12
أسّغري خف واسّ ن-سّبت
(مارقوس 2:23-28؛ لوقا 6:1-5)
1 داي ݣ لوقت نّا أر ئتدّو سيدنا عيسى ݣ وامّاس ن-ئݣران ن-ئمندي ݣ واسّ ن سّبت، أها ئنغ لاژّ ئمحضار نّس بدون أر تّكسن ئبورخصن أر تن تتّن.
2 داي نتّا أنّاين ئفرّيسيّين أياد، نّاناس: «هان ئمحضار نّش دا تݣّان أينّا ؤر ئخصّان أد ئتواݣ ݣ واسّ ن سّبت خف لحساب ن شّرع ن-ؤداين».
3 أها ئنّاياسن سيدنا عيسى: «ئس ؤر ثقرام خف مايد ئݣا سيدنا داود ݣ تينغا لاژ نتّا د وينّا لّانين أݣّيدس.
4 ميمش ألّيݣ ئكشم غر تادّارت ن ربّي أها ئتشّ زݣ ؤغروم نّا ئتواوشن يي ربّي نّا ؤر-أس ئزري أتّيتش حما أتّيتشّ نتّا د ميدّن أݣّيدس ئلّان، ماشان ؤر ئحلّا غاس ئ-يكهّان.
5 ئس ؤر ثقرام ݣ شّرع ن موسى ئس ؤر دا توقّارن ئخاتارن ن دّين نّا دا ئخدّمن ݣ تادّارت ن ربّي أسّ ن سّبت أها ؤر ئلّي مايد ثن ئتّلامّان؟
6 ماشان أداون ئنيخ: هاثين ئلّا ديتخ ونّا يوݣرن تادّارت ن ربّي!
7 مور ثفهيم لمعنث ن واوال-اد، نكّين ريخ رّحمت ؤر-ئد تامغروصت، ثالي قاح ؤر ثكحمم خف وينا خف ؤر ئلّي ؤلامّا.
8 ئدّخ ئݣا ألتو ممّيس ن بنادم باب ن سّبت».
أجّوجي ݣ واسّ ن سّبت
(مارقوس 3:1-6؛ لوقا 6:6-11)
9 ئدّو زݣ سّييس ئكشم غر ثادّارت ن دزّاليت نسن،
10 داي هان يون ن-ؤرݣاز نّا مي ئكّوشم ؤفوس نّس، سقسانت ئفرسيين حما أت تهمن، نّاناس: «ئس ئحلاّ ؤجّوجّي ݣ واسّ ن سّبت؟»
11 أها ئنّاياسن: «مش ئلّا شان يون ديݣون غور ئلّا يون ؤحولي ياتّوياس ݣ يون ن-ؤحفور ݣ واسّ ن سّبت ئس ؤر غورس ئتّاژض أفوس أتّيد ئنزغ؟
12 مايد يوفن ئد بنادم ماد أحولي؟ خف ؤياد ئحلّا لخير أد ئتواݣ ݣ واس ن سّبت».
13 داي ئنّاياس يي ؤرݣاز نّا مي ئكّوشم ؤفوس: «أژضد أفوس نّش». نتّا يوژضت ياغول ئصحو أم وايض.
14 نتّا فّغن ئفرّيسيّين، أر غيفس تّمشاوار حما أتنغين.
ونّا ئعزل سيدي ربّي
15 أها ئسّن سيدنا عيسى أينّا، ئدّو زݣ سّييس، تفارنت شيݣان ن ميدّ ن، أر (تن) ئجّوجوي كول وينّا ئنغا شا.
16 داي ئوصّاثن أد-ؤر صّاواضن لخبار نّس يي أود يون،
17 حما أد ئجرو ؤينّا ئنّا نّبي إشَعْيَا:
18 «واد أيد ئݣان أخدّام ئنو نّا ختارخ،
د-ؤحبيب ئنو نّا خف رضيخ س-ؤل ئنو،
أد غيفس ݣخ رّوح ئنو،
ئعلم يي ميدّن خف لوقث ن لحكام ديدّان.
