15
ئمحضرن ن سيدنا عيسى ؤر دا تݣّين أينّا ݣان ئمزوورا
(مارقوس 7:1-13)
1 داي دّوند ݣ لوقث نّا ئيتّس ن لعولاما ن شّرع د ئفرّيسيّين غر سيدنا عيسى زݣ ثمدينث ن لقدس، نّاناس:
2 «مّاخ ألّيݣ فغن ئمحضار نّش خف ؤينّا دزرين ئمزوورا، ئدّخ ؤر دا سّيريدن ئفاسّن نّسن أدّاي ئرين أد تشين أغروم؟».
3 ماشان ئجاوبثن سيدنا عيسى ئنّاياسن: «ماخ كنّي ألّيݣ ؤر دا تݣّام أينّاون ئنّا ربّي أر تݣّام أينّاون دزرين لجدود نّون؟
4 ئدّخ ئنّا ربّي: "تّهلا ݣ بّا نّش د مّا نش"، ئد "ونّا ئرݣمن بّا نّس نغد مّا نّس ئلازم أد ئمّت".
5 ماشان دا تّينيم كونّي، ونّا ئنّان يي بّا نّس نغد مّا نّس هان أينّا دا ش أكّاخ، ؤشيخت يي ربّي.
6 ؤر ئقّيم غيفس لحق أد ئتهلّا ݣ ئبّاس س واكا تودجيم أوال ن ربّي تتّابعم لعادا، يغول واوال ن ربّي بلا لقيما.
7 ألمونافيقين، هاثين س لحق أس ئساول غيفون نّبي إِشَعْيَاء ألّيݣ ئنّا:
8 "ميدّن-اد دا يي تعبادن غاس س-ؤقمو،
ئد ؤلاون نّسن بعدن شيݣان غيفي.
9 باطّل دايتّعبادن ئتخ دا يي تعبادن
غاس لوصيّاث ن بنادم"».
(مارقوس 7:14-23)
10 داي ئغرد سيدنا عيسى يي ميدن، ئنّياسن: «سفلداث ثفهمم:
11 هاثين ماشي أينا ئكشّمن أقمو ن بنادم أيداي سوسّاخن، ماشان أينّا داديتفغن زݣ ؤقمو أيدا ئسّوساخن بنادم».
12 داي دوند ئمحضار نّس نّاناس: «ئس ؤر تسّينث ئس قلقن ئفرّيسيّين ألّيݣ سلّان يي واوال-اد؟»
13 ئجاوبثن ئنّياسن: «كّو أخليدج نّا ؤر ئزريع بانو ئلّان ݣ ئݣنوان، أد ئتوقلع.
14 أدجّاتن! نيثني ݣان ئدرغال أر ژّوغور ئدرغال، أداي داي ژّوغور ؤدرغال أدرغال دّان أد تّوتّين سّين نّسن ݣ يون ن-ؤحفور».
15 ئجاوبث بطرس، ئنّاياس: «سفهماخ ماتّا لمعنا ن لقيسث-اد».
16 داي ئنّاياسن، سيدنا عيسى: «ئد أر دغي أود كُنّي تسولم ؤر ثفهيم؟
17 ئس ؤر تسّينم كول أينّا ئكشمن ݣ ؤقمو داي تدو غر أديس أها ئدّو ئيفّغ غر برّا.
18 ئد أينّا ئتفغن زݣ ؤقمو دا د-يتفغ زݣ وول، هان أينّا ئسوسّاخن بنادم.
19 ئتخ زݣ ؤل أزݣ دا ئتفّغ كون أينّا ؤر ئحلين، منغيوث، لفساد، توكرضا، شّهادت ن زور د لكفر.
20 أياد أداي سوسّاخن بنادم، ئد ؤتشّي س-ئفاسّن ؤر ياريدن ؤر دايسوسّاخ بنادم».
ليمان ن تمطّوط ئݣان زݣ تمازيرث ن كنعان
(مارقوس 7:24-30)
21 أها ئفّغ سيدنا عيسى زݣ سّييس ئدّو غر ثنيلا ن ثمدينث ن صور د صيدا.
