26
ئخاثارن ن-ؤوداين دا تقلاّبن أد نغن سيدنا عيسى
(مارقوس 14:1-2؛ لوقا 22:1-2؛ يوحنّا 11:45-53)
1 ألّيݣ ئشمّل سيدنا عيسى ئواليون-اد كول، ئنّياسن ئ-يمحضار نّس:
2 «هان كنّي تسّنم ئس قّيمان غاس سِين ن-ووسّان يي لعيد ن-ؤزرّوي ن بني إسرائيل، ݣ دّان أد شين ممّيس ن بنادم حما أد ئتّوصلب».
3 ݣ لوقث نّا جمعن ئخاثارن ن دّين د ئمغارن ن شّعب ݣ ثدّارث ن قَيَافَا ئݣان أخثار ن دّين.
4 مشوار ݣراسن حما أد-امژن سيدنا عيسى س شا ن لحيلث أتنغن.
5 ماشان نّان: «ؤور نتّݣا أياد ݣ لعيد حما أد ؤر تكّر ثيريت ݣ شعب».
ثامطّوط نّاݣ خوان زّهر خف سيدنا عيسى.
(مارقوس 14:3-9؛ يوحنّا 12:1-8)
6 ألّيݣ ئلّا سيدنا عيسى ݣ ثمدينث ن بَيتْ عَنْيَا ݣ ثدّارث ن سمعان أمبروص.
7 ثدّود غورس يوث ن ثمطّوط غر ثلّا يوث ن لقرعا ن زّهر ئغلان شيݣان، ثخووياسث خف ئخف ألّيݣ ئلّا ئسنّد.
8 ألّيݣ أنّاين ئمحضار نّس أينّا، داي ؤراسن ئعجيب لحال أر تّينين: «ماخف يي ؤوضيعا؟
9 يوف مّور ئنزي زّهر-اد س تّامان ئغلان، ئتّونشف يي يمژلاض!»
10 ألّيݣ ئسن سيدنا عيسى ماي تّينين ݣراسن، داي ئنّياسن: «مّاخ ألّيݣ دا تسضّاعم ثامطّوطا؟ هاتّين ؤر ئثݣي غاس لخير.
11 ئتخ ئمژلاض لاّن غورون كّوياس ئد نكّين ؤر دّيخ أد غورّون ئليخ ديما.
12 ئد نتّاث مش ثخوا أياد خف صّاحث ئنو، هاثين ثخواث غاس أدي ثجوجد يي ثنضلا نو.
13 دّيخ أداون ئنيخ لحق: أك ماني خبّرن ميدّن س لخبار لينجيل ݣ دّونيت كول، دّان أد سيول خف ثمطّوطّا شثيند أينّا ثݣا».
لغضر ن يهوذا
(مارقوس 14:10-11؛ لوقا 22:3-6)
14 ݣ لوقث نّا ئدّا يون زݣ تناعش، ئسم نّس يهوذا ئسخريوطي، غر ؤوخثار ن دّين.
15 داي ئنّياسن: «مشحال أيدي ثكّام مش-اون ثيد ئويخ؟» داي مساسان ئس س ثلاثين ن وارضل ن نقّرث.
16 زݣ لوقث نّا دا يتقلاب ماݣ تݣّا أداسن ثيف.
ئمنسي ن لفيصح ن سيدنا عيسى د ئمحضرن
(مارقوس 14:12-21؛ لوقا 22:7-23؛ يوحنّا 13:21-30)
17 ݣ ئمزوورا ن ووسّان ن لعيد ن ؤوفضير دّان ئمحضار غر سيدنا عيسى نّناس: «ماني ݣ ثريث أداش نسّوجد ئمنسي ن-لعيد ن-ؤوفضير نّاݣ تّتشاد؟»
18 داي ئجاوبثن ئنّياسن: «دّوياث غر فلان ئلّان ݣ ثمدينث ثينيماس، ئنّاياش لمعلّيم، ثيوض لوقث ئنو، ها نك دّيخ أندّوخ أد زريخ غورش لعيد ن لفيصح نك د ئمحضار-ئنو».
19 دّون ئمحضار ݣن ئمشينّا أسن ئنّا سيدنا عيسى، داي سّوجدن ئمنسي ن لعيد ن لفصح.
20 ألّيݣ ثيوض ثادوݣّات، ئقّيم سيدنا عيسى غر طّبلا أد ئتش د ئمحضار نّس س ثناعش.
