27
سيدنا عيسى غر لحاكم بيلاطس
(مارقوس 15:1؛ لوقا 23:1-2؛ يوحنّا 18:28-32)
1 ألّيݣ ئفو لحال، مشوارن ئنݣراسن ئخثار ن دّين د ئمغار ن شعب خف سيدنا عيسى أتنغن.
2 داي شرفنث أوينث يي لحاكم بيلاطس أبنطي.
لموث ن يهوذا نّا ئيغضر سيدنا عيسى
(ئمازانّ 1:18-19)
3 أليݣ ينّاي يهوذا نّا ثيغضر ئس غيفس حكمن، ئندم ئرار ثلاثين ن-ؤقاريض ن نقرث يي يخثار ن تادّارث ن ربّي د-ئمغار ن شّعب.
4 داي ئنّاياسن: «هاثين دنبخ ئدّخ غضرخ يون ؤر ئدنيبن». داي نّناس: «ماخ ئدّان نكني ديك؟ راعا شݣّ مايد تݣّاث».
5 داي ئيݣر س نقرث نّاݣ ثدّارث ن ربّي، ئكّر ئدّو ياݣل ئخف نّس ئمّث.
6 داي أفن ئخثارن ن دّين نقّرث نّا نّان: «ؤر-اخ ئليق أتنسيرس ݣ صّندوق ن ثادّارث ن ربّي، ئدّخ ثݣا تّمان ن-ئدامّن».
7 داي مشوارن أد سغن س نقرث نّا ئݣر ن واشال زݣ بوئثقّي أد ئيݣ ئسمضال يي يبرّانين.
8 خف ؤياد أس دا تّينين ئيݣر ن-ئدامّن آر أسّاد.
9 ݣ لوقث نّا ئيوضن خف واوال نّاݣ نّا نّبي إرْمِيَا: «داي أمژن ثلاثين ن-وارضل ن نقرث، أد ئݣ تّمان نّس نّا خف مشوار شان ئيتس زݣ ورّاو ن-إسْرَائِيل.
10 س تّمان-اد أس سغان ئيݣر ن واشال زݣ بو ئثقّي، ئمشينّا س يي ئوصّا مولانا».
لحاكم بيلاطس داي تسال سيدنا عيسى
(مارقوس 15:2-5؛ لوقا 23:3-5؛ يوحنّا 18:33-38)
11 ألّيݣ ئبدّا سيدنا عيسى داث ن لحاكم، ئسالث ئنّياس: «ئد شݣ أݣّان أݣلّيد ن وارّاو ن-إسرائيل؟» ئجاوبث سيدنا عيسى ئنّياس: «ها شݣ ثنّيت».
12 ألّيݣ لاّن ئخاثار ن دّين د ئمغار ن شّعب دا تّهامن، ؤر ثن ئجاوب س-اود يون واوال.
13 داي ئنّاياس بيلاطس: «ئيس ؤر دا تسلاث يي كول أياد نّاس دا غيفش تشّهادن؟»
14 داي ؤر ثيجاوب سيدنا عيسى س-اود يّون وّوال، ألّيݣ ئرعب لحاكم شيݣان.
لحْشام س لموث خف سيدنا عيسى
15 ثيلي يوث ن لعادا غر لحاكم كّو لعيد ن-ؤزرّوي دا يرژّم يي يون ؤحبّاس نّا ئرا شّعب.
16 ييلي ݣ لوقث نّا غورسن يون ؤحبّاس ئتّوشنعن ئسم نّس باراباس.
17 ألّيݣ جمعن ميدّن ئسالثن بيلاطس: «ماتّا ونّا ثرام أداس رژمخ، ئد باراباس ماد سيدنا عيسى نّا مي دا قّارن لمسيح؟»
18 ئدّخ ئسّن بيلاطس ئس ثومژن غاس س لحسد نّسن.
19 ألّيݣ ئقّيما بيلاطس خف لكورسي ن لحشام، ثوزناسد ثمطّوط نّس يوث ن ثبرات ثنّياس: «خراش أتݣث شا يي ؤوݣازا، نّا ؤر ئدنيبن ئتخ تكّا غيفي ثمارا زݣ ثنيلا نس ݣ ثوارݣيت ئيضا».
20 ماشان ئخثارن ن دّين د ئسلمادن سحورشن ئربّاع ن شّعب أد تّرن أد ئرژم يي باراباس نغين سيدنا عيسى.
21 داي ئسالثن لحاكم ئنّياسن: «ماني ونّا ثرام ݣ سينا أداس رزمخ؟» داي نّناس: «باراباس!»
