10
سيدنا عيسى أݣّان أمكسا ئژيلن
1 يّيه، ستيتّ أيد-أون تّينيخ: «ونّا ؤر دا ئتّاكمن زݣ تݣّورت غر تحدجّورت ن وولّي، ماشان دا ئزرّي زݣ شا ؤدغار ياضن، هاتين أخوّان د أقطّاع أيد ئݣا.
2 ئد ونّا ئتّاكمن زݣ تݣّورت، نتّا أيد ئݣان أمكسا ن وولّي.
3 أعسّاس ن تݣّورت دا س ئرژّم أها سلّينت وولّي ئ واوال نّس. دا ئقّار ئ وولّي نّس س-ئسماون نّسنت أها ياويتنت غر برّا.
4 داي أدّاي ئسّوفغ ؤلّي نّا ݣانين تينّس، دا ئتدّو داتاسنت، أر ت تفارن ئدّخ سّننت أوال نّس.
5 ئد أبرّاني ؤر دّين أت ت تفارنت، دا زّيكس رݣّلنت، ئدّخ ؤر دا تّيسينت أوال نّس».
6 ئقيساسن سيدنا عيسى لميتال-اد، ماشان نيتني ؤر فرين ما خف دا سن ئساول.
7 داي ئنّاياسن سيدنا عيسى ديخ ألتو: «يّيه، ستيتّ أيدا أون تّينيخ: نكّين تاݣّورت ن تحدجّورت ن وولّي.
8 كول وينّا د ديدّان داتي، ݣان ئشفّارن د-يقطّاعن، ماشان ؤلّي ؤر-اسن سّغيدن.
9 نكّين تاݣّورت، ونّا ئتّاكمن زّيݣي أد ئفوكّا، أد ئكشّم، ئفّغ أها ياف ؤتشي نّس.
10 أّشفّار ؤر دا دّيتدّو غاس أد ياكر، ئغرص أها ئخلو. ئد نكّ هاتين دّيخدّ أكّ أد غورسن تيلي تودرت أها ؤر-اسن ئتخصّا شا.
11 نكّين أمكسا ئژيلن، د-ومكسا ئژيلن دا ياكّا تودرت نّس خف وولّي نّس.
12 أخدّام، ؤر ئݣي أمكسا، د وولّي ؤر ݣينت تينّس. أدّاي يانّاي ؤشّن ئدّادّ، دا ئتّادجّا ؤلّي ئروول. داي ئحوّص ووشّن ؤلّي أها ئسلوزع تاوالا.
13 أخدّام دا ئرݣّل، ئدّخ دا ئخدّم غاس خف تغراض، ؤر دا تّيتّاوي ݣ وولّي.
14 ماشان نكّين أمكسا ئژيلن أيد ݣيخ، دا تّيسينخ ؤلّي نو د وولّي نو دا ئ تّيسيننت،
15 ئمشينّا ئ ئسّن بّانو د نكّ دا تّيسينخ بّانو، دا ياكّاخ تودرت ئنو خف وولّي نو.
16 أها غوري ؤلّي ياضن نّا ؤر ئݣين زݣ تحدجّورت-أد، ئخصّايي أت تن-يد أويخ ألتو. أد سّغدنت ئ واوال ئنو، أغولن أد ݣينت يوت ن توالا أها ييلي غورسن غاس يون ن-ومكسا.
17 خف ؤياد دا ئ ئتّيري بّانو، ئدّخ دا ياكّاخ تودرت ئنو أكّ أت تّامژخ ألّو.
18 ؤر ئكّي أود يون ئتّامژن رّوح ئنو، ماشان دا تّاكّاخ س لخاضر ئنو. تلّا غوري تنباطّ أد ؤشخ رّوح ئنو، أها تلّا غوري تنباطّ أت تامژخ ألتو، أياد أيد ئ ئنّا ئبّا أت تݣخ».
19 داي تكّر لغنانت خف واول-اد ئنݣر ووداين ألتو.
20 أر تّينين شايݣان زّيكسن: «ئوثيث شا ن لجنّ، هاتين ئحّويض! مّاخ ألّيݣ دا غورس تسّغادم؟»
21 د ييتس ياضن أر تّينين: «ؤر ئد أوال ن ونّا ئوّث لجنّ أياد. مّاخ ئد ئس ئغيي لجنّ أد ئرار ئژري ئ ئدرغالن؟».
