24
ثانكرا ن - سيدنا عيسى زݣ لموث
(ماتّى 28:1-10؛ مارقوس 16:1-8؛ يوحنّا 20:1-10)
1 ماشان ثيفاوث ن - لحدّ زيكّ، دّانث ثوثمين غر ثمضلث، أوينث لاحنوض نّامي حبّلنث.
2 أفينثنّ أقشمير نّاس ئتييقّن ؤقمو ن ـ ثمضلث ئتوسكّنورّي.
3 داي كشمنث غر ثمضلث، ماشان ؤر نّوفينث لݣنازث ن - سيدنا عيسى.
4 قّيمينث هبضنث، أر تخمّامنث ݣ - ؤينّا، شوي بدّيند غيفسنث سين ئيد لمالاك س - مرسيواث ثيسفّاقّاسين.
5 داي ݣّدنث، سحودرنث ئقرّا نسنث س - أشال. داي نّاناسنث: «مّاخ ألّيݣ دا ثورزّومث ؤنّا يدّرن ئنݣر ن - ئمتّين؟
6 هاثين ؤر ئلّي داد، ئدّا يكّر زݣ لموث! شثيمث مايدا كونث ئنّا لّيݣ ئلّا ݣ - لجاليل،
7 ئنّاياكونث: "ئدّا ممّيس ن - بنادم أد ئتّوغدر، ئتوزّنز ئي وينّا عصانين ربّي، ئتّوطّورق أها يكّرد زݣ لموث ݣ - واسّ ويسّ شراض"».
8 داي شثينثدّ أوال ن ـ سيدنا عيسى.
9 كّرنث أزّلينث قّيسنث ئي يمازانّ س - حضاعش د - ئي وييّاض ضنين كول أينّا يجران.
10 ثلّا ديكسنث مريم ثامجداليث، د - يوانّا، د - مريم مايس ن - يعقوب، د - ثوثمين ضنين نّا مونّين أݣيدسنث غر ثمضلث.
11 ماشان غالن ئمازانّ ئيد غاس أر سݣّژضيفنث داي ؤر ثنث ؤمينن.
12 ماشان ئكّر بطرس يازّل غر ثمضلث، ئحودر ئسّيݣ أها يانّاي لكفن يورا، داي ياغول ئبردان نّس ئرعب ݣ - ؤينّا يجران.
ݣ - ؤبريد ن - عيمواس
(مارقوس 16:12-13)
13 داي يافدّ لحال أسّ نّا سينّ ن ـ ئمحضرّ دّان غر يان ؤسون داس تّينين عيمواس، ئبعدن خف لقدس س - أم حضاعش ن - كيلوميتر.
14 قيمين أر تمقّيسن ݣ ـ ؤبريد خف ؤينّا يجران كول.
15 لّان أر تمساوالن أر تمداشارن أليݣ غيفسن ديبدّا سيدنا عيسى س - ئخف نّس، أر ئتدّو أݣيدسن.
16 ماشان ؤرث ؤكيزن أمّي أسن تّييقّننث واللّن.
17 داي يسقساثن، ئنّاياسن: «ماكون ياغن، كّود تدّوّم تمساوالم؟» أها بدّين، ئضهر غيفسن ؤطيّر.
18 داي ينّاياس يون ديكسن، ئسم نّس كليوباس: «غاس شݣّين عينخ ݣ - لقدس أيد ؤر ئسّينن مايد ديكس ئجران ݣ - ووسّان أد!»
19 داي ينّاياسن: «مّاخ مايد ئجران؟» أها نّاناس: «أينّاس ئجران ئي سيدنا عيسى ؤنّاصيرا. ئݣان يان نّبي يݣان لموعجزاث ثيخاثارين، ئيݣ أسّلماد أخاثار ئمقّورن غر ربّي د ـ ميدّن.
20 ماشان ؤمژنث ئنمغورّ ن ـ ثدّارث ن ـ ربّي، د - ئنبّاضن نّخ أها وشينث ئي يرومانين أد غيفس حشمن س ـ لموث أها طّورقنث.
21 نوكني أر نتّيني أوميد نتّا أغا يفوكّان ثاروا ن ـ إسرائيل، ئميل شّراض ن - ووسّان أياد س ـ ئجرا وياد.
22 سحيّرنثاخ ألثو ييتّسث ن - ثوثمين زݣ ؤݣراو نّخ، ئدّخ دّانث غر ثمضلث أسّا زيكّ
23 أغولنثد أر تّينينث هاثين ؤر نّوفينث لݣنازث نّس، أها فّغندّ غيرسن سينّ ن - ئيث لمالاك، نّاناسنث هاثين ئلّا سيدنا عيسى يدّر.
24 أها دّون ييتّس ن - ئسمونّ نّخ غر ثمضلث، أفيننّ غاس أم ؤينّاسن نّانث ثوثمين، ئيد نتّا ؤر ثانّاين».
25 داي ينّاياسن سيدنا عيسى: «أييحياض، هاثين ژّايناون وانّليثن أها ؤر ثومينم س ـ ؤينّا نّان لانبيا كول ݣ ـ لشثاب ن ـ ربّي!
