17
أبدّل ن-ؤدم ن سيدنا عيسى
(مارقوس 9:2-13؛ لوقا 9:28-36)
1 ضارث ن ستّا ن-ؤسّان ييوي يَسُوع، بُطْرُسْ، د يَعْقُوب، د يوحنّا ݣماس، غاس نيثني، يالي أݣّيدسن غر يون ن عاري ئعلّان.
2 داي ثبدّل سّيفث نّس دات-اسن أر ئسفليلّي ؤودم نّس أم ثافوكث ݣين ئعبان نّس ئملّالن أم واسيد.
3 داي ئضهراسند موسى د إيليّا سّين داݣّيس تمسوال.
4 داي ئنّاياس بطرس يي يَسُوع: «ئغودا أليݣ نلّا ديتخ أمولانا، مش ثريث أد نݣ شراط ن ثنوال ديتخ، يوت نّش، د يوث يي موسى، د يوث يي إيليّا».
5 نتّا ئسول دا يسوال، هان يون ئسيݣنو ئسّادّان ئغمساسن، ئسيولد يون صّوت زݣ ئسيݣنو ئينّا: «واد أيد ئݣان ممّي ئعزّين نّا س فرحخ، سفلداث-اس».
6 ألّيݣ سلّان ئمحضارن يي واوال-اد تّوتّين خف ؤدماون نسن، داي ݣّدن شيݣان.
7 داي ئدّود سيدنا عيسى ئحاداثن ئنّياسن: «كّراث، أد ؤر تّݣّداث».
8 داي هزّان ئمحضار ألّن نّسن، ؤر أنّاين أود يون غاس سيدنا عيسى وحدوث.
9 ألّيݣ د ݣزن زݣ عاري، ئوصّاثن سيدنا عيسى ئنّياسن: «أد ؤر تخبّاراث أود يون س-ؤينّا ثنّايم أر دّيكر ممّيس ن بنادم زݣ لموث».
10 داي سالنث ئمحضار نّس، نّناس: «مّاخ ألّيݣ داتّينين لعولاما ن شّرع، ئخصّا يي نّبي إيليّا أد دّيدو ݣ ؤمزوارو؟»
11 داي ئجاوبثن سيدنا عيسى، ئنّياسن: «يّيه، ئدّا نّبي إيليّا أدّيدّو ݣ ؤمزوارو، أد ئيعدل كولشي.
12 ئد نكّين أداون ئنيخ: هان نّبي إيليّا ئدّادّ ياد، أها ؤر توݣيزن، عدبنث ئيمشنّا ران، ئمشيس أيد تݣّان يي ممّيس ن بنادم، ئقّنثين أتعدّبن».
13 ݣ لوقث نّا سّنن ئمحضار نّس ئس داسن ئسوال خف يحيى لْمَعْمَدَانْ.
سيدنا عيسى دا يجّوجوي أربا ݣ لّان وادجنون.
(مارقوس 9:14-29؛ لوقا 9:37-43)
14 ألّيݣ نّيوضن ئمحضارن د سيدنا عيسى غر يون ن-ؤجمّوع ن ميدّن، ئدّود غورس يون ؤرياز ئسجداس.
15 ئنّياس: "رحم ممّي أ-مولانا، ئتخ داي تّوتّوي أر ئتعدّاب، أر ئتّوتّوي ݣ لعافيت شيݣان د وامان، ئتخ شان تيكّال داتيتّاغ شا ݣ ئخف نّس.
16 داي أويخثيد يي ئمحضار نّش أها ؤر غيين أد جُّوجِيْن».
17 داي ئسيول سيدنا عيسى، ئنّا: «ألجيل-اد نّا ؤر دائتّامن ئفرغن، أر مانيݣ تّيليخ ديدّون؟ أر مي أكون تّاسيخ؟ أوياتيد غوري غر دا!»
18 داي ئسغوي يَسُوع خف أدجنون فّغن زّيكس فيساع ئجّي ؤوربا.
19 داي قّيمن ئمحضارن تما ن سيدنا عيسى ألّيݣ ئلّا غاس نتّا، نّناس: «مّاخ ألّيݣ ؤر نْغِي نكني أنسّوفغ أدجنون؟»
20 داي ئنّياسن سيدنا عيسى: «ئتخ ؤر ديݣون ليمان! ريخ أداون ئنيخ: مور غورّون ئلّا ليمان أم وانشث ن-ئيفس ن بوحمّو، ثدّام أتّينيم يي عاري-اد: مّوتّي زݣ سّيا غر سّيا ئدّا ئجرو ؤوينّا داي أود يات لحاجت ؤر داون تݣا لموحال.
21 ئتخ أدجنون وعرنين ؤر دا تفّغن غاس س تژالّيت د واژوم».
سيدنا عيسى دا ئتّكاشاف ديخ ألتو خف لموث نّس.
(مارقوس 9:30-32؛ لوقا 9:43-45)
22 ألّيݣ جمعن ئمحضار ݣ تمازيرت ن لجليل، داي ئنّياسن سيدنا عيسى: «ممّيس ن بنادم ئدّا أد ئتّوغضر أها ئيتونشف غر ئفاسّن ن ميدّن.
23 أها نغينث ئكّرد ݣ واسّ ويس شراض». داي حزنن ئمحضارن شيݣان خف ماݣ نّا.
سيدنا عيسى دا ياكّا ضّاريبا ن ثدّارث ن ربّي
24 نتّا ئدّاد سيدنا عيسى د-ئمحضار نّس غر ثمدينث ن كَفْرَنَاحُومْ، داي دّوند أيث ضاريبا ن ثدّارث ن ربّي غر بطرس نّاناس: «ئيس ؤر داي تخلاّص لمعلم نّون ضّاريبا ثدّارث ن ربّي؟»
25 داي ئنّاياسن بطرس: «ئيّه، دات ئتخلاّص». ألّيݣ ئكشم غر ثادّارث ئزوورث سيدنا عيسى ئنّاياس: «ماش ئيضهرن أسمعان؟ ما زݣ دا تّامژن ئݣلدان ن تمازيرت ضّاريبا؟ ئد زݣ وارّاو نّسن ماد زݣ ئبرّانين؟»
26 ئجاوبث بطرس ئنّاياس: «زݣ ئبرّانين»، داي ئنّاياس سيدنا عيسى: «ئوا أرّاو نسن تّوعفان.
27 دغي حما أد ؤوراسن نݣ شان لعثرث، دّو غر لبحر ثݣرث صنّارا، أسلّم نّاد يولين ݣ ؤمزوارو ثامژث، رزماس أقمو نس، ثدّيث أتّافث ديݣس ربعا ن-ئقاريضن، ثاسيتن ثدّوث ثخلّصث غيفي د غيفش».