8
تامطّوط ئتفسادن
1 ئد سيدنا عيسى ئدّا غر عاري ن زّيتون.
2 س-أسكّا نّس، تيفاوت زيكّ، ياغولدّ غر تادّارت ن ربّي. دّوندّ غورس شايݣان ن ميدّن، داي ئقّيم أها ئبدو أر تن ئسّلماد.
3 داي أويناسد ئسلمادن ن شّرع د-ئفرّيسيّين يوت ن تمطّوطّ ؤمژنت أر تفسّد د يون ؤرݣاز، سبدّينت دات ن ميدّن.
4 أها نّان ئ سيدنا عيسى: «ألموعلّيم، تامطّوطّ-اد تتّوامژ دا تفسّد.
5 ݣ شّرع ن سيدنا موسى، تامطّوطّ أم تاد ئلازم أت تتّواوت س-ئژرا أر تمّت، ئوا شݣّين، مايدا تّينيد؟»
6 نّان أياد باش أت تجرّبن، ئدّخ ران أد-أفين ماس غيفس شّتكون، ماشان سيدنا عيسى ئحودر ئقّيم أر ئتّاري س-ؤضاض ݣ واشال.
7 نتّا ؤر حبيسن زݣ ئسقساتن نّسن، ئبدّ ئنّاياسن: «مان ديݣون ؤر دجين ئݣي شا ن لمعصييت، ئݣر غيفس يون ؤژرو د-أمزوارو!»
8 أها ئحودر ديخ ألّو أر ئتّاري ݣ واشال.
9 نتّا سلّين ئ واوال-اد، كّرن أر تّفّغن يون ضارت ن يون، ئكسواتن د-ئمزوورا، ؤر ئقّيم غاس سيدنا عيسى د تمطّوطّ نّا ئبدّين ݣ-ؤدغار نّس.
10 داي ئبدّ سيدنا عيسى، ئنّاياس: «ماني ميدّن نّا ئسّم ئشتكون؟ ئس ؤر ئقّيم أود يون حما أد غيفم ئحكم؟»
11 أها تنّاياس: «أود يون أسيدي!». داي ئنّاياس سيدنا عيسى: «ئوا، أود نكّين ؤر نّيخ أد غيفم حكمخ، دّو ئبردان نّم، والاينّي زݣ أسّا أد ؤسار تعاواد أت تّݣّد لمعصييت»].
سيدنا عيسى أيد-ئݣان أسيدّ ن دّونييت
12 داي ئسّيول سيدنا عيسى ئ لغاشي ألتو ئنّاياس: «نكّين أسيدّ ن دّونيت، ونّا ئ ئتفارن أد غورس ييلي ؤسيدّ ن تودرت أها ؤسار ئدّي ݣ تالّست».
13 أها نّاناس ئفرّيسيّين: «شݣّ، دا تّشاهات ئ يخف نّش، هان شّهات نّش ؤر تزري».
14 ئنّاياسن سيدنا عيسى: «يّيه، مغار دا تشاهادخ ئ يخف ئنو، شّهات ئنو تزري، ئدّخ سّنخ ما زݣ ددّيخ د ما غر تدّوخ. ماشان كونّي، هاتين ؤر تسّينم ما زݣ ددّيخ نغد ما غر تدّوخ.
15 كونّي دا تحكمم ئمشينّا ئحكّم بنادم، ماشان نكّ ؤر دا حكمخ خف أود يون.
16 داي مغار دا حكمخ، لحكام ئنو لحقّ أيد يݣا، ئدّخ ؤر دا حكمخ غاس نكّ، ماشان ئبّا نّا ئ دّيوزن ئلّا أݣّيدي.
17 هاتين ئتواري ݣ شّرع نّون: شّهات ن سين ن ميدّن لحقّ أيد تݣا (مش مساسان ئواليون نّسن).
18 نكّ دا تشاهدخ ئ ئخف ئنو، أها أر غيفي ئتشاهاد ئبّا نّا ئ دّيوزن».
19 داي سقسانت: «ماني بّا نّش؟» ئنّاياسن سيدنا عيسى: «كونّي، ؤر ئ تسّينم نكّ ؤلا تسنم ئبّا. مور ئ تسّينم مايد مسخ، دا تسنم مايد ئمس أود ئبّا».
20 أوال-اد ئنّات سيدنا عيسى تاما ن صّندوق نّاݣ سروسان صّاداقات لّيݣ ار ئسّغرا ميدّن ݣ تادّارت ن ربّي، أها ؤر ت يوميژ أود يون، ئدّخ تسول لوقت نّس ؤر تيويض.
