19
ئول د وولوف
(مارقوس 10:1-12)
1 ألّيݣ ئشمّل سيدنا عيسى أوال ئمّوتي زݣ تمازيرت ن لجليل، ئدّو غر ثنيلا ن تمازيرت ن ليهوديّا، ئورين يي واسيف ن الأردن.
2 ثفورنث شيݣان ن ثربّاع ئجّوجيثن دينّا.
3 داي دّوند غورس ئيتسن ن-ئفرّيسيّين أد تجرّبن، نّناس: «ئيس-اس ئزري يي ؤرݣاز أد ئلّف يي ثمطّوط نّس خف كول أينّاي جران ئنيراسن؟».
4 ئجاوبثن ئنّياسن: «ئيس ؤر ثغريم ݣ لشثاب ن ربّي، ئس ؤر ئد ربّي أيثن ئخلقن زݣ ثيزويري ئݣثن سّين أوثم د توثمث؟
5 داي ئنّياسن: خف ؤياد أد يادج ؤورݣاز بّا نّس د مّا نّس ئمون د تمطّوط نّس، ݣين يون.
6 س-ؤياد ؤر قّيمين ݣان سين، والاينّي عايدن ݣان يون. د أينّا ئسمون ربّي ؤر دا ث ئبطّو بنادم».
7 داي نّناس ئفرّيسيّين: «ماخ ألّيݣ ئوصّا موسى غاس أداس ئف ثبرات نّس ئلفاس؟»
8 داي ئنّياسن سيدنا عيسى: «هان مُوسَى ئنّياون لفاث ئثيوثمين نّون ئتخ أون قسحن وولاون نّون، ماشان أياد ؤر-ئلّي ݣ ثيزويري ألّيي ئخلق ربّي آدم د حواء.
9 ئد نك أداون ننيخ: هان ونّاݣ لفّن يي ثمطّوط نّس مش ؤر ثفسيد، ياول شان يوث ياضنين هاثين دا ئتفساد».
10 داي نّناس ئمحضار نّس: «مشد ئمشيد أيد تݣّا ن لحالث ئنݣر ؤرݣاز د تمطّوط، يوفاس مش ؤر ييويل كول!».
11 داي ئجاوبثن ئنّياسن: «ؤر ئد كولشي ئدّا أد-ئقبل أوال-اد، ماشان داي تقبال أوال-اد غاس وينّا خف ئنعم ربّي.
12 ئدّخ لّان وينّا د لولانين زݣ ؤديس ن مّان نّسن ؤر غيين خف ييول، ئلين وينّا رورانين ميدّن أد ݣين ئمشيد، ئلين وينّا خثارنين أد قّيمن بلا ييول خف لحساب ن ثݣلديث ن-ئݣنوان، ونّاݣ غيين أد ئقبل أياد ئقبلث».
سيدنا عيسى دا ئتّباراش ئشيرّان
(مارقوس 10:13-16؛ لوقا 18:15-17)
13 لوقت نّا أويند غورس ئشيرّان حما أتن ئبارش ئݣ غيفسن ئفاسّن نّس، داي سغويْن ئمحضرن خف وينّا ثن-ئد نيوين.
14 ئد سيدنا عيسى ئنّاياسن: «أدجّات ئشيرّان أد غوري ددّون، أد ؤر تن تحرصاث، ئدّخ أم ويد نا غر ثلاّ تݣلديت ن-ئݣنوان».
15 داي ئݣ غيفسن ئفاسّن نّس، ئيبارشثن أها ئيكر ئمّوتّي زݣ سّييس.
أعرّيم ئطرّحن
(مارقوس 10:17-31؛ لوقا 18:18-30)
16 داي ئدّود غورس يون ؤرݣاز ئنّاياس: «ألموعلـّيم، مايد ئژيلن أثݣخ حما أد غوري ثيلي ثودرت ن وابدا؟»
17 أها ئنّاياس سيدنا عيسى: «مّاخ ألّيݣ داي تسالث خف ؤينّا ئژيلن؟ ؤر ئلّي أود يون ئژيلن، غاس ربّي، ماشان مش تريت أتكشمث غر تودرت ن وابدا ئيݣ س لوصيّاث».
18 داي ئنّياس: «مانيتّا ديكسنث؟» ئنّاياس سيدنا عيسى: «أد-ؤر نقّا، أد-ؤر فسّد، أد-ؤر تّاشر، أد-ؤر تشهاد زّور.
19 تهلاّ ݣ بّا نّش د مّا نّش، ثيريث أدجّار نّش أم ئخف نّش».
20 داي ئنّاياس ؤعرّيم: «أياد كول دا تتݣّاخ زݣ ألّيݣ سولخ مژّييخ، ئوا ماݣ قّيمان ديخ؟»
21 أها ئنّاياس سيدنا عيسى: «مش ثريث أتشمّلث، دّو زّنز أينّا نّش توشت يي يمژلاض، حما أغورش ييلي لكنز ݣ ئݣنّا، أها ثدّود ثتفرثيّي!»
22 أليݣ ئسلّا ؤعرّيم يي واوال نّا ئدّو ئقلّق، ئدّخ ئطرّح شيݣان.
23 داي ئنّاياسن سيدنا عيسى يي ئمحضار نّس: «دّيخ أداون ئنيخ لحق، هاثين ئوعر خف يون ن-ؤرݣاز ئطرّحن أد ئكشم غر ثݣلديت ن-ئݣنوان.
24 أد زايدخ أداون سفهمخ ألثو: أد ئوهين يي يون ن-ولغم أد-ئكشم زݣ ثيطّ ن ثيسݣنيت ولا ئكشم يون ن-ؤرݣاز ئطرحن غر ثݣلديت ن ربّي».
25 ألّيݣ سلّان ئمحضار نّس يي ئواليون نا رعبن شيݣان أر تّينين: «ئوا مايد ئغيين أد-ئفوكّا ئخف نّس؟»
26 داي ئراعا ديكسن سيدنا عيسى، ئنّياسن: «أياد غر مدّن ؤراس قدّان أتݣن، ماشان غر ربّي كولشي ئغيياس».
27 داي ئسيول بطرس ݣ لوقث نّا ئنّاياس: «هان نكني دغي نزري كولشي أها نتفورش، مايد نستاهل؟»
28 داي ئنّياسن سيدنا عيسى: «أداون ئنيخ لحق: أدّاي ئقّيم ممّيس ن بنادم خف لكورسي ن لعزّ نّس ݣ-ئݣا كولشي ؤجديد، أود كنّي نّا ث-ئتفارن أتقّيمم خف ثناعش ن لكراسا تنبضم خف ثقبيلين ن-إسرائيل س تناعش.
29 ئد ونّا ئزرين ثادروين نّس، د أيثماس، د-يسثماس، د بّا نّس، د مّا نّس، د تمطّوط نّس، د واراو نّس، د ئݣران نّس، خف نّيرث ن ئسم ئنو، ئدّا أد يامژ ؤݣار ن تودرت ن وابدا.
30 ماشان دّان شيݣان ن-ئمزوورا أد ݣين ئمݣّورا، د شيݣان ئمݣّورا أد ݣين ئمزوورا».