10
ئمازان س تناعش
(مارقوس 3:13-19؛ لوقا 6:12-16)
1 داي ئكّر سيدنا عيسى ئغرد ئ-يمحضار س تناعش، ئشفاسن تانباط خف وادجنون حما أت تن سّوفغن، جّوجين مايد ئݣان ئغنشا كول د واطّان ئلّان ݣ ميدّن كول.
2 ئد ئسماون ن-ئمحضرن س تناعش ويد أيتن ئݣان: أمزوارو سمعان: نّا مي داتّينين بطرس، د ݣماس أندراوس، د يعقوب: ممّيس ن زبدي، د ݣماس يوحنّا
3 فيلبّس، د بارتولماوس، توما، د متّى أصنّاكّ، د يعقوب: ممّيس ن حلفا، د تدّاوس،
4 سمعان نّا ئݣان زݣ تمدينث ن قانا د ياهودا ئسخريوطي، نّا يدّان أد-ئغضر سيدنا عيسى.
سيدنا عيسى دا ئتّازن ئمحضرن س تناعش
(مارقوس 6:7-13؛ لوقا 9:1-6)
5 د ويد أيد ئݣان تناعش نّا يوزن سيدنا عيسى ئوصّاتن ئنّاياسن: "أد-ؤر تدّويات غرلݣنوس ؤر ئݣين ؤوداين، أد-ؤر كشمات غر تمدينث ن-ئساميريين،
6 ماشان دّويات غر ئشروان يوشكانين ن ثادّارث ن-إسرائيل،
7 داي أدّاي تدّوم سيولات أر تينيم هان تاݣليت ن-ئݣنوان ثقربد.
8 جّوجييات ئموضين، تسكّرم ئمتّين، تجّوجيم وينّا ݣ ئلّا لبرص، تسّوفغم أدجّنون، ئدّخ ثومژم باطّل، ؤشات باطّل.
9 أد ؤر تّاويات دّهب نغد نّقّرت نغد نّحاس ݣ ئفكّاسن نّون،
10 أد-ؤر تّاويات لعوين ݣ ؤبريد، لا سين ئعبان، ولا ئكوربين، ولا أعكاز، ئدّخ ئستاهل ؤخدّام أد ئتتّا ؤتشي نّس.
11 تامدينث نغد ئغرم نّا غر تكشمم، رزويات ديكس خف ونّا ئستاهل أد غورس تيليم، تقّيمم غورس أر زّيكس تمّوتّيم.
12 داي أدّاي تكشّمم غر تادّارت تسلّمم غيفس.
13 داي مش ستاهل ثدّارت نّا أغيفس دّيݣّز سلام نّون ئدّا أد غيفس ديݣز، ئد مش ؤر تستاهل ئدّا أد غورّون ديعايد سلام نّون.
14 ئد ونّا ؤر ئسّون ئرحيبن ؤر دائسغاد يي واوال نّون، فّغات زݣ تادّارت نّا نغد زݣ تمدينث نّا غر برّا أها تنقّرم أود أݣضرور زݣ ئضارن نّون.
15 هاثين لحق أداون تّينيخ: ئقّنن لحالت ن تمدينين ن سادوم د عمورة أد ئوهين لعيقاب خف لحالت ن تمدينث نّا".
لوقت ن تمارا
(مارقوس 13:9-13؛ لوقا 21:12-17)
16 هان نكّين داكون تّازنخ أم ئيشروان أمّاس ن-ووشّان، راراث لبال نّون أم ئفاغريون، توهينم أم ئتبيرن.
17 ماشان رارات لبال نّون زݣ ميدّن، هاثين دّان أد كون تّاوين غر لمحكما، ؤوتن كون ݣ ثيدّروين ن-تژّاليت-نسن.
18 ژّوغرن كون غر دات ن-ئنبّاضن د ئݣلّيدن خف نّيرت ن-ئسم ئنو ئمشي، تدّام أتشاهدم يي لݣنوس ؤر ݣينين ؤداين.
19 أدّاي كون أوين أد ؤر تخمّامات ماي تّينيم نغد ماس تدّام أتّسيولم، ئدّخ تدّام ݣ لوقت نّا أداون ئتياش ماس تساوالم.
20 ئدّخ هاثين ؤر ئد كنّي أيد ئساوالن، ماشان رّوح ن بّاتون نّا ݣلّان ديݣون أݣدان أد ئسيول.
