6
تيوشي ن صّاداقا
1 «غوراون أتݣم لخير نّون داث ن ميدّن حما أد كون تّنّاين، أها ؤر غورون ئتّيلي لاجر غر بّاتون ئلّان ݣ ئݣنوان.
2 ماشان أدّاي تشت صّاداقا، أد ؤر ئس تّبرّاح ئمشينّا تݣّين لمونافيقين ݣ لمحلاث ن دژاليت د ئزنيقن حما أد أسن أكّان ميدّن لعزّ، لحق أيداون تّينيخ، هاثين ؤمژن لاجر نّسن ياد.
3 ئد شكّين، أدّاي تاكّات صّاداقا أد ؤر ئتّيسين ؤفوس نّش أژلماض مايد دا ئتّݣّا ؤفوس نّش أفاسي،
4 ماشان أكّا صّاداقا نّش س توفرا، ئد بّا نّش ئلّان ݣ ئݣنّا دايتنّاي مايدّا تّݣّات س توفرا ئدّا أداش ئرار س لخير».
تاژالّيت د واژوم
5 «داي أدّاي تژالّات، أد ؤر تّݣّا أم لمونافيقين، هاثين داتّيرين أد ژّالّن س-ئبدّي ݣ ثيدروين ن تژاليت د ئبردان حما أتن أنّاين ميدّن. لحق أيد أون تّينيخ، هاثين ؤمژن لاجر نّسن زݣ ميدّن.
6 ئد شݣين، أدّاي تژّالت كشم غر لبيت نّش تقّنت غيفش لباب، تژّالت يي ربّي نّا ئݣان ئبّاش س توفرا، ئتخ بّانش نّا دا ئتانّاين زݣ أفلا ئدّا أداش ئرار س لخير.
7 داي أدّاي ثژّالم، أد ؤر سعدوياث ئواليون أم ؤينّا تّݣّان ميدّن نّا ؤر ئسّين ربّي، داتّغالن ئس دّان أداسن سفلدن مش سعدّان ئواليون.
8 أد ؤر تݣيم أم نيتني، ئدّخ ئسّن بّاتون ماون ئخصّان مغار ؤر آس تتّيرم.
9 «ئد كنّي أدّاي تيريم أتژالّم ئنياث ئمشيد: "أربّي نّا ئݣان بّانخ، شݣّين أيد ئلّان ݣ ئݣنوان، أد ئتّوسبورز ئسم نّش.
10 أها تدّود تݣلديت نّش ئتّواݣّ لموراض نّش ݣ واشال أم ݣ ئݣنّا.
11 أكّاياخ كّوياسّ أغروم نّاخ ئتقدّان.
12 تغفرثاخ لمعصيّات نّخ ئمشينّا دا نتساماح أود نكّني ئ-وينّاخ ئݣان ئيخّوث.
13 عاوناخ، ثحفطّاخ أد-ؤر نتّوتي ݣ دّنوب، ماشان فوكّاخ زݣ شّيطان".
14 «هاثين مش تّسامحم ئ-ميدّن خف دّنوب نّسن أود بّاتون ئلّان ݣ ئݣنّا ئدّا أداون ئسامح.
15 ئد مش ؤر تّسامحم يي ميدّن خف دّنوب نّسن نّا داونݣان، أود بّاتون ؤر-اون ئتساماح خف دّنوب نّون».
16 «أدّاي تاژومم، أد ؤر سّخنشويات أم لمونافيقين، هاثين دا تبدّالن ؤدماون نّسن حما أد سنعتن يي ميدّن ئس أژومن، لحق أداون تّينيخ، هاثين وينا ؤومژن لاجر نّسن غر ميدّن.
17 ئد شݣّين، أدّاي تاژومت دهن أقشّاش-نش، تسّيرت ؤدم نّش،
18 حما ؤر تّيسين ميدّن ئس تاژومت، ماشان بّا نّش نّا ؤر دائتويناين، ئتخ بّا نّش نّا دايتّنّاين ئد شݣ ؤر داث تنّايث ئدّا أداش ئرار س لخير».
