14
لموت ن-يحيى لمعمدان
(مارقوس 6:14-29؛ لوقا 9:7-9)
1 داي ݣ لوقت نّا ئسلّا هِيرُودُس أنبّاض ن تمازيرث يي ئنغميسن ن سيدنا عيسى.
2 أها ئنّاياسن يي ئخدّامن نّس: «وادخ أيد ئݣان يحيى لمعمدان نّا ديكّرن زݣ لموث! أينّا أس دا تّواݣّنث لموعجيزات خف ؤفوس نّس».
3 يافد لحال هيرودس يومژ يحيى ئكرفث ئݣريث ݣ لحبس خف نّيرث ن هِيرُودِيَّا ثمطّوط ن ݣماس فيلبّس،
4 ئدّخ ئلّا يحيى أراس ئتّيني: «ؤراش ئزري أتّاولث هِيرُودِيَّا ثامطّوطّ ن ݣماش».
5 ماشان أليݣ ئرا هيرودس أد-ئينغ يحيى، ئݣّد زݣ شعب، ئدخ غورسن ئݣا أم يون ن نّبي.
6 نتّا ييوض لعيد ن ثلاليت ن هيرودوس، تكّر ئلّيس ن هيروديا أر تشطّاح ݣ وامّاس نّسن أها تعجباس يي هيرودس.
7 داي ئقّاولاس س يوث ثݣّاليت أداس ئيش أينّا ثرا.
8 نتّاث توصّات ما نّس، تنّاياس: «أوييد غر داتخ ݣ يوث ن صينيا ئخف ن يحيى لمعمدان».
9 داي ئحزن ؤݣلّيد هيرودس، خف نّيرت ن ثݣاليت نّا ئݣّولاّ د خف نّيرت ن وينّا أݣّيدس ئقّيمان، ئنّاياسن ؤشاثاس أينا ثرا.
10 أها يازن أد بّين ئخف يي يحيى ݣ لحبس.
11 أويند أقشاش نّس ݣ صّينيا ؤشينث يي ثعرّيمث، ثاويثيد يي مّا نّس.
12 دّون ئمحضار ن يحيى أسين لݣنازث نضلنت، أها دّون قّيسن أينّا يي سيدنا عيسى.
سيدنا عيسى دا ئستشّا خمسا ألاف ن-ؤرݣاز
(مارقوس 6:30-44؛ لوقا 9:10-17؛ يوحنّا 6:1-14)
13 داي ألّيݣ ئسلا سيدنا عيسى ئ-ؤياد، ئدّو زݣ سّيس ݣ يون ن-ؤغرّابو غاس وحدوت غر يون ن-ؤدغار ئݣان لخلا، ألّيݣ سّنن تربّاع، أها تفارنث زݣ ثمدينين خف ئضارن نّسن.
14 نتّا ئفّغد سيدنا عيسى زݣ ؤغرّابو، ينّاي يان ؤجمّوع أختار، ئحنّا غيفسن، ئجّوجي وينّا ياغ شا زّيكسن.
15 ماشان ألّيݣ تيوض تدݣّات، دّوند غورس ئمحضار نّس نّاناس: «ئݣا ؤدغار لخلا أها ئدّو لحال، أزن ميدّن أد دّون غر ئغرمان حما أد سغن ؤتشّي ئ-يخفاو نّسن».
16 أها ئنّاياسن سيدنا عيسى: «ؤلا ماغر دّان نيتني، ؤشاتاسن كنّي مايد تتشان».
17 داي نّاناس: «هاثين ؤر غورّخ ئلّي غاس خمسا ن توغريفين د سين ن-ئسلمان».
18 أها ئنّاياسن: «أوياتنيد غوري غر ديتخ».
19 داي ئنّاياسن يي ميدّن قّيماث خف توݣا، يامژ توغريفين س خمسا د سين ن-ئسلمان، أها ئهزّا ألّن نّس غر ئݣنّا، ئبارش، ئيبّي توغريفين ئيش ئ-ئمحضار نّس، ئد ئمحضار شان يي ميدّن.
20 تشين كول نّسن ألّيݣ دجّيونن، أسين ئمحضار نّس تناعش ن دزݣاوين ئعمّرن س ئقشران ئشايضن.
21 ئد وينّا ئتشّان لّان س خمسا ألاف ن-ؤرݣاز أيد ئيلان بلا ثوثمين د-ئشيرّان.
سيدنا عيسى دا ئتدّو خف وامان
(مارقوس 6:45-52؛ يوحنّا 6:15-21)
22 ئسني سيدنا عيسى ݣ لوقت نّا ئمحضار نّس أد نييْن ݣ ؤغرّابو أها زݣورنت غر ثمناط ياضن ن لبحر أرد ئسيفض ميدّن أد دّون ئبردان نسن.
23 أليݣ ئمسافاض د تربّاع، يالي غر عاري غاس نتّا حما أد ئژّالّ، ألّيݣ ثيوض ثادوݣّات ئلّا ئسول غاس نتّا دينّاخ.
24 ئد أغرّابو ئلّا ييوض أمّاس ن لبحر أر ئتّمواث د تمزازين، ئدّخ أس ديكا ؤزݣو زݣ داث.
25 داي ݣ ربع أمݣارو ن-ييض ئدّاد غورسن سيدنا عيسى أر ئتدّو نيݣ ن وامان.
26 نتّا أنّاينت ئمحضار دايتدّو خف وامان ن لبحر داي ݣّدن نّان: «لخيال أياد!» س ثوݣدا أر سغويّون.
27 فيساع ئسيولاسن سيدنا عيسى، ئنّاياسن: «أد ؤر تݣّداث! هاثين نكّين أياد».
28 ئجاوبث بطرس ئنّاياس: «مشد شݣّ أيث تيݣان أ-مولانا، شي لامر أداسخ غيرش أتدّوخ نّيݣ ن وامان».
29 داي ئنّاياس سيدنا عيسى: «أورا». ئضر بطرس زݣ ؤغرّابو أر ئتدّو نّيݣ ن وامان حما أد ئدّو غر سيدنا عيسى.
30 ماشان أليݣ يانّاي أزوو دا يتصوض ئݣّد أها أر ئغرّق ݣ وامان، ئسغوي أر ئتّيني: «فوكّايي أمولانا!»
31 فيساع ياژض سيدنا عيسى أفوس نّس يامژتيد، داي ئنّاياس: «أونّا مي ئدروس ليمان؟ مّاخ ألّيݣ تشكاث؟»
32 نتني نييْن أغرّابو سّين نّسن ئرصا ؤزوو.
33 داي دّوند وينّا لّانين ݣ ؤغرّابو سجدناس نّاناس: «سنّيت شݣّين ممّيس ن ربّي أيد تݣيت!»
سيدنا عيسى دايجّوجّوي شيݣان ن-ئغنشاتن.
(مارقوس 6:53-56)