9
سيدنا عيسى دا يجوجوي يون ؤكوشام ݣ كافرناحوم.
(مارقوس 2:1-12؛ لوقا 5:17-26)
1 أها ئني سيدنا عيسى أغرّابو ئنضود أݣلمام ياغولد غر تمدينت نّس (كافرناحوم).
2 داي أويند ئيتس ن ميدّن يون ن-ؤكوشام ئمحضن خف تيسّي، نتّا يانّاي سيدنا عيسى ليمان نّسن، ئنّاياس ئ-وكوشام: «أد ؤر تݣد، أممّي، هان دّنوب نّش تّوغفرنت-اش».
3 أها أر تّينين ئيتّس ن لعولاما ن شّرع ݣ ئخفاون نّسن: «واد دا يساوال س لمعيور خف ربّي!»
4 داي ئسين سيدنا عيسى ئخمّيمن نّسن، أها ئنّاياسن: «مّاخ ألّيݣ داتخمّامم ݣ ؤينّا ؤر ئحلين ݣ ؤلاون نّون.
5 مايد ئوهنن؟ ئد أد ئتّوينا: "هان دّنوب نّش تّوغفرنت-اش"، ماد أد ئتّوينا: "كّر أتدّوث؟"
6 ماشان دّيخ أداون سنعتخ ئد ممّيس ن بنادم غورس تانباطّ خف واشال حما أد ئغفر دّنوب». لوقت نّا، ئنّاياس ئ-ؤكوشام: «كّر أسي تيسّي نّش تدّوت غر تادّارت نّش!»
7 أها ئكّر ئدّو غر تادّارت نّس.
8 ألّيݣ أنّاين تربّاع أياد، رعبن ؤشين لعزّ يي ربّي نّا ئوشان يي بنادم تانباطّ ئݣان أم تاد.
سيدنا عيسى دا يقّار يي متّى أصنّاكّ
(مارقوس 2:13-17؛ لوقا 5:27-32)
9 داي نتّا ئزري سيدنا عيسى زݣ سّيس، يانّاي يون ن-ؤرݣاز ئقّيم ݣ ؤدغار ن تصنّاكت ئسم نّس متّى. أها ئنّاياس: «تفاريي». ئكّر ئتفورت.
10 داي ألّيݣ ئقّيم أر ئتتّا ݣ تادّارت ن-متّى، دّوند شيݣان ن-ئصنّاكن د لمودنيبين قّيمان د سيدنا عيسى د ئمحضار نّس.
11 داي نتّا أنّاين ئفرّيسيّين أياد، نّان ئ-يمحضار: «مّاخ ألّيݣ ديتتّا لموعلّيم نّون د ئصنّاكن د لمودنيبين؟»
12 ألّيݣ ئسلّا سيدنا عيسى يي مايد نّان، ئنّاياسن: «ؤر-ئد وينّا ئصحان أيد ئحلادجّان ئ-وضبيب، ماشان وينّا ياغ شا!
13 دّويات ئسينات ماتّا واوال-اد ئتّينين: "نكّين رّحمت أيد ريخ ؤر-ئد تامغروصت" أها (ئدّخ) ؤر ددّيخ أد غرخ يي وينّا صلحنين، ماشان وينّا دنبنين أد توبن».
سيدنا عيسى د واژوم.
(مارقوس 2:18-22؛ لوقا 5:33-39)
14 تفّير ن-ؤينّا دّوندّ غورس ئمحضار ن يحيى، نّاناس: «ماخ ألّيݣ دانتّاژوم شيݣان نكّني د ئفرّيسيّين، ئد ئمحضار نّش ؤر دا تّاژومن؟»
15 داي ئنّاياسن سيدنا عيسى: «ئد أد ئغيين أيت تمغرا أد رون ماحد ئلّا ئسلي أݣّيدسن؟ ماشان ئقّان أد-ئدّو يون ن واسّ أد زّيكسن ئتّواسي ئسلي، لوقث نّا دّان أد أژومن.
16 «أود يون ؤر دا يݣنّو أرقيع ن لكتّان ؤجديد خف ؤعبان أقديم ئدّخ ئدّا ؤورقّيع ن لكتّان ؤجديد أد ئفلي أعبان أقديم ئمغور ؤفلّوي.
