20
تانكرا ن سيدنا عيسى زݣ ئنݣر ن-ئمتّين
(ماتّى 28:1-10؛ مارقوس 16:1-8؛ لوقا 24:1-12)
1 داي ݣ واسّ ن لحدّ، تدّود مريم تامجدليت زيكّ غر تنضلت نّا ئݣان أم ئفري، تسول تالّست أها تانّاي أژرو نّا س قّن تانضلت ئكّنورّي.
2 تدّو س طّرحت غر سمعان بطرس د-ؤمحضر ياضن نّا أر ئتّيري سيدنا عيسى، تنّاياسن: «هاتين ؤسين لݣنازت ن مولانا زݣ تنضلت، ؤر نسّين مانيدا ت ݣان».
3 داي ئفّغ بطرس د-ؤمحضر ياضن أها دّون غر تنضلت.
4 دّون سّين نسن س تازّلا، والاينّي ئزوير ؤمحضر ياضن سمعان، ياوضن د-امزوارو غر تنضلت.
5 ئسّيݣّ يانّاي لكتّان نّا ئلّان داد، ماشان ؤر ئكشيم.
6 داي ئدّودّ فّيراس سمعان بطرس، ئكشم غر تنضلت يانّاي أود نتّا لكتّان نّا ئلّان داد.
7 د-ؤشرويض نّا ئلّان خف ئخف ن سيدنا عيسى، ؤر ئلّي د لكتّان، ماشان ياضي ݣ يون ن-ودغار ئويل نّس.
8 أها ئكّر ئكشم أود ؤمحضر ياضن نّا دّيدّان د-امزوارو غر تنضلت، يانّاي أياد كول أها يامن،
9 ئدّخ، أل واسا ئمحضرن سولن ؤر فرين أينّا ئتّيني لشتاب ن ربّي ئس ئلازم ئ سيدنا عيسى أد ئكّر زݣ ئنݣر ن-ئمتّين.
10 داي فّير ن-وياد، أغولن ئمحضرن سّين غر أدغار نّاݣ زدغن.
عيسى دا ئسنعات ئخف نّس ئ مريم تامجدليت
(ماتّى 28:9-10؛ مارقوس 16:9-11)
11 ئد مريم تامجدليت تقّيم برّا ن تنضلت أر تّرو. لّيݣ أر تّرو، تسّيݣّ غر جاج ن تنضلت.
12 داي تانّاي سين ن لمالايكا س-ئعبان ئملّال ݣ-ودغار نّاݣ توسرس لݣنازت ن سيدنا عيسى، قّيمن يون ݣ وانسا ن-ئخف د وايّاض ݣ وانسا ن-ئضارن.
13 نّاناس: «أثامطّوطّ، ماخ ألّيݣ دا تّروت؟» داي تنّاياسن: «هاتين ؤسين سيدي أها ؤر سّينخ ماني دا ت سرسين!»
14 داي لّيݣ تنّا أياد، تبرّم غر ضارت، تانّاي سيدنا عيسى ئبدّ داد، ماشان ؤر تسّين ئد نتّا أينّا.
15 أها ئنّاياس سيدنا عيسى: «أثامطّوطّ، مّاخ ألّيݣ دا تّروت؟ ماي تورزّود؟» تغال ئد باب ن وورتي، أها تنّاياس: «أسيدي، مشد شݣّ أيد تيوسين غاس ئنييي مانيدا ت تݣيد، أها دّيخ نكّ أت تاسيخ».
16 داي ئغراياس سيدنا عيسى: «أمريم!» داي تبرّم غورس أها تنّاياس س تعبرانيت: «ربّوني!» لمعنا ن واوال-اد: ألموعلّيم.
17 أها ئنّاياس سيدنا عيسى: «باراكا، أد ؤر ئ تّامژ، ئدّخ سولخ ألتو ؤر ؤليخ غر بّا ئنو، ماشان دّو غر أيتما ئنياسن: "هان نكّ دّيخ أد دّوخ غر بّانو نّا ئݣان ألّو بّاتون نتّا س-ئخف نّس أيد ئݣان ربّي نو أها ئݣ ربّي نّون ألّو"».
18 داي تدّو مريم تامجداليت تنّا ئ ئمحضرن: «أنّايخ مولانا!» أها تقّيساسن كول أينّاس ئنّا.
سيدنا عيسى دا ئسنعات ئخف نّس ئ ئمحضرن
(ماتّى 28:16-20؛ مارقوس 16:14-18؛ لوقا 24:36-49)
19 نتّا تيوض تادݣّات ن واسّ نّا ن لحدّ، مݣراون ئمحضرن ݣ يوت ن تادّارت أها رݣلن تيفلوين مسقّم، ئدّخ ݣّدن زݣ ئخاتارن ن ووداين. شوي ئضهرد سيدنا عيسى ݣ أمّاس نّسن أها ئنّاياسن: «سّلام ن ربّي غيفون».
20 فّير مايد ئنّا أياد، ئنعتاسن ئفاسّن نّس د-ئديس نّس. داي فرحن ئمحضرن شايݣان لّيݣ أنّاين مولانا.
21 أها ئنّاياسن سيدنا عيسى ديخ ألتو: «سّلام ن ربّي غيفون! هاتين أكيس ئ دّيوزن بّانو، أود نكّ، دا كون تّازنخ».
22 نتّا ئنّا أياد، ئصوض غيفسن أها ئنّا: «رحبات س رّوح ن ربّي.
23 ميدّن نّا مي تغفرم دّنوب نّسن ئدّا ربّي أداسن ئغفر، ئد ميدّن نّا مي ؤر تغفيرم دّنوب نّسن ئدّا ربّي ؤر-اسن ئتّغفار».
24 ماشان توما نّا ئݣان يون زݣ ئمحضرن س تناعش، نّا مي تّينين ئشني، ؤر ئلّي أݣّيدسن لّيݣ ئضهر سيدنا عيسى.
25 داي نّاناس ئمحضرن ياضن: «هاتين نانّاي مولانا!» والاينّي توما ئنّاياسن: «هاتين ؤر دّيخ أد-امنخ أبدا ئس ديكّر زݣ ئنݣر ن ئمتّين مش ؤر أنّايخ ليمارات ن-ئمسميرن ݣ-ئفاسّن نّس، ݣخ أضاض ئنو ݣ-ئدغارن ن-ئمسميرن أها ݣخ أفوس ئنو ݣ تسݣا نّس».
26 داي ضارت ن تمانييا ووسّان، مݣراون ئمحضرن ديخ ألتو ݣ تادّارت ييلي أݣّيدسن توما. تواقّنت تفلوين مليح. ئضهرد سيدنا عيسى ݣ أمّاس ن-ئمحضرن أها ئنّاياسن: «سّلام ن ربّي غيفون».
27 ئنّاياس ئ توما: «ݣّ أضاض نّش داد أها تانّايد ئفاسّن ئنو، أژض أفوس نّش أها تݣت ݣ-ئديس ئنو. أد ؤر تشكّا شا، ماشان ئخصّاش أت تامند!»
28 ئواجبت توما: «مولانا د ربّي نو!»
29 داي ئنّاياس سيدنا عيسى: «تومنت ئدّخ ئ تانّايد أتوما! ماشان أياعري نّسن ئ وينّا يومن أها ؤر أنّاين».
مّاخ ألّيݣ يورو يوحنّا لشتاب-اد؟