12
أد ؤر تّݣداث!
1 داي ݣ - لوقث نّا، مونند شايݣان ن ـ والفيون ن - ميدّن ألّيݣّ أر تمّعفاسن، ئبرّم سيدنا عيسى غر ئمحضرّ نّس أها ينّاياسن ديمزوورا: «حضوياث ئخفاون نّون زݣ ثمثونث ن - ئفرّيسين، ئݣّان نّيفاق نسن.
2 هاثين ؤر ئلّي شا يفّرن نّا ؤر ئدّين أدّ ئفّغ، ؤلا شا يݣان سّرّ نّا ؤر ئدّين أد ئتواسّن.
3 خف ؤياد، هان أينّا ثنّام كول ݣ - ثالّسث ئدّا أداس ئتّوسلّا س ـ واسّ، د - ؤينّا ثنّام ݣ - جاج ن - ثيدّار س - لحسّ ئقّنثين أد ئيسّ ئتّوبرّح أفلّا ن - ئغرمان.
4 أداون ئنيخ أييمعزيزن ئنو، أد ؤر تّݣّداث زݣ وينّا دا تّيرينين أكون نغين، هاثين غاس صّاحث أيدا نقّان، ضارث ن ـ ؤينّا، ؤر تّيغين أد ݣين ؤݣار ن ـ ؤياد.
5 ماشان أداون سنعثخ مايد ئمس ؤنّا زݣ تّݣدم: ݣّداث زݣ ربّي نّا غر ثلا ثنباطّ أد ئنغ بنادم أها يݣريث ݣ - جاهنّام. ئيّيه، داون تّينيخ: ݣّداث زݣ ربّي».
6 «ئيس ؤر دا تّونزان خمسا ن - ئجضاض س - سينّ ن ـ وارّيالن؟ واخّا يامشيسّ ؤر دا يتتّو ربّي أود يوكّ ديكسن.
7 ئيد كونّي أود ئنژضن ن - ئقرّا نّون تّوحاسبن كول، غاس أد ؤر تّݣداث، هاثين كونّي ثوفم غورس شايݣان ن - ئجضاض».
8 «أداون ئنيخ: كول ؤنّا دا يسّي يتقرّان داث ن - ميدّن، دّيخ أديسّ قرّاخ داث ن - لملايكاث ن - ربّي.
9 ئيد ؤنّا دا يي يتّنكارن داث ن - ميدّن، دّيخ أث نكرخ داث ن - لملايكاث ن - ربّي.
10 د - وونّا ينّان كول شان واوال نّا ؤر ئحلين خف ممّيس ن - بنادم أداس ئتّوغفر، ئيد ؤنّا يرݣّمن رّوح ن - ربّي ؤر ئدّي أداس ئتّوغفر».
11 «أدّاي كون حرين غر ثمزݣيديوين د ـ غر داث ن ـ ئنبّاضن د ـ لمخزن حما أد غيفون حشمن، أد ؤرتخمّاماث ݣ ـ ماغا ثينيم نغد ماس تّرارام خف ئخفاون نّون،
12 ئدّخ ئدّا رّوح ن ـ ربّي أداون ئسنعث مايداون ئخصّان أتّينيم ݣ - لوقث نّا».
لقيسثن ـ ؤمطرّح ئغندفن
13 داي ينّاياسد يوكّ زݣ لغاشي ئي سيدنا عيسى: «أياسّلماد، ئنيياس ئي ݣما أد أݣّيدي ئبضو ثاكاسوتّ نّاخدّ يودجّا يبّاثنخ».
14 أها ينّاياس سيدناعيسى: «أسيدي، مايدي يݣان غيفون د - لقاضي نغد وونّا دا يبطّون؟»
15 داي ينّاياسن ئي ميدّن: «راراث لبال نّون، حضوياث ئخفاون نّون زݣ طّمع، ئدّخ ثودرث ن ـ بنادم ؤر ئيد س ـ مشثا أيد غورش ئلّان».
16 داي يقّيساسن لقيسث أد حما أداسن ئسّفرو أينّاسن ئنّا: «يوسي يان ؤرݣاز نّا يطرّحن شايݣان ن ـ ئمندي زݣ ييݣران نّس ألّيݣ ئعمّر طّارماث نّس كول،
17 أها ينّا ݣ - ئخف نّس: "ماي تݣّاخ؟، هاثين ؤر غوري يلّي شان وانسا نّاݣ تّسمونخ ئمندي نو كول".
18 شوي ينّا: "دّيخ أد ردلخ طّارماث ئنو، بنوخ ثينّا ثن يوݣرن أها سمونخ ديكسنث ئمندي نو د - ؤيدّا نو كول".
