25
لمعنا ن ثعرّيمين س عشرا
1 «ݣ لوقث نّـا أتݣ ثݣليت ن-ئݣنوان أم عشرا ن ثعرّيمين نّاݣ ؤسين لفتّاشاث نّسنث داي فّغنث أد حاضرنث يي ييسلي.
2 خمسا زيكسنث ݣانث تّيحياض، ئد خمسا ياضن ݣانث ثونژيژين.
3 ثيحياض ؤسينث لفتّاشاث نسنث، أها ؤر ئوينث زّيث أݣّيدسنث.
4 ئد ثونژژين، ئوينث زّيث ݣ لقراعي نسنث د لفتّاشاث.
5 داي ئعطّرن ييسلي، ألّيݣ ݣننث كول نسنث ياويثنث ييطص.
6 ألّيݣ ئمناصاف ييض ئتّوسمع يون ؤغوي دا ئتّيني: "هان ئسلي ئدّاد، كراث حاطرثاس!"
7 داي كّرنث ثعرّيمين نّا كول، سّيغنث لفتّاشاث نسنث.
8 داي نّانثاسنث، ثيحياض يي تونژژين: "شتاخ شوي زّيث، ئدّخ دّانث لفتّاشاث نّخ أداخ خسينث".
9 داي جاوبنثنث تونژژين نّناسنث: "هاثين ؤراخ ئتقدّا، دّومث سغيمث ئخفاون نكنث زّيث زݣ ئعطّارن".
10 ألّيݣ دّانث أد سّغينث زّيث، ئدّاد ئسلي، كشمنث ديتس ثينّا لاّنين وجدنث غر ثمغرا، قن لباب.
11 ألّيݣ دعايدنث ثعرّيمين ياضن أر تّينيت: "أسيدي، أسيدي، رژماخ لباب!"
12 داي ئجاوبثنث ئنّياسنث: "دّيخ أداون ئنيخ لحق: هاثين ؤر كنث سّينخ".
13 ئوا عسسّات، ئدّخ ؤر تسّينم لا ياسّ ولا ثاسّاعث نّاݣ ديتدّو ممّيس ن بنادم».
لمعنا ن لقيسث ن وارضل ن نّقّرت
14 «ثݣلّيت ن-ئݣنوان دات ترويس يي يون ؤرݣاز ئران أد-ئسافر، ئغرد يي يسمغان نّس ئسبدثن خف ؤينّا ݣ لاّن غورس كول.
15 ئشاس يي يون خمسا ن وارضل ن نقرث، ئد وايض ئشاس سين وارضل ن نقرث، ئد وايض ئشاس يون ن وارضل ن نقرث، كّو يون د-ؤينا مي ئغيي، فيساع ئدّو ئسافر.
16 داي ئكر ونّا يومژن خمسا ن وارضل ن نقرث أر ئسّن ئسّاغ أر ئزّنزا ئربح ئرارد خمسا ن وارضل ياضن.
17 د ئمشيد أيد ئݣا ونّا يومژن سين ن وارضل، ئرارد ألثو سين ن وارضل ياضن.
18 ئد ونّا يومژن يون ن وارضل، ئدّا ئغزاس ݣ واشال ئنضل أرْضل نّا ن باب نّس.
19 «ألّيݣ ديزري شيݣان ن لوقث ئعايد باب ن-ئسمغان نّا أد-ئمحاساب أݣيدسن.
20 داي ئدّود ونّا يومژن خمسا ن وارضل، ئنعثاس خمسا ن وارضلن ياضن، داي ئنّياس: "أسيدي، تشيثي خمسا ن وارضل، هاغاش خمسا ن وارضلن ياضن نّا ربحخ".
21 أها ئنّاياس باب نّس: "ئغودا ؤيا ثݣيث، أييسمغ ئژيل ݣ ئلّا لامين! دغي ئلاّ ديك لامان خف ؤينّا ئدروسن، دّيخ أك وْكّلخ خف ؤينّا ئعدّان، كشمد أتفرحث د باب نّش".
22 داي ئدّود ونّا يومژن سّين ن وارضل، ئنّياس: "أسيدي، تشيثي سين ن وارضل، هاغاش سين ن وارضل ياضن ربحخثن سّين".
23 داي ئنّاياس باب نّس: "ئغودا ؤيا تݣيد، أييسمغ ئژيل ݣ ئلّا لامين! دغي ألّيݣ ئلاّ ديك لامين دّيخ أك وكلخ خف ؤينّا ئعدّان، كجمد أتفرحث د بابنّش".
24 داي ئدّود غورس ونّا يومژن يون ن وارضل، ئنّياس: "أسيدي، سّنخ ئس ثݣيث يون ن-ؤرݣاز ئقسحن، دا تمݣّرث أينّا ؤر تزريعث أر د جماعث أينّا ؤر دزوزّرث.