22 داي ئنّياسن بيلاطس: «ئوا ماي تݣّاخ س سيدنا عيسى نّا مي دا قّار لمسيح؟» داي نّاناس كول نسن: «أد ئتّوصلب!»
23 داي ئنّاياسن لحاكم: «ئيس ئݣا شان دّنب ؤر ئحلين؟» داي زايدن ݣ ئغويان أر تّينين: «أد ئتّوصلب!»
24 ألّيݣ ينّاي بيلاطس ئس ؤر ثينفيع والو، ماشان ثكّر ثيريت، داي ياسي أمان ئسّيرد ئفاسّن نّس داث ن شّعب أر ئتّيني: «هان نكّين برّاخ ئخف ئنو زݣ ئدامّن ن-ؤرݣازا! راعاث كنّي ماس تݣّام».
25 داي ئجاوبث شّعب كول نّان: «هان ئدامّن نّس غيفنخ نكني د ورّاو نّخ!»
26 داي ئرژماسن يي باراباس، ئد سيدنا عيسى سلخنث، عدبنث، أوينث أد-ئطّورّق خف ؤحنيݣ.
لعسكر دا تّامژن تيقرفيت خف سيدنا عيسى.
(مارقوس 15:16-20؛ يوحنّا 19:2-3)
27 داي أوين ئعسكرين ن لحاكم سيدنا عيسى غر لقصر ن لحكام جمعند غيفس كول ئعسكريين.
28 داي كسناس ئعبان نّس سّلسن-اس أژنّار أزݣّاغ.
29 عدل يون ن تّاج زݣ ئسنّان ݣيناسث خف ئيخف نس، د يون ؤغانيم ݣ ؤفوس نّس أفاسي، أر تسجادن داث-اس أرغيفس تكّاثن ثقبّاط أر تّينين: «سلام أياݣلّيد ن وراو ن-إسرائيل!»
30 داي كّسناس أغانيم أر ثكّاثن خف ئخف نّس أر غيفس سّوفّوسن.
31 فّير ن ماي غيفس طصّان، كّسناس أژنّار سّلسناس ئعبان نّس أوينث أت صلبن.
سيدنا عيسى خف صّليب.
(مارقوس 15:21-32؛ لوقا 23:26-43؛ يوحنّا 19:17-27)
32 ألّيݣ ثيوين ئجمع ئسن يون ؤرݣاز زݣ تمازيرت ن-ئقاراويين ئسم نّس سمعان، ئناس دّرع أد ياسي صّاليب ن سيدنا عيسى.
33 ألّيݣ نّيوضن غر يون ن-ؤدغار ئسم نّس «جُلْجُثَا» لمعنا نّس أدغار ن-ئغصانّ ؤقرّو،
34 ها ؤشناس لخل ئروين س يان ؤسفار ئسمّومن، نتّا يورمث داي ؤر ئري أتّيسو.
35 ألّيݣ أس دزان ئمصمار ݣ صّاليب ݣر ئيلان خف ئعبان نّس بضونثن.
36 داي قّيمن يرن غيفس لعسّا.
37 ݣناس أفلّا ن-ئخف نّس يوث ن ثالواحت أرون ديكس: واد أيد ئݣان أݣلّيد ن وراو ن-إسرائيل.
38 داي صلبن ئتس سين ن-ئخوّان يون خف ؤفاسي د يون خف ؤژلماض.
39 ئلين ميدّن دا زرّين أر ث تعايار أر تهزّان ئخفاون نسن.
40 أر تّينين: «أونّا ئدّان أد يهدم ثدّارث ن ربّي ئبنوت ݣ شراض ن ووسّان، مش ثݣيث ممّيس ن ربّي فوكّا ئخف نّش ثݣزد زݣ صّاليب».
41 ئلين ألثو أود ئخثارن ن دّين د لمعلّمين ن شّرع د ئمغارن داغيفس طصّان أر تّينين:
42 «ئفوكّا ميدّن ئد ئخف نّس ؤر ئغيي أتّيفوكّا! مش ئݣا أݣلّيد ن-إسرائيل أدّيݣز دغي زݣ صّاليب داي نامن ئس!
43 ياك نتّا ئعوّل خف ربّي ئدّخ دا يتّيني: نكّين ممّيس ن ربّي ئوا أد تيفوكّا دغي مش تيرا».
44 داي عايرنث أود ئخوّان نّا ئطّورقن خف ؤوحنيݣ أݣّيدس.
سيدنا عيسى دا يسّوفوغ رّوح.
