئتّيري ممّيس أها ئوشاس تانباطّ خف مايد ئݣان شا.
36 د ونّا ئتّامن س ممّيس ن ربّي، دا غورس تّيلي تودرت ن وابدا. ئد ونّا ؤر دا ئتيرين أد-يس يامن ؤسار يانّاي تودرت ن وابدا، ماشان دا غيفس ئزدّع ؤطيّر ن ربّي».