11
تانكرا ن-ؤمتّين لعازر
1 يون واسّ، ياغ شا يون ن-ؤرݣاز ئسم نّس لعازر، نّا ئݣان زݣ ئغرم ن بيت عنيا، نّاݣ تزدغ مريم د مرثا، ئستماس.
2 مريم نتات أيد يومسن زّهر ئ يضارن ن سيدنا عيسى أها تسفضاستن س-وشكوك نّس، أها ئݣ لعازر نّا ياغ شا ؤماس.
3 داي تصّيفض مريم د مرثا أمازان غر سيدنا عيسى، نّانتاس: «أسيدي، هان أمدّاكل نّك نّا ئعزّين، لعازر، ياغث شا».
4 داي نتّا ئسلّا سيدنا عيسى ئ واوال-اد، ئنّا: «ئغنشاياد ؤر دا ئصّاواض غر لموت، هاتين تصلح حما أتسباين لعزّ ن ربّي أها ئتواݣ لعزّ ئ ممّيس ن ربّي».
5 ييلي سيدنا عيسى أر ئتّيري مرثا د ؤلتماس د-ؤماتسن لعازر،
6 والاينّي، لّيݣ ئسلّا ئس ياغ شا لعازر، ئقّيم ألّو سين ن ووسّان ݣ-ودغار نّا ݣ-ئلّا.
7 ضارت ن-ؤينّا، ئنّا ئ ئمحضرن نّس: «أغولاتاخ غر تمازيرت ن-أيت يهوذا».
8 داي نّاناس ئمحضرن نّس: «ألموعلّيم، زݣ شا ن لوقت ئدروسن، ؤداين دا ؤرزّون أش نغين س-ئژرا، ئوا مّاخ ألّيݣ تريت أت تاغولد غورسن دغي؟»
9 ئنّاياسن سيدنا عيسى: «ئس ؤر ئد تناعش ن تاسّاعت أيد-ئلّان ݣ واسّ؟ د ونّا ئتدّون س واسّ ؤر دا تكّات تفيشيتa، ئدّخ دا ئتّانّاي أسيدّ ن دّونيت-اد.
10 ماشان مش دا ئتدّو شا ن يون ݣّيض ئدّا أت توّت تفيشيت، ئدّخ ؤر ديكس أسيد».
11 داي ضارت مايد ئنّا أوال أد، ئنّاياسن ألّو: «هان أمدّاكل نّخ لعازر ئݣن، ماشان دّيخ أد دّوخ أتّسكرخ».
12 أها نّاناس ئمحضرن نّس: «أسيدي، مش ئݣن ئقّنتين أد ئجّي».
13 ماشان سيدنا عيسى أر ئساوال خف لموت ن لعازر، ئد نيتني غالن ئس أر ئساوال غاس خف ؤنودّم.
14 داي ئنّاياسن سيدنا عيسى بطايطاي: «هان لعازر ئمّوت،
15 د نكّين فرحخ خف نّيرت نّون، ئدّخ ؤر ن لّيخ دينّ، حما أتامنم ئسّي، ئوا كراتاخ أندّو غورس».
16 أها ئنّا توما، نّا مي تّينين "ئكنيو"، ئ يمحضرن ضنين: «كراتاخ أندّو أود نوكّني حما أنمّت د لموعلّيم نّخ!»
17 داي نتّا ييوضدّ سيدنا عيسى، يافن لعازر ئنضل ياد س ربعا د-وسّان.
18 ييلي ئغرم ن بيت عنيا تانيلا ن تمدينت ن لقدس س-أم شارض ن-ئد كيلوميتر.
19 داي دّوند شايݣان ن ووداين غر مرثا د مريم أت تنت سعونّان ݣ-ؤماتسنت.
20 نتّا تسلّا مرثا ئس دّيدّا سيدنا عيسى، تكّر تݣراس عرّاض، ئد مريم تقّيم ݣ تادّارت.
21 داي تنّا مرثا ئ سيدنا عيسى: «أسيدي، مور تلّيت داد، ؤر ئتّمتات ؤما!