(مارقوس 15:33-41؛ لوقا 23:44-49؛ يوحنّا 19:28-30)
45 داي ألّيݣ ييوض ئمشلي تقّن ثالّست خف واشال كول أر ثاسّاعت تيسّ شراط.
46 أها أتاين ن ثاسّاعت ثيس شراط ئسغوي سيدنا عيسى س يون ن-ؤغويّي ئجهدن أر ئتّيني: «إيلي، إيلي، لما شبقتاني؟» زعما: ربّي ئنو، ربّي ئنو، مّاخ ألّيݣ ئثزريت؟
47 داي ألّيݣ أس سلّين ئتس ن ميدّن زݣ وينّا بدّين دينّا، نّان: «هاثين دا يقّار يي نّبي إيليّا!»
48 يازّل يون زيكسن ياسي يون ن لبونج ئسبزيت س لخلّ ئݣيت خف يون ن-ؤغانيم ياژضاس أد ئسو.
49 ئد وييْض لّان أراس تّينين: «ستّاويل حما أد نانّاي ئد أد دّيدّو نّبي إيليّا أثيفوكّا!»
50 داي ئسغوي سيدنا عيسى ديخ ألثو س يون ن-ؤغويّي أخثار ئسّوفغ رّوح.
51 أها ئفلي زݣ وافلّا آر ئزدار ليزار ن تدّارث ن-ربّي خف سين، داي ئرݣيݣي وشال ݣين ئژرا ئبخسا.
52 رژمن ئسمضال، كّرند شيݣان ئمتين نا صلحنين.
53 داي فّغند زݣ ئصنضال كشمن غر ثمدينث نّا لقدس، ضارث ن ثنشرا ن سيدنا عيسى سنعثن ئخفاون نّسن يي شيݣان ن ميدّن.
54 ئد أخثار ن لعسكر د وينّا يومژن لعسّا خف سيدنا عيسى، ألّيݣ أنّاين أزلزل ن واشال د ماݣ جران ݣّدن شيݣان، داي نّان: «سثيت واد ممّيس ن ربّي أيد ئݣا!»
55 ئلينث شيݣان ن ثعيالين ديس داد ترعانث زݣ تّيساع، نيثنثي أݣ كّان دا تفّورنث سيدنا عيسى زݣ تمازيرت ن لجليل أر غيفس تسخّارنث.
56 ثلّا ديݣسنث مريم ثامجدليث، د مريم مّا نّس ن يعقوب د يوسي، د مانّس ن وارّاو ن زبدي.
ثانضلا ن سيدنا عيسى
(مارقوس 15:42-47؛ لوقا 23:50-56؛ يوحنّا 19:38-42)
57 ألّيݣ ثيوض ثدݣّات ئدّود يون ن-ؤورݣاز ئطرّحن زݣ ئغرم ن رّاما ئسم نس يوسف، ئكّا ئݣا أود نتّا أمحضار ن سيدنا عيسى.
58 ئدّو غر لحاكم بيلاطس ئتّراس لݣنازث ن سيدنا عيسى، داي يامر ئعسكرين أداس تشين.
59 داي يامژ يوسف لݣنازث ئتّلت ݣ لكفن ئزدّيݣن.
60 ئݣيث ݣ ثنضلث ثوجديت نّاݣ ئغزا نتّا يي ئيخف نّس ݣ يون ئفري، ئقناس لباب س يون ئسلّي أخثار، ئدّو.
61 ثلي مريم ثامجدليث د مريم ياضن قّيمانث ديس بْنِيد ن تنضلث.
62 غر أسكّا نّس ݣ واسّ ن سّبت ضارت ن واسّ ن لعيد ن-ؤزرّوي جمعن ئخاثارن ن دّين د ئفرّيسيّين غر لحاكم بيلاطس.
63 نّناس: «أسيدي، هاثين نشثيد أغضّار نّا ئنّا ألّيݣ ئسول ئدّر: دّيخ أد كّرخ فّير ن شراض ن-ووسّان.
64 وصّاتن أد ݣين أعسّاس خف ثنضلت أر أس ويس شراض، غيراش أد دّون ئمحضار نّس ݣّيض أتّاشرن ئنيناسن يي ميدّن، ئدّا ئكّر زݣ لموث، داي ثاݣر ثحلاّل ثاد ثامݣّاروت ثامزواروت».
65 داي ئنّاياسن بيلاطس: «هاث لاّن غورون ئعسّاسن، دّوياث ݣاث ئعسّاسن خف ثنضلث أم ؤينّا ثرام».
66 دّون رشمن ئسلّي ن ثنضلث سضورّاس لعسّا.