9
سيدنا عيسى دا ئجوجوي يون ؤدرغال
1 داي نتّا أر ئتدّو سيدنا عيسى ݣ-ؤبريد، يانّاي يون ؤرݣاز ئݣان أدرغال زݣّوس دّ-يلولا.
2 أها سقسانت ئمحضرن نّس: «ألموعلّيم، مان ديكسن أيد ئݣان لمعصييت، ئد أرݣاز-اد ماد لوالدين نّس ألّيݣ دّ-يلولا ئݣا أدرغال؟»
3 داي ئنّاياسن سيدنا عيسى: «ؤر ئد خف لمعصييت نّس، ؤلا خف لمعصييت ن لوالدين نّس. ئݣا أدرغال حما أت تباين لخدمت ن ربّي ديكس.
4 ئخصّاياخ أنݣ لخدمت ن ونّا ئ دّيوزن، ماحدّ ئسول واسّ، ئدّخ ئدّا أد ديدّو ييض أها ؤر ئتّيغيي أود يون أد ئخدم.
5 ماحد سولخ ݣ دّونيت، نكّين أسيدّ ن دّونيت».
6 فّير مايد ئنّا أوال-اد، ئسوفس سيدنا عيسى ݣ واشال، أها ئعديل س تفولاژ نّس شوي ن والوض، يامست ئ والّن ن-ؤدرغال.
7 داي ئنّاياس: «دّو سّيرد ؤدم نّش ݣ سّاريجa ن سِلْوَام». (لمعنا ن سِلْوَام: أزن). ئدّو ئسّيرد أها ياغول أر ئتّراعا.
8 داي قّيمن وادجّارن د ميدّن نّا ت يانّاي أر ئتتّر زݣ واهلي، أر تمسقسان: «ئس ؤر ئد أرݣاز-اد نّا أر ئتتّرن س ئغيمي؟»
9 ئتسّ زّيكسن نّان: «يّيه، نتّا أياد!» د-ئتسّ ياضن نّان: «ؤهو، ؤر ئد نتّا، ماشان ئرويست!» ئد نتّا ئنّاياسن: «نكّ أيد-ئݣان!»
10 أها نّاناس: «مايد تݣيت ألّيݣ رژمنت والّن نّش؟»
11 داي ئنّاياسن: «أرݣاز نّا مي دا تّينين ميدّن عيسى، أيد ئعديلن شوي ن والوض يامست ئ والّن ئنو، أها ئنّايي: "دّو سّيرد ݣ سّاريج ن سِلْوَام"، دّوخ سّيردخ أغولخ أر تّراعاخ».
12 أها سقسانت: «ئوا، ماني أرݣاز-اد؟» ئنّاياسن: «ؤر سّينخ».
ئفرّيسيّين دا تسقسان أدرغال نّا ئجّين
13 داي أوينّ أرݣاز نّا ئكّان ئݣا أدرغال غر ئفرّيسيّين.
14 أها ئݣ واسّ ن سّبت لّيݣ ئعديل سيدنا عيسى ألوض حما أد ئرژم ألّن ئ ودرغال.
15 أياد أخف تين سقسان ئفرّيسيّين أود نيتني، مايد ئݣا ألّيݣ ياغول دا ئتّراعا. ئنّاياسن: «ئݣايي شوي ن والوض خف والّن، سّيردخ، أغولخ أر تّانّايخ».
16 أها نّان ئتسّ ن-ئفرّيسيّين: «أرݣاز نّا ئݣان أياد ؤر ديدّي زݣ ربّي، ئدّخ ؤر دا ئتّوقّار أسّ ن سّبت». ئد وييّاض نّان: «أراح، يون ؤرݣاز ئعصان ؤر ئتّيغي أد ئݣ أم تميتار-أد!» داي ؤر مساسان ئنݣراتسن.
17 أها سقسان ألّو أدرغال نّا ئجّيين: «ماي دا غيفس تّينيد، ئدخ شݣّين أمي ئرژم ألّن؟» ئواجبتن: «ئݣا نّبي ن ربّي».
18 ماشان ئخاتارن ن ووداين ؤر رين أد-أمن ئد نتّا أيد ئكّان ئݣا أدرغال أها ياغول أر ئتّراعا. أياد أخف دّ غران ئ لوالدين نّس
19 حما أت تن سقسان. نّاناسن: «ئس ئݣا ؤرݣاز-اد ممّيتون نّا خف دا تّينيم ئلولاد ئݣا أدرغال؟ ماكّاس ألّيݣ دا ئتراعا دغي؟»
20 داي نّاناسن لوالدين نّس: «نسّن ئد ممّيتنخ أيد ئݣا أها ئݣ أدرغال زݣّوس د-ئلال.
