8
ثيوثمين نّا أر ئتّمونن د ـ سيدنا عيسى
1 فّير ن ـ ؤينّا، ئدّو سيدنا عيسى أر ئتّكّا ثيمدينين د ـ ئسونّ، أر ئتّبرّاح س ـ ئنغميسن ژيلنين خف ثݣلديتّ ن - ربّي. مونّ أݣّيدس ئمحضرّ نّس س - ثناعش،
2 د - ييتّسث ن - ثوثمين نّا يجّوجي زݣ ييغنشاثن نسنث، ئسّوفغ زّيكسنث أدجّنون: ثلّا ديكسنث مريم نّا مي دا تّينين ثامجداليث نّا زݣ ئسّوفغ سبعا ن - وادجّنون،
3 د - حنّا ثامطّوطّ ن - خوزي ئݣان نّايب ن - هيرودس، د - سوسانّا، د - ثيّاض عدّانين. كول نسنث أر سعاواننث سيدنا عيسى د - ئمحضرّ نّس زݣ ؤينّا يݣان وينسنث.
لقيسث ن - ؤحرّاث نّا أر ئزرّعن
(ماتّى 13:1-9؛ مارقوس 4:1-9)
4 يان واسّ، مّݣراون شايݣان ن - ميدّن خف سيدنا عيسى دّاند غورس زݣ مايد ئݣان ثامدينث، أها يقّيساسن يان لقيسث، ئنّاياسن:
5 «ئدّا يان ؤحرّاث أد ئكرز. نتّا أر ئزرّع، أتّويناس شان ئفسان ݣ - يير ن ـ ؤبريد، داي تّوعفسن تشّينثن ئجضاض.
6 أها أتّويناس ييتّس ضنين خف واشال بو يقشميرن، نتّا مغيند قّارن ئدّخ ؤر ؤفين ؤموغ.
7 د ـ ييتس ضنين أتّوين ئنݣر ن ـ ئسنّان، داي كّرند أݣيدسن ئسنّان أها ؤر ثن ؤّجين أّدّ مغورن.
8 ئيد شان ئفسان ضنين أتّوين ݣ - واشال ئژيلن، أها مغيند ؤشين لغلّث ئعدّان». ئنّا أياد داي يسغويّ ئنّاياسن: «ؤنّا غر لّان ئمجّان أها يسّغد يرار لبال نّس ئي وينّا نّيخ!»
أسّفرو ن - لقيسث ن - ؤحرّاث.
(ماتّى 13:10-17؛ مارقوس 4:10-12)
9 داي سقسانث ئمحضرّ نّس خف مايد ئرا أد ييني س ـ ؤينّا يقّيس
10 أها ينّاياسن: «كونّي ؤدجّيخكون أتيسينم سّرّ ن - ثݣلديتّ ن - ربّي. ئيد وييّاض داسن ساوالخ غاس س - لقيساث حما أد ئجرو ؤينّا ينّا ربّي ݣ ـ لشثاب نّس: "دا تّراعان ݣ ـ ؤينّا دا تّݣّاخ ماشان ؤر دا تّانّاين، أر سّغادن ئي مايدا تّينيخ ماشان ؤر دا تّفرون"».
(ماتّى 13:18-23؛ مارقوس 4:13-20)
11 «هاياون معنا ن ـ لقيسث نّا قّيسخ: ئفسان نيثني أوال ن - ربّي.
12 وينّا أتّوينين ݣ - يير ن ـ ؤبريد، نيثني وينّا دا سّغادنين ئي واوال ن ـ ربّي، أها يدّود شّيطان ئكّسث زݣ وولاون نسن حما أد ؤر تّامنن أها تّوفوكّان.
13 ئيد ئفسان نّا أتّوينين خف واشال بو يقّشميرن، نثني وينّا دا سّغادنين أها قبلن أوال ن ـ ربّي س - ؤفراح، ماشان ؤر غورسن ئژوران، دا تّامنن غاس شوي، أها خرّمن ݣ - لوقث ن - ؤژيّر.
