2
تامغرا ن تمدينت ن قانا
1 سين ن-ووسّان ضارت ن-ؤينّا، تتواݣ يوت ن تمغرا ݣ تمدينت ن قانا ݣ تمازيرت ن لجليل، تيلي مايس ن سيدنا عيسى دينّ.
2 أها ئتّوعرّض أود سيدنا عيسى د-ئمحضرن نّس غر تمغرا.
3 داي نتّا قضاناسن وامان ن واضيل، تكّر مايس ن سيدنا عيسى تنّاياس: «هاتين ؤر غورسن قّيمن وامان ن واضيل».
4 ماشان سيدنا عيسى ئنّاياس: «أيمّا، ؤر-يد لهمّ نّخ، تسول تاسّاعت ئنو ؤر تيوض!»
5 تكّر مايس ن سيدنا عيسى تنّا ئ ئمزيلّزن ن تمغرا: «ݣات أيين غاون ييني كول».
6 ئلينت دينّا ستّا ن تخوباي ن-ؤژرو، دا ديكسن تݣّين ووداين أمان ئ تاردا أدّاي ييرين أد عبدن ربّي. كو ييوت دا تّاوي ئنݣر تمانيين د مييّا د عشرين ن ليترو.
7 داي ئنّا سيدنا عيسى ئ ئمزيلّزن: «عمّرات تيخوباي س وامان». أها عمّرنتن أل أقمو.
8 داي ئنّاياسن: «دغي، أݣمات شوي زݣ وامان-اد أها توشيم ئ ونبداد ن تمغرا». وشيناس.
9 لّيݣ يورم ؤنبداد ن تمغرا أمان نّا ياغولن ݣان أمان ن واضيل، نتّا ؤر ئسّين مايد ئجران، ماشان ئمزيلّزن نّا يوݣمنّ أمان سّنّ ماني زݣ ددّان وامان-اد ن واضيل. داي ئغرد ئ وسلي.
10 أها ئنّاياس: «ميدّن كول دا ياكّان ݣ-تيزويري أمان ن واضيل نّا ژيلنّ. أدّاي فّغن ئنبياون ئخفاون نّسن، دا ياكّان ونّا ؤر ئحلين، ئد شݣّ تودجّيت أمان ن واضيل نّا ئغودان أل دغي!»
11 تاد أيد ئݣان تاماتارت تامزواروت نّا ئݣا سيدنا عيسى. ئجرا ؤياد ݣ تمدينت ن قانا ݣ تمازيرت ن لجليل. ئمشيد أس ئسنعت لعزّ نّس. أها أمنّ ئسّ ئمحضرن نّس.
12 ضارت ن-ئسكّين-اد، ئسرّح سيدنا عيسى د مايس د-أيتماس د-ئمحضرن نّس غر تمدينت ن كفرناحوم، أها ؤر قّيمن دينّا غاس شا ووسّان دروسنين.
سيدنا عيسى دا ئتژّع وينّا زنوزانين د-ئمساغن زݣ تادّارت ن ربّي
(ماتّى 21:12-13؛ مارقوس 11:15-17؛ لوقا 19:45-46)
13 داي ئدّجاور لعيد ن-ؤزرّويa ن ووداين (ليݣ فّغن ؤداين زݣ تمازيرت ن مصر)، يالي سيدنا عيسى غر تمدينت ن لقدس.
14 أها ياف ݣ تادّارت ن ربّي، ميدّن نّا ئزنوزان ئزّݣار د وولّي د-يتبيرن، ياف ألّو ئصرّافن ن لفلوس قّيمن غر طّبالي نّسن.
15 داي ئعديل يون ؤمشحاض زݣ لقنّب، ئشاشا ئسبّابن كول زݣ تادّارت ن ربّي د وولّي نّسن د-يزّݣار نّسن، أها ئزلّع لفلوس ن-يصرّافن أها ئسݣّدم لميدات نّسن.
16 داي ئنّا ئ يسبّابن ن-يتبيرن: «أسيات أياد كول زݣ سّياد. أد-ؤر تݣّات تادّارت ن ئبّا د تادّارت ن تسبّابت».
17 شتين ئمحضرن نّس أينّا ئتّوارين ݣ لشتاب ن ربّي: «نّعرت دا ئ ت تّاسي خف تادّارت نّش أربّي، أر ئ تسغوس أم لعافييت».
18 داي سقسانت ووداين: «ماتّا تماتارت نّا مي تغيت أت تݣد، حما أد أخ تسنعت ئس أش ئوشا ربّي تانباطّ أت تݣّد أياد نّا تݣيد؟»
19 ئرار غيفسن سيدنا عيسى، ئنّاياسن: «ردلات تادّارت-اد ن ربّي، داي ݣ شراض ن ووسّان أت ت بنوخ ألتو».
20 أها نّاناس ووداين: «وينّا بنّانين تادّارت-اد ن ربّي كّان ديكس ستّا ؤربعين ن-ؤسݣّاس، شݣّين تدّيت أت تبنوت ݣ شراض ن ووسّان؟»
21 والاينّي تادّارت ن ربّي نّا خف ئسّاوال سيدنا عيسى، هاتين صّاحت نّس.
22 فّير ن-وينّا، لّيݣ د-يكّر سيدنا عيسى زݣ لموت، كتيند ئمحضرن نّس أينا سن ئنّا، داي أمنّ س لشتاب ن ربّي د ئواليون-اد ن سيدنا عيسى.