5
سيدنا عيسى دا ئجوجوي يون أفوكال
1 ضارت ن-ؤياد، ئدّود يون ن لعيد ن ووداين، يالي سيدنا عيسى غر تمدينت ن لقدس.
2 ييلي ݣ تمدينت-اد، تاما ن تݣّورت نّا مي دا تّينين «تاݣورت ن وولّي»، يون سّاريجa، نّا مي تّينين س واوال ن ووداين «بيت حسدا»b، د خمسا ن-ئسقّيفن س ترسال نّسن.
3 ئلين شايݣان ن-ئموضينّ محضن دّاو ن-ئسقّيفن-أد، ديكسن ئدرغالن د-يحيزان د-ئفوكالن، [أر تّاݣّان ئخف أد حرّشن وامان،
4 ئدّخ ئلّا يون ن لمالاك ن ربّي دا ئتسرّاح ييتس ن تيكّال ݣ سّاريج أها ئحرّش أمان. ونّا ئضرن ݣ وامان د-امزوارو ضارت ن-وحرّش دا يتجّي زݣ مايد ئݣان ئغنشا نّا تيوغن].
5 أها ييلي دين يون ن-ؤرݣاز نّا ئݣان أفوكال تمانييا ؤتلاتين ن-ؤسݣّاس.
6 يانّايت سيدنا عيسى ئمحض ݣ تيسّي، ييسين ئس ئݣا ؤرݣاز أفوكال زݣ واهوّا، أها ئسقسات: «ئس تريت أت تجّيد؟»
7 داي ئنّاياس ؤفوكال: «أسيدي، هات ؤر غوري ئلّي أود يون أد ئ ئسرّح ݣ سّاريج أدّاي حرّشن وامان، أدّاي ئريخ نكّ أد سرّخ ݣ وامان دا ئ ئتّزوير شا ياضن».
8 أها ئنّاياس سيدنا عيسى: «كّر، أسي تيسّي نّش أها تدّوت».
9 دغيا ئجّي ؤرݣاز. ياسي تيسّي نّس ئدّو. ئجرا ؤياد ݣ واسّ ن سّبت.
10 داي نّان ئخاتارن ن ووداين ئ ونّا ئجّين: «هاتين ئݣا واسّ-اد سّبت! ؤر-اش ئزري أت تاسيد تيسّي نّش».
11 أها ئنّاياسن: «ونّا ئ ئجوجين نتّا أيد ئ ئنّان: "أسي تيسّي نّش تدّوت"».
12 داي سقسانت: «مايد يمس ؤرݣاز نّاش ئنّان: "أسي تيسّي نّش تدّوت؟"»
13 ماشان أفوكال نّا ئجّين ؤر يسّين ماتّا نتّا، ئدّخ ئدّا سيدنا عيسى ئغلي ݣ لغاشي.
14 ضارت ن-ؤينّا، يافت سيدنا عيسى ݣ تادّارت ن ربّي، أها ئنّاياس: «ها شݣّ تجّيد دغي، غوراش أت تݣّت دّنوب ديخ ألتو، حما ؤر-اش ئتجرو ؤݣار ن-ؤياد».
15 داي ئدّو ؤرݣاز أها ئنّا ئ يخاتارن ن ووداين ئد سيدنا عيسى أيد ت-يجوجين.
16 خف ؤياد، كّرن ئخاتارن ن ووداين أر ؤرزّون أد نغين سيدنا عيسى، ئدّخ ئݣا أياد ݣ واسّ ن سّبت.
17 ماشان سيدنا عيسى ئروراياسن: «ئبّا دا ئخدّم دّيما، أها ئلازم أد خدّمخ أود نكّينتين».
18 خف واوال-اد، كّرن ئخاتارن ن ووداين أل ؤرزّون ألّو ؤݣار أت تنغين، ئدّخ ؤر ئد غاس شّرع ن واسّ ن سّبت أوْر دا ئتّوقّار هيلّي، ماشان ئدّخ ئنّا ديخ ألتو ئس ئݣا ربّي ئبّاس، أها ئمشيد أس ئسمساسا ئخف نّس د ربّي.
تانباطّ ن ممّيس ن ربّي
19 داي ئسيول سيدنا عيسى خف ئخف نّس، ئنّاياسن: «يّيه، ستيتّ أيدا أون تّينيخ: ؤر دا ئتّيغيي ممّيس ن ربّي أد-ئݣ أود لقرطّ زݣ ئخف نّس، ماشان ؤر دا ئتّݣ غاس أينّا دا ئتّانّاي ئبّاس دا ت-يتّݣّ، ئدّخ غاس أينّا دا ئتݣّا ئبّاس أيدا ئتّݣّ ممّيس ن ربّي أود نتّا.
20 ئدّخ ئبّاس دا ئتّيري ممّيس أها أر-اس ئسنعات كول أينّا دا ئتّݣّ نتّا س ئخف نّس. ئقنتين أد-اس ئنعت لخدمات ن-ئخصّا أد ئݣ، تينّا ؤݣرنين تيد، أكّ أت ترعبم.
21 ئدّخ، ئمشينّا دا ئسكّار ئبّاس ئمتّينّ أر تن ئسّيدير، ئمشيس أود ممّيس أد ئسّيدر وينّا ئرا.