14 ئد وينّا أتّوينين ئنݣر ن ـ ئسنّان، نيثني وينّا دا سّغادنين ئي واوال ن ـ ربّي ماشان دا تطّواعارن ݣ - ؤنزݣوم ن - دّونيث د - وطرّح نّس د - شّهواث نّس، أها ؤر دا تمغورن ؤلا ثمرن.
15 ئد وينّا أتّوينين ݣ ـ واشال نّا يژيلن، نيثني وينّامي ژيلن وولاون أر سّغادن ئي واوال ن ـ ربّي، شبّرن ديكس، أر تݣّان ثامسّومانث حما أديكسن ثيلي لغلّث».
لقيسث ن - لانبا
(مارقوس 4:21؛ ماتّى 5:15)
16 «ؤر ئلّي ؤنّا يسّاغان لانبا أها يغمساس س - شان ثلوليت نغد أتّ ئسيرس دّاو ن - شان سّرير، ماشان داتّ ئسروس خف شا نّا يهزّان حما أد أنّاين وينّا داد كتشّمنين أسيدّ.
17 ئدّخ هاثين ؤر ئلّي شا ينثلن نّا ؤر ئدّين أدّ ئباين ؤﻻ شا نّا يفّرن نّا ؤر ئدّين أد ئتّواسّن.
18 ئوا راراث لبال نّون ئي ميمش دا ثسّغادم. ئدّخ هاثين ؤنّا غر ئلّا شا ئدّا أداس ئتّواوش ووݣار، ئد ؤنّا غر ؤر ئلّي شا، أود أينّا مي يغال ئيس غورس ئلّا ئدّا أداس ئتّييكّس».
مايس ن - سيدنا عيسى د - أيثماس
(ماتّى 12:46-50؛ مارقوس 3:31-35)
19 يوث ن ـ لمرث، ثدّود مايس غر سيدنا عيسى د - أيماس، أها ؤر ؤفين ما زݣ غورس كّان ئدّخ ئعدّا لغاشي.
20 داي علمناس شان ييتس نّاناس: «هان مايش د - أيثماش بدّان برّا، ران أكّ أنّاين».
21 أها ينّاياسن: «ئمّا د - أيثما ݣانثن وينّا دا سّغادنين ئي واوال ن - ربّي أرث تّضاعن».
سيدنا عيسى يسبدّا شّوط
(ماتّى 8:23-27؛ مارقوس 4:35-41)
22 يان واسّ، ئنّا سيدنا عيسى ئي يمحضرّ نّس: «أوريو أننضو س ـ أجمّاضين ن - ؤݣلمام.» داي نين يان ؤغرّابوأها كشمن أمان.
23 نتّا أر نطّون، ياوي ونودّم سيدنا عيسى. داي ثنهم يوث ن - شّوط ن - ؤزݣو د ـ ؤنژار، أر ئتعمّار ؤغرّابو س ـ وامان، ئلين ݣ - لخاطار.
24 داي تّوجين ئمحضرّ غر سيدنا عيسى أرث تسفافان س - ئغويّان: «أياسّلماد، أياسّلماد! هاثين ندّا أنخلو!» داي يكّر ئنهر أزݣو د - ثمزازين. داي ثبدّ شّوط، ياغول كولشي ينّيرس.
25 أها ينّاياسن: «ماني ليمان نّون؟» داي ݣّدن قّيمين هبضن، أر تّميينين ئنݣراسن: «مايد ئمس ؤرݣاز أد ألّيݣ دا يساوال أود ئي وزݣو د - ثمزازين أرث تّضاعنث؟».
أسّوفغ ن - وادجّنون
(ماتّى 8:28-34؛ مارقوس 5:1-20)
26 داي أوضنن غر ثمازيرث ن - ئجرّاسيّن، نّا يلّان بنيد ن - ثمازيرث ن - لجاليل زݣ ؤجمّاضين ن - ؤݣلمام.
