7
سيدنا عيسى د-أيتماس
1 ضارت ن-ؤياد، ئدّو سيدنا عيسى أر ئتكّا ئدغارن ݣ تمازيرت ن لجليل، أها ؤر ئري أد ئدّو غر تمازيرت ن-أيت يهوذا، ئدّخ ئخاتارن ن ووداين أر ؤرزّون أت تنغين.
2 داي نتّا ئدجّاوردّ لعيد نّا مي تّينين ؤداين: لعيد ن-ئنولان،
3 نّاناس أيتماس: «دّو زݣ تمازيرت-اد غر تمازيرت ن-أيت يهوذا، حما أد أنّاين ئمحضرن نّك أود نيتني لخدامي نّا تݣّاد.
4 ؤر ئلّي أود يون ئتݣّين شا ن لخدمت س لخزين مش ئرا أد ئتواسّن. زݣّوس تݣيد ئسكّين-اد، ئوا سنعت ئخف نّش ئ ميدّن».
5 ئدّخ أيتماس س-ئخفاون نّسن ؤر ئسّ ؤمينّ.
6 ماشان سيدنا عيسى ئنّاياسن: «هان لوقت ئنو تسول ؤر تيويض. ئد كونّي تغيم أت تدّوم ݣ لوقت نّا ترام.
7 ميدّن ن دّونيت-اد ؤر غورسن ما خف كون شرّهن، ئد نكّ ؤر دا ئ تّيحميلن، ئدّخ دا تشاهادخ ئس خّان ئسكين نّا تݣّين.
8 دّويات كونّي غر لعيد، ئد نكّ ؤر دا تدّوخ، ئدّخ تسول لوقت ئنو ؤر تيويض».
9 فّير مايد-اسن ئنّا أياد، ئقّيم نتّا ݣ تمازيرت ن لجليل.
سيدنا عيسى ݣ لعيد ن-ئنولان
10 نتّا دّان أيتماس غر لعيد، ئدّو أود سيدنا عيسى، ماشان ئدّا س-ؤخزّون.
11 أها كّرن ئخاتارن ن ووداين أر تورزّون ݣ ووسّان ن لعيد، أر تسقسان: «مانيت؟»
12 ئلين شايݣان ن ميدّن أر غيفس تّمساولن س لحسّ، ئتّس دا تّينين: «أرݣاز ئژيلن أيد ئݣا»، ئد ئتّس ياضن أل تّينين: «أراح، ؤر ئژيل شا، دا ئسّاشكا ميدّن».
13 ماشان أود يون ؤر غيفس ئسيول س طايطاي، ئدّخ ݣّدن زݣ ئخاتارن ن ووداين.
14 نتّا زّرين ميدّن نّص زݣ ووسّان ن لعيد، ئدّو سيدنا عيسى غر تادّارت ن ربّي، ئكّر أر-ئسلماد ميدّن.
15 داي رعبن ووداين، أها قّيمن أر تّينين: «ممشي ئكّا ؤرݣاز-اد ألّيݣ ئسّن أنشتيد، د نتّا ؤر دجين ئقرا؟»
16 داي ئنّاياسن سيدنا عيسى: «أينّا دا سّلمادخ ئ ميدّن ؤر ئد زّيݣي، ماشان ئدّاد زݣ ربّي نّا ئ دّيوزنن.
17 ونّا ئران أد ئݣ لموراض ن ربّي، ئدّا أد ييسين مش د-يكّا ؤينّا دا سّلمادخ زݣ ربّي، نغد دا ساوالخ زݣ ئخف ئنو.
18 هان ونّا ئسّاوالن زݣ ئخف نّس دا يورزّو لعزّ ن-ئخف نّس، ئد ونّا يورزّو لعزّ ن ونّا ت-يد يوزنن دا ئتيني لحقّ أها ؤر ديكس لغشّ.