ؤداين ؤر فرين أوال ن سيدنا عيسى
21 داي ئنّاياسن سيدنا عيسى ديخ ألتو: «نكّين، دّيخ أد دّوخ أها تدّام أد ئ ترزوم، ماشان تدّام أت تمّتم د لمعصييت نّون، أها ؤر تّيغييم أد تدّوم غر أدغار نّا غر دّيخ أد دّوخ».
22 أها كّرن ؤداين أر تمسقسان ئنݣراتسن: «بار ئس ئدّا أد ئنغ ئخف نّس؟ أينّا أخف ئنّا: "ؤر تّيغييم أت تدّوم غر أدغار نّا غر دّيخ أد دّوخ"».
23 داي ئنّاياسن سيدنا عيسى: «كونّي تݣام زݣ ؤنادّا، ئد نكّ ݣيخ زݣ-ئݣنّا. يّيه، كونّي، تݣام زݣ دّونييت-اد ماشان نكّ ؤر ݣيخ زݣ دّونييت-اد.
24 خف ؤياد أخف أون نّيخ تدّام أت تمّتم د لمعصييات نّون. مش ؤر تومينم "نكّ أيد-ئݣان"a، ستيتّ، تدّام أت تمّتم د لمعصييات نّون».
25 سقسانت: «ماتّا نتّا شݣّ؟» ئواجبتن سيدنا عيسى: «هاتين نّيخاونت ياد زݣ تيزويري.
26 شايݣان ن-ئواليون أيد غوري ئلّان أد-أون تن ئنيخ أها حكمخ ئسّن غيفون، ماشان ونّا ئ دّيوزنن لحقّ أيد ئݣا، د-ؤينّا مي سلّيخ زّيكس أيد تّينيخ ئ ميدّن ن دّونييت».
27 داي ؤر فهيمن ئس أر-أسن ئساوال خف ئبّاس،
28 داي ئنّاياسن سيدنا عيسى: «أدّاي تسّيليم ممّيس ن بنادم، تدّام أد تيسينم ئد "نكّ أيد-يݣان"، ؤر دا تّݣّخ أود لقرطّ زݣ ئخف ئنو أها ؤر دا تّينيخ غاس أينّا ئ ئسلمد ئبّا.
29 ونّا ئ دّيوزنن ئلّا أݣّيدي. ؤر ئ ئزرّي غاس نكّ، ئدّخ دا تݣّاخ كوتوال أينّا ئرا».
30 لّيݣ أر ئساوال سيدنا عيسى خف-ؤياد، ؤمنّ ئسّ شايݣان ن ميدّن.
لحقّ أد-اون ئوش لحورييّا
31 داي ئنّا سيدنا عيسى ئ ووداين نّا ئسّ يومنّ: «هاتين تݣام ستيتّ ئمحضرن ئنو، مش دا تّامژم ݣ واوال ئنو.
32 أت تيسينم لحقّ، د لحقّ أد-اون ئوش لحورييّا». b
33 داي نّاناس ووداين: «نوكّني، زݣ تاروا ن سيدنا إبراهيم أيد نݣا، ؤر دجّين نݣي ئسمغان ن-اود يون! ئوا مّاخ ألّيݣ-أخ تّينيد: "أد غورون تيلي لحورييّا؟"»
34 ئنّاياسن سيدنا عيسى: «يّيه، ستيتّ أيداون تّينيخ: ونّا ئتݣّين لمعصييت، ئسمغ ن لمعصييت أيد-ئݣا
35 د-ئسمغ ؤر دا ئتغيما ݣ ؤخام، ئد ممّيس ن باب ؤخام دا ديكس ئتغيما أبدا.
36 ئوا مش-اون ئوشا ممّيس ن ربّي لحورييّا، تدّام أت تامژم ستيتّ لحورييّا. c
37 سّنخ ئس تݣام زݣ تاروا ن سيدنا إبراهيم، ماشان ؤر تقبيلم أوال ئنو أها أر تورزّوم أد ئ تنغيم.
38 نكّ دا سوالخ س-ؤينّا أنّايخ غر ئبّا، ئد كونّي، دا تݣّيم أينّا مي تسّغدم زݣ ئبّاتون».
39 نّاناس: «ئبّاتنخ، إبراهيم أيد تيݣان». داي ئنّاياسن سيدنا عيسى: «مور تݣيم أراو ن سيدنا إبراهيم، أر دا تݣّيم أينّا ئݣا نتّا.
40 ماشان دغي، واخّا أون نّيخ لحقّ نّا مي سلّيخ زݣ ربّي، دا تورزّوم أد ئ تنغيم، د-ؤياد ؤر تيݣي سيدنا إبراهيم.