27 نتّا يرس سيدنا عيسى زݣ ؤغرّابو، ئنّالثيد يان ؤرݣاز زݣ ثمدينث ديكس أدجّنون زݣ واهوّا، أر ئتّغيما حژّوضي، ؤر غورس ثلّي ثدّارث، أر ئتّغيما غاس ݣ - ئسمضال.
28 نتّا يانّاي سيدنا عيسى، ئنفض ئخف نّس داثاس أها ينّاياس س - يان ؤغويّي أخاثار: «مايد ئي ثريد أعيسى ممّيس ن - ربّي أنافلّا! عافاش أد ؤر ئي تمرّاث».
29 ئنّا ورݣاز أياد ئدّخ ئنبض سيدنا عيسى خف دجّن أد ئفّغ زّيكس. ئكّا أرث ئتّامژ دجّن مشثا ن ـ ثيلمرّاث، أرث كرّفن ميدّن س ـ ثيفرين حما أث سرصّان، ماشان أر ئتّبّي ئكوراف، أرث ئحرّي دجّن غر لخلا.
30 داي يسقساث سيدنا عيسى ينّاياس: «ميسم نّش؟» ئنّاياس: «ئسم ئنو ثاربيعث ن ـ لعسكر» ئدّخ ديكس لّان شايݣان ن - وادجّنون.
31 داي سحوژّرن وادّجنون سيدنا عيسى حما أد ؤرثن ئتژّع غر أقّا.
32 ثيلي ديسّ يوث ن - ثوالا ثخاثارث ن - ييلفان أر تّاوغن ݣ - ؤمادل ن ـ عاري، تّرن زّيكس وادجّنون أثن يادجّ أد كشمن ݣ ـ ييلفان، أها يادجّيثن.
33 داي فّغن وادجّنون زݣ ؤرݣاز كشمن ݣ - ثوالا ن - ييلفان. نهمن ييلفان، أزّوفن زݣ وافلّا ن - زّابوق س ـ أݣلمام أها تّشينثن وامان.
34 نتّا أنّاين ئمكساون مايد ئجران، دّون رولن أها قّيسن أينّا يجران ئي يايث ثمدينث د - ئسونّ نّا لّانين ثاما نّس.
35 فّغند ميدّن أد أنّاين مايد ئجران. دّوندّ غر سيدنا عيسى، أفيندّ أرݣاز نّا زݣ فّغن وادجّنون ئلّا يقّيماس س ـ ئضارّ ئلسا ئعبانّ ييلي س ـ لعقل نّس، داي ݣّدن.
36 أها قّيسناسن ألتو وينّا ݣانين ئنيݣان مايد ئݣا سيدنا عيسى ألّيݣ ئجّوجي بو وادجّنون.
37 داي تّرن زّيكس ئمزداغ ن - ثمازيرث ن - ئجرّاسين كول أد ئدّو يبردان نّس ئدّخ ݣّدن شايݣان، ئكّر ئني أغرّابو أها ياغول غر أݣمّاضين ن ـ ؤݣلمام نّا زݣ ديدّا.
38 ئيد أرݣاز نّا زݣ فّغن وادجّنون أر ئسحوژّور سيدنا عيسى أث يادّج أد ئمون أݣّيدس. ماشان ؤرث يودّجي أها ينّاياس:
39 «دّو غر أيث ؤخام نّش ثقيسداسن لعجايب نّاش ئݣا ربّي.» أها يدّو أر ئتّقّيس ݣ - ثمدينث س ـ ماس ثلّا مايد أس ئݣا سيدنا عيسى.
أسيدر ن - ئلّيس ن - يايروس د ـ ؤجّوجي ن ـ ثمطّوط نّا يزدين س ـ ئدامّن
(ماتّى 9:18-26؛ مارقوس 5:21-34)
40 لّيݣ ياغول سيدنا عيسى غر أݣمّاضين ن ـ ؤݣلمام، رحبن ئيسّ ميدّن ئدّخ لّان كول نسن أرث تّعايانن.