26 ئيس ؤر كاشيفن لانبيا ئيس ئدّا لماسيح أد غيفس ئيكّ ؤياد كول قبل أد ئدّو غر لعزّ نّس؟»
27 داي يقّيم أراسن ئتقّيس ماي غيفس نّان لانبيا كول، ئسفالّاسن زݣ سيدنا موسى ألّيݣ أسن ئسنعث أينّا غيفس ئنّا لشثاب ن ـ ربّي كول.
28 نتّا دّجاورننّ غر أسون نّا غر دّان، داي ئيݣ سيدنا عيسى أمّاني ئثامّا غر شان وانسا نّا يبعدن.
29 أها شبّرن ديكس نّاناس: «قّيم غورخ ئضا ئدّخ ئدّا لحال أها ثدّجاور ثالّسث أتقّن». داي يكشم أد ئقّيم غيرسن.
30 نتّا قّيمان غر لميدا أد تشّين، ياسي سيدنا عيسى أغروم ئتّر ئي ربّي أديكس ئيݣ لبركا، ئبّيث ئوشاسن.
31 أغولن والّن نسن رزمنث أها أكزنث، شوي ينثل زّيكسن.
32 أها ينّاياس يون ديكسن ئي وايّاض: «ئيس ؤر أر ركّمن وولاون نّخ لّيݣ أراخ ئساوال ݣ - ؤبريد، أراخ ئسنعاث مايد ئنّا لشثاب ن ـ ربّي؟»
33 داي كّرن ݣ ـ وانسا أغولن غر لقدس، أفينن ئمحضرّ س - حضاعش د ـ ئمسثفرّ ضنين ن ـ سيدنا عيسى لّان مݣراون.
34 أر تّينين: «هاثين سثيتّ ئكّر مولانا زݣ لموث، أها يفّغد غر سيمعان!»
35 داي قّيسناسن أود نثني أينّا يجران ݣ - ؤبريد لّيݣ غيرسن ديفّغ سيدنا عيسى أها ؤرث ؤكيزن ألّيݣ ئبّي ياغروم.
سيدنا عيسى ئفّغد غر ئمحضرّ
(ماتّى 28:16-20؛ مارقوس 16:14-18؛ يوحنّا 20:19-23؛ ئمازانّ 1:6-8)
36 نتّا أر تّقّيسن أياد، ئبدّد سيدنا عيسى س - ئخف نّس ݣ - وامّاس نسن أها ينّاياسن: «أزول غيفون!»
37 داي خلعن، غالن س ـ ؤهباض ئيد لخيالث نّس أيد أنّاين.
38 داي ينّاياسن: «ماي كون ياغن ألّيݣ تشوّشم؟ مّاخ ألّيݣ ئكشم شّكّ ؤلاون نّون؟
39 راعيواث ئفاسّن ئنو د - ئضارّ ئنو، هاثين نكّين س ـ ئخف ئنو أياد، أژضاث غوري، ثنژوم ديݣي، هان لخايالث ؤر دا غورس ئتّيلّي وكسوم، ؤلا ييغصان أم ؤينّا دا تّانّايم».
40 ئنّا أياد أها يسنعثاسن ئفاسّن نّس د - ئضارن نّس.
41 سولن ألثو ؤر ؤمينن أينّا أنّاين ئدّخ فرحن أها هبضن، داي ينّاياسن: «ئيس غورون ئلّا داد مايد ئتّواتّان؟»
42 أها ؤشيناس يوث ن ـ لقرطّ ن ـ ؤسلم نّا يشنفن،
43 داي يامژتّ ئتشّيتّ داثاسن.
44 أها ينّاياسن: «هاثين أياد أخف أون سيولخ لّيݣ لّيخ أݣّيدون، ئيس نّيقّن أد ئجرو وينّا غيفي يتّوارين كول ݣ - شّرع ن - سيدنا موسى، د - ݣ لشثوب ن ـ لانبيا، د - ژّابور».
45 داي يرزماسن أنّليثن حما أد فرون أينّا يتّيارين ݣ ـ لشثاب ن ـ ربّي.
46 أها ينّاياسن: «هاثين أياد أيد ئنّا لشثاب ن ـ ربّي، ئيس نّيقن لماسيح أد ئتومرّث، أها يكّرد زݣ لموث ݣ - واسّ ويسّ شّراض.
47 أها يتّوبرّح س ـ ثنباط نّس ئي لݣنوس كول أد ثوبن حما أداسن تّوغفرنث لمعصياث نسن، ئتّوسفال ؤياد زݣ ثمدينث ن - لقدس.
48 هان كونّي ثݣام ئنيݣان خف ؤينّا يجران كول.
49 هاثين دّيخ أداون دّازنخ أينّاون ئقّاول ئبّا، قّيماث ݣ - لقدس أرد غيفون دّيرس لجهد زݣ ييݣنّا».
أساي ن - عيسى غر ئݣنّا
(مارقوس 16:19-20؛ ئمازانّ 1:9-11)