19
لحوكم خف سيدنا عيسى س لموت خف صّاليب
1 داي فّير ن-ؤينّا، ئكّر بيلاطس يامر ئ ئعسكرين أد-اوين سيدنا عيسى أها ئرزنت س ؤمشحاض.
2 كرن ئعسكريين ژضن يون ن تّاج زݣ ئسنّان ݣينت خف ؤقرّو نّس، سّلسيناس يون ن-ؤژنّار أزݣّاغ، a
3 داي أر غورس تحادزان، أراس تّينين: «سّلام غيفش أياݣلّيد ن ووداين!» أها أر تكّاتن س-ئباريقن.
4 أها ئفّغ ديخ ألتو بيلاطس غر برّا داي ئنّا ئ ميدّن: «ها دّيخ أداون ت سّوفغخ حما أت تيسينم ئس نكّين ؤر ديكس ؤفيخ أود يان لعيب حما أد غيفس حكمخ».
5 داي ئفّغدّ سيدنا عيسى غر برّا ئݣا تّاج ن-ئسنّان خف ؤقرّو ئلس أژنّار أزݣّاغ. أها ئنّاياسن بيلاطس: «هان أرݣاز!»b
6 ماشان لّيݣ أنّاينت ئخاتارن ن تادّارت ن ربّي د-ئعسّاسن، داي كّرن أر سغويّون: «أد ئتّوصلب! أد ئتّوصلب!» ئنّاياسن بيلاطس: «أويات كونّي تصلبمت خف ئحنيݣن، ئدّخ نكّين ؤر ديكس ؤفيخ أود يان لعيب حما أد غيفس حكمخ».
7 داي نّاناس ئخاتارن ن ووداين: «نكني، غورنخ شّرع، د شّرع نّخ دا ئتّيني ئلازم أد ئمّت، ئدّخ ئݣا ئخف نّس د ممّيس ن ربّي».
8 نتّا ئسلّا بيلاطس ئ واوال-اد ئݣّد ديخ ؤݣار.
9 أها ئكشم ديخ ألتو غر لقصر نّس داي ئسقسا سيدنا عيسى، ئنّاياس: «مازݣ تݣيد؟» ئد سيدنا عيسى ؤر غيفس ئرار أوال.
10 داي ئنّاياس بيلاطس: «ئس ؤر تريد أد ئ تسيولد؟ ئس ؤر تسّينت ئس تلّا غوري تنباطّ أد-اك رژمخ نغد أك صلبخ؟»
11 ئنّاياس سيدنا عيسى: «ؤر تدّي أد غورك تلّي أود يوت ن تنباطّ غيفي، مش ؤر-اك ت ئوشي ربّي، خف ؤياد ونّا ئ دّييوين غورك ئݣا دّنب أخاتار ؤݣار نّش».
12 زݣ لوقت نّا، أر يورزّو بيلاطس أد ئرژم ئ سيدنا عيسى. ماشان ؤداين أر سغويّون: «هاتين مش ترژمت ئ ورݣاز-اد ؤر تݣيد أمدّاكل ن ؤݣلّيد قيصر، ئدّخ كول ونّا ئݣان ئخف نّس د أݣلّيد ئݣا أنضليب ن قيصر».
13 نتّا ئسلّا بيلاطس ئ واوال-اد ئسّوفغ سيدنا عيسى، أها ئقّيم خف لكورسي ن لحكام ݣ-ؤدغار نّا مي تّينين: «أدغار ن-ئژرا»، أها أر تّينين ووداين س واوال نّسن ئ ودغار-اد: «جبّاتا».
14 ئݣ واسّ نّا أسّ نّا ݣ-أر تّحبّالن ئ لعيد ن-ؤزرّوي،c أتّاين ن وامّاس ن واسّ، ئنّاياسن ئ ووداين: «هان أݣلّيد نّون».
15 ماشان كّرن أر سغويّون: «أويت! أويت! صلبت!» داي ئسقساتن بيلاطس: «ئس ئخصّا أد صلبخ أݣلّيد نّون؟» ناناس ئخاتارن ن تادّارت ن ربّي: «أود يون ؤر ئݣي أݣلّيد نّخ غاس أݣلّيد قيصر».
16 ئكّر بيلاطس ئوشيت ئ ئعسكريين حما أت تصلبن. داي أوينت.
سيدنا عيسى خف ئحناݣ ن صّاليب
(ماتّى 27:32-44؛ مارقوس 15:21-32؛ لوقا 23:26-43)
17 سيدنا عيس ئفّغ زݣ تمدينت، يوسي نتّا س-ئخف نّس صّاليب نّس أها ئدّو غر أدغار نّا مي تّينين: «أدغار ن - ؤقلقول»،d أر-اس تّينين ووداين س واوال نّسن: «جلجثا».
18 هاتين داد أيد ت-ؤݣلن ئعسكريين خف ئحناݣ ن صّاليب د سين ياضن، يون خف ؤفاسي د وايّاض خف ؤژلماض، د سيدنا عيسى ݣ وامّاس نّسن.
19 أها ياري بيلاطس خف يوت ن تالّواحت نّا يوݣل خف صّاليب: «عيسى ؤنّاصيرا أݣلّيد ن ووداين».
20 داي قران شايݣان ن ووداين تيرّاياد، ئدّخ أدغار نّاݣ ئتّوصلب سيدنا عيسى ئلّا تاما ن تمدينت، أها ئتّواري س واوال ن ووداين د أيت ن رّومان د أيت ليونان.
21 داي نّان ئخاتارن ن تادّارت ن ربّي ئ بيلاطس: «أد ؤر تّاري: "أݣلّيد ن ووداين"، ماشان أري: "أرݣاز-اد ئنّا: نكّ، أݣلّيد ن ووداين أيد ݣيخ!"»
