11
ثژالّيتّ ن - سيدنا عيسى
1 يان واسّ، ئقّيما سيدنا عيسى أر ئتژالّا ݣ - شان وانسا. نتّا يشمّل، ئنّاياس يوكّ زݣ ئمحضرّ نّس: «أمولانا، سّلمداخ أنژّال ئمشينّا ئسّلمد سيدنا يحيى ئي يمحضرّ نّس».
2 داي ينّاياسن: «أدّاي دا تّژالّام أها ثينيم: "أيبّاثنخ نّا يلّان ݣ ـ ئݣنوان، أد ئتّوسّمغور ييسم نّش، ثدّود ثݣلديتّ نّش.a
3 أكّاياخ كوياسّ أغروم نّاخ ئتقدّان.
4 ثسامحداخ ݣ ـ لمعصيّاث نّخ، ئدّخ دا نتّساماح أود نوكّني ئي وينّا دا غيفنخ تّعدّانين كول، ثحضوضاخ زݣ شّيطان أد ؤر أخ ئتجرّاب"».
5 داي ينّاياسن ديخ ألثو: «مش ئلّا غر شا ديݣون شان ؤمدّاكّول أها يدّود غورس ݣ - وامّاس ن - ييض يينيياس: "أيا مدّاكوُل ئنو، رضلي شراطّ ن - ثوغريفين،
6 ئدّخ غوري ديدّا يان ؤمدّاكل ئنو زݣ تّيساع أها ؤر غوري يلّي مايداس أكّاخ".
7 ئيد أد غيفس دّيرار زݣ جاج ن - ثادّارث أها يينيياس: "أد ؤر ئي سطّورّوي! هاثين قّنخ ياد لباب، ئݣا لحال ݣّيض، ئليخ نكّ د - واراو ئنو ݣ - ثيسّي، ؤر غيخ أنّ كّرخ أداش ؤشخ أينّايي ثتّرد"».
8 «أداون ئنيخ: "مغار ؤر ئكّير أداس ئوش ئدّخ ئݣا أمدّاكّل نّس، هاثين ئدّا أد ئكّر أداس ئوش أينّا يرا ئدّخ ئيث ئسطّورّي س ـ ثيثي ن ـ لباب".
9 د ـ نكّين داون تّينيخ: "تّراث أها يتّمّوشاون، رزوياث أها ثافيم، ؤثاث لباب أها يتّورژماون.
10 ئدّخ كول ؤنّا يتّرن ئدّا أد يامژ، د - ونّا يرزان ئدّا أد ياف، د - ونّا ينقّرن لباب ئدّا أداس ئتّورژم.
11 ئي كونّي ألوالدين، ؤنّامي ئتّر ديݣون ممّيس b أسلم، ئيد أداس يوش ثيفيغرا ݣ - وانسا ن - ؤسلم؟
12 ئي مش أس ئتّر ثاݣلايث، ئيد أداس ئوش ثيغيرضمث؟
13 داي مش ثسّنم كونّي نّا يخّان أتّوشيم ئي واراو نّون أينّا يژيلن، ئوا مشثا أيدا ياكّا بّاثون نّا يلّان ݣ - ييݣنّا رّوح نّس ئصفان ئي وينّا داسث تتّرنين؟"».
سيدنا عيسى د - شّيطان
(ماتّى 12:22-30؛ مارقوس 3:20-27)
14 يان واسّ، ئسّوفغ سيدنا عيسى يان جّن زݣ يان ؤرݣاز ئݣاث د ـ أعنژول. نتّا يفّغ جّن أها يسيول ؤعنژول، داي رعبن ميدّن.
15 ماشان ييتّس زّيكسن نّان: «هاثين دا يسّوفوغ أدجّنون س ـ ثنباطّ ن ـ شّيطان c ئݣان أخاثار ن - وادجّنون».
16 ئيد ييتس ضنين ران أث جرّبن، أها تّرن زّيݣس شان ثماثارث زݣ ييݣنّا حما أد راعان ئيس ثيد يوزن ربّي.
17 ماشان ئسّن ماي دمان أها ينّاياسن: «كول ثاݣلديتّ نّاݣ ئكّر بطّو ثدّا أتّخلو، د - ؤخام كول نّامي يبضا رّاي يدّا أد ئمزلّاع.
18 داي مش دا يتّناغ شّيطان د - ئخف نّس، ميمش أي تّبداد ثݣلديتّ نّس؟ ئدّخ دا تّينيم هاثين دا سّوفوغخ أدجّنون س ـ ثنباطّ ن ـ شّيطان.
19 داي مش دا سّوفوغخ نكّين أدجّنون س - ثنباطّ ن ـ شّيطان، ماس داثن سّوفوغن ميدّن نّون؟ خف ؤياد، نيثني س ـ ئخفاون نسن دّان أكون حاسبن خف ؤينّا ثنّام.
