24
سيدنا عيسى دايتنبّأ س تيخلي ن لهيكل
(مارقوس 13:1-2؛ لوقا 21:5-6)
1 داي ئفّغ سيدنا عيسى ئدّو زݣ ثدّارث ن ربّي، أها دّوند غورس ئمحضرن نّس حما أداس سنعثن لبني نّس.
2 داي ئنّياسن سيدنا عيسى: «ئس ؤر ثنايم أياد كول، دّيخ أداون ئينيخ: هاثين ؤر ئتّغيما ديتخ أود يون ن-ئيسلّي خف ئسلّي ؤر ئتّوهدام».
أمرمد د ثمارا
(مارقوس 13:3-13؛ لوقا 21:7-19)
3 داي ألّيݣ ئقّيما سيدنا عيسى ݣ عاري ن زّيتون، دّوند غورس ئمحضار نّس ألّيݣ ئلاّ غاس نتّا، نّناس: «ئنّياخ: ميلمي أيد ئتّيلي ؤياد، د ماتّا نتّاث ثمثارث ن-ؤعايد نّش د تماثارث ن-ؤمݣارو ن دّونيت؟»
4 داي ئجاوبثن سيدنا عيسى، ئنّياسن: «خوراون أكن ئسّوفغ شا ئ-وبريد.
5 هاثين ئقنن أد دّون شيݣان ن ميدّن س-ئسم ئنو، أر تّينين: "نكّين أيد ئݣان لمسيح!" أها سّوفغن شيݣان ن ميدّن ئ-وبريد.
6 ثدّام أتسلام يي ئمنغان د ؤينّا ئجران ديكسن، خوراون أتݣّدم، ئدّخ ئلازم أد ئجرو ؤياد كول، ماشان ؤر ئدّي ؤياد أد ئݣ أمݣارو.
7 ئدّخ ئدّا أد ئنّاغ لݣنّس د لݣنّس ثنّاغ دّولا د دّولا، أها ييلي بوهيّوف د ئغنشا د زّنزال ن واشال ݣ شيݣان ن ثميزار.
8 والاينّي أياد كول غاس لبدو ن-ؤزبار.
9 دّان أكن أوين ݣ لوقث نّا غر وينّا كن ئتعدّابن نغين كون، دّان ؤر كن تّيحميلن لݣنوس كول خف نّيرث ن-ئسم ئنو.
10 أها عايدن شيݣان ن ميدّن أد زرين ليمان نّسن، أر تّمغضار ݣراتسن، أر تمسعداون ئنيݣراسن.
11 داي باينند شيݣان ن لانبييا س-ئحلّالن، سّوفغن شيݣان ن ميدّن يي وبريد نسن.
12 داي عدّون شيݣان ن دّنوب، أها تصميض ثايري ن شيݣان ن ميدّن.
13 ماشان ونّا ئصبرن آر ثينييرا ئدّا أد ئنجو.
14 داي ئتّوخبر س ثݣلّديت ن-ئݣنوان ݣ دّونيت كول، ثدّا أتيݣ شهات ئ-لݣنوس كول. ثسّاعت أتݣ تامݣاروت».
تيخلي ثاخثارث.
(مارقوس 13:14-23؛ لوقا 21:20-24)
15 «أدّاي ثنّايم لفساد نّا دا ئسخصار أينّا خف ئساول نّبي دَنْيَالْ ئبدّا ݣ وانسا ئيقدسن، أونّا دا يتقران ئوا فهم ئد تامݣاروت تقرّب.
16 لوقث نّا أد رولن وينّا ئلّان ݣ تمازيرت ن لياهوديّا غر لعواري.
17 ئد ونّا ݣ لّان أفلّا ن-سضوح، ؤر دّيتݣز أد ياسي أينّا غورس ݣ ثدّارث نّس.
18 ئد ونّا ݣ لّان ݣ ييݣر ؤر ديتعياد أد ياسي ئعبان نّس.
19 أويهانسنث يي ثينّا ئتّارونين د ثينّا ئصوطّوضن ݣ ؤوسّان نّا.
20 ژّالّاث أد ؤر تّيلي ثرولا نّون ݣ ؤنژار نغد ݣ واسّ ن سّبث.
21 ݣ لوقث نّا ثدّا أتّيلي يوث ن ثمارا ثخثارث نّا ؤر دجّين ئلّين زْݣِّيس ثلاّ دّونيت آر دغي، أها ؤسار ثنّي أتّيلي.
22 مّور ئد ئسد ربّي أيد ئسدروسن ؤسّان نّا، ؤر ئتراح أݣد يون، والاينّي خف نّيرث ن-وينّا ئخثار دّان ووسّان نّا أد دروسن.
23 داي لوقث نّا مش-اون ئنّا شان يون: هان لمسيح ئلّا دا نغد ئلّا دوهاين! هان أتّامنم،
24 ئتخ دان أد ئيضهير ميدّن س-ئحلالن أر تّينين نكني أݣان لمسيح باينند ديخ ويض أر تّينين نكني نݣا لانبيا، داي ݣين لموعجيزاث ثيخثارين د لعجايب حما أد سّوفغن ميدّن يي ؤبريد، أد سّوفغن، مش غيين أود وينّا ئتّوخثارن.
25 هان نكّين زوارخ خبرخ كن.
26 «مش-اون نّان: هاثين ئلّا ݣ لخلا! أد ؤر غورس تفغاث، نغد هاث ئلّا ݣ جاج ن ثادرْوين! أد-ؤر تّامناث شا.