لكنز أحقّاقي ݣ ئݣنوان.
19 «أد ؤر دجمعاث ئ-يخفاون نّون لخزين ن لكنوز خف واشال، ماني ݣ داتتّا تّونيا د تصضّا، د مانيݣ غيفس قّازن ئخوّان أتّاشر.
20 ماشان ݣات ئ-ئخفاون-نّون لكنز ݣ ئݣنّا ماني ݣ ؤر داث ئتتّا تّونيا نغد تصضا د ماني ݣ ؤر غيفس قازن ئخوّانن أتاشرن.
21 ئدّخ ماني ݣ-ئلّا لكنز نّش دينّا أݣ ئتّيلي أود ؤول نّش».
أسيدّ ن صّاحت
22 «ألّن أيد ئݣان أسيد ن صّاحت. داي مش صحانث والّن نّش، تدّا صّاحث نّش كول أتعمّر س-ؤسيد.
23 ئد مش ؤر ژيلنث والّن، تدّا صّاحت نّش أتيلّس. ئوا مش ياغول ؤسيد نّا ئلّان ݣ صّاحت نّش ئݣا تالّست، مشحال أيد توعر تالّست نّا!»
ربّي د لفلوس
24 «ؤر ئتّيغيي أود يون أد ئݣ ئسمخ يي سين ن-ئد بابين ن شّي، ئدّخ ئدّا ؤر ئتّيحميل يون أها ييري وايض، نغد أد ئقّيم د يون ئسّمزي وايض، هاثين ؤر تّيغييم أتݣيم ئسمخان ن ربّي د لفلوس».
25 «خف ؤياد داون تّينيخ: أد ؤر تّاسيات أنزݣوم يي تودرت نّون مايد تتّام د مايد تلسّام، نغد يي صّاحت نّون مايد تلسّا، ئس ؤر توف تودرت ؤوتّشي، د صّاحت توف ملسيوت؟
26 راعات ئجضاض ن-ئݣنّا هاثين ؤر دا زرّعن ؤلا دا مݣّرن ولا دا سمونّون ݣ ئعريشن، أر تن ئستشّا بّا تون ن-ئݣنّا، د كونّي ئس ؤر تن توفم شيݣان.
27 مان ديݣون أدّاي ئخمّم، ئد أد ييغيي أد ئزايد يوت ن-تاسعت ݣ لعمر نّس؟
28 مّاخ ألّيݣ دا تّاسيم أنزݣوم ن ملسيوث؟ راعاث ئيلدجيݣن ن-ئݣران ميمش داتݣّان أد مغورن: ؤر دا تلّمن ؤلا دا خدّمن.
29 ماشان أداون ئنيخ، هان أود سليمان ݣ لعزّ نّس كول ؤر ئلسي أم يون زّيكسن.
30 مش دا ئسّلسا ربّي ئمشيد توݣا ئلّان أسّاد ݣ ئݣر، تتّياݣر أسكّا ݣ ؤفرّان ن لعافيت، ميمش أود كوني ؤر كن ئسّلسا، أوينّا مي ئدروس ليمان؟
31 أد ؤر تّاسيات أنزݣوم أد تينيم: "مايد نتّتا د مايد نسّا نغد مايد نلسّا؟"
32 هان أياد داتّازلان غيفس أود وينّا ؤر ئسّين ربّي، هان بّا تون ئلّان ݣ ئݣنّا ئسّن ئس ثحدادجم يي ؤوياد كول.
33 ماشان رزوياث ݣ ثيزويري كشماث ݣ تݣلديت ن ربّي، تمنوم، د-ؤياد كول أداون تيزايد.
34 أد-ؤر تّاسياث لهمّ يي واسّ نّا ديدّان، ئدّخ أسّ نّا ديدّان ئدّا أد ياسي لهمّ نّس يي ئخف نّس، كّوياس ئلّا س ثمارا نّس».