21 ماشان ماكّاس ألّيݣ دا ئتّانّاي دغي، هات ؤر نسّين شا، أها ؤر نسّين مايد-أس ئرژمن ألّن، هاتين ئݣا أرݣاز، سقّسات أد-ئسيول خف-ئخف نّس».
22 لوالدين نّس نّان أياد، ئدّخ ݣّدن زݣ ئخاتارن ن ووداين، لاحقّاش ئخاتارن ن ووداين مساسان أد ژّعن زݣ تمزݣيدا نّسن كول وينّا ئقرّان س سيدنا عيسى ئس ئݣا لمسيح.
23 أياد أخف نّان لوالدين نّس: «هاتين ئݣا أرݣاز، سقّسات».
24 داي غريندّ ئفرّيسيّين ديخ ألتو ئ ورݣاز نّا ئݣان أدرغال، نّاناس: «ݣّال س ربّي ؤر تّينيد غاس لحقّ! نوكّني نسّن ئس ئݣا ؤرݣاز نّا ش-ئجّوجين ئمعصي».
25 ئنّاياسن: «ؤر سّينخ مش ئݣا ئمعصي نغد أراح، ماشان يون ؤسكين أيد سّنخ: كّيخ ݣيخ أدرغال دغي دا تراعاخ».
26 أها سقّسانت ديخ ألتو: «مايد أش ئݣا حما أد ئجّوجي ألّن نّش؟»
27 داي ئواجبتن: «هاتين نّيخاونت ياد، والاينّي ؤر تريم أد غوري تسّغدم، مّاخ ألّيݣ ترام أد أون قّيسخ أينّا ئجران ديخ ألتو؟ بار ئس ترام أود كونّي أت تݣيم ئمحضرن نّس؟»
28 أها رݣمنت نّاناس: «شݣّ أيد ئݣان أمحضر ن-ورݣاز-اد! ئد نوكّني نݣّا ئمحضرن ن سيدنا موسى.
29 نكّني نسّن ئس ئسّيول ربّي ئ سيدنا موسى، ئد أرݣاز-اد هاتين ؤر نسّين أود ما زݣ-ئݣا».
30 ئنّاياسن ؤرݣاز: «ئوا لعجب أياد! كونّي ؤر تسّينم ما زݣ ئݣا مغار ئ ئرژم ئ والّن.
31 نسّن ئس ؤر دا ئتّسلاّ ربّي ئ ئمعصان، ماشان دا ئتّسلّا ئ ونّا ت-يتعبادن أر ئتݣّ س واوال نّس.
32 زݣ تيزويري ن دّونييت، ؤر دجين ئلّي ونّا د-ئروران ئژري ئ شا ن يون ئݣان أدرغال زݣّوس ئلولا.
33 مور ئد ئس ؤر ديدّي ؤرݣاز-اد زݣ ربّي، ؤر ئتّيغيي أد ئݣ أود لقرطّ».
34 داي نّاناس: «شݣ زݣ ئخف أل ئضار تلّيد ݣ لمعصييت زݣّوس تلوليد أها تريد أد-اخ تسّقراد!» داي ژّعنت برّا ن تمزݣيدا ن ووداين.
35 فّير ن ؤينّا، ئسلّ سيدنا عيسى ئس ژّعن ئفرّيسيّين أرݣاز نّا ئݣان أدرغال زݣ تمزݣيدا نّسن، داي لّيݣ ت يوفا سيدنا عيسى ئنّاياس: «ئس دا تّامنت س ممّيس ن بنادم؟»
36 ئنّاياس: «عافاش أسيدي، ئنييي مايد ئمس حما أد ئسّ أمنخ؟»
37 داي ئنّاياس سيدنا عيسى: «هان شݣّ دا ديكس تراعات س والّن نّش، نتّا س-يخف نّس أيد-اش ئساوالن دغي!»
38 ئنّاياس ؤرݣاز: «دا تّامنخ، أسيدي!» أها ئسجد دات ن سيدنا عيسى.
39 داي ئنّا سيدنا عيسى: «دّيخدّ أد حكمخ خف ميدّن ن دّونيت-اد، حما وينّا ݣانين ئدرغالّ أت تراعان، د وينّا ئتراعان أد ݣين ئدرغالن».
40 داي فّير مايد سلّين ئتّس ن-يفرّيسيّين نّا ئلّان أݣّيدس ئ واوال-اد، نّاناس: «بار ئس نݣا أود نوكّني ئدرغالن؟»
41 أها ئنّاياسن سيدنا عيسى: «مور تݣيم ئدرغالن، ؤر ديݣون تّيلي لمعصييت. ماشان دغي، ݣ دا تّينيم دا تّانّايم، تسول لمعصييت ديݣون».