17 أها ؤر داتݣّان شّراب ؤجديد ݣ ئݣديدن ئقديمن، حما ؤر ئطّيقّيس ؤݣديد ئنّغل شّراب ئخسر ؤݣديد، ماشان دا تݣّان شّراب ؤجديد ݣ ئݣديدن ؤجديدن، راحن كول نّسن».
أسّيدر ن ترباث د-ؤجوجي ن تمطّوط ئحادان سيدنا عيسى
(مارقوس 5:21-43؛ لوقا 8:40-56)
18 داي لّيݣ ئلّا أر ئتّيني أياد، ئدّودّ يون ن-ؤخاتار ن-ؤوداين ئبندقاس ئنّاياس: «هان ئلّي دغي أيد تمّوت، أوْرا ئݣ غيفس أفوس نّش أها تيدير».
19 أها ئكّر سيدنا عيسى ئتفارت نتّا د ئمحضار نّس.
20 داي هان يوت ن تمطّوط ئتّازّلان س-ئدامّن تناعش ن-ؤسݣّاس تدّادّ زݣ ضاراس تحادا أشضّور ن-ؤعبان نّس.
21 ئدّخ تنّا ݣ ئخف نّس، مش حاداخ غاس ئعبان نّس، دّيخ أد جّيخ.
22 داي ئبرّم سيدنا عيسى يانّايت، أها ئنّاياس: «أد ؤر تݣد أيلّي، هان ليمان نّم ئجوجيشم». تجّي تمطّوط فيساع.
23 داي نتّا ييوض سيدنا عيسى غر تادّارت ن-ؤخاتار ن-ووداين يانّاي ئغيّاطن دا كّاتن أݣجدور د ميدّن دا سغويّون.
24 أها ئنّاياسن: «خوراون! هان تارباتّ ؤر تمّوت شا ماشان ثݣن!» أر غيفس تصّان.
25 داي ألّيݣ ئسّوفغ ميدّن ئكشم يامژاس أفوس نّس، تكر تربات.
26 أها ئسيح واوال ݣ تمازيرث نّا كول.
سيدنا عيسى دا ئجّوجوي سين ن-ئدرغالن.
27 ماشان لّيݣ ئدّا سيدنا عيسى ئبردان نّس، تفارنت سين ن-ئدرغالن س-ؤغويّي أر تّينين: «رحماخ، أممّيس ن داود!»
28 نتّا ئكشم غر تادّارت، قربند غورس ئدرغالن سّين، أها ئنّاياسن سيدنا عيسى: «ئيس دا تّامنم ئس غييْخ أكن جّوجيخ؟» نّاناس: «ئيّيه، أسيدي!»
29 ئسلفاسن يي والّن نّسن، ئنّاياسن: «خف وانشثي ن ليمان نّون أداون ييلي ؤياد».
30 أها رژمن والّن نّسن، ئوصّاتن سيدنا عيسى ئنّاياسن: «غيراون أتّينيم يي شا ن يون!»
31 ماشان غاس فّغن شنّعنت ݣ تمازيرث نّا كول.
سيدنا عيسى دا ئجّوجوي أعنژول
32 داي ألّيݣ فّغن ئدرغالن سّين، أويناسد ئيتّسن ن ميدّن يون ؤرݣاز ئݣان أعنژول ئتّوسكن س وادجنون.
33 ألّيݣ ئسّوفغ أدجّنون-اد، ئسيول ؤعنژول. رعبن تربّاع ن ميدّن أر تّينين: «ؤر دجّين ئلّي أم واد ݣ-إسرائيل!»
34 ئد ئفرّيسيّين أر تّينين: «هاثين س-ؤخاتار ن وادجنون أس دا ئسّوفوغ أدجّنون!»
سيدنا عيسى دا ئتّحنّا خف ميدّن
35 داي ئقّيم سيدنا عيسى أر ئسّارا ݣ تمدينين د ئغرمان كول، أر ئسّغرا ݣ ثيدروين ن-ثزاليت ن-ووداين، أر ئساوال خف ئنغميسن ژيلنين ن تݣلديت ن ربّي، أر ئجّوجوي مايد ئݣان ئغنشا د واطّان.
36 ماشان ألّيݣ يانّاي تيربّاع ن ميدّن ئحنّا غيفسن، ئدّخ لّان ݣ تمارا أها مزلاّعن، ݣين أم ؤلّي غر ؤر-ئلي ؤمكسا.