2
لماجوس ئتكاشافن س-ئتران
1 ألّيݣ ئلولا سيدنا عيسى ݣ تمدينث ن بيت لحم، ئلّان ݣ تمازيرث ن ليهوديّا، ݣ لوقت ن-ؤݣلّيد هيرودس، ئلين دّاند ئتّس ن لمجوس (وينّا دا يتكاشافن س-ئتران) زݣ ؤنقّر ن تافوشت غر تمدينث ن لقدس.
2 أر تّينين: «ماني ݣ تلولا تسلميا، ئݣان أݣلّيد ن ووداين؟ هاثين نانّاي ئثري نّس ݣ تانيلا ن-ؤنقّر ن ثافوشث، أها ندّود أداس نسجد».
3 داي لّيݣ ييوض واوال أݣلّيد هيرودس، ئرعب نتّا د ئمزداغ ن تمدينث ن لقدس كول.
4 ئكّر ئسموند أخثار ن تادّارت ن ربّي د ئكتاتبين ن شّرع ن ووداين كول نّسن د وينّا سّغرانين ميدّن ئسقساتن ئنّاياسن: «ماني ݣ ئدّا أد ئلال لمسيح؟»
5 داي نّاناس: «ݣ ثمدينث ن بيت لحم ئلّان ݣ تمازيرث ن ليهوديّا، ئتخ أياد أيد ئتّيارون س-ؤفوس ن نّبي:
6 أتامدينث ن بيت لحم ئلّان ݣ تمازيرث ن ليهوديّا، شمّينتين ؤر تݣيت تامژّيانت ݣ تمدينين ن تمازيرث ن ليهوديّا، ئدّخ زّيݣم أزݣ ئدّا أد-يفّغ يون ن-ؤخاتار ئكسّان إسرائيل ئݣان لقوم ئنو».
7 أها ئكّر ؤݣلّيد هيرودس ئغرد س توفرا يي لماجوس نّا دا ئتكاشافن س-ئثران، يامژ زّيݣسن صّاحت ن لخبار ميلمي أيد دّيضهر ئثري،
8 أها يازنتن غر تمدينث ن بيت لحم ئنّاياسن: «دّويات قلبات مسقّم خف ؤفروخ، أدّاي تّتافيم، تعلمّييي حما أندّوخ أود نكّين أداس سجدخ».
9 داي ألّيݣ سلّان ئ-وݣلّيد هيرودس ئنّا أياد، دّون، ماشان أليݣ دّان ݣ ؤبريد داي هان ئتري نّا أنّاين ݣ تانيلا ن-ؤنقّر ن تافوشت، ئزوور دات-اسن ألّيݣ ييوض ماني ݣ ئلّا ؤفروخ ئبد أفلّا نّس.
10 ألّيݣ أنّاين ئثري فرحن شيݣان،
11 أها كشمن غر ثادّارث أفين أفروخ د مايس مريم، حودرن سجدناس، رژمن يي لخزين نّسن ؤشيناس توكّيوين ن-وورغ زعما دّهب د لّوبان د لبخور ن لمرّ.
12 داي ئوصّاتن ربّي ݣ يوت ن توارݣيت ؤر تعيادن غر أݣلّيد هيرودس أها كّرن دّون ݣ يون ن-ؤبريد ياضن غر تمازيرت نّسن.
تارولا غر تمازيرت ن مصر.
13 ألّيݣ عايدن ئبردان نّسن، ئضهراسد لملاك ن ربّي يي يوسف ݣ توارݣيت، ئنّاياس: «كّر، أوي تاسلميا د مّا نّس ترولت غر تمازيرث ن مِصْر تقّيمت ديكس، أر-أش ئنيخ ماتّا لوقث أيد تّاغولت، ئدّخ ئعوّل ؤݣلّيد هيرودوس أد ئرزو خف تسلميا حما أتّينغ».
14 داي ئكّر يوسف ياوي تاسلميا د مّا نّس ݣّيض ئدّو غر تمازيرث ن مِصْر.
15 أها ئقّيم ديكس ألّيݣ ئمّوت ؤݣلّيد هيرودوس، حما أد ئجرو أينّا ئنّا ربّي س-ؤقمو ن نّبي ئنّان: «غريخدّ زݣ تمازيرث ن مصر يي ممّي».
منغيوت ن-ئشيرّان ن تمدينث ن بيت لحم
16 داي ألّيݣ يانّاي ؤݣلّيد هيرودوس ئس غيفس لعبن لماجوس، ثطايراس شيݣان أها يازن ئنغ ئشيرّان ئوثمان لّانين كول ݣ تمدينث ن بيت لحم د تمناضين نّس، زݣ ممّيس ن سين ن-ئسݣّاسن د دّاواسن، خف لحساب ن-ؤينّا س نّان لماجوس.
17 داي ئجرو ݣ لوقت نّا أينّا ئنّا نّبي إِرْمِيَا ئنّان:
18 «سلّين يي وݣجدور د ئمطّاون د شيݣان ن-ئغويّان ݣ ئغرم ن رّاما، راحيل داترو خف وارّاو نّس، ماشان ؤر تري أد تّوسعونّا، ئدّخ ؤر قّيمين ݣ دّونيت».
يوسف دا دّيتاغول غر تمدينث ن نّاصيرا.
19 ألّيݣ ئمّوت ؤݣلّيد هيرودس، أها ئضهراسد لْمَلاَك ن ربّي يي يوسف ݣ يوت ن توارݣيت ݣ تمازيرث ن مصر.
20 ئنّاياس: «كّر، أوِي أربا د مّا نّس تدّوت غر تمازيرث ن-إسرائيل، ئدّخ مّوتن وينّا رانين أد نغين أربا».
21 ئكّر ياوي أربا د مّا نّس أغولن غر تمازيرث ن-إسرائيل.
22 ماشان أليݣ ئسّن ئس ئݣا أرخيلاوس أݣلّيد خف تمازيرث ن ليهوديّا ݣ-ؤدغار ن-ئبّاس هيرودس، ئݣّد أد ياغول غر دينّا. أها ئعلماس ربّي ݣ يوت ن توارݣيت، ئدّو غر تمازيرث ن لجليل.
23 داي ئدّو ئزدغ ݣ يوت ن تمدينث داس تّينين نَّاصِرَا حما أد ئجرو ؤينّا نّان لانبيّا: «أداس قّارن أناصيري».