19
سيدنا عيسى د - ؤصنّاك
1 ئكشم سيدنا عيسى غر ثمدينث ن - أريحا، ئيكّ زݣ وامّاس نّس.
2 ييلي ديكس يان ؤرݣاز ئسم نّس زاكّا، ئݣا لامين ن - ئصنّاكن أها يطرّح شايݣان.
3 أر يورزّو بار أد يانّاي ماني ونّا يݣان سيدنا عيسى، ماشان ؤر ئغي أث يانّاي زݣ لغاشي ئدّخ ئݣزّول.
4 أها يازّل، ئزوير غر داث يالي خف يوث ن - ثازارث ثلّا ثاما ن ـ ؤبريد حما أثيانّاي، ئدّخ ئدّا سيدنا عيسى أد ئزري زݣ سّييس.
5 نتّا ييوض سيدنا عيسى غر أنسا نّا، ئهزّا الّن نّس أها ينّاياس: «أزاكّا، سرّحدّ دغيا ئدّخ لابدّا أد كّخ ثادّارث نّش أسّا».
6 أها يسرّحدّ زاكّا دغيا، ئرحباس ئي سيدنا عيسى س - ؤفراح.
7 داي ؤراسن ئعجيب لحال ئي ميدّن، قّيمين أر تّݣمݣمن أر تّينين: «ئدّا ئكشم غر أرݣاز يعصان ربّي أد غورس ئقّيم».
8 داي يبدّ زاكّا داث ن سيدنا عيسى أها ينّاياس: «أمولانا، دّيخ أد ؤشخ أمناصف زݣ ؤينّا ئݣان وينو ئي يمژلاض، داي مش ئلّا مامي تشّيخ شا أداسث غرمخ خف ربعا ن - ييلان».
9 داي ينّاياس سيدنا عيسى: «أسّا يدّاد ؤفوكّا غر ثادّارث أد ئدّخ أرݣاز أد أود نتّا ئݣا ئرو ن - سيدنا براهيم.
10 هاثين ممّيس ن ـ بنادم ئدّاد أد ئرزو خف وينّا ؤشكانين حما أثن ئفوكّا».
لقيسث ن - عشرا ن - ئمزيلّزن
11 لّان ميدّن كول أر سّغادن غر سيدنا عيسى، داي ئدّخ نّيدجّاورغر لقدس، د ـ ئدّخ غالن ئيس ثيوض لوقث نّاݣ تّيلي ثݣلديتّ ن - ربّي، يقّيساسن يوث ن ـ لقيسث.
12 ئنّاياسن: «ئدّا يان ؤرݣاز نّامي يمقّور وادّور غر يوث ن - ثمازيرث ئبعدن حما أدّ يامژ رّسم نّاس ئتݣّا أݣلّيد أها ياغولدّ.
13 داي داث ن ـ ما غا يدّو، ئغراد ئي عشرا زݣ ئسمغان نّس، ئوشاس ئي كّو يوكّ ديكسن يان ؤقّاريض ن - وورغ أها ينّاياسن: "سبّباث ئسّن أر دّاغولخ".
14 ماشان ؤرث حميلن أيث ثمازيرث نّس، أها أزنن ييتّس ن - ئمازانّ فّيراس حما أد ئنين: "هاثين ؤر نري أرݣاز أد ئيݣ أݣلّيد نّخ"».
15 «واخّا يامشيسّ، ياغول ئݣا أݣلّيد أها يعايدّ غر ثمازيرث نّس، أها يغرد ئي يسمغان نّس نّامي يوشا ئقّاريضن حما أد يانّاي مشتا أيداس دّيولين ئي كّو يون ديكسن».
16 «داي يدّود ؤمزوارو ينّاياس: "أسيدي، هاثين ئروراييد ؤقّاريض نّش عشرا ن ـ ئقّاريضن ضنين".
17 أها ينّاياس ؤݣلّيد: "صاحا نّش، أييسمغ ئژيلن! ئدّخ ديكّ ئلّا لامين ݣ - ؤينّا يدروسن، دّيخ أداش ؤشخ ثانباطّ خف عشرا ن - ثمدينين".
18 داي يدّود ويسّ سينّ ئنّاياس: "أسيدي، أقّاريض نّش ئروراييد خمسا ن ـ ئقّاريضن ضنين".
19 داي ينّاياس ؤݣلّيد: "دّيخ شݣّين أداش ؤشخ ثانبّاطّ خف خمسا ن - ثمدينين"».
20 «ئيد ويسّ شراض ينّاياس: "أسيدي، هاياش أقّاريض نّايي ثوشيد كمسخث ݣ - ؤشرويض،
21 ݣّدخ زّيكش ئدّخ ثݣيد أرݣاز ئوعرن دا تّاسيد أينّا ؤر ثسريسد أر ثمݣّرد أينّا ؤر ثكريزد".
