23
سيدنا عيسى داث ن ـ ؤنبّاض بيلاطوس
(ماتّى 27:11-14؛ مارقوس 15:1-5؛ يوحنّا 18:28-38)
1 داي كّرن أيث لمݣليس كول نسن، أوين سيدنا عيسى غر بيلاطوس أنبّاض ن ـ رّومان.
2 أها قّيمين أر غيفس تشثوان أر تّينين: «هاثين نوفانّ أرݣاز أد أر ئسحورّوش ميدّن نّخ أد سكّرن ثيريتّ، أراسن ئتّيني أد ؤر أكّان ضّاريبا ئي ؤݣلّيد ن ـ رّومان، أها أر ئتّيني نتّا أيد ئݣان لماسيح أݣلّيد».
3 داي يسقسا بيلاطوس سيدنا عيسى ينّاياس: «ئيد شݣّين أيد ئݣان أݣلّيد ن - ووداين؟» أها ينّاياس سيدنا عيسى: «هان شݣّ ثنّيتّ».
4 داي يبرّم بيلاطس غر ئنمغورّ ن ـ ثدّارث ن ـ ربّي د - لغاشي أها ينّاياسن: «نكّين ؤر ؤفيخ أود يان لعيب ݣ - ؤرݣاز أد!»
5 ماشان نثني ؤمژن ݣ - واوال نسن أها نّاناس: «هاثين دا يسكّار ثيريتّ ئنݣر ن ـ ميدّن س - ئسّلميدن نّس ݣ - ثمازيرث ن - أيث ياهودا كول. ئسفالّن ݣ - ثمازيرث ن - لجاليل، دغي هاثين ئدّاد غر داد».
سيدنا عيسى غر أݣلّيد هيرودوس
6 لّيݣ ئسلّا بيلاطوس ئي وينّا، ئسقساثن: «ئيد زݣ لجاليل أزݣ ئݣا ورݣاز أد؟»
7 نتّا نّاناس هاثين ئݣا زݣ لجاليل، داي يازنث غر هيرودوس ئدّخ ثلّا لجاليل لوقث نّا دّاو ن ـ ثنباط ن ـ هيرودوس، يافثيد لحال ݣ ـ ووسّان نّا يلّا ݣ - لقدس.
8 لّيݣ يانّاي هيرودوس سيدنا عيسى، ئفرح شايݣان ئدّخ ئسلّا ئي مايد أر غيفس تقّيسن ميدّن، داي يرا أث يانّاي زݣ واهوّا، أر ئتّيني أومي يݣا شان لمعجزث داثاس.
9 أها يسقساث خف شايݣان ن - ئسكين، ماشان ؤر غيفس ئروري سيدنا عيسى س - أود يان واوال.
10 كّرن ئنمغورّ ن ـ ثدّارث ن ـ ربّي د - ئسّلمادن ن - شّرع قّيمين أر غيفس تشثوان شايݣان.
11 داي يحقّر هيرودوس د - ئعسكرين نّس سيدنا عيسى قّيمين أر ديكس تعجّامن، أها يسّلساس يان ؤژنّار أسفاقّاس أمّ وين ؤݣلّيد، ئرارث غر بيلاطس.
12 يافد لحال داث ن - ؤينّا بيلاطوس د - هيرودوس كّان ݣان ئنضليبن ماشان زݣ واسّ نّا، أغولن ݣان ئمدوكّال.
سيدنا عيسى يتّوحشم غيفس س - ؤطورق
13 داي يغردّ بيلاطوس ئي ينمغورّ ن ـ ثدّارث ن ـ ربّي د - ئنبّاضن، د - ميدّن،
14 أها ينّاياسن: «ثيويمدّ غوري أرݣاز أد ئدّخ ثنّام دا يسحورّوش ميدّن أد سكّرن ثيريتّ، ماشان هاثين سقرّاخث داثاون أها ؤر ديكس ؤفيخ أود يان لعيب زݣ ؤينّاس دا غيفس تشثوام.
15 أود هيرودس ؤر ديكس يوفي شا أها يرارثيد غورنخ. هاثين ؤر ئݣي ؤرݣاز أد شا نّاخف ئواثا لموث.
16 دّيخ أث ئرّزخ أها رژمخاس».