21 ألّيݣ بدان داتمنساون ئنّياسن: «دّيخ أداون ئنيخ لحق، هان يون زّيݣون ئدّا أد ئيغضر».
22 داي حزنن ئمحضار شيݣان، ئبدو كّو يون ديݣسن دا ثيتسال: «ئد نكّين أمولانا؟»
23 داي جاوبثن ئنّياسن: «ونّا ݣ ؤزضن أفوس نّس أد ئزري أغروم نّس ديدي ݣ ؤقصري نتّا أݣ دّان أد ئيغضر.
24 هان ممّيس ن بنادم ئدّا أد ئمّث ئمشينّا غيفس ئتّيارون ݣ لشتاب، ماشان أوّيها نّس يي ورݣاز نّا ئدّان أد ئغضر ممّيس ن بنادم! هاثين يوفاس مور ئد ئس ؤر ئتّيارو!»
25 داي ئسالث يهوذا نّاݣ دّان أتّيغضر، ئنّاياس: «ألموعلّـيم، ئد نكّين؟» ئجاوبث سيدنا عيسى ئنّاياس: «هان شݣّين ثنّيت».
ئمنسي ن ربّي
(مارقوس 14:22-26؛ لوقا 22:15-20؛ 1 كورنتوس 11:23-25)
26 ألّيݣ قّيمان أر تتشان، ياسي سيدنا عيسى أغروم ئيشكر ربّي ئبّيث ئشاسن يي يمحضار ئنّاياسن: «أمژاث تشّاث، واد أيد ئݣان صّاحث ئنو».
27 ياسي لكاس ئشكر ربّي ئشاسن ئنّاياسن: «سوياث زّيكس كول نّون.
28 ئدّخ واد أيد ئݣان ئدامّن-ئنو نّاݣ ضمنن لعاهد ؤوجديد. ئدامن-اد نّغلن خف نّيرث ن شيݣان ن ميدّن، حما أد تّوغفرنث دّنوب.
29 أداون ئنيخ: هاثين زݣ دغي ؤر دّيخ عاد أتسوخ زݣ لعاصير ن-دّيليث، غاس أر دّيدّو واسّ نّاݣ دّيخ أد تسوخ أݣّيدون ݣ توادا توجديث ݣ ثݣلّيت ن بّا نو».
30 داي سبّحن فّغن دّون غر عاري ن زّيتون.
سيدنا عيسى دا ئتنبأ خف بطرس.
(مارقوس 14:27-31؛ لوقا 22:31-34؛ يوحنّا 13:36-38)
31 داي ئنّياسن سيدنا عيسى: «كول نّون ثدّام أد ئتادجم ئض-اد، ئدّخ ئتّيارو ݣ لشثاب ن ربّي: دّيخ أد ؤوثخ أمكسا، تزلّع ثقضيعث ن-وولّي.
32 والاينّي أدّاݣ دكّرخ زݣ لموث دّيخ أد كن زوُورخ غر تمازيرت ن لجليل».
33 داي ئسيولاس بطرس ئنّاياس: «مغار ݣ زرين كول، ئد نك ؤسار ك زرّيخ».
34 داي ئنّاياس سيدنا عيسى: «دّيخ أداش ئنيخ لحق: هاثين ئضاد، قبل أد ئيودّن ؤفولّوس أد ئثنشرث شراط ن لمرّاث».
35 داي ئجاوبث بطرس ئنّاياس: «مغار تّيسنخ أدمثخ ئدش ؤورش نكرخ والو»، أود ئمحضار نّس كول أياد أينّان.
تاژالّيت ن سيدنا عيسى ݣ-ؤدغار نّا مي تّينين جثسيماني.
(مارقوس 14:32-42؛ لوقا 22:39-46)
36 داي ئمون سيدنا عيسى د ئمحضار نّس ݣ لوقث نّا غر يون ن وورثي دا س تّينين جثسيماني، داي ئنّاياسن: «قّيماث دا، أد دّوخ نك غر دين أد ژّالّخ».
37 ياوي أݣّيدس بطرس د وارّاو سّين ن زبدي، داي ئبدُو أر ئتّاشي س لحزن د-ؤقلّق.
38 داي ئنّياسن: «نّفس-ئنو ديݣس لغيار د ؤوقلّق، قّيماث سهراث غوري».