22 داي ينّاياس ؤݣلّيد: "دّيخ أد غيفش حشمخ س - ؤينّا ثنّيد أييسمغ نّا يخّان. ثسّند ئيس ݣيخ أرݣاز ئوعرن أها أر تّاسيخ أينّا ؤر ئݣين وينو أر مݣّرخ أينّا ؤر كريزخ،
23 ئوا ماخ ألّيݣ ؤر ثسريسد لفلوس ئنو غر ئسبّابن، حما أدّاي دّعايدخ أفخدّ بعدا شا يولييد زّيكسن؟"
24 داي يبرّم غر وينّاس ضورنين ينّاياسن: "كّساثاس أقّاريض أها ثوشيمث ئي ونّا غر لّان عشرا"».
25 «أها نّاناس: "أسيدي، هاثين لّان غورس ياد عشرا ن ـ ئقّاريضن!"
26 داي ينّاياسن: "أداون ئنيخ: هاثينن ؤنّا غر ئلّا شا، ئدّا أداس ئتّوزايد ووݣار، ئيد ؤنّاݣ ؤر ئلّي شا، أود ئميق نّا غورس ئلّان ئدّا أداس ئتّواكّس.
27 ئيد ئنضليبن ئنو نّا ؤر ئرين أد ݣخ أݣلّيد نسن، أوياتّنيد غر داد أها ثغرصماسن داثي"».
سيدنا عيسى ئكشم غر لقدس
(ماتّى 21:1-11؛ مارقوس 11:1-11؛ يوحنّا 12:12-19)
28 داي ضارث ن - مايد ئنّا سيدنا عيسى أياد، ئثامّا ݣ ـ ؤبريد نّس غر لقدس.
29 نتّا يدجّاورن غر أسون ن - بيت فاجي د - ؤسون ن - بيت عانيا غر ثاما ن ـ عاري نّامي دا تّينين "عاري ن - زّيثون"، أها يازن سّين زݣ ئمحضرّ نّس،
30 ئنّاياسن: «دّوياث غر أسون أد نّا يلّان داثاون، أدّاي نثاوضم، ثدّام أنّ ثافيم يان ؤشنيض ئلّا يقّن، ؤر دجّين غيفس ئني أود يون، كّساثاس ثاغوني أها ثاويمثيد.
31 داي مش كون ئسقسا شا: "مّاخ ألّيݣ داس تّنورژومم؟" أها ثينيماس: "هاثين ئحداجّاث مولانا"».
32 دّون ئمحضرن سّين أفينن أشنيض غاس أم ؤينّاسن ئنّا سيدنا عيسى.
33 نتّا أراس تّنورژومن، نّاناسن ئيد بابين نّس: «مّاخ ألّيݣّ دا تّنورژومم ئي وشنيض نّا؟»
34 أها نّاناسن ئمحضرّ: «هاثين ئحداجّاث مولانا».
35 داي أويندّ أشنيض ئي سيدنا عيسى، ݣرين غيفس ئعبانّ نسن أها سنينث غيفس.
36 نتّا أر ئتدّو، أراس تسّون ميدّن ئعبانّ نسن ݣ - ؤبريد.
37 لّيݣ ندّجاورن غر لقدس، زݣ ؤبريد نّا يسرّحن زݣ عاري ن - زّيثون، فرحن ئمحضرّ نّس كول نّا ثيد ئثفارن قيمين أر تسبّاحن ربّي س - ؤغويّي خف لموعجيزاث نّا أنّاين كول.
38 أر تّينين: «أنبارش أيد ئݣا وݣلّيد نّا دّيوزن مولانا. لهنا ݣ - ييݣنّا د - لعزّ ئي ربّي أنافلّا!»
39 داي نّاناسد ييتس ن - ئفرّيسين زݣ جاج ن - لغاشي: «أيا سّلماد، ئنيياسن ئمحضرّ نّش أد فسثين!»
40 أها ينّاياسن: «أداون ئنيخ: هاثين مش فسثان نثني، دّان ئژرا أد سغويّن!»
ئمطّاون ن - سيدنا عيسى خف لقدس
41 لّيݣ نّييوض سيدنا عيسى غر ثاما ن ـ لقدس، يانّايتّ أها يرو غيفس،
42 ئنّاياس: «أومي ثسّند أود شم أسّا أبريد ن ـ لهنا! ماشان دغي ئتييفّر زّيݣم.
43 دّان أدّ دّون ييتّس ن - ووسّان نّاݣ غيفم تقّنن ئنضليبن نّم ثيݣورين كول أها ضورنام، ژيّرنشم زݣ مايد ئݣان ثامناطّ.
44 دّان أشم ردلن، ئلين واراو نّم جاج نّم، داي ؤر ديݣم تّادجّان أود يان ؤژرو خف ؤژرو، ئدّخ ؤر ثسّيند لوقث نّاݣ غورم دّيدّا ربّي أشم ئفوكّا».
ؤژّوع ن - وينّا دا زّنزانين زݣ ثدّارث ن - ربّي
(ماتّى 21:12-17؛ مارقوس 11:15-19؛ يوحنّا 2:13-22)
45 ئدّو سيدنا عيسى غر ثدّارث ن - ربّي، ئقّيم أرد ئتّژّع وينّا أر زّنزانين.
46 أها يناياسن: «دا يتّيني لشثاب ن ـ ربّي: ثادّارث ئنو ثين ثژالّيت أي ثݣا، ماشان كونّي ثݣامتّ د - ئفري ن - ئخوّان!»