19 مّاخ ئس ؤر-أون ئوشي سيدنا موسى شّرع؟ والاينّي أود يون ديݣون ؤر دا ئسّ ئتݣا. مّاخ ألّيݣ دا تورزّوم أد ئ تنغيم؟».
20 داي نّاناس ميدّن: «ئلّا ديكّ شا ن لجنّ! ماي ؤرزّون أك ئنغ؟»
21 أها ئنّاياسن سيدنا عيسى: «ݣيخ يوت ن لخدمت، أها ترعبم كول نّون.
22 ئوصاكون سيدنا موسى أت تزينم ئ ئشيرّان، واخا ؤر ئد زّيكس أيد ئدّا ؤزيّن، ماشان زݣ لجدود نّون، خف ؤياد أر تزيّانم أراو نّون ألّو ݣ واسّ ن سّبت.
23 داي مش ئزيّن بنادم ئ ئشيرّي نّس ݣ واسّ ن سّبت حما أد ئوقر شّرع ن سيدنا موسى، مّاخ ألّيݣ أون ئطيّر غيفي ئدّخ جوجيخ يون ن بنادم زݣ ئغنشاثن نّس كول ݣ واسّ ن سّبت؟
24 أد-ؤر حكّمات خف لحساب ن-ؤينّا دا تانّايم، ماشان حكمات س لحقّ».
ئد سيدنا عيسى أيد ئݣان لمسيح؟
25 داي نّان ئتس ن ميدّن زݣ ئمزداغ ن تمدينت ن لقدس خف سيدنا عيسى: «ئس ؤر-ئد أرݣاز-اد أيدا ؤرزّون ئخاتارن ن ووداين أد نغين؟
26 هاياونت دا ئساوال س طايطاي دات ن ميدّن أها ؤر-اس نّين أود لقرطّ! بار ئس سّنن ستيتّ ئخاتارن ئد واد أيد ئݣان لمسيح؟
27 ماشان أرݣاز-اد هاتين نسّن ما زݣ ئݣا، ئد لمسيح أدّاي دّيدّو ؤر ئتّيسين أود يون ما زݣ ئݣا».
28 داي لّيݣ أر ئسّغرا سيدنا عيسى ݣ تادّارت ن ربّي، ئنّاياسن س-يغويّان: «ئس ئ تسّنم ستيتّ ماي مسخ د ما زݣ ݣيخ؟ ؤر ددّيخ زݣ ئخف ئنو، ماشان ونّا ئ دّيوزن ئݣا لحقّ، د كونّي ؤر ت تسّينم شا.
29 والاينّي نكّ سّنخت، ئدّخ دّيخد زݣ غورس، د نتّا أيد ئ ديوزن».
30 أها أر ؤرزّون ألّو أت تامژن، ماشان ؤر غيفس ئسريس أود يون أفوس نّس، ئدّخ تسول تاسّاعت نّس ؤر تيويض.
31 داي أمن ئسّ شايݣان ن ميدّن زݣ لغاشي، أها نّان: «مّاخ ئس ئدّا لمسيح أدّاي دّيدّو أد-ئݣ ؤݣار ن تميتار أم ؤينّا ئݣا ؤرݣاز-اد؟».
32 أها سلّين ئفرّيسيّين ئ مايد ئتّيني لغاشي خف سيدنا عيسى س لحسّ. داي كّرن ئخاتارن ن تادّارت ن ربّي د-ئفرّيسيّين أزنّ ئعسّاسن حما أت تامژن.
33 داي ئنّا سيدنا عيسى: «سولخ أد قيمخ أݣّيدون شا ن لوقت ئدروسن، أها أغولخ غر ونّا ئ ديوزن.
34 تدّام أد ئ ترزوم أها ؤر ئ تّافام، ئدّخ ؤر تّيغييم أت تدّوم غر أدغار نّاݣ دّيخ أد ئليخ».