39 داي ئبعداسن شوي ئسجد خف ؤودم نّس أر ئتژالّا أر ئتّيني: «مش تغيث بّا نو، أدور غيفي ساكّا لمحنايا، ماشان ؤر ئتّيلي ؤينّا ريخ نكّين، ماشان أد ييلي ؤينّا ثريث شݣّين».
40 داي ئعايد غر ئمحضار يافثنيد ݣنن، ئنّاياس يي بطرس: «ئيس ؤر ثغييم أد غوري ثقّيم ثففام غاس يوث ن ثاسّاعث؟
41 سهراث ثژّالم حما أد ؤر ثتّوتّيم ݣ شان ؤجرّب. هان رّوح ئرا أينّا ئغودان، والاينّي صّاحث ثضعف».
42 أها ئدّو ديخ ألثو أر ئتژالاّ أر ئتّيني: «مش ثريث أبّا ئنو ؤر غيفي تسكّاث لمحنا ياد، ماشان ؤر ئتّيلي غاس أينّا ثريث شݣّين».
43 داي ئعايد يافثنيد ديخ ألتو ݣنان، ئدّخ ثن ئرّا ئيطص.
44 يادجّثن ئدّو أد ئژّال ديخ ثيس شراط ن لمرّاثّ، ئعاود غاس يي واوال نّاݣ نّا أمزوارو.
45 داي ئعايد غر ئمحضار نّس ئنّياسن: «ئس تسولم ثينم تسݣونفام؟ هان ثاسّاعت ثقربد ݣ ئدّا أد ئتّونشف مميس ن بنادم غر ئفاسّن ن-ئمودنيبن.
46 كّراث أندّو! هان ونّا يي ئزّنزّان ئقرّبد».
ألّيݣ ئتيامژ سيدنا عيسى
(مارقوس 14:43-50؛ لوقا 22:47-53؛ يوحنّا 18:3-12)
47 نتّا ئسول داسن ئساوال، هان يهوذا ئݣان يون زݣ ثناعش ئمحضارن نّس ئدّاد نتّا د يون ؤوربيع أخثار، ؤسيند ئغريان د سيوفا، ؤزنثنيد ئيخاثار ن تادّارت ن ربّي د ئخاثار ن شعب.
48 ييلي ونّا ثيزّنزان ئشاسن يوث ن ثمثارث ئنّاياسن: «ونّا دّيخ أد سّودمخ، نتّا أينّا أمژات!»
49 داي ئقرّب غر سيدنا عيسى فيساع ئنّياس: «مايث ثعنيث ألمعلـّيم؟» ئسّودمث.
50 داي ئنّاياس سيدنا عيسى: «ماخ ألّيݣ تدّيث أيامدّاكل، غاس ݣ أينّا غر تريث!» داي دّوند غر سيدنا عيسى ݣ لوقث نّا أمژنث.
51 ئكّر يون زݣ وينّا ئلّان غر سيدنا عيسى ياژض أفوس نّس ئيجبد سّيف داي ئوّث يون زݣ ئسمغان ن-ئخثار ن-معلّمين ن شّرع، ئبّياس أمژّوغ.
52 داي ئنّاياس سيدنا عيسى: «رار سّيف غر أدغار نّس، ئدّخ ونّا دا ينقّان س سّيف، دا ئتّمثاث س سّيف.
53 ئس ثغالث ئس ؤر غيخ نك أد تّرخ زݣ بّا نو أد ئد يازن ؤوݣار ن ثطناعش ن-ؤربيع ن لعسكر زݣ لمالايكا؟
54 ماشان ماس ئدّا أد ئشمل ؤوينّا يتيارون ݣ لشثاب ن ربّي؟ ئتخ ئمشيد أݣ لازمن أد ئجرو».
55 ݣ لوقث نّا ئنّياسنث سيدنا عيسى يي ثربيعين: «ماكن ياغن ثدّامد س سثغريين د سيوفا أد ئثامزم أم شان ؤشفّار؟ لّيخ كوياس دا غورون تغيماخ أر تعلامخ ݣ ثادّارث ن ربّي، يي ماخ ألّيݣ ؤر يي ثوميژم.
56 ماشان ئجرا ؤياد كول حما أد ئصحو ؤينّا أرون لانبييا». ݣ لوقث نّا دّون زرينث كول ئمحضار نّس.