25 داي ݣّدخ دّوخ خزنخ أرضل نّش ݣ واشال، دغي هياش أينّا ئݣان وينّش".
26 داي ئجاوبث باب نّس، ئنّياس: "أييسمغ ؤر ئژيل ݣ ئلّا لعݣز! تسّنث ئس دا مݣّرخ أينّا ؤر زريعخ أر د جماعخ أينّا ؤر زوزّرخ.
27 ئوا ئلازم غيفش أتسيرسث نّقّرث ئنو يي وينّا دا زنزانين أر سّاغن ݣ لفلوس، حما أدّاي د دّوخ أمژخ أينّا ئݣان وينو د ربح.
28 داي ئنّياسن يي يسمغان نّس: كسثاس أرضل، دزايدمث يي ونّا غر لّان عشرا ن وارضل.
29 ئدّخ كول ونّا غر ئلّا أداس ئتّوشف، ييلي غورس شيݣان، ئد ونّا غر ؤر ئلّي شا، أود أينّا غورس ئلّان أداس ئتياكّس.
30 ئد ئسمغ نّاݣ ؤر ئلّي نفع، ݣراث غر ثالّسث غر برّا، ديس أݣ تّيلين ئمطّاون د ؤغژاژ ن ثوغماس"».
أسّ ن لعيقاب
31 أدّاݣ ديدّو ممّيس ن بنادم ݣ لعزّ نّس، ئلينث غورس كول لملائيكا نّس، ئقّيم خف لكورسي ن لعزّ نّس.
32 داي جمعند غورس لݣنوس كول غر داثاس، ئسّمزراي شا زݣ شا، ئمشينّا دايسّمزاراي ؤمكسا ئشروان زݣ ئغجدن،
33 ئسغيم ئشروان خف ؤفاسي نّس ئد ئغجدن خف ؤژلماض نّس.
34 داي ئسيول ؤݣلّيد يي وينّا ئلّان خف ؤفاسي نّس: أدّوياد، أوينّا ئبارش بّا ئنو، أد تورثم ثاݣلديت نّاون ئجّوجد زݣّيس ئعدل دّونيت،
35 ئدّخ ألّيݣ ئيْنغا لاژ تستشامي، ئنغي ئريفي ثشمي أد سوخ أمان، ݣخ أبرّاني ترحبمييي،
36 ئليخ عرّاخ تسّلسمييي، ياغي شا ثدّومد دژورمي، ئليخ ݣ لحبس ثكّم غوري.
37 ݣ لوقث نّا جاوبنث وينّا صلحنين نّناس: "أمولانا، ماتّا لوقث أيك ننّاي ئنغاش لاژّ نفاش أد تْتّشث؟ نغد ئنغاش ئريفي نفاش أتسوث أمان؟
38 د ماتّا لوقث أيك ننّاي ثݣيث أبرّاني نرحباش؟ نغد ثلّيث ثعرّاث نسّلساش ئعبان؟
39 د ماتّا لوقث أيك ننّاي ياغشّا نغد ثلّيث ݣ لحبس ندّون غورش؟"
40 داي ئجاوبثن ؤݣلّيد ئنّياسن: "دّيخ أداون ئنيخ لحق: زكّيس ثݣام يي يون زݣ أيثما-أياد ئمژيان، أمّي ئتݣام نكّ!".
41 داي ئنّياسن يي وينّا ئلّان خف ؤژلماض نّس دّيخ ألثو: "دّوياث زّيݣي أوينّا ئينعل ربّي، غر لعافيت ن وابدا نّا ئتّوݣّان يي إبليس د لمالايكا نّس،
42 ئدّخ يي ينغا لاژّ أها ؤر-ئ ثفيم أد تشّخ، ئنغيي أريفي ؤر-ئ ثفيم أمان أد سوخ.
43 ݣيخن أبرّاني غورون أها ؤر ئسّي ثرحيبم، ئليخ عرّاخ أها ؤر ئتسّلسيم، ياغي شا ئليخ ݣ لحبس أها ؤر غوري تدّيم".
44 ݣ لوقث نّا أد جاوبن، ئنيناس: "أمولانا، ماتّا لوقث ناݣ ئيݣ ئينغا لاژ، نغد ئنغاش أريفي، نغد ثݣيث أبرّاني نغد ثلّيث ثعرّاث، نغد ثلّيث ݣ لحبس، أها ؤر دندّي أك نعاون".
45 ئجاوبثن ئنياسن: "دّيخ أداون ئنيخ لحق: ئدّخ ؤر ثݣيم أياد يي ئمژلاض، هاثين نكّين أمي ؤر تݣيم".
46 داي دّون ويد غر لعداب ن وابدا، ئد وينّا ئصلحن أد دّون غر تودرت ن وابدا.