17 a
18 ماشان أر سغويّون ميدّن كول أر تّينين: «نغيث أها ثرژمداخدّ ئي باراباس!»
19 يافدّ لحال باراباس ئتّوامژ ݣ - لحبس ئدّخ ئنغا شان يوكّ أها يامّو ݣ - ثيريتّ نّا يكّان ݣ - لقدس.
20 داي يرا بيلاطوس أد ئرژم ئي سيدنا عيسى، أها يسيول ديخ ئي ميدّن.
21 ماشان قّيمان أرسغويوّن أر تّينين: «طّورقث خف ئحنيݣن! طّورقث خف ئحنيݣن!»
22 أها ينّاياسن ثيلمرتّ ثيسّ شّراطّ: «ماخ؟ مايد ئجّرا ؤرݣاز أد؟ نكّين بعدا ؤر ديكس ؤفيخ أود يان لعيب نّاخف ئواثا لموث، دّيخ أث ئرّزخ أها رژمخاس!»
23 داي قّارن ݣ - واوال نسن أر سغويّون ؤݣار أراس تّينين أث ئطورق. أها ييرّون بيلاطوس س ـ ئغويّان نسن،
24 داي يݣاسن أينّا ران.
25 أها يرژماسندّ ئي باراباس نّا أراس تتّرن، نّا يكشمن لحبس ئدّخ ئسكّر ثيريتّ أها ينغ رّوح، داي يحشم خف سيدنا عيسى ئمشينّا ران.
سيدنا عيسى يتّواݣل خف ئحنيݣن ن - ؤطّورق
(ماتّى 27:32-44؛ مارقوس 15:21-32؛ يوحنّا 19:17-27)
26 نتّا ييويند سيدنا عيسى، أمژندّ يان ؤرݣاز ئݣان زݣ لقايراوان ئسم نّس سيمعان، ئلّا بحرا أيدّ ياغول زݣ ييݣر أها سّيسيناس ئحنيݣن ن - ؤطّورق، حما أثن ياسي أر ئتدّو ضارث ن ـ سيدنا عيسى.
27 داي يثفارث شايݣان ن - لغاشي، ئلينث شايݣان ن ـ ثوثمين أر سغيّونث، أر غيفس كّانث أݣجدور.
28 شوي يبرّم غورسنث سيدنا عيسى ينّاياسنث: «أيسّيس ن - لقدس، أد ؤر غيفي تّرومث شا، ماشان رومث خف ئخفاون نكونث د - خف واراو نكونث.
29 ئدّخ دغيكّ أدّ دونّ وووسّان نّاݣ تّينين ميدّن: "أياعريتّ ن - ثوثمين نّا ؤر دا تّارونين، ثينّا ؤر دّجين ؤرونين ؤلا سّوطّضنث".
30 لوقث نّا دّان ميدّن أد تّينين ئي لعواري: "أتّوياتدّ غيفنخ، د - ئي ثوريرين، غمسمثاخ!"
31 ئدّخ مش دا تݣّان أياد ئي وسكلو أزݣزا، ماغاس ݣين أدّاي يقّار؟».
32 أوين أود يان سين ن ـ ئقطّاطعين حما أثن طّورقن د ـ سيدنا عيسى.
33 لّيݣ نّيوضن غر أدغار نّامي دا تّينين أقلقول، طّورقنث نتّا د - سين ن - ئقطّاطعين نّا، ئلّاياس يوكّ خف ؤفاسي، ييلياس وايّاض خف ؤژلماض.
34 داي ينّا سيدنا عيسى: «سامحاسن أيبّا ئي ميدّن أد ئدّخ ؤر سّينن ماي دا تّݣّين». أها ݣرين ئعسكرين ئلان خف ئعبان نّس بضونثن.
35 بدّين ميدّن أر تّراعان، أر ديكس تعژّارن ئخاثارّ ن ـ ووداين أر تّينين: «ئفوكّا وييّاض، ئوا يينياس أد ئفوكّو ئخف نّس مش ئݣا سثيتّ لماسيح نّا يسثي ربّي!»
36 أر ديكس تعجّامن أود ئعسكرين أراس أكّان لخل أث ئسو.