35 داي كرن ووداين أر تّينين ئنݣراتسن: «ماني غر ئعوّل أد-ئدّو ؤرݣاز-اد، حما ؤر ت نتّافا؟ بار ئس ئعوّل أد ئدّو غر ؤداين نّا ئزلعن ئنݣر ن وينّا ؤر ئݣين ؤداين أها ئسّلمد وينّا ؤر ئݣين ؤداين؟ a
36 ماتّا واوال-اد ئتّيني ؤرݣاز-اد: "تدّام أد ئ ترزوم أها ؤر ئ تّافام، ئدّخ ؤر تّيغييم أت تدّوم غر أدغار نّاݣ دّيخ أد ئليخ"؟».
ئسافّن ن وامان دّرنين
37 ݣ واسّ أنݣّارو ن لعيد، نّا ئݣان أسّ أخاتار، ئبدّ سيدنا عيسى أها ئسيول س-ئغويّان: «ونّا ئنغا ئريفي أد دّيدّو غوري أد ئسو.
38 د ونّا ئتّامن ئسّي، أد-ازّلن زݣ وول نّس ئسافّن ن وامان دّرنين، أم ؤينّا ئنّا لشتاب ن ربّي».
39 ئنّا أياد خف رّوح ن ربّي نّا دّان وينّا ئس يومن أت تامژن. ݣ لوقت نّا، رّوح ن ربّي ئسول ؤر ئتّواوش، ئدّخ ئسول سيدنا عيسى ؤر يولي حما أد يامژ لعزّ.
ميدّن ؤر مساسان خف سيدنا عيسى
40 داي فّير ن مايد سلّان ئتس زݣ لغاشي ئ واوال-اد، نّان: «ستيتّ، واد أيد ئݣان نّبي (نّا خف ئسيول سيدنا موسى)».
41 د-ئتّس نّان: «واد أيد ئݣان لمسيح». ماشان ييتس ياضن نّان: «ئس ئدّا لمسيح أد دّيدّو زݣ تمازيرت ن لجليل؟
42 ئس ؤر دا ئتّيني لشتاب ن ربّي: "هاتين أد دّيدّو لمسيح زݣ تاروا ن-ؤݣلّيد داود، د زݣ تمدينت ن بيت لحم نّا زݣ ئݣا ؤݣلّيد داود؟"»
43 داي ئبضو لغاشي خف نّيرت سيدنا عيسى.
44 أها ئرين ئتّس ن ميدّن زّيكسن أت تامژن، ماشان أود يون ؤر غيفس ئسريس أفوس.
45 داي ليݣ أغولن ئعسّاسن غر ئخاتارن ن تادّارت ن ربّي د-يفرّيسيّين نّا سن ئنّان: «مّاخ ألّيݣ ؤر ثيتّيويم؟»
46 نّاناسن ئعسّاسن: «ؤر دجّين ئسيول أود يون ئمشينّا ئسيول ؤرݣاز-اد!»
47 داي نّاناسن ئفرّيسيّين: «بار ئس كون ئسّخضا أود كونّي؟
48 ئسّ ئلّا شا ن يون زݣ ئخاتارن ن دّين نغد يون زݣ ئفرّيسيّين نّا ئسّ يومنّ؟
49 ماشان لغاشي-اد ؤر ئسّين شّرع ن سيدنا موسى، هاتين ئݣا أمسخوض».
50 نيقوديموس، b يون زݣ ئفرّيسيّين نّا ئكّان غر سيدنا عيسى ياد، ئنّاياسن:
51 «خف لحساب ن شّرع نّخ، ؤر نتّيغي أنحكم خف شا ن بنادم مش ؤر غورس نسّغيد ݣ-ؤمزوارو أها نيسين أينّا ئݣا».
52 نّاناس: «بار ئس تݣيد أود شݣّ زݣ تمازيرت ن لجليل؟ رزو (ݣ لشتاب ن ربّي) أها تدّيت أت تافت ئس ؤر دا دّيتدّو أود يون ن نّبي زݣ تمازيرت ن لجليل».
53 [داي فّير ن-ؤينّا، كو يون ئدّا غر تادّارت نّس.