سيدنا عيسى ݣ لجلسا ن-ئخثار ن دّين
57 والاينّي وينّا يومژن سيدنا عيسى ئوينث غر تادّارت ن قَيَافَا، نّا ئݣّان أختار ن تادّارث ن ربّي ݣ وانسا نّاݣ مجماعن لعولاما ن شّرع د ئمغارن.
58 ئد بطرس ئثفارث زݣ تّيساع غر ألّيݣ نيوض تادّارت ن قَيَافَا، داي ئكشم غر لمراح ئقّيم ئنݣر ئعسّاسن حما أد يانّاي ماݣ دّان أد ئجرو ݣ ؤومݣارو.
59 بدون ئخثارن ن دّين د ئمغار ن لمحكما كول أر تفتّاشن خف ماݣ تشهادن س زّور خف سيدنا عيسى حما أتنغين،
60 داي ؤر ؤوفين ماسن ئشاهدن، وخّا عدّان شيݣان ن شهود ن زّور، والايني غر ثينݣيرا كّرن سّين أدغيفس شاهدن س زّور.
61 نّان: «هان أرݣازا ئنّا: "نك غيخ أد هدمخ ثدّارث ن ربّي، بنوخت ݣ شراض ن-ووسّان"».
62 داي ئيبد ؤخاتار ن دّين، ئسقساث: «ئيس ؤر غورش ماس تراراث خف ئخف نّش، ماتّا ؤوياد أس داغيفش تتشهادن ميدّن-اد؟»
63 والاينّي سيدنا عيسى ئقّيما ئفسثا، داي ئنّاياس ؤخثار ن لمعلّمين ن شّرع: «داش سݣالّاخ س-ئيسم ن ربّي ئدّرن غاس ئنياخ، ئد شݣ أيد ئݣان لمسيح ممّيس ن ربّي؟».
64 داي ئجاوبث سيدنا عيسى: «ها شݣ ثنّيت. دّيخ أداون زايدخ ألثو: س-دغي غر داث ثدّام أتنّايم ممّيس ن بنادم ئقّيما خف ؤفاسي ن ربّي نّا ئقادّان يي كولشي، دّوخد خف ئسݣنو ن-ئݣنّا!»
65 داي ئفلي ؤخثار ن لمعلّمين ن دّين ئعبان نّس، ئنّياسن: «هان واد ئݣا أوال ن ربّي د والو! ؤر ئقّيمي مايد تݣّا س شهود هان كنّي تسلام ئس ئحاسب ربّي أم والو.
66 ئوا ماون ئيضهر؟» جاوبنث: «هاثين ئسثاهل لموث!»
67 داي سّوثفسناس خف ؤودم نّس زايدن وثنث س لبونيّاث د ئباريقن.
68 أر تّينين: «يلاّه ألمسيح كاشف ثنيثاخ، ماك ئيوثان!»
بطرس دا ئتّنكار سيدنا عيسى
69 ئد بطرس ئلّا ئقّيما ݣ لمراح برّا ن ثدّارث، داي ثدّود غورس يوث ن ثخدّامث ثنّاياس: «أود شݣ ثلّيث غر سيدنا عيسى أجاليلي!»
70 داي ئنشر كول داث وينّا حاضرّين، ئنّياس: «نكّين ؤر سّينخ مادا تّينيث شمّين».
71 نتّا ئفّغ غر لمراح ن برّا، ثنّايث يوث ياضن، داي ثنّاياسن يي وينّا لّانين ديس: «هان أود واد ئلّا د سيدنا عيسى أناصري!»
72 داي ئنكر ألثو، ئݣّال، ئنّياسن: «هاث ؤر سّينخ نك أرݣازا!»
73 شوي دّوند غورس وينّا بدّانين ديس، نّناس ئبطرس: «أود شݣ بلا شّك ثݣيث زّيكسن، ئدّخ ثباينث غاس ݣ واوال نّش!»
74 داي ئبدو أر ئرݣم أر ئتݣالّا ئنّياسن: «نكّ ؤر دجّين سّينخ أرݣازا»، ݣ لوقث نّا ئسكوكع ؤفولّوس.
75 داي ئشثيد بطرس أوال ن سيدنا عيسى نّا س-ئنّا: «قبل أد ئسكوكع ؤفولّوس ثدّيث أدي ثنشرث شراطّ ن لمرّاث»، داي ئفّغ غر برّا أر يالاّ س-ئمطّاون حرّانين.