20 ئيد مشد ثانباطّ ن ـ ربّي أس دا سّوفوغخ أدجّنون، هاثين ثيوضدّ غورون ياد ثݣلديتّ ن - ربّي».
21 «أدّاي دا يتّعسّاس شان ؤرݣاز نّا يوعرن خف ثادّارث نّس ييلي يسنّح، ئدّا ؤيدّا نّس كول أد ييلي ݣ - لمان.
22 ماشان أدّاي غيفس ئكشم شان يوكّ نّا يوعرن ؤݣار نّس، ئدّا أث ييرّو ئكّساس سّناح نّس نّا خف ئعوّل، أها يبضو د ـ ئسمونّ نّس أينّاس ئكّس».
23 «وونّا ؤر ئݣين زݣ ثمناط ئنو، هاثين ئݣا ضّض ئنو. د - وونّا ؤر دا يتّسمونن أݣّيدي، هاثين دا يتزلّاع».
أعايد ن - دجّن
24 «أدّاي يفّغ شان دجّن زݣ شان بنادم، دا يتدّو غر أنسيون نّا يخلان أر يورزّو أد ئسݣونفا، ماشان أدّاي ؤر يوفي أسݣونفا دا يتّيني: "دّيخ أد أغولخ غر ثادّارث ئنو نّا زݣ دفّغخ".
25 أها يدّو يافتّينّ ثزدّيݣ ثمون،
26 داي يدّو ياويد سبعا ن - وادجّنون ضنين نّاث يوݣرن ݣ - ثوخّيث، أها كشمن ݣ ـ بنادم نّا زدغن ديكس كول نسن، داي يخّوياس لحال ئي بنادم نّا ؤݣار ن ـ ثيزويري».
أفراح ن - سثيتّ
27 داي لّيݣ أر ئتّيني سيدنا عيسى أياد، ثسغويدّ يوث ن - ثمطّوطّ زݣ جاج ن - ميدّن أها ثنّاياس: «أياعريتّ ن - مايش نّاش يورون أها ثصّوطّضش».
28 داي ينّاياس: «ماشان أياعريتّ ن - وينّا دا سّغادنين ئي واوال ن - ربّي أر ئيسّ تݣّين».
ميدّن دا تتّرن شان ثماثارث ئݣان لموعجزا
(ماتّى 12:38-42؛ مارقوس 8:12)
29 نتّا أر غيفس تّمزاحامن ميدّن، ئقّيم أر يتّيني: «ميدّن ن - زّمان أد خّان، دا زّيݣي تتّرن أداسن سنعثخ شان ثماثارث زݣ ربّي. ماشان ؤر دّيخ أداسن ؤشخ غاس ثماثارث ن - نّبي يونان.
30 ئدّخ مايداس ئجران ئي نّبي يونان ئݣاياسن ثاماثارث ئي ميدّن ن ـ ثمدينث ن ـ نيناوا، ئوا أود أينّا يدّان أداس ئجرو ئي ممّيس ن - بنادم ئدا أد ئيݣ ثماثارث ئي ميدّن أد.
31 أدّاي ياوض واسّ ن ـ لحساب، ثدّا ثݣلّيتّ ن - ثمازيرث ن - سبأ أدّ ثكّر نتّاث د - ميدّن ن - زّمان أد أها ثحشم غيفسن، ئدّخ نتّاث ثدّاد زݣ ؤبوض ن - دّونيث حما أتسّغد غر ثانژّي ن - سيدنا سوليمان. داي دغي هان وونّا يوݣرن سيدنا سوليمان ئلّا داد أها ؤر ثريم أد غورس ثسّغدم.
32 أود أيث نيناوا دّان أدّ كّرن ݣ - واسّ ن - لحساب نثني د - ميدّن ن - زّمان أد أها حشمن غيفسن ئدّخ نثني ثوبن لّيݣ أسن نّيصّيوض نّبي يونان أوال ن ـ ربّي. داي دغي هان وونّا يوݣرن نّبي يونان ئلاّ داد أها ؤر ثريم أتّوبم!»
أسيدّ ن - صّاحث
33 «ؤر ئلّي ونّا يسّاغان لانبا أها يسرستّ ݣ ـ شان وانسا نّا ينثلن نغد دّاو ن - تّمنيث، ماشان داتّ ئسروس خف شا نّا يهزّان حما أد أنّاين ميدّن نّا دا كتّشمنين غر ثدّارث أسيدّ.
34 هاثين ألّن أيد ئݣان أسيدّ ن ـ صّاحث، أدّاي يژيلنث والّن نّش، ثدّا صّاحث نّش كول أديكس ييلي وسيدّ، ئيد مش خّانث والّن نّش، ثدّا صّاحث نّش كول أتسّولّس.