19 أها يينيخ ئي يخف ئنو: "أييخف ئنو، غورش لخير ئعدّان ئفّرن ئي شايݣان ن - ئسݣّاسن نّا ديدّان، غاس سݣونفا، ثشّد، ثسود أها ثبرّعد!"
20 ماشان ئنّاياس ربّي: "أياحيوض، هاثين ئضا س ـ ئخف نّس ثدّيد أتمّدّ، ما مي غا ثزريد أياد نّا ثسموند؟"».
21 «هاثين أياد أيداس ئتّجرون ئي ونّا يتّسمونّ لمال ن ـ دّونيث ئي يخف نّس، أها يتّو أينّاث ئسقرّابن غر ربّي».
أمناث ݣ - ربّي
22 داي ينّاياسن ئي يمحضرن نّس: «خف ؤياد أخف داون تّينيخ: أد ؤر تّاسياث أنزݣوم ئي ثودرث نّون ماي تتّام نغد ئي صّاحث نّون ماي ثلسّام.
23 ئدّخ هاثين ثوف ثودرث ؤتشّي، ثاف صّاحث ملسيوث.
24 راعيواث ئهاقّارن، نثني ؤر دا زرّعن ؤر دا مݣّرن، ؤلا غورسن ئلّا ؤعريش نغد طّارما، ماشان ربّي دا ثن ئسوتّشا! ئوا هاثين كونّي ثوفم غورس ئجضاض.
25 داي مغار يوسي شا ديݣون أنزݣوم، ئيد أد ييغي أد ئزايد غاس أود يوث ن ـ ثسّاعث ݣ ـ لعمر نّس؟
26 ئوا لّيݣ ؤر ثغيم أود ئي وسكّين أد أمژّيان، مّاخ ألّيݣ دا تّاسيم أنزݣوم ئي يسكّين ضنين؟
27 راعيواث ئݣدجّوين ن ـ لخلا ماس دا تّمغورن، ؤر دا كّاثن ثامارا ؤر دا زطّان، ماشان أداون ئنيخ: هاثين أود سيدنا سوليمان ݣ - لعزّ نّس كول ؤر دجّين ئلسي شا يغودان أمّ نثني.
28 داي مش دا يسّلسا ربّي ئمشيد ثوݣا نّا دا يتّيلين أسّاد ݣ - ييݣر أها ثتّواݣر أسكّا ݣ - لعافيث، ئيس ؤر كون ئسّلسا كونّي ؤݣار أوينّا مي يدروس ليمان؟
29 أد ؤر تّاسياث أنزݣوم ئي ماي تتّام نغد ماي ثسّام ؤلا ثهوّلم،
30 ئدّخ أياد أخف دا ورزّون ميدّن ن - دّونيث س ـ ماس لّان، ماشان ئلّا بّاثون ئسّن ياد ئيس أون ئخصّا وياد.
31 رزوياث بعدا أينّا يݣان وين ثݣلديتّ ن - ربّي، د ـ ئسكّين أد كول دّان أداون تتواوشنّ».
32 «أد ؤر تّݣّد شا أثاوالا ثامژّيانث! ئدّخ ئفرح بّاثون أداون ئوش ثاݣلديتّ نّس.
33 زّنزاث أيدّا نّون ثوشيم صّاداقا ئي يمژلاض، أها ثݣيم ئي يخفاون نّون ثيكمسين نّا ؤر ئفلّين ݣانين يان لخزين نّا ؤر ئتّقضون ݣ - يݣنوان، نّاݣ ؤر غورس ديتدّو ؤخوّان ؤلاث ئتشّا واكوز.
34 ئدّخ ماني ݣ - ئتّيلي لخزين نّون، أݣ ئتّيلي أود وول نّون».
لقيسث ن - ئسمغان نّا فافانين
35 «أسّاث ئفكّاسن نّون حما أتّوجيدم، ثادّجيم ئسيدّن نّون أغن.
36 أها ثݣيم أمّ ئسمغان نّا دا تعايانّين باب نسن أدّ ياغول زݣ ثمغرا. حما أدّاي دّياوض، ئنقّر لباب أها رژمناس ݣ ـ وانسا.
37 أياعريتّ ن - ئسمغان نّا دا ديتّافا باب نسن لّان فافان أدّاي دّياغول. سثيتّ أيداون تّينيخ: هاثين ئدّا أد ئيݣ ثابانشا نّس أها يسغيمثن أر غيفسن ئتزيلّيز.
38 أياعريتّ ن - ئسمغان نّا دّيوفا باب نسن فافان أها وجدن ݣ ـ داكّ ماتّا لوقث نّاݣ ديدّا.
39 ماشان ئسيناث أياد: هاثين مّور ئسّين باب ن - ثادّارث ميلمي أيدّ ئتدّو وخوّان ألّيݣ ئقّيما يفافا أها ؤرث ئتّادجّا أداس ئكشم غر ثادّارث نّس أث ياشر.
