28
ثانشرا ن سيدنا عيسى زݣ لموث.
(مارقوس 16:1-8؛ لوقا 24:1-12؛ يوحنّا 20:1-10)
1 ألّيݣ ئزري واسّ ن سّبث ئفو واسّ ن لحد، ثدّو مَرْيَم ثامجدليث د مَرْيَم ياضن ݣ ثيفاوث زيك أد راعانث ثينضلث.
2 ݣ لوقث نّا ئزلزل وشال شيݣان ئدّخ ئݣزد يون ن لملاك ن مولانا زݣ ئݣنّا ئكّس ئسلّي زݣ لباب ن ثنضلث ئقّيم غيفس.
3 ئݣا ݣ سّيفث نّس أم ؤسم ݣين ئعبان نّس ئملاّلن أم ؤثفل.
4 داي ݣّدن زيݣس ئعسّاسن أر ترݣيݣين زّيكس ݣين أمّ ئمتّين.
5 داي ئسيول لملاك يي ثعيالين سناث ئنّاياسنث: "أد ؤر تّݣداث شا، هاثين سّنخ ئس دا تفتّاشمث خف سيدنا عِيسَى ئطّورقن خف ؤحنيݣ.
6 هاث ؤر ئقّيمي ديتخ، هاتين ئنشر زݣ لموث ئمشينّا ئنّا. أدّوياد أتراعامث ثيمضلث نّاݣ ئكّا ئينضل.
7 دّومث فيساع ئنيمث يي ئمحضار نّس: هاثين ئكّر زݣ لموث، ئدّا أكن ئزوُور غر تمازيرت ن لجليل، ديس أݣ ثدّام أتّانّايم، هان نك نّيغاونث".
8 داي فغنث فيساع سّناث نسنث زݣ ئفري نّاݣ ثلاّ ثنضلث ئلينث ݣدنث والاينّي فرحنث شيݣان، دّونث أسينث ثارولات أد علمنث يي ئمحضار نّس.
9 دينّا نّيت ئحاضّراسنت سيدنا عيسى ئنّياسنث: «سلام غيفونث». دّوند غورس أمزنثاس ݣي ئضار نّس سجدنثاس.
10 داي ئنّياسنث سيدنا عيسى: «أد ؤر تّݣّدُمْث شا! دّومث ثينيمث يي أيثما أد دّون غر تمازيرت ن لجليل، حما أد يي يانّاين ديس».
11 ألّيݣ دّانث، دّان أود ئعسّاسن غر ثمدينث خبّرن ئخثارن ن دّين س-ؤينّا ئجران.
12 داي جمعن ئخثار ن دّين، مشوارن ݣاراتسن ؤوشناسن يي يعسّاسن نّا شيݣان ن نّقّرت،
13 نّناسن، تّينياث: "دّاند ئمحضار نّسن ݣّيض، أفناخ نݣنا، أشرنث.
14 ئد مش ييوض واوال غر لحاكم، ندّا نكني أتن حاول حما ؤر كن ئتّاوض شا ؤر ئحلين".
15 داي أمژن ئعسّاسن نقّرث ݣْنْ أينّاسن نّان، داي ئزلّع واوال-اد ئنݣر وارّاو ن-إسرائيل أر أسّاد.
سيدنا عيسى ئمجماع د ئمحضار نّس
(مارقوس 16:14-18؛ لوقا 24:36-49؛ يوحنّا 20:19-23؛ ئمازانّ 1:6-8)
16 ئد ئمحضار س حداعش دّان غر تمازيرت ن لجليل غر عاري نّا سن ئنّا سيدنا عيسى.
17 ألّيݣ ثانّاين سجدناس، ماشان ئتّس ديكسن شكّان.
18 داي ئدّود غورسن سيدنا عيسى ئسيولاسن ئنّاياسن: «هاثين تّونشفايي ثنباط خف ئݣنّا د واشال.
19 دّوياث غر لݣنوس ن دّونيت كول ثعلمّاسن أد ݣين ئمحضار، ثعمدمثن ݣ وامان س-ئيسم ن-ئبّا د-ؤربا د رّوح لقدس.
20 ثعلمثن أد ݣين أينّا خف كن وصّاخ كول، هان نكّ دّيخ أد ئليخ أݣّيدون ؤوسّان كول أر ثينݣيرا ن دّونيت".