22 أها ئنّاياسن بيلاطس: «أينّا ؤريخ، ؤريخت».
23 كّرن ئعسكريين لّيݣ صلّبن سيدنا عيسى، أمژن ئعبان نّس بضونتن خف ربعا د-ئلان، داي كو أعسكري ييوي أمور نّس، أوين أود تيكبرت نّا ئݣان غاس يون ؤشضاض ؤر تݣني، تژضا زݣ وافلّا أل ئزدار.
24 داي ميونّان ئنݣراتسن: «أد ؤر تنفلّي، ماشان أد غيفس نݣر ئلان مايد ت يتّاوين»، ئمشيد ئجرا ؤينّا ئتّوارين ݣ لشتاب ن ربّي: «بضان ئعبان ئنو ئنݣراتسن د تكبرت ئنو ݣران غيفس ئلان»، e أياد أيد ݣان نّيت ئعسكريين.
25 تاما ن صّاليب ن سيدنا عيسى، تبدّ مايس، خالتيس د مريم، تامطّوط ن كلوبا د مريم تامجداليت.
26 نتّا يانّاي سيدنا عيسى مايس د-ؤمحضر نّا غورس ئعزّين ئبدّ تاما نّس، أها ئنّا ئ مايس: «أيمّا، هان ممّيم».
27 داي ئنّا ألّو ئ ؤمحضر: «هان مايك»، أها ياويت ؤمحضر غورس زݣ لوقت نّا.
لموت ن سيدنا عيسى
(ماتّى 27:45-56؛ مارقوس 15:33-41؛ لوقا 23:44-49)
28 ضارت ن-ؤياد، ئسّن سيدنا عيسى ئس ئكمّل كولشي (زݣ ؤينّا س ئنّا ربّي أد ئݣ)، ئنّا: «ئنغايي ئريفي» حما أد-ئجرو ؤينّا ئتّوارين ݣ لشتاب ن ربّي. f
29 أها تيلي دينّا يوت ن تلوليت تعمّر س وامان ن واضيل نّا ئشّورن د لخلّ، داي بّژن يون ؤشرويض ݣ وامان-اد، ݣينت خف يون ؤمعراض أها أژضناست س-اقمو نّس.
30 لّيݣ ئقّاس سيدنا عيسى أمان ن واضيل، ئنّا: «هاتين ئكمّل»، داي ئسّيلو ئ وقرّو أها ئسّوفغ رّوح.
31 ئݣا لحال أسّ نّاݣ ـ أر تحبّالن ووداين ئ لعيد أمقران. كرن ئخاتارن ن ووداين تّرن ئ لعامل بيلاطس أد رژين ئضارن ن وينّا ئتّوصلبن أها سضرن لݣنازات نّسن حما ؤر تن ئتّافا واسّ ن سّبت خف ئد صّاليب، ئدّخ ئمقّور واسّ نّا ن سّبت شيݣان.
32 داي دّوندّ ئعسكريين رژين ئضارن ن-ئرݣزن سّين نّا ئتّوصلبن د سيدنا عيسى.
33 نتّا تامّان غر سيدنا عيسى ؤفانتين ئمّوت ياد أياد أخف ؤر-اس رژين ئضارن.
34 ماشان يون ؤعسكري ئسنوفّݣت زݣ تسݣا نّس س يون ن-ؤحريش ن-ووزّال، ݣ وانسا فّغندّ زيكس ئدامّن د وامان.
35 دا ئتشاهاد ونّا يانّاين ئسكّين-اد، تيݣ شّهاتّ نّس ستيتّ، د نتّا ئسّن ئس دا ئتّيني لحقّ، حما أت تامنم أود كونّي.
36 ئجرا ؤياد، حما أد ييلي ؤينّا ئلّان ݣ لشتاب ن ربّي: «أها ؤر دّين أد-اس رژين أود يون ئغصّ».
37 أها أر ئتّيني لشتاب ن ربّي ديخ ألتو: «دّان أت تّراعان ݣ-ونّا سنوفّين».
تانضلا ن سيدنا عيسى
(ماتّى 27:57-61؛ مارقوس 15:42-47؛ لوقا 23:50-56)
38 داي فّير ن-ؤياد، ئكر يوسف أريماتي، ئݣ يون زݣ ئمحضرن ن سيدنا عيسى س-ؤنتل، ئدّخ أر ئتّݣّد زݣ ئخاتارن ن ووداين، ئتّر ئ بيلاطس أت تيادج أد ياسي لݣنازت ن سيدنا عيسى. أها يودجات. داي ئدّو يوسف ياسي لݣنازت ن سيدنا عيسى.
39 داي ئدّودّ أود نيقوديموس، أرݣاز نّا دّيدّان يوت لمرت غر سيدنا عيسى ݣّيض، ياويدّ أم تلاتين كيلو ن لحنوض g نّا تݣّين ميدّن ئ ومتّين.
40 أها أسين سّين نّسن لݣنازت ن سيدنا عيسى، ݣين-أس لحنوض أها تّلنت ݣ لكتّان أم ؤينّا تݣّين ووداين ئ ومتّين.
41 داي ييلي ݣ ؤدغار نّاݣ ئتّوصلب سيدنا عيسى يون ؤرتي، تيلي يوت ن تنضلتh توجديت ݣ ؤرتي ؤر دجّين ديكس ئتّونضل أود يون.
42 أها سرسين ديكس لݣنازت ن سيدنا عيسى ئدّخ ئݣا لحال أسّ نّاݣ ـ أر تحبّالن ووداين ئ لعيد أمقران أها تيلي تنضلت تاما ن-ؤدغار نّاݣ ئتّوصلب سيدنا عيسى.