41 داي هان يان ؤرݣاز ئسم نّس يايروس، ئݣان أخاثار ن - ثمزݣيدا ن - ووداين، ئدّاد أها يتّوتّي غر ئضارن ن - سيدنا عيسى، ئتّر زّيكس أد أݣّيدس ئمون غر ثادّارث نّس،
42 ئدّخ غورس ثلا يوث ن - ثرباتّ ثافرضيث، غر ثلّا أم ثناعش ن - ؤسّݣّاس، ثيوض لموث. نتّا يمون أݣّيدس، أر غيفس تّمزاحامن ميدّن.
43 ثيلي ݣ ـ لغاشي يوث ن - ثمطّوطّ ئزدين س - ئدامّن أم ثناعشّ ن - ؤسّݣّاس. ثسخسر أينّا غورس ئلّان كول خف ئضبيبن، أها ؤر ئغي أود يوكّ أتّ ئجّوجي.
44 داي ثكّد زݣ ضارث ن - سيدنا عيسى ثاژضاس غر أشضّور ن - ئعبان نّس أها رصّاناس ئدامّن ݣ - وانسا.
45 داي ينّاياسن سيدنا عيسى: «مايد ئمس ؤنّا غوري يوژضن؟» أها نكرن كول نسن، داي ينّاياس بطرس: «أسيدي، ميدّن كول دا غيفش تّمزاحامن أرش ثحّين زݣ مايد ئݣان ثامناطّ، أر تّينيد مايد غوري يوژضن؟»
46 ماشان ئنّاياسن سيدنا عيسى: «هاثين يوژض غوري شا، ئدّخ ؤشيخ د - شان جّهد ئفّغ زّيݣي».
47 نتّا ثسّن ثمطّوطّ ئس يوشي أݣّيدس، ثدّود أر تّرݣيݣي ثتّوتّي غر ئضارّ نّس أها ثقّيساس داث ن - ميدّن كول ماخ ألّيݣ غورس ثوژض د - ماكّاس ألّيݣ ثجّي ݣ ـ وانسا.
48 داي ينّاياس: «ألالاّ، هان ليمان نّم ئجّوجيشم، مون د ـ لمان».
49 ئسول أر ئساوال، ئدّود يان ؤمازان زݣ ثادّارث ن - ؤخاثار ن - ثمزݣيدا ينّاياس ئي يايروس: «غاس أد ؤر تشقّا أسّلماد، هاثين ثمّوث ئلّيش».
50 نتّا يسلّا سيدنا عيسى ئي وياد أها ينّاياس ئي يايروس: «أد ؤر تّݣّد شا، غاس أمن، هاثين ثدّا يلّيش أتجّي».
51 لّيݣ نّييوض غر ثادّارث ن ـ يايروس، ؤر يودجّي أوُد يوكّ أد ئكشم أݣّيدس، غاس بطرس د - يعقوب د ـ يوحنّا د - ئبّاس ن - ثرباتّ د - مايس.
52 ئلين ميدّن كول أر ترون خف ثرباتّ أر غيفس كّاثن أݣجدور، أها ينّاياسن: «أد ؤر تّروياث، هاثين ؤر ثمّوث شا، غاس ثݣن».
53 داي قّيمين أر غيفس تّصين ئدّخ سّنن ئس ثمّوث.
54 ماشان يومژ ثارباتّ زݣ ؤفوس ئغراس: «أ ثارباتّ، كّر!»
55 أها يعايتّيد رّوح، ثكّر ݣ - وانسا، داي ينّاياسن أداس ؤشين مايد تتّا.
56 قّيمين لوالدين نّس هبضن، ماشان ئوصّاثن سيدنا عيسى أد ؤر تّينين ئي أود يوكّ أينّا يجران.