41 كونّي دا تݣّيم أينّا ئتݣّا بّاتون». داي نّاناس ووداين: «نوكّني ؤر نݣي ئحژيژن، غاس ربّي أيد ئݣان ئبّاتنخ!»
42 أها ئنّاياسن سيدنا عيسى: «مور ئݣي ربّي بّاتون أد ئ تيريم، ئدّخ دّيخدّ زݣ ربّي أها لّيخ داد خف نّيرت ن ربّي، ؤر ددّيخ زݣ ئخف ئنو، ماشان نتّا أيد ئ دّيوزن.
43 مّاخ ألّيݣ ؤر دا تفرّوم أوال ئنو؟ ئدّخ ؤر دا تّيغيم أد تسّغدم ئ واوال ئنو.
44 كونّي، تݣام أراو ن بّاتون شّيطان، أها أر تّيريم أت تݣيم لموراض ن بّاتون. نتّا أيدا ئنقّان ميدّن زݣ تيزويري، ؤر دجين ئقّيم ݣ لحقّ، ئدّخ ؤر ئلّي لحقّ جاج نّس، أداي دا ئساوال س-يحلّالن دا ئتيني أينّا ديكس ئلّان، ئدّخ ئݣا بويحلّالن أها ئݣ ئبّاس ن-يحلّالن.
45 ماشان نكّين، دا تّينيخ لحقّ، د-ؤياد أخف ؤر دا ئسّي تّامنم.
46 مان ديݣون أيد غيفي يومژن شا ن لمعصييت؟ ئوا مش دا تّينيخ لحقّ، مّاخ ألّيݣ ؤر ئ تومينم؟
47 ونّا ئݣان وين ربّي دا ئسّغاد ئ واوال ن ربّي، ماشان كونّي، ؤر تݣيم وين ربّي، أياد أخف ؤر دا تسّغادم».
سيدنا عيسى د سيدنا إبراهيم
48 داي نّان ووداين ئ سيدنا عيسى: «ئس ؤر غورنخ لحقّ أد نيني: "تݣيت أساميري أها ئلّا ديكّ شا ن لجنّ؟"»
49 أها ئنّاياسن سيدنا عيسى: «نكّ ؤر ديݣي شا ن لجنّ، ماشان نكّ دا سّمغوراخ ئبّا، ئد كونّي دا يي تّحقّارم.
50 نكّ، ؤر دا ؤرزّوخ لعزّ ن-يخف ئنو، ماشان ئلّا يون نّا ئ ت يورزّو أها أر ئحكّم.
51 يّيه، نكّين داون تّينيخ لحقّ: ونّا يوحطّون أوال ئنو ؤسار يانّاي لموت».
52 داي نّاناس ووداين: «دغي، نسّن ئس ئلّا ديكّ شا ن لجنّ، هاتين ئدّا ئمّوت سيدنا إبراهيم أها مّتن أود لانبييا، أر تّينيت شݣّ: "ونّا يوحطّون أوال ئنو ؤسار يانّاي لموت تارضاراس".
53 بار ئس توݣرد ئبّاتنخ إبراهيم نّا ئمّوتن؟ أود لانبييا دّان مّوتن، ئوا مايد تغالد ݣ-يخف نّش؟»
54 أها ئنّاياسن سيدنا عيسى: «مش دا تݣّخ لعزّ ئ يخف ئنو، هان لعزّ ئنو ؤر ئواتا والو، ماشان ئبّانو أيد ئ ئݣان لعزّ، ونّا خف دا تّينيم كونّي ئݣا ربّي نّون.
55 كونّي ؤر دا ت تّيسينم، ئد نكّ دا ت تّيسينخ. مش نّيخ ؤر تسّينخ، أد ݣخ بويحلّالن أم كونّي، ماشان نكّ سّنخت أها أر ؤحطّوخ أوال نّس.
56 بّاتون إبراهيم ئفرح شايݣان لّيݣ ئخمّم أد يانّاي أسّ نّاݣ دّيخ أد دّوخ. داي يانّايت أها ئرشقاس».
57 داي نّاناس ووداين: «هاتين ؤر غورش ݣ لعمر أود خمسين ن-وسݣّاس، ميمشي تكّيد ألّيݣ تانّايد سيدنا إبراهيم؟».
58 أها ئنّاياسن سيدنا عيسى: «يّيه داون تّينيخ لحقّ: دات ن مايد ئلال سيدنا إبراهيم، "نكّ أيد ئݣان"».
59 داي أسين ئژرا باش أت توتن، ئد سيدنا عيسى ئنتل زّيكسن أها ئفّغ زݣ تادّارت ن ربّي.