21
سيدنا عيسى دا ئسنعات ئخف نّس ئ سبعا زݣ ئمحضرن نّس
1 داي ضارت ن-ؤياد، ئسنعت ديخ ألتو سيدنا عيسى ئخف نّس ئ ئمحضرن نّس تاما ن لبحر ن طبريّا. ئجرا ؤياد:
2 ئلّا سمعان بطرس، د توما نّا مي تّينين ئشني، د نثنائيل نّا ئݣان زݣ تمدينت ن قانا ن تمازيرت ن لجليل، د واراو ن زبدي سّينa، د سين ياضن زݣ ئمحضرن نّس مݣراون كول نّسن.
3 ئنّاياسن سمعان بطرس: «هايي دّيخ أد صيّدخ ئسلمان»، نّاناس: «أود نوكّني أد ندّو أݣّيدش». داي دّون أها نين يون ؤغرّابو، ئميل ؤر ؤميژن شا ݣ ييض نّا.
4 نتّا ئفّو لحال، ئبدّ سيدنا عيسى خف ئميسّي ن لبحر، ماشان ئمحضرن ؤر سّين ئد سيدنا عيسى أينّا.
5 داي ئنّاياسن: «أييعرّيمن، ئس غورون شا ئسلمان؟» نّاناس: «ئهي، أود يوت».
6 أها ئنّاياسن: «ݣرات تاراتسّا غر تاما تافاسيت ن-ؤغرّابو، تدّام أت تافيم ئسلمان»، داي ݣرينت، أها ؤر غيين أت تين نزغن س تيژيت ن-ئسلمان.
7 داي ئنّا ؤمحضر نّا ئتّيري سيدنا عيسى ئ بطرس: «هاتين مولانا أياد!» غاس ئسلّا سمعان بطرس ئد مولانا أياد، ئلس أعبان نّس أنافلّا، ئدّخ ئكّا ئكّست حما أد ئصيّد، أها ئݣر ئخف نّس ݣ وامان.
8 ئد ئمحضرن ياضن تامّاندّ س-ؤغرّابو، أر نزّغن تاراتسّا ئعمّرن س ن-ئسلمان، ئدّخ ؤر بعيدن شا زݣ واشال غاس س-ام مييّا ميترو.
9 نتّا فّغن س-اشال أنّاين لعافيت ن تيرݣين ئلين ئسلمان غيفس، د-ؤغروم.
10 داي ئنّاياسن سيدنا عيسى: «أوياتيدّ شا ئسلمان زݣ ؤينّا تومژم دغي».
11 أها يالي سمعان بطرس ݣ-ؤغرّابو ئنزغدّ تاراتسّا غر أشال، تعمّر س-ئسلمان ئخاتارن، مييّا د تلاتا ؤخمسين، داي مغار عدّان ئسلمان شايݣان، ؤر تفلي تراتسّا.
12 ئنّاياسن سيدنا عيسى: «أوريو أت تشّيم!» ئمحضرن سّنن ئد مولانا أينّا، ماشان أود يون ؤر ئزعيم أت ت-ئسقسا: «ماي تمسد؟»
13 ئحادزد سيدنا عيسى، ياسي أغروم، ئبضوت ئ ئمحضرن أها ئوشاسن أود ئسلمان.
14 تاد أيد ئݣان لمرت تيسّ شراط نّاݣ ئسّنعت سيدنا عيسى ئخف نّس ئ ئمحضرن نّس ضارت ن مايد دّيكّر زݣ ئنݣرن ن-ئمتّين.
سيدنا عيسى دا ئسّزعيما سمعان بطرس
15 ضارت ن مايد تشّان، ئنّا سيدنا عيسى ئ سمعان بطرس: «أسمعان، أممّيس ن يوحنا، ئس دا ئ تّيريد ؤݣار ن-ؤينّا دا ئ تّيرين ويد؟» ئنّاياس: «يّيه أمولانا، شݣّ تسّند ئس داك تّيريخ»، أها ئنّاياس سيدنا عيسى ألتو: «ئوا حضو ئعلّوشن ئنو».
16 داي ئنّاياس ديخ ألتو لمرّت تيسّ سنات: «أسمعان، أممّيس ن يوحنا، ئس دا ئ تّيريد؟» ئنّاياس: «يّيه أمولانا، تسّند ئس داش تّيريخ»، ئنّاياس سيدنا عيسى: «ئوا رار لبال ئ وولّي نو».
17 داي ئنّاياس لمرّت تيسّ شراطّ: «أسمعان، أممّيس ن يوحنا، ئس دا ئ تّيريد؟» أها ئقّيم لحال ݣ بطرس، ئدّخ أس ئنّا لمرّت تيسّ شراطّ: «ئس دا ئ تّيريد؟» ئنّاياس: «أمولانا، شݣّ تسّند كولشي، تسّند ئس داش تّيريخ»، ئنّاياس سيدنا عيسى: «حضو ؤلّي نو».
18 يّيه، ستيتّ أيداك تّينيخ، لّيݣ تݣيت أعرّيم دا تفكّاسد ئ ئخف نّش، أر تدّوت ماني غر تريد، ماشان أدّاي توسيرد أت تهزّاد ئفاسّن نّك، د يون ياضن أداك ئفكّس، أها ياويك غر ماني غر ؤر تريد».
19 س-ئواليون-اد ئسنعت سيدنا عيسى ماتّا لموت نّا س ئدّا بطرس أد ئݣ لعزّ ئ ربّي. فّير ن ماس ئنّا أوال-اد، ئنّاياس سيدنا عيسى: «تفارييي».
سيدنا عيسى دا ئسّاوال خف ؤمحضر نّا ئتّيري
20 داي ئبرّم بطرس يانّاي أمحضر نّا ئتّيري سيدنا عيسى أر تن ئتتفار، ونّا ئكّان ئحودرن غر سيدنا عيسى ݣ لوقت ن-ئمنسي، أها ئنّاياس: «أسيدي، ماني واد ئدّان أك ئزّنز؟»
21 نتّا يانّايت بطرس، ئنّا ئ سيدنا عيسى: «أمولانا، مايد ئدّان أد-ئجرو ئ واد؟»
22 أها ئنّاس سيدنا عيسى: «مش ريخ أد ئقّيم ئدّر أر دّاغولخ، مايداك ئدّان؟ غاس تفارييي شݣّ!»
23 داي ئساقّا واوال-اد ئنݣر ن ئمومن، ئس ؤر ئدّي ؤمحضر نّا أد ئمّت، ئميل سيدنا عيسى ؤر-أس ئنّي ئس ؤر ئدّي أد ئمّت، ماشان ئنّاياس: «مش ريخ أد ئقّيم ئدّر أر دّاغولخ، مايداك ئدّان؟».
24 أمحضر-اد أيد ئتّشاهادن ئ ئسكّين-اد، أها ياريتن داد، د نوكّني نسّن ئس تݣا شّهاتّ نّس لحقّ.
25 سيدنا عيسى ئݣا شايݣان ن-ئسكّين ياضن، مش تّوارين يوت س يوت، هاتين ؤر عيّينخ ئد أت تيغي دّونيت س-ئخف نّس أت تاوي لشتوب نّا ئدان أت تّوارين.