ؤداين دا سّاساين ئ سيدنا عيسى لكوفر
22 ݣ تݣرست، تلّا غر ؤداين لعات أد ݣين يون ن لعيد ݣ تمدينت ن لقدس، حما أد كتين ئسّ تّورژم تادّارت ن ربّي ديخ ألتو.
23 ݣ لوقت-اد، سيدنا عيسى أر ئتنيودّو دّاو ن-ؤسقّيف نّا مي تّينين "أسقّيف ن سليمان"، نّا ئلّان ݣ تادّارت ن ربّي.
24 داي مّونّ غيفس ووداين أها نّاناس: «مشحال ن لوقت أيد-اش ئخصّان حما أد-اخ تينيد لحقّ؟ مش-ئد-ئس تݣيد لمسيح ئنيياخت س طايطاي؟»
25 داي ئنّاياسن سيدنا عيسى: «هاتين نّيخاويتّ، ماشان ؤر دا تّامنم. لخدامي نّا دا تݣّاخ س تنباطّ ن-ئبّا، دا ئ تشاهادن.
26 ماشان ؤر دا تّامنم، ئدّخ ؤر تݣيم زݣ وولّي نو.
27 ؤلّي نو دا تسلّانت ئ واوال ئنو، د نكّ دا تن تّيسينخ تفارنتييي.
28 أر-اسن أكّاخ تودرت ن وابدا، ؤر سار ؤشكينت أبدا، أها ؤر ئدّي أود يون أت تن ئحوّص زݣ ؤفوس ئنو.
29 ئبّا أيد ئ تن ئوشان د نتّا يوݣر مايد ئلّان كول، أها ؤر ئتّيغيي أود يون أت تن ئحوّص زݣ ؤفوس نّس.
30 نكّ د-يبّا يون أيد نݣا».
31 داي أسين ووداين ديخ ألتو ئژرا أت توتن.
32 داي ئنّاياسن سيدنا عيسى: «ݣيخ داتاون شايݣان ن لخدامي ژيلنين س لجهد ن-ئبّا. مان ݣ لخدامي-اد أخف ترام أد ئ تنغيم س-ئژرا؟»
33 واجبنت ييتس ن ووداين: «ؤر دا ش نكّات س-ئژرا خف لخدامي نّا ئژيلن، ماشان خف لكوفر. شݣّ غاس بنادم أيد تݣيت، أر تّيريد أت تݣد ئخف نّش د ربّي».
34 أها ئواجبتن سيدنا عيسى: «ئس ؤر ئتّواري ݣ لشتاب ن شّرع نّون، نّا ݣ-ئنّا ربّي: "نّيخاون: تݣام ئد ربّي"؟ a
35 ؤر ئلّي مايد ئغين أد ئسّفرغ أوال ن ربّي. مولانا ئنّا: "ئد ربّي" ئ وينّا مي دّيدّا واوال نّس،
36 ئوا مّاخ ألّيݣ دا ئ تّينيم نكّين نّا ئختار ئبّا أد ݣخ وينّس أها يازنتيد غر دّونيت: "هاتين تكفرد!" ئدّخ-أون نّيخ: "نكّ ممّيس ن ربّي أيد ݣيخ"؟
37 مش ؤر دا تّݣّاخ لخدامي ن-ئبّا، أد ؤر ئسّي تّامنات.
38 ماشان مش دا تݣّاخ لخدامي-اد، واخّا ؤر تريم أد ئسّي تامنم، أمنات أبعدا غاس س-ؤينّا ݣيخ، حما أت تيسينم ئس ئلّا ديݣي بّانو أها لّيخ ديكس».
39 أها ران أت تامژن ديخ ألتو، ماشان ئروح-اسن.
40 ضارت ن-وياد، ئكّر سيدنا عيسى ياغول غر أجمّاضين ن واسيف ن الْأُردن، س-ادغار ماني ݣ ار ئتبّژ يحيى ميدّن تيزويري، أها ئقّيم دينّا.
41 داي دّوند غورس شايݣان ن ميدّن أها أر تّينين: «ؤر دجّين ئݣي يحيى أود يوت ن تماتارت، ماشان أينّا ئنّا كول خف ؤرݣاز-اد ئݣا ستيتّ».
42 أها أمنّ ئسّ شايݣان ن ميدّن دينّا.