19 ؤر ئتݣّا بو ئمنغان ؤلا بو ئغويّان،
أود يون ؤر ئتسلا ئ-وغويّي نّس ݣ ئبردان.
20 ؤر ئرژّا أود أغانيم ئرشان،
أود تافتيلت ئݣان أݣّو ؤر تّيسخساي،
أر دّيبرم لحكام نتّا أيد ئرّان.
21 أها ييلي يي لݣنوس رّجا ݣ ئسم نّس».
سيدنا عيسى د بعلزبول أخاتار ن وادجّنون
(مارقوس 3:20-30؛ لوقا 11:14-23؛ 12:10)
22 داي أويناسد ݣ لوقت نّا يي سيدنا عيسى يون ن-ؤرݣاز ݣ لاّن وادجنون ئݣان أدرغال ئݣ أعنژول، ئجّوجيت أها ئسيول ؤدرغال ئݣان أعنژول أر ئتّانّاي.
23 داي رعبن ميدّن كول، أر تّمسقسان: «ئيس ؤر-ئد واد أيد ئݣان ممّيس ن داود؟»
24 نتّا سلان ئفرّيسيّين ئ-وياد، نّان: «واد دا ئسّوفوغ أدجّنون س بعلزبول ئݣان أخاتار ن شياطين».
25 ييسين سيدنا عيسى أينّا ݣ تخمّامن داي ئنّاياسن: «تاݣليت نّا ئبضان كول أتخلو، د تمدينث نغد تاخامت ئبضان كول أتزلّع.
26 داي مشد شّيطان دا يسّوفوغ شّيطان، هاثين ئبضا ئخف نّس، ميمش تݣّا تݣلديت نّس أتقّيم.
27 أها مش دا سّوفوغخ (سّوفوق) نكّين أدجّنون س بعلزبول، ئوا أرّاو نّون ماس دّان ثن سّوفوغن؟ خف ؤياد أرّاو نون أݣ دّان أد غيفون حشمن.
28 ماشان مش دا سّوفوق نكّين أدجّنون س رّوح ن ربّي، هان تاݣليت ن ربّي ثيوض غر أمّاس نّون.
29 نغد ميمش ئتّݣّ يون أد ييري أد ئكشم غر ثدّارت ن ونّا ئجهدن حما أداس ياوي كول أيدّا نّس، غاس مش ثيشرف ݣ تيزويري، أها ياوياس لوقت نّا أيدّا نّس؟».
30 «ونّا ؤر ئݣين زݣ تمناطّ-ئنو نتّا ضد-ئنو، د ونّا ؤر دا ئسمون ئدي نتّا دايبطّو.
31 خف ؤياد أداون ئنيخ: "كول أينّا ئݣان دّنب د تيرݣام أد ئتّوغفر ئ-ميدّن، ئد ونّا ئكفر رّوح لقودوس ؤر دائتّوغفار.
32 ئد ونّا ئنّان، شان واوال ؤر ئحلين خف ممّيس ن بنادم أداس ئتّوغفر، ئد ونّا ئنّان شان واوال ؤر ئحلين خف رّوح ن ربّي، ؤر داس ئتّوغفار، لا ݣ دّونيت ولا ݣ ليخرا».
أسكلو د لغلت نّس
33 زرعاث أسكلو ئـﮋيلن، تيژيل لغلت نّس، ئس دزرعم أسكلو ؤر ئحلين، ثدا أتخّو لغلت نّس، ئدّخ دانتّيسين أسكلو زݣ لغلت نّس.
34 أتاروا ن-ئفاغريون، ميمش تّغييم أتسيولم س واوال ئژيلن د كونّي ؤر تحليم؟ هاثين أينّا س-ئيعمّر ؤول أس دا ئساوال ئمي.
35 أرݣاز ئژيلن زݣ لخزين ئژيلن ن-وول نّس أس زݣ دّيسّوفوغ أينّا ئژيلن، د-ؤرݣاز ؤر-ئحلين زݣ لخزين ؤر-ئحلين أس زݣ دّيسّوفوغ أينّا ؤر-ئحلين.