21 ئقّنن يون أد ئيش ݣماس أتنغين، د بّانّس ن يون أد ئيش ممّيس أتنغين، عصون أرّاون لوالدين نّسن أها نغينتن!
22 داي ؤر كن ئتّيحميل أود يون خف نّيرت ن-ئسم ئنو، ماشان ونّا ئتّساعافن أر تينݣيرا هاثين نتّا أيد ئتراحن.
23 أها أدّاي كن قهرن زݣ يوت ن تمدينت، ترولم غر تايض، ئدّخ لحق أيداون تّينيخ، هاثين ؤر تشمّالم لخدمث ݣ ثمدينين ن-إسرائيل غاس أر دّيدّو ممّيس ن بنادم.
24 ؤر ئلّي ؤمحضار يوفن لموعلّيم نّس، نغد ئسمغ يوفن سيدي نّس.
25 باراكا أد ئݣ ؤمحضار أم لموعلّيم نّس د ئسمغ أد ئݣ أم باب نّس، داي مش نّان خف باب ن ثادّارت بعلزبول زعما شيطان ئوا مايد تّينين خف أيت ثادّارت نّس؟
26 أد ؤر زّيكسن تّݣّدات شا، ئدّخ ونّا توسثر ئدّا أد ئعرّا، د ؤينّا غمسن ئدّا أد ئضهير.
27 أينّا داون تّينيخ ݣ تالّست، ئنييات ݣ واسيدّ. د ؤينّا مي تسّفلدم س لحس ݣ ئمجان نّون، برّحات ئسّ أفلّا ن سضوح.
28 أد ؤر تݣدات زݣ وينّا ئنقّان صّاحث ماشان ؤر تّيغيين أد نغن رّوح، ماشان ݣدات زݣ ونّا ئغين أد ئنغ رّوح د صّاحث سّين نّسن ݣ جاهنّام.
29 ئس ؤر دانزّان سين ن-ئجضاض س يون ن وارّيال؟ أها أود يون زّيكسن ؤر تّوتّوي خف واشال غاس مش ئيرا باثون.
30 ئد كنّي، أود أژار ن-ؤقشاش نّون ئتّوحاسب.
31 أد ؤر تّݣدات هان كونّي توفم شيݣان ن-ئجضاض.
أقرّر س لمسيح
32 د ونّا ئسّي ئتّقرّان داث ن ميدّن، أود نكّين أد ئس قرّاخ دات ن-بّانو ئلّان ݣ ئݣنوان.
33 ماشان ونّا يي ئنكرن داث ن ميدّن، أود نكّين أت تنكرخ دات ن بّانو ئلّان ݣ ئݣنوان.
سيدنا عيسى د دّونيت.
34 هان أتغالم ئس ددّيخ أد ݣخ لهنا خف واشال، ؤر ديويخ لهنا ماشان ئويخد سّيف.
35 نكّين دّيخدّ حما أد بضوخ أرݣاز د بّاس، د تربات د مّا نّس، د تّيسليت د تمغارت نّس.
36 د ئنضليبن ن بنادم أيت تادّارت نّس أيتن-ئݣان.
37 د ونّا ئتّيرين ئبّاس نغد مايس ؤݣار ئنو نكّين، ؤر يي ئستاهل شا، د ونّا ئتّيرين ممّيس نغد ئلّيس ؤݣار ئنو، ؤر يي ئستاهل شا.
38 د ونّا ؤر ئوجيدن أتّيتّوعلّق خف صّاليب أها ئتّوعدّب غيفي، ياسي صّاليب نّس ئتفوري، ؤر يي ئستاهل شا.
39 د ونّا يومـﮋن ݣ تودرث نّس أتّيزل، د ونّا ئزلان تودرث نّس خف نّيرت ئنو أتّياف.
(مارقوس 9:36-41)
40 د ونّا ئسّون ئرحبن، هاثين نكّين ݣ لحق ئرحب، د ونّا ئرحبن ئسّي، س ونّا يي دّيوزنن أس ئرحب.
41 د ونّا ئرحبن س يون ن نّبي ئتخ ئݣا نبي، لاجر ن نّبي أيد ئتّامژ، د ونّا ئرحبن س يون صّاليح ئتخ ئݣا صّاليح، لاجر ن صّاليح أيد ئتّاوي.
42 هاثين لحق أيداون تّينيخ: ونّا يوشان أد ئسو يي يون زݣ ئمژيان-اد واخا غاس يون ن لكاس ن وامان ئصمّيضن ئدّخ ئݣا أمحضر ئنو، ؤر دا س ئتضاع لاجر.