22 داي ثنّالثيد يوث ن ثمطّوط ئݣان زݣ تمناضين-اد ئݣان زݣ أيت كَنْعَانْ س-ؤغويّي ثنّياس: «رحميي، أسيدي، أممّيس ن داود! هان ئلّي تّوسكن س وادجنون وعرنين».
23 ماشان ؤر اس ئسيول س-أود يون ن واوال، أها دّوند غورس ئمحضار نّس، حاولنث نّناس: «ژّعت زّيݣنخ، ئدّخ داتسغويّو ضاراخ!».
24 داي ئجاوبثن ئنّاياسن: «نكّين يوزنيد بّانو غاس غر ئشروان نّا يوشكان ن تخامث ن-إسرائيل».
25 داي ثدود غورس ثمطّوط نّا تسجداس، ثنّاياس: «عاوني أسيدي!»
26 داي ئجاوبيت ئنّياس: «ؤر ئݣي لحق، أد ئتياسي ؤغروم ن ورّاو أها ئتياݣر يي يݣضان».
27 داي ثنّياس: «يّيه، أسيدي! والاينّي أود-ئݣضان دا تتّان زݣ ئفتوتّين ئتّوتّين زݣ طّبلا ن-ئد باب نّسن».
28 داي ئسيولاس ݣ لوقث نّا سيدنا عيسى ئنّياس: «ئخاثر ليمان نّم أثامطّوط! أد-ام ئتّواݣ ؤينّا ثريث». داي ثجّي ئلّيس ݣ لوقث نّا.
سيدنا عيسى دا يجّوجوي شيݣان ن ميدّن
29 داي ئمّوتّي سيدنا عيسى زݣ سّييس ئدّو غر ثاما ن-ؤݣلمام ن لجليل، يالي غر عاري ئقّيم دينّاخ.
30 أها دّوند غورس شيݣان ن تربّاع ݣ لّان ئحيزان د ئدرغالن د ئكوشامن د ئعنژال د وييْض شيݣان، سرسينتن ثاما ن-ئضارن ن سيدنا عيسى ئجّوجيتن.
31 رعبن تربّاع ݣ أنّاين ئعنژال دا ساوالن، د-ئكوشامن دا تجّين، د-ئحيزان داتدّون، د ئدرغالن داتّانّاين، شين لعزّ يي ربّي ن-إسرائيل.
سيدنا عيسى دا يستشّا ربعا لاف ن-ؤرݣاز.
(مارقوس 8:1-10)
32 ئد سيدنا عيسى ئغرا يي ئمحضار نّس ئنّياسن: «نكّين حنّاخ خف ميدن-اد، شراض ن-ؤسّان دغي أيد لّان غوري أها ؤر غورسن مايد تتّان، ؤر رّيخ أتن نازنخ أژومن حما ؤر تّوحالن ݣ ؤبريد».
33 داي نّناس ئمحضار نّس: «ماني زݣ د نتّاوي أنشثيد ن-ؤغروم ݣ لخلا ياد يي شيݣان ن ميدّن-اد».
34 داي ئنياسن سيدنا عيسى: «مشتا ن-ؤغروم أيد غورّون ئلّان؟» نّناس: «سبعا ن توغريفين د شا ن تسلمين مژّينين».
35 داي ئسيولاسن سيدنا عيسى أد قّيمن ݣ واشال،
36 داي يامژ سبعا ن ثوغريفين د ئسلمان، ئيشكر ربّي ئيبضو ئيشاسن يي يمحضار نّس أد شين يي ثربّاع.
37 تشينث ثربّاع أليݣ دجّاون، أسين ئمحضار زݣ ؤينّا ئشايضن ن-ئقشران سبعا ن ثزݣاوين ئعمّرن.
38 ئد وينّا ئتشان لاّن س ربعا لاف ن-ؤرݣاز بلا تعيّالين د ئشيرّان.
39 داي يازن ميدّن داي دّون ئبردان نّسن، ئني ݣ ؤغرّابو ئدّو غر ثنيلا ن تمازيرت ن مَجْدَل.