22 د ئبّاس ؤر دا ئحكّم خف أود يون، ماشان ئوشا تانباطّ كول ن لحكام ئ ممّيس،
23 حما أد وقّرن ميدّن كول ممّيس ن ربّي أكيس تّوقّارن ربّي نّا ئݣان ئبّاس. ونّا ؤر دا ئتّوقّارن ممّيس ن ربّي، ؤر دا ئتّوقّار ئبّاس نّا تيد يوزنن.
24 يّيه، ستيتّ أيد-اون تّينيخ: هان ونّا ئسّغادن ئ واوال ئنو أر ئتّامن س ربّي نّا ئ دّيوزن، غورس تودرت ن وابدا، ؤر ئدّي أد غيفس ئتّوحكم، ماشان ئمّوتي ياد زݣ لموث غر تودرت.
25 يّيه، ستيتّ أيدا أون تّينيخ: ئقنن أد ديدّو يون واسّ، هاتّين ييوضد ياد، نّاݣ دّان أد سلّين ئمتّين ئ واوال ن ممّيس ن ربّي، د وينّا ئدّان أد-اس سلّينّ أد ئديرن.
26 ئدّخ أكيس تلّا تانباطّ غر ئبّاس أد ئوش تودرت، ئمشيس أيد ئوشا ئ ممّيس تانباطّ أد ياكّا تودرت.
27 أها ئوشاس ديخ ألتو تانباطّ ن لحكام، ئدّخ ئݣا ممّيس ن بنادم.
28 أد ؤر ترعابات: ئقنّ أت تتدّو يوت ن تاسّاعت أد ديكس سلّين كول وينّا ئلّان ݣ-ئسنضال ئ واوال نّس،
29 داي كّرن ئمتّين كول زݣ تنضلين نّسن. وينّا ݣانين لخير دّان أد كّرن حما أد غورسن تيلي تودرت توجديت، ئد وينّا ݣانين لمعصييّات دّان أد حما أد تّوحاكمن.
30 نكّ، ؤر تّيغييخ أد ݣخ أود لقرطّ زݣ ئخف ئنو، هاتين دا حكّمخ خف ميدّن س-وينّا ئ ئنّا ربّي، د لحكام ئنو ئمنا، ئدّخ ؤر دا ؤرزّوخ أد ݣخ أينّا رّيخ، ماشان أد ݣخ لموراض ن ونّا ئ دّيوزنن».
31 «مش دا تشاهادخ ئ ئخف ئنو، هان شّهاتّ ئنو ؤر تدّي أت تزري.
32 هاتين يون ياضن أيد ئ ئشاهدن، د نكّ سّنخ ئس ئݣا واوال نّس نّا س غيفي ئشاهد لحقّ.
33 كونّي، توزنم ئمازان غر يحيى أها ئشاهدييي س لحقّ.
34 نكّ ؤر حدادجخ ئ شا ن بنادم أد ئ ئشاهد، والاينّي دا تّينيخ أياد حما أد كون ئفوكّا ربّي.
35 ئݣا يحيى أم لانبا نّا يوغن، أر تسفليلي. أها ئعجباون أد تفرحم س-ؤسيدّ نّس يوت ن لوقت.
36 والاينّي ئلّا شا ضنين نّا دا ئ ئتشاهادن يوݣر أينّا غيفي ئنّا يحيى: نتّات لخدمت نّا ئ ئوشا ئبّا أت تشملخ، د لخدمت-اد نّا دا تݣخ دا تّشاهاد ئد ربّي أيد ئ ديوزن.
37 د ئبّا نّا ئ ديوزن، أود نتّا س-ئخف نّس دا ئ ئتشاهاد، غاس كونّي ؤر دجين تسلّيم ئ واوال نّس ؤلا تانّايم ؤدم نّس.
38 د واوال نّس ؤر دا ئتغيما ݣ وولاون نّون، ئدّخ ؤر دا تّامنم كونّي س ونّا ئ دّيوزن.
39 دا تورزّوم ݣ لشتاب ن ربّي، ئدّخ تغالم ئس تدّام أت تافم ديكس تودرت ن وابدا. د نتّا س-ئخف نّس دا ئ ئتشاهاد،
40 ماشان ؤر تريم أد ئ تتفارم حما أد غورون تيلي تودرت ن وابدا.
41 ؤر دا ؤرزّوخ لعزّ نّا د-ئتدّون زݣ ميدّن.
42 ماشان، هاتين سّنخكون أها سّنخ ئس ؤر دا تّيريم ربّي زݣ ؤلاون نّون.
43 نكّينتين دّيخدّ س تنباطّ ن-ئبّا، أها ؤر ئسّي ترحيبم، ماشان مش دّيدا شا ن يون ياضن زݣ ئخف نّس تدّام أد ئس ترحبم.
44 دا تّيريم أت تميوݣّام لعزّ ئنݣراون، أها ؤر دا تورزّوم لعزّ نّا د-يدّان زݣ ربّي أفرضي. ئوا ماكّاي تݣّيم أد-ئسّي تامنم؟
45 ماشان أد-ؤر تغالم ئد نكّ أيد ئدّان أد ئسّون ئشتكون غر ئبّا. ونّا ئدّان أد ئسّون ئشتكو: هاتين سيدنا موسى نّاݣ تݣام رّجا نّون.
46 ئدّخ، مور تومينم س سيدنا موسى دا تومنم ئسّي أود نكّين، علاحقّ يوري غيفي.
47 ماشان ألّيݣ ؤر دا تّامنم س-ؤينّا يوري، ماكّاي تݣّيم أت تامنم س واوال ئنو؟».