16
تيميتار ن-لاوقات
(مارقوس 8:11-13؛ لوقا 12:54-56)
1 أها دّوند غورس ئفرّيسيّين د ئصدّوقين حما أتجربن، تّرناس أداسن ئسنعث شان ن-تماتارت زݣ ئݣنّا.
2 ئسيول ئنّياسن: «أدّاي دا تّانّايم ثقرب ثافوشث أتغلي: "ئدّا أدي صفو لحال، ئتخ ثنايم ئݣنّا ئݣا أزݣاغ".
3 ئد صباح لاّ تنيم: "أسّا ئدّا أد-يوث ؤنزار، ئتخ ئݣنّا ئزݣاغ ئدلاس ئسيݣنو". لحال ن-ئݣنّا دا تّيسنم أتسفرزم، ئد ثميثار ن لاوقّاث ؤر تسينم أتن ثسفرزم!
4 جّيل ؤر ئيحلين ئفسدن دايسّوثور تماتارت، والينّي ؤر دا س تياكّا أود يوث تماتارت غاس تماتارت ن نّبي يُونَانْ». داي ئزريثن ئدّو ئبردان نّس.
تامتونت ن-ئفرّيسين د-ئصدّوقين
(مارقوس 8:14-21)
5 ألّيݣ نضون ئمحضار نّس غر ثاسݣا ياضن ن-ؤݣلمام، تّون ؤر ئوين أغروم.
6 داي ئنّياسن سيدنا عيسى: «راراث لبال نّون، حضوياث زݣ ثمثونث ن-ئفرّيسيّين د-ئصدّوقين».
7 داي مشاوارن ئمحضارن نّان ݣ ئخفاون نّسن: «ئنّا أياد ئدّخ ؤر دنيوي أغروم».
8 داي ئسّن سيدنا عيسى مادّا تّينين، داي ئنّياسن: «أوينّا مي ئدروس ليمان، ماخ ألّيݣ دا تخمّامم ئينݣرات كون د ئخفاون نّون: أر تّنيم ؤر غورخ أغروم؟
9 ماخ ألّيݣ تسولم ؤر ثفهيم؟ ئس ؤر ثعقّيلم يي خمسا ن ثوغريفين نّا نبضا خف خمسا لاف ن-ؤرياز، شحال ن تزݣاو أي ثعمّرم؟
10 نغد سبعا ن ثوغريفين نّان نبضا خف ربعا لاف ن-ؤورياز، د مشثا ن تزݣاو أݣ شايضن؟
11 ماخ ألّيݣ ؤر ثفهيم؟ ؤر ئد أغروم أخف داون سوالخ. دغي خيراون ثامثونث ن-ئفرّيسيّين دئصدّوقين!»
12 داي فهمن ݣ لوقث-نّا، ئس ؤر داسن ئسوال شا خف ثمثونث ن-ؤوغروم، والاينّي داثن ئتوصّا خف تّعليم ن-ئفريسيين د-ئصدّوقيين.
شݣّ أيد ئݣان لمسيح ممّيس ن ربّي
(مارقوس 8:27-30؛ لوقا 9:18-21)
13 ألّيݣ نييوض سيدنا عيسى غر ثنيلا ن ثمدينث ن قيصريّا ن فيلبس، ئسقسا ئمحضار نّس، ئنّياسن: «مايد دا تّينين ميدّن خف ممّيس ن بنادم؟»
14 داي نّناس: «ئيتّسن داتّينين ئݣا يحيى لمعمدان، ئد ئيتّسن داتّينين ئݣا نّبي إيليّا، د ئيتّسن دا تّينين ئݣا نّبي إرْمِيَا نغد ئݣا يون زݣ لانبييا».
15 داي ئنّياسن: «ئكنّي مادا غيفي تّينيم؟»
16 داي ئسيول سمعان بطرس، ئنّياس: «شݣ أيد ئݣان لمسيح، ممّيس ن ربّي ئدّرن».
17 داي ئنّاياس سيدنا عيسى: «أياعري نّش أسمعان ممّيس ن يونا! ئدّخ ؤراش ئتّونعيث أود يون ن بنادم، ماشان ئنعثاشث بّانو ئلّان ݣ-ئݣنوان.
18 نك دّيخ أداش ئنيخ: شݣّين أيد ئݣان بطروس، ئسلّي نّا خف مي دّيخ أد بنوخ لكانيسا ئنو، ئد لبيبان ن جاهنّاما ؤر نّين أت غلبن.
19 دّيخ أداك وشخ تيسورا ن ثݣلديت ن-ئݣنوان، كول أينّا أرا ثقّنث ݣ واشال أد ئتواقن ݣ ئݣنوان، د كول أينّا أرا ثرژمث ݣ واشال أد-ئتّورژم ݣ-ئݣنوان».
20 أها ئيوصّا لوقث نّا ئمحضار نّس أد ؤر تّينين يي أود يون ئس ئݣان سيدنا عيسى لمسيح.
سيدنا عيسى دا يتكاشاف خف لموث نّس د تنكرا نّس
(مارقوس 8:31؛ 9:1؛ لوقا 9:22-27)
21 ئبدو سيدنا عيسى أر ئسنعاث يي يمحضار نّس ئس تيخصّا أد ئدّو غر ثمدينث ن لقدس، أد ئتّوعدب شيݣان خف ئفاسّن ن-ئمغارن د ئخثارن ن ثدّارث ن ربّي د لعولاما ن شّرع أها نغنث، ئكّر ݣ واسّ ويس شراض.
22 داي ئزّوغرث بطرس غر طّرف ئبدو أر غيفس ئسغويّو، أر-أس ئتّيني: «حاشا أسيدي أداش ئجرو ؤياد!»
23 داي ئبرّم غيرس سيدنا عيسى ئنّاياس يي بطرس: «دّو زّيݣي أ شّيطان! ثݣيث لعثرث داثي، ئدّخ ؤر دا تفكّارث ݣ ؤينّا ئݣان وين ربّي، ماشان دا تفكّارث غاس ݣ-ؤينّا ئݣان وين ميدّن».
24 ئزايد ئنّياسن سيدنا عيسى ئ-يمحضار نّس: «ونّا ئران أد ئدّو ضاري، أد ئسامح ݣ-ئخف نّس ياسي صّاليب نّس ئثفوري.
25 هاثين ونّا ئران أد-ئفوكّا تودرث نّس أد-ئخسر تودرث ن وابدا، ئد ونّا ئران أد ئخلو تودرث نّس خف نّيرث ئنو أتّيلي تودرت ن وابدا.
26 ئدّخ ماتّا نفع ئلّان غر بنادم مش ئربح دّونيت كول أها ئخصر تودرت نّس ن وابدا؟ نغد مايد غور بنادم أد تّيش خف تودرت ن وابدا حما أتيفوكّا؟
27 ئدّخ هان ممّيس ن بنادم ئقّنتين أدّيدّو د لمالايكا نّس ݣ لعزّ أم وين بّا نّس، لوقث نّا ئدّا أد ئخلص يي كّو يون خف ؤينّا ئݣا.
28 لحق أيد أون تّينيخ، هاثين لّان ديتخ ميدّن نّا ؤر ئتمثاثن غاس أرد أنّاين ممّيس ن بنادم ياغول حما أد-ئحكم».