35 ئوا رار لبال نّش، هان أسيدّ نّا يلّان ديكّ أد ياغول أد ئيݣ ثالّسث.
36 مش ثعمّرد س ـ ؤسيدّ أها ؤر ديكش ثلّي ثالّسث، ثدّا ثودرث نّش كول أتسّيدّا أمّي غيفش ثسّيدّ شان لانبا س ـ ؤسيدّ نّس».
سيدنا عيسى دا يتّلامّا ييفرّيسين د - ئسّلمادن ن - شّرع
(ماتّى 23:1-36؛ مارقوس 12:38-40؛ لوقا 20:45-47)
37 لّيݣ ئشمّل سيدنا عيسى أوال نّس، ئتّر زّيكس يان ؤفرّيسي أد غورس ئتشّ ئمشلي. ئكشم سيدنا عيسى أها يقّيم غر لميدا.
38 داي يرعب ؤفرّيسي لّيݣ يانّاي سيدنا عيسى ؤر ئسّيرد ئفاسّن نّس داث ن - ووتّشي أم لقاعيدا ن ـ ووداين.
39 ماشان ئنّاياس سيدنا عيسى: «كونّي دغي أييفرّيسين دا ثسّيريدم أغرّاف د - ؤقصري زݣ برّا، ئيد جاج نّون ئعمّر س - طّمع د - ثوخّيث.
40 أييحياض، ئس ؤريد وونا يعديلن برّا أيد ئعديلن أود جاج؟
41 هاثين ئخصّاياون أد تّاكّام صّاداقا ئي يمژلاض زݣ ؤينّا غورون ئلّان حما أداون ئزديݣ مايد ئݣان شا».
42 «ماشان أياعندانّون أييفرّيسين! ئدّخ دا تّكسم لعشور ئي نّعناع د - ئورمي د - مايد ئݣان ثوݣا، أها ؤر دا تتّاويم ݣ - لحق د - ثايري ن - ربّي، ئخصّاياون بعدا أتّزّويرم لحقّ د ـ ثايري ن ـ ربّي، داي ثكّسم لعشور».
43 «أياعندانّون أييفرّيسين! ئدّخ دا تّيريم أتقّيميم ݣ - وانسيون ئمزوورا ݣ - ثمزݣيديوين، أراون ئتّيعجيب أد غيفون تسلّامن ميدّن ݣ - لاسواق.
44 أياعندانّون! ئدّخ ثݣام أم ثمضلين نّا نثلنين، دا غيفسنث ثتّعفاسن ميدّن د ـ نثني ؤر سّينن».d
45 داي يسيول يان ؤسّلماد ن - شّرع ئنّاياس ئي سيدنا عيسى: «أياسّلماد، هاثين أدّاي دا تّينيد أياد داخ ثكّادّ أود نوكّني س ـ واوال!»
46 أها ينّاياس سيدنا عيسى: «أياعندانّون أود كونّي أييسّلمادن ن - شّرع، ئدّخ دا ثسّاسايم أݣّاثن نّا ژّاينين ئي ميدّن، أها ؤر دا تّاژضم أود أضاض حما أثن ثسعاونم.
47 أياعندانّون، دا ثعدّيلم ثيمضلين ن - لانبيا، د ـ لجدود نّون أي ثن ئنغان.
48 هاثين س - ؤياد، دا ثسنعاثم ئيس ثمساسام د ـ ؤينّا ݣان لجدود نّون، ئدّخ نيثني نغانثن، د ـ كونّي داسن ثبنّوم ثيمضلين.
49 خف ؤياد أخف ئنّا ربّي س ـ ثانژّي نّس: "دّيخ أد غورسن أزنخ لانبيا د - ئمازانّ أها نغين ييتس زّيݣسن، كّرفصن وييّاض".
50 حما أد تّوحاسبن أيث لجيل أد خف منغيوث ن ـ لانبيا نّا تّونغانين زݣ ثيزويري ن - دّونيث،
51 زݣ منغيوث ن - هابيل أر منغيوث ن - نّبي زاكريّا نّا يتّونغان ݣ ـ ثدّارث ن ـ ربّي ئنݣر ن - وانسا نّاخف دا تّوغراصنث ثمغراص ئي ربّي د - وانسا نّاغر دا يكتّشم غاس ؤنمغور ن ـ ثدّارث ن ـ ربّي. ئيّيه، سثيت أيداون تّينيخ: هاثين ئدّا لجيل أد ئتّوحاسب خف ؤياد كول».
52 «أياعندانّون أييسلمادن ن - شّرع! ئدّخ ثومژم ثاساروتّ ن ـ لباب ن - ثوسنا، أها ؤر ثكشيمم ؤلا ثودّجام وينّا رانين أد كشمن».