27 ئدّخ أم وُوسم أدّاي ئوث ݣ ؤونقر ئسّيدّن ݣ لغرب ئمشيد أيد ئتݣا أود ممّيس ن بنادم أدّاي ديعايد.
28 ئدّخ أنسا نّاي ثلاّ جّيفث دا غورس دجماعن نسورا.
أعايد ن لمسيح
(مارقوس 13:24-27؛ لوقا 21:25-28)
29 «فيساع تفّير ن تمارا ن ووسّان نّا، أد تيلّس تافويت د وايّور ؤر ئتّݣّا أسيد، داي تّوتّيند ئتران زݣ ئݣنّا، زعزعنث لقوات ن-ئنݣوان.
30 داي ثبايند ݣ لوقث نّا ثامثارث ن ممّيس ن بنادم ݣ-ئݣنّا، داي وثن أݣجدور لݣنوس ن دّونيت كول، ألّيݣ أنّاين ممّيس ن بنادم نّيݣ ن لغيام ئدّاد س جّهد د لعزّ أخثار.
31 داي يازند ربّي لملايكا نّس س يون ن لبوق ئجهدن، داي ئجمّعد وينّا ئخثار زݣ ربعا ن ثمناضين ن وشال، زݣ لحد ن-ئݣنّا أر لحد ياضن».
لمعنا ن ثزارث
(مارقوس 13:28-31؛ لوقا 21:29-33)
32 «زݣ ؤسكلو ن ثزارث أزݣ تّيسنم لمعناياد، أدّاي ثبدو لا ثݣار أر ثرزّم ئ-وافريون نّس دا تّيسينم ئس د-يقرّب ؤنبدو.
33 ئمشيد أود كنّي أدّاي ثنّايم كول أياد، ثيسينم ئس ثيوض لوقث ن-ؤعايد دا ثقرّبد غر لباب.
34 دّيخ أداون ئنيخ لحق، هاثين ؤر ئزرّي لجيل-اد أر د-ئجرو ؤياد كول.
35 ئيݣنّا د واشال دّان أد تواكسن ماشان أوال ئنو ؤر ئنّي أد ئتواكّس».
حضوياث ئخفاون نّون
(مارقوس 13:32-37؛ لوقا 17:26-30؛ 12:39-40)
36 «ئد أسّ نّا د ثاسّاعت نّا، هاثين ؤر دا ثن ئتّيسين أود يون، لا لمالايكا ن-ئݣنوان، ولا ممّيس ن بنادم، غاس بّانو أيد غيفس ئعالمن.
37 ئمشينّا ئجران ݣ-وسّان ن نوح، أيدي تّݣ ؤعايد ن ممّيس ن بنادم.
38 لاّن ݣ ؤوسّان نّا مدّن داث ن طّوفان دا تتّان أر سّان أر تّاول أر تمياوال آر-أسّ نّاݣ ئكشم نوح غر أغرّابو.
39 أها ؤر سّين ماݣ دّان أد-يجرو ألّيݣ ديدّا طّـوفان ياويثن كول، ئمشيد أݣ دّان أد ئجرو ألثو ݣ ؤعايد ن ممّيس ن بنادم.
40 ݣ لوقث نّا دّان أد ئلين سين ئرݣزن ݣ-ئݣر، ئدّا أد ئتّواسي يون ئقّيم وايض.
41 ئلينث سناث ن ثوثمين دا ژّاضنث مقبالنث خف ؤزرّوي، دات يساي يوث ثقّيم ثايض.
42 سهراث، ئدّخ ؤر ثسّينم ماتّا واس نّاݣ ديتدّو مولانا.
43 ئخصّياون أتّيسينم أمّوري دّيس ئسّن باب ن ثادّارث ماتّا ثاسّاعت ݣ ئدّا أدّيدّو ؤوخوّان، ئدّا أد ئسهر ؤر ئتّادجا ثدّارث نّس أتّياشر.
44 خف ؤياد أود كنّي سّوجداث ئخفاون نّون، ئدّخ ثاسّاعت نّاݣ ئدّا أدّيدّو ممّيس ن بنادم ؤر ثنّي أتّيلي ݣ لبال نّون».
لمعنا ن-ئسمغ ݣ ئلّا لامين
45 «ماݣ مس ئسمغ نّاݣ ئيلاّ لمان د لحكما نّاݣ سبدّا باب نّس خف ئخدّامن نّس أداس نياكّا ؤوتشي ݣ لوقث؟
46 أياعري نّس ئسمغ نّا أدّاي ديعايد باب نّس أتّيد ياف لاّي تݣ لخدمث نّا خف ثيوصّا.
47 دّيخ أداون ئنيخ لحق: هاثين ئدّا أتّيسبد خف ؤينّا نّس كول.
48 ئد مش ئخّا ئسمغ نّا ييني ݣ لخاضر نّس: ئدّا باب-ئنو أدن ئعطّر ݣ ؤوعايد نّس،
49 ئبدو أر ئكّاث ئسمون نّس ݣانين ئسمغان، أر ئتتّا أر ئسّا د وينّا ئسّان شراب،
50 ئدّا أدّيدو باب ن-ئيسمغ نّاݣ واسّ نّا ؤر ئدمي ݣ ثاسّاعت نّا ؤر ئسّين،
51 داي ئعاقبيث شيݣان ئݣرث غر لمونافقين. ديس أݣ تّيلين ئمطّاون د ؤغژاژ ن ثوغماس».