40 خف ؤياد سّوجيداث أود كونّي ئخفاون نّون، هان ممّيس ن - بنادم ئدّا أد دّياغول ݣ - شان لوقث نّا ؤر ثدميم».
لقيسث ن - ؤنبداد ئنژّين
41 داي ينّاياس بطرس: «أمولانا، ئيد غاس ئي نوكّني أمي دا تّقيسد لقيسث أد، ماد ئي ميدّن كول؟».
42 داي ينّاياس سيدنا عيسى: «ماتّا ونبداد ئنژّن نّاݣ ئتّامن باب نّس أث ئسبدّ خف ئسمغان نّس أداسن ياكّا أمور نسن ن ـ ووتشّي ݣ - لوقث نّس؟
43 ئوا أياعريتّ نّس ئي يسمغ نّا مش ديدّا باب نّس يافثيد دا يتݣّا أياد.
44 سثيتّ أداون ئنيخ: هاثين ئدّا أث ئيݣ د ـ أنبداد خف ؤيدّا نّس كول.
45 ئيد مش ئنّا يسمغ نّا ݣ - ئخف نّس: "ئدّا باب ئنو أنّ ئعطّر ؤر دّيتّاغول دغيا"، ئقّيم أر ئكّاث ئمزيلّزن د - ثمزيلّزين، أر ئتتّا، أر ئسّا، أر ئسّا شّراب،
46 داي يدّود باب نّس ݣ - يان واسّ نّا خف ؤر ئعوّيل د - ݣ ـ يوث ن ـ ثاسّاعت نّا ؤر ئسّين، أها يبّي صّاحث نّس، ئݣيثينّ غر ئسمغان نّا عصانين».
47 «د ـ ئسمغ نّا يسّنن أنّا يرا باب نّس أها ؤرث ئݣي، ئدّا أد ئتّواوث شايݣان.
48 ئيد ؤنّا ؤر ئسّينن مايد ئرا باب نّس أها يݣ ماخف ئتّواواث، ئدّا أد ئتّواوث غاس شوي. كول ؤنّامي يتمّوش شايݣان، أد زّيكس ئتواتّر شايݣان، د - ونّا يتّوامانن خف شايݣان، أد زّيكس ئتواتّر ووݣار».
سيدنا عيسى د - دّونيث
49 «نكّين دّيخد أد سّيغخ لعافيث ݣ - واشال، غاس أومي ثوغ!
50 هاثين ئخصّا أد غيفي ئيكّ يان لعداب، أها يليخ ݣ ـ ثمارا ثاخاثارث أرد ئزري!
51 ئيس ثغالم ئيسد دّيخ أد ݣخ لهنا خف واشال؟ ئهي، هاثين دّيخد أد ݣخ بطّو.
52 زݣ سّياد غر داث، دّان أد ئلين خمسا ݣ - يوث ن - ثادّارث أها بضون، شراض أد يي ييرين د ـ سينّ ؤر ئي تّيرن، نغد أدي ييرين سينّ ؤر ئي تّيرين شراض.
53 ئدّا أد ئكّر بطّو ئنݣر ن ـ ئبّاس د - ممّيس، د ـ ئنݣر ن ـ مايس د - ئلّيس، د ـ ئنݣر ن ـ ثمغارث د - ثيسليتّ نّس».
54 داي يبرّم غر ميدّن ئنّاياسن: «أدّاي ثانّايم ئسيݣنو يݣّافيد زݣ ؤغلّوي، دا تّينيم هاثين ئدّا أد ئوّث ؤنژار، أها يوث ؤنژار سثيتّ.
55 ئيد أدّاي ييلي وحارّاف، دا تّينيم ئدّا أد ئحمو لحال، أها يحمو.
56 ألمونافيقين! دا تّيسينم مايد ئدّا لحال أد ئيݣ زݣ ؤينّا ثانّايم ݣ - واشال د - ييݣنّا، أها ؤر ثفريم مايدا يتّجرّون ݣ ـ لوقث أد».
57 «مّاخ ألّيݣ ؤر ثغيم أتّيسينم زݣ ئخفاون نّون مايد ئݣان لحقّ؟
58 مش ثدّيد شݣ د - بو دّعوث نّش غر لمخزن، ئݣ ثامسّومانث أد أݣّيدس ثمساساد ماحدّ ثسولم ݣ - ؤبريد، ئدّخ ئدّا أش ئژّوغر غر لقاضي أها يوشيش لقاضي ئي ومخزني، داي يݣريش ؤمخزني ݣ - لحبس.
59 أداش ئنيخ: هاثين ؤرد تّفّغد زݣ سّييسّ ألّ تخلّسد أرّيال أنݣّارو نّا داش ئتّوثفارن».