37 أراس تّينين: «مشد ثݣيد أݣلّيد ن - ووداين، ئوا فوكّو ييخف نّش!»
38 ثيلي يوث ن ـ ثالّواحتّ ثتّواݣل خف ؤحنيݣ نّيݣاس ئتّياري ديكس: «واد أيد ئݣان أݣلّيد ن - ووداين!»
39 أرت ئتّعايار يوك زݣ ئقطّاطعين نّا يتّوطورقن ثاما نّس، أراس ئتّيني: «ئيس ؤر ئيد شݣّين أيد ئݣان لماسيح؟ ئوا فوكّا ييخف نّش ثفوكّوداخ!»
40 أها ييژي غيفس وايّاض ئنّاياس: «ئيس ؤر دا توݣّدّ ربّي د ـ شݣّ دا تّمثادّ أمّ نتّا؟
41 مشد نوكّني هاثين نواثا لموث خف ؤينّا يخّان نّا نݣا، ئيد أرݣاز أد هاثين ؤر ئݣي شا نّا ؤر ئحلين».
42 داي ينّاياس ئي سيدنا عيسى: «أسيدنا عيسى، شثيي أدّاي تّثدود أتّنبض ݣ ـ ثݣلديتّ نّش».
43 أها ينّاياس سيدنا عيسى: «سثيتّ أداش ئنيخ: هاثين ثدّيد أتّيليد أݣّيدي أسّا ݣ - دجّنث!»
لموث ن - سيدنا عيسى
(ماتّى 27:45-46؛ مارقوس 15:33-41؛ يوحنّا 19:28-30)
44 لّيݣ ثيوض لثناعشّ ن ـ واسّ، ثقّن ثالّسث خف ثمازيرث كول ألّيݣ ثيوض تّلاثا ن ـ ثدݣّاتّ.
45 داي ثسّولّس ثافوشث، شوي يفلي وسݣلف نّا يلّان ݣ ـ ثدّارث ن - ربّي زݣ وامّاس.
46 داي يسغويّ سيدنا عيسى ينّا: «أيبّا، دا تݣّخ رّوح ئنو ينݣر ن - ئفاسّن نّش!» ئنّا أياد، أها يسّوفغ ئمان.
47 نتّا يانّاي ؤخاثار ن - لعسكر ن ـ رّومان مايد ئجران، ئمجّد ربّي أها ينّا: «سثيتّ ئمنا ورݣاز أد».
48 أود ميدّن نّا ددّانين أد فرّجن ݣ ـ ؤياد، لّيݣ أنّاين مايد ئجران، أغولن ئبردان نسن ئطيّراسن، أر كّاثن ئدمارّ نسن.
49 ئيد ئسمونّ ن - سيدنا عيسى، د - ثوثمين نّا ثيد ئثفارن زݣ ثمازيرث ن - لجاليل، بدّاننّ ݣ - تّيساع أر تفرّاجن ݣ ـ مايد أر ئتّجرون.
ثانضلا ن - سيدنا عيسى
(ماتّى 27:57-61؛ مارقوس 15:42-47؛ يوحنّا 19:38-42)
50 ييلي ݣ ـ لمݣليس ن ـ ووداين يان ؤرݣاز ئژيلن ئمنان، ئسم نّس يوسف.
51 ئݣا زݣ ثمدينث ن ـ رّاما ݣ ـ ثمازيرث ن ـ أيث ياهودا. ؤر ئمساسا د - راي ن - أيث لمݣليس د ـ ؤينّا ݣّان، يافثيد لحال أود نتّا أر ئتّعايان ثاݣلديتّ ن - ربّي أدّ ثدّو.
52 ئكّر ئدّو غر بيلاطس، ئتّراس لݣنازث ن - سيدنا عيسى.
53 داي يدّو يسضرتّيد زݣ وافلّا ن ـ ئحنيݣن ن ـ ؤطّورق أها يتّلتّ ݣ - لكفن، ياسيتّ ئسيرسث ݣ - يوث ن - ثمضلث ئتّوغزان ݣ - ؤقشمير، ؤر دجّين ديكس ئتّومضيل أود يون.
54 ئيݣ لحال ثادݣّاتّ وارضاراس ن ـ دّجمعا، ثدّجاور سّبث أتّكشم.