36 ماشان أداون ئنيخ، هان أوال ؤر-ئحلين كول نّا س دا ساوالن ميدّن، دّان أد غيفس شفين لحساب ݣ واسّ ن لحساب.
37 ئدّخ س واوال نّش أس تدّيت أتّوبرّات، د س واوال نّش أس تدّيت أد تّوعاقبد.
ئفرّيسين داتتّرن تماتارت
(مارقوس 8:11-12؛ لوقا 11:29-32)
38 داي لوقث نّا جاوبنث ئيتّس ن لعولاما ن شّرع د-ئفرّيسيّين نّاناس: «ألموعلّيم، نرا أداخ تݣث يوث ن تماتارت».
39 ئسيول ئنّاياسن: «أثاروا ؤر ئحلين، ئيفسدن، ن لوقثا دا يرزّون شان تماتارت أها ؤر أس تواݣّ أود يوت ن تماتارت غاس ثين نّبي يونان.
40 ئدّخ ئمشينّا ئكّا نّبي يونان شراض ن ووسّان د شراض ن-ئيضان ݣ-ؤديس ن-ؤسلم، ئمشيس أد ئكّ ممّيس ن بنادم ݣ وابوض ن واشال شراض ن ووسّان د شراض ن-ئضان.
41 لقوم ن نِينَوَى دّان أد كّرن ݣ واسّ ن لحساب د وارّاو ن زّمان-اد أها شاهدن غيفسن، ئدّخ توبن لّيݣ سلّين يي واوال ن نّبي يونان، داي هان ونّا يوݣرن نّبي يونان ئلّا داتخ.
42 تاݣليت ن تمازيرث ئلّان خف ؤفاسي ن-ؤنقّر تدّا أتكّر ݣ واسّ ن لحساب د وارّاو ن زّمان-اد أها ثشاهد غيفسن، ئدّخ تدّا زݣ لحدّ ن دّونيت حما أد تسّغد يي لحكما ن سُلَيْمَان، داي هان ونّا يوݣرن سُلَيْمَان ئلّا داتخ".
أدجّنون وعرنين
43 داي مش فّغن لارياح ئمنݣوسن زݣ ؤرݣاز دّان أد دّون غر يون ؤدغار ݣ ؤر لّين وامان ئرزو أد ئسݣونفا أها ؤر تّيتّافا.
44 ئكّر، أريتّيني: "أد أغولخ غر ثادّارت ئنو نّا زݣ دّفّغخ". ئدّود يافتّيد تخوا، تشطّب، تستف.
45 ئدّو ياويد أݣّيدس سبعا ن وادجنون ياضن نّا تيوݣرن ݣ تيخّيت كشمن زدغن دينّا، ياغول ئخّو ؤنݣّارو ن-ؤورݣاز-نّا خف ؤمزوارو نّس، ئمشيد أيد ئتّجرون يي وارّاو ن زّمان-اد ؤر-ئحلين».
مّانّس ن سيدنا عيسى د أيتماس
(مارقوس 3:31-35؛ لوقا 8:19-21)
46 داي ݣ ئلّا سيدنا عيسى أر ئساوال يي تربّاع، هان مّانّس د أيتماس بدّان برّا ران أداس سيولن.
47 أها ئنّاياس يون: «هان مايش د أيتماش بدّان برّا ران أداش سيولن».
48 ئسيول ئنّاياس يي ونّا داس ئساوالن: «مايد ئݣان مّانو د مايد ئݣان أيتمانو؟»
49 أها ياژض أفوس نّس غر تانيلا ن-ئمحضار نّس، ئنّاياس: «هان مّانو هان أيتما نو».
50 ئدّخ ونّا دايتݣّان لموراض ن بّانو ئلّان ݣ ئݣنّا نتّا أيد ئݣان: ݣما، د ؤلتما، د مّانو.