22 ماشان أود دغي سّنخ ئد أينّا تتّرت كول ئ ربّي أد-اش تييوْش».
23 أها ئنّاياس سيدنا عيسى: «هان ؤمام ئدّا أد ئكّر زݣ لموت».
24 داي تنّاياس مرثا: «سّنخ أسيدي ئس تينّ ئقّن أد ئكّر ݣ واسّ أنݣّارو، أسّ ݣّ دّان أد كّرن ئمتّين».
25 أها ئنّاياس سيدنا عيسى: «نكّين تانشرا زݣ لموت أها ݣخ تودرت. ونّا ئتّامن ئسّي أد ييدير مغار ئمّوت!
26 د ونّا ئدّرن أها أر ئسّي ئتّامن ؤسار ئمّوت أبدا. ئس دا تّامنت س واوال-اد؟»
27 داي تنّاياس مرثا: «يّيه أسيدي، نكّ دا تّامنخ ئد شݣّ أيد ئݣان لمسيح، ممّيس ن ربّي، نّا ئقاول ربّي ئس ئدّا أد ديدّو غر دّونيت».
28 داي لّيݣ أس تنّا أياد، تدّو تغر ئ ؤلتماس مريم، تسيول-أس س لحسّ أها تنّاياس: «هان لموعلّيم ئدّاد أها أل-أم ئقّار».
29 نتّا تسلّا ئس د ييوض سيدنا عيسى، دغيا تكّر، تدّو س-ؤسدّرف غورس.
30 ئد سيدنا عيسى ئسول ؤر دّييويض غر ئغرم، ماشان ئسول ݣ-ودغار نّا ݣ-اس تݣرا مرثا عرّاض.
31 والاينّي ؤداين نّا أݣّيدس ئلّان ݣ تادّارت أر تسعونّان، لّيݣ أنّاين مريم تكّر س زّرب أها تفّغ، تفارنت أها نّان بار ئس تدّا غر تنضلت باش أت ترو دينّا.
32 نتّا تيوض مريم غر أدغار نّا ݣ-ئلّا سيدنا عيسى، غاس تانّايت، تكرف غرئضارن نّس أها تنّاس: «أسيدي، مور تلّيد داد ؤر ئتّمتات ؤما».
33 داي نتّا يانّايت سيدنا عيسى دا تّرو نتات د ميدّن نّا أݣّيدس دّيمون، داي ئغيّر شايݣان أها ئشوّش لخاضر نّس.
34 داي ئنّاياسن: «ماني ݣ تين تنضلم؟» أها نّاناس: «أسيدي، أورا أتانّايد».
35 داي ئقّيم سيدنا عيسى أر ئتّرو.
36 ئد ؤداين قّيمن أر تّينين ئنݣراتسن: «راعات، مشحال أيد ئعزّ غورس!»
37 ماشان ئتّس ياضن أر تّينين: «نتّا نّا د-ئرارن ئژري ئ ودرغال، ئس ؤر ئغي أد ئݣ شا ئ لعازر حما ؤر ئتّمتات؟».
38 داي ئغيّر عيسى ديخ ألتو شايݣان، ئدّود غر تنضلت، نّا ئݣان أم ئفري أها تتواقن س يون ن-وژرو أخاتار.
39 داي ئنّاياسن سيدنا عيسى: «كّسات أژرو!» أها تنّاياس مرثا، ؤلتماس ن-ؤمتّين: «أسيدي، هاتين ئلّانّ ئرصّوض ئدّخ ربعا د-وسّان أياد س-ئنضل».
40 أها ئنّاياس سيدنا عيسى: «ئس ؤر-ام نّيخ؟ مش دا تّامند تدّيد أتانّايد لعزّ ن ربّي».
41 داي كّسن ميدّن أژرو زݣ تنضلت، ئهزّا سيدنا عيسى ألّن نّس س-ئݣنّا، أها ئنّا: «أيبّا، داش تشّكارخ ئدّخ ئ تسّغتّ.
42 نكّ سّنخ ئس غوري تسّغات كوتوال، ماشان داش تّينيخ أوال-اد خف ميدّن-اد نّا ئلّان داد، باش أد-امنّ ئد شݣّين أيي د يوزن».
43 داي فّير مايد ئنّا أوال-اد، ئسغوي س يون ؤغويّي ئجهدن: «لعازر، فّغدّ غر برّا!»
44 أها ئفّغدّ ؤمتّين، ئفاسّن نّس د-ئضارن نّس ئضوراسن لكتّان، د وودم نّس ئغمس س يون ن زّيف. داي ئنّاياسن سيدنا عيسى: «كسات-أس ئشرويضن نّاݣ ئتّل، تادجّيمت أد ئدّو».
ئفرّيسييّين دا تمشاوارن ميمشي تݣّين أد نغين سيدنا عيسى
45 شايݣان ن ووداين، زݣ وينّا د-يدّان غر مريم، أنّاين أينّا ئݣا سيدنا عيسى. كّرن أر ئسّ تّامنّ
46 ئد ئتّس زّيكسن دّان غر ئفرّيسيّين أها قّيسناسن أينّا ئݣا سيدنا عيسى.
47 داي مّݣراون ئخاتارن ن تادّارت ن ربّي د-يفرّيسيّين ݣ لمجليس، أها قّيمن أر تّميينين ئنݣراتسن: «هان أرݣاز-اد دا ئتݣّا شايݣان ن تميتار. ئوا مايدا نتّݣّ دغي؟
48 هاتين مش ت نودجّا أد ئتݣّا أشيد، دّان أد ئسّ أمنّ ميدّن كول، أها دّوندّ ئنبّاضن ن رّومان أد ردلن تادّارت ن ربّي أها خلون لݣنس نّخ».
49 داي ئنّاياسن يون زّيكسن، ئسم نّس قيافا، نتّا أيد ئݣان أنمغور ن تادّارت ن ربّي ݣ-ؤسݣّاس نّا: «هات شا ؤر تسّينم،
50 أها ؤر دا تّخمّامم، ييفاون أد ئمّت يون ن-ؤرݣاز خف شّعب، ئمشيد ؤر يوخلو لݣنس كول».
51 ؤر ئنّي أياد زݣ ئخف نّس، ماشان ئدّخ ئݣا أنمغور ن تادّارت ن ربّي ݣ-ؤسݣّاس نّا، ئكاشف ئس ئدّا سيدنا عيسى أد ئمّت خف شّعب ن ووداين.
52 ؤر ئد غاس خف شّعب-اد هيلّي، ماشان باش أد ئسمون أراو ن ربّي نّا ئزلّعن ݣ مايد ئݣان تامازيرت أها ݣين يون ن شّعب.
53 داي زݣ واسّ نّا، مساسان ئخاتارن ن ووداين أد نغين سيدنا عيسى.
54 خف ؤياد، ؤر ئقّيم سيدنا عيسى دا ئسّارا قّاح ئنݣر ن ووداين س طايطاي، ماشان ئدّا زݣ سّييس ئعيّن يوت ن تمناطّ تاما ن صّحرا، غر يوت ن تمدينت ئسم نّس أفرايم، نّاݣ ئقّيم نتّا د-ئمحضرن نّس.
55 داي ئدجّاوردّ لعيد ن-ؤزرّويb ن ووداين، ألين شايݣان ن ميدّن ن تمازيرت غر تمدينت ن لقدس دات ن لعيد، أد سّزديݣن ئخفاون نّسن (حما أت تن ئقبل ربّي).
56 كرن ووداين أر ؤرزّون سيدنا عيسى أها أر تّمسقسان ئنݣراتسن لّيݣ مّونّ ݣ تادّارت ن ربّي: «مايداون ئضهرن؟ ئس ؤر ئدّي أد دّيدّو غر لعيد؟»
57 داي وصّان ئخاتارن ن تادّارت ن ربّي د ئفرّيسيّين ميدّن نّاناسن: «ونّا ئسّن ماني ݣ-ئلّا عيسى ئخصّا أت تييني». نّان أياد، حما أت تامژن.