6
سيدنا عيسى دا ئستشّا خمسالاف ن-ورݣاز
(ماتّى 14:13-21؛ مارقوس 6:30-44؛ لوقا 9:10-17)
1 فّير ن-ؤينّا، ئدّو سيدنا عيسى غر أجمّاضين ن لبحر ن لجليل، نّا مي تّينين ألّو لبحر ن طبريّا.
2 أها تفارنت شايݣان ن لغاشي، ئدّخ أنّاين ميدّن تيميتار نّس نّا أر ئتݣّا لّيݣ أر ئجّوجوي ئموضين.
3 يالي سيدنا عيسى غر يوت ن تيشّوت أها ئقّيمن دينّا د-ئمحضرن نّس.
4 ييلي لعيد ن-ؤزرّويa ن ووداين ئدجّاوردّ.
5 ئهزّا سيدنا عيسى ألّن نّس، يانّاي شايݣان لغاشي دّاند غورس، داي ئنّا ئ فيلبّس: «ماني سياد ندا أد ناغ أغروم حما أد نسّوتش ميدّن-اد كول؟»
6 نتّا ئنّا أياد غاس حما أد يانّاي مايد ئدّا فيلبّس أد ييني، ئدّخ سيدنا عيسى ئسّن ياد مايد ئدّا أد-ئݣ.
7 أها ئواجبت فيلبّس: «مغار نسغا ميتاين ؤقاريض ن نّقرت ن-وغروم ؤر-أسن تقادّا حما أد يامژ كويون تاقشّور».
8 داي ئنّاياس يون ياضن زݣ ئمحضرن نّس، نّا مي تّينين أندراوس ؤماس ن سمعان بطرس:
9 «هاتين ئلّا داد يون ن-ؤربا غورس خمسا ن توغريفين ن تمژين د سين ن-ئسلمان، ماشان مايد ئتّݣ ؤياد ئ وانشتيد ن ميدّن؟»
10 داي ئنّا سيدنا عيسى ئ ئمحضرن نّس: «ئنييات ئ ميدّن كول أد قّيمن». ييلي شايݣان ن-وحشلاف ݣ-ؤدغار نّا، داي قّيمن ميدّن كول، ئلين أم خمسالاف ن-ؤرݣاز.
11 أها ياسي سيدنا عيسى توغريفين، ضارت ن مايد ئشكر ربّي، ئوش ئ ئمحضرن نّس، حما أد وشين ئ ميدّن نّا ئقّيمن داد. ئݣ ئمشيس ئ ئسلمان، أها أمژن ميدّن أنشت ن-ؤينّا ران.
12 نتّا دجّيون، ئنّا ئ ئمحضرن نّس: «سمونات ئقشران نّا شايضن حما ؤر ئضيّاع أود لقرطّ زݣ ؤتشي-اد».
13 داي سموننتن أها عمّرن تناعش ن تزݣاوت زݣ ئقشران نّا ئشايضن خف ميدّن نّا تشّانين زݣ خمسا ن توغريفين ن تمژين.
14 ضارت مايد أنّاين ميدّن تاماتارت نّا ئݣا سيدنا عيسى، نّان: «ستيتّ، واد أيد ئݣان نّبي نّا ئخصّا أد د-ئدّو غر دّونيت (ونّا خف ئسّيول سيدنا موسى)!»
15 ماشان سيدنا عيسى ئسّن ياد ئس عوّلن أد ددّون أت تحوّصن حما أت تݣين د-أݣلّيد، ئصرّم b زݣ لغاشي أها ئدّو غر تيشّوت غاس ئ وول نّس.
سيدنا عيسى دا ئتدّو خف وامان
(ماتّى 14:22-27؛ مارقوس 6:45-52)
16 داي لّيݣ تيوض تادوݣّات، سرّحن ئمحضرن نّس غر لبحر ن لجليل.
17 نين يون ؤغرّابّو أد بّين لبحر حما أد عيّن تامدينت ن كفرناحوم. ماشان تضر غيفسن تالّست ياد د سيدنا عيسى ئسول ؤر تن ئسّيكيل.
18 أر ئتصوض يون ؤزوو ئجهدن، داي ئهيج لبحر.
19 فّير ن ماي بعدن ݣ وامان س-أم خمسا نغد ستّا ن-ئد كيلوميتر، أنّاين سيدنا عيسى أل ئتدّو خف وامان ن لبحر. نتّا ئدجّاوردّ غر أغرّبّو، داي ݣّدن.
20 ماشان ئنّاياسن: «أد ؤر تݣّدات غاس نكّ أياد!»
21 ئرين ئمحضرن أت تسنين ݣ-ؤغرّابّو، ماشان دغيا ييوض ؤغرّابّو أدغار نّا غر ران أد دّون.
ميدّن دا ؤرزّون سيدنا عيسى
22 داي س-أسكّا نّس، لغاشي نّا ئقّيمن ݣ-ؤجمّاضين ن لبحر ئشتي ئس ؤر ئلّي دينّا غاس يون ن-ؤغرّابّو، ونّا ݣ دّان ئمحضرن، د سيدنا عيسى ؤر ئنيي أݣّيدسن.
23 فّير ن-ؤياد، ئوضندّ ئغرّوبّا ياضن زݣ تمدينت ن طبريّا غر تاما ن-ؤدغار نّاݣ ئشكر سيدنا عيسى ربّي أها تّشين ميدّن أغروم.
24 نتّا يانّاي لغاشي ئس ؤر ئلّي سيدنا عيسى دينّا ؤلا ئمحضرن نّس، كّرن ميدّن أود نيتني نين ئغرّوباياد. دّون غر تمدينت ن كفرناحوم أت ترزون.
سيدنا عيسى أيد ئݣان أغروم ن تودرت
25 نتّا ؤفانتين ميدّن ݣ-ؤجمّاضينّ ن لبحر، نّاناس: «ألموعلّيم، ميلمي أيد تيوضدت غر داد؟»
26 ئواجبتن سيدنا عيسى: «يّيه، داون تّينيخ لحقّ: هات ؤر دا ئ تورزّوم ئدّخ تفرام لمعنى ن تميتار ئنوc، ماشان دا ئ تورزّوم ئدّخ تشّام أغروم ألّيݣ تدجّاونم.
27 أد ؤر خدّمات خف ؤتشّي نّا ئختسرن، ماشان خدمات خف ماتشّا نّا ئتغيمان ئ تودرت ن وابدا. ؤتشي-اد ئدّا ممّيس ن بنادم أد-اون ت-ئوش، لاحقّاش ربّي ئبّاتنخ ئوشاس تانباطّ لّيݣ تين ئرشم س طّابع نّس».
28 داي سقسانت: «مايد-أخ ئخصّا أت تنݣ، حما أد نݣ لخدمت نّا ئرا ربّي؟»
29 ئسيول سيدنا عيسى، ئنّاياسن: «لخدمت نّا ئتيري ربّي أت تݣيم: أت تامنم س ونّا دّيوزن».
30 أها نّاناس: «ماتّا تماتارت نّا تغيت أداخ تسنعت، حما أد ئسّك نامن؟ ئوا مايد تديت أت تݣد؟
31 لجدود نّخ تشّان لمنّd لّيݣ لّان ݣ صحرا، ئمشينّا ئتّواري ݣ لشتاب ن ربّي: "ئوشاسن أد تشّين أغروم نّا ديدّان زݣ ئݣنّاe"».
32 داي ئنّاياسن سيدنا عيسى: «يّيه، ستيتّ أيد أون تّنيخ: هات ؤر ئد سيدنا موسى أون ئوشان أغروم ن-ئݣنّا، ماشان ئبّا أيد أون ياكّان أغروم أرسلي نّا دّيدّان زݣ ئݣنّا.
33 ئدّخ أغروم ن ربّي نتّا أيدا ئطّارن زݣ ئݣنّا أها أر ياكّا تودرت ن وابدا ئ ميدّن ن دّونيت».
34 داي نّاناس: «أسيدي، عافاش أكّاياخ كوتوال أغروم-اد».
35 أها ئنّاياسن سيدنا عيسى: «نكّين أغروم ن تودرت. ونّا دّيتدّون غوري ؤسار تينغي لاژّ، د ونّا ئتّامن ئسّي ؤسار تينغي فاد.
36 ماشان دا نّيخ-أون ياد: "هاتين تعلاميي، أها ؤر دا ئسّي تّامنم".
37 كول وينّا ئ ياكّا ئبّا أد غوري د دّون، د ونّا غوري د-ئتدّون ؤسار تژّيعخ غر برّا.
38 ئدّخ ؤر ضيرخ زݣ ئݣنّا حما أد ݣخ أينّا ريخ، ماشان حما أد ݣخ أينّا ئرا ونّا ئ دّيوزنن.
39 دغي، هان أينّا ئرا ونّا ئ دّيوزنن: ئخصّا ؤر ئ ئتّاشكا أود يان زݣ وينّا ئ ئوشا كول، ماشان ئخصايي أت تن سكّرخ زݣ لموت ݣ واسّ أنݣّارو.
40 ئدّخ أياد أيد ئرا ئبّا: ونّا دا ئتّانّاي ممّيس ن ربّي أها أر ئتّامن ئس غورس تودرت ن وابدا، د نكّ أت تسكّرخ زݣ لموت ݣ واسّ أنݣّارو».
41 داي كرن ؤداين أر غيفس تّݣمݣيمن، ئدّخ ئنّا: «نكّين أغروم نّا دّيضرن زݣ يݣنّا».
42 أها أر تّينين: «ئس ؤر ئد واد أيد ئݣان عيسى ممّيس ن يوسف؟ هاتين نسّن ئبّاس د مايس. ئوا ماخ ألّيݣ ئتّيني دغي: "نكّ أيد دّيضرن زݣ-ئݣنّا"؟»
43 داي ئنّاياسن سيدنا عيسى: «أد ؤر تّݣمݣيمات ئنݣراون.
44 هان أود يون ؤر ئتّيغيي أد غوري دّيدّو مش ؤر تيدييوي ئبّا نّا ئ دّيوزنن، د نكّ أت تسكّرخ زݣ لموت ݣ واسّ أنݣّارو.
45 هاتين ئتواري ݣ لشتاب ن لانبييا f: "ئدّا ربّي أت تن ئسلمد كول"، ونّا ئسّغادن ئ ئبّا أها ئلمدّ زّيكس، دا د-ئتدّو غوري.
46 أود يون ؤر يانّاي ئبّا، غاس نكّ نّا دّيدّان زݣ ربّي، نكّ أيد يانّاين ئبّا. g
47 يّيه، داون تّنيخ لحقّ: هان ونّا ئتّامن غورس تودرت ن وابدا.
48 نكّين أغروم ن تودرت.
49 مغار تّشان لجدود نّون لمنّ ݣ صّحرا، دا مّوتن.
50 ماشان ونّا دا ئتتّان زݣ ؤغروم نّا دا ئطّارن زݣ ئݣنّا، ؤر ئنّي أد ئمّت.
51 نكّين أغروم ئدّرن نّا دّيضرن زݣ يݣنّا. مش دا ئتتّا شا ن يون زݣ ؤغروم-اد أد ييدير أبدا. د-ؤغروم نّا دّيخ أد وشخ، صّاحتh ئنو أيد تّيݣان، دا تّاكّاخ حما أد ئديرن ميدّن ن دّونيت».
52 خف ئواليون-أد، ئكّر يون ؤمنغي أموعار ئنݣر ووداين، أر تّينين: «ميمشي ئتݣّا ؤرݣاز-اد أداخ ئوش صّاحت نّس أت ت نتشّ؟»
53 داي ئنّاياسن سيدنا عيسى: «يّيه، داون تّينيخ لحقّ: هات مش ؤر تشّيم زݣ صّاحت ن ممّيس ن بنادم أها تسوم ئدامّن نّس، ؤر دا ديݣون تّيلي تودرت.
54 ماشان ونّا ئتتّان زݣ صّاحت ئنو أها أر ئسّا ئدامّن ئنو، هاتين غورس تودرت ن وابدا، د نكّ أت تيد سكّرخ زݣ لموت ݣ واسّ أنݣّارو.
55 ئدّخ تݣا صّاحت ئنو ؤتشّي أرسلي د-يدامّن ئنو تسّي تارسلييث.
56 د ونّا ئتتّان زݣ صّاحت ئنو أها أر ئسّا زݣ ئدامّن ئنو دا ديݣي ئزدّغ أها أر ديكس زدغخ أود نكّ.
57 ئمشينّا ئ ديوزن ئبّا نّا ئدرن، د نكّين دّرخ علاحق نكّ د-ئبّا نݣا يونi، أود ونّا ئتتّان زݣ صّاحت ئنو، أد ييدير ئدّخ ئݣا يون أݣّيدي.
58 ئوا، هان أغروم نّا دّيضرن زݣ ئݣنّا، ؤر ئد أم لمنّ نّا تّشان لجدود نّون، نيتني دا مّتن، ماشان ونّا ئتتّان أغروم-اد أد ييدير أبدا».
59 ئنّا سيدنا عيسى أوال-اد لّيݣ أر ئسّلماد ݣ تمزݣيدا ن ووداين نّا ئلّان ݣ تمدينت ن كفرناحوم.
أوال ن تودرت ن وابدا
60 فّير مايد سلّين شايݣان زݣ ئمحضرن نّس ئ واوال ن سيدنا عيسى، نّان: «ئوعر واوال-اد! مايد ئغين أت ت-يقبل؟»
61 ماشان سيدنا عيسى ئسّن زݣ ئخف نّس ئس دا تݣمݣيمن خف ؤياد، داي ئنّاياسن: «ئس ئزعزع واوال-اد ليمان نّون؟
62 ئوا ما غا ئجرون مش دا تّانّايم ممّيس ن بنادم يولي غر أدغار نّا ݣ-يلّا تيزويري؟
63 رّوح ن ربّي أيدا ياكّان تودرت، ئد صّاحت ؤر ديكس نّفع. ئواليون نّا س-أون سّيولخ، أيد-يݣان رّوح د تودرت.
64 ماشان لاّن ديݣون وينّا ؤر دا ئتّامن ئسّي». ئدّخ سيدنا عيسى ئسّن زݣ تيزويري وينّا ؤر دا ئسّ ئتّامين، د مايد ئمس ونّا ئدّان أت ت-ئزّنز.
65 داي ئنّاياسن ألّو: «خف ؤياد أخف أون نّيخ ئس ؤر ئتّيغيي أود يون أد غوري دّيدّو غاس مش-اس ئوشا ئبّا أد ئݣ أمحضر ئنو».
66 داي فّير ن مايد ئنّا أياد، زرينت شايݣان ن-ئمحضرن نّس أها ؤر قّيمن دا-ياݣّيدس تّمون.
67 أها ئنّا سيدنا عيسى ئ ئمحضرن س تناعش: «ئس ترام أد ئ تزريم، أود كونّي؟»
68 ماشان سمعان بطرس ئنّاياس: «أسيدي، ما غر نتدّو؟ د شݣّينتين ئلّا غورش واوال ن تودرت ن وابدا.
69 ئد نوكّني دا ئسك نتّامن أها نسّن ئد شيݣّ أيد-ئݣان أزدّاي نّا ئختار ربّي».
70 أها ئنّاياسن سيدنا عيسى: «ئس ؤر ئد نكّ أيد كون ئستين س تناعش؟ ماشان يون ديݣون ئݣا شّيطان!»
71 ئنّا أياد خف يهوذا ممّيس ن سمعان ئسخريوطي، ئدّخ ئدجاور أد ئزّنز سيدنا عيسى، مغار ئݣا